رواية أميرة قلبي الحلقة الثامنه - زهور جمال الدين

وصلت اميرة للفرع الثانى فالشركة .. اتفاجئت بوجود بوها .. وتفاجئت اكثر لما قاللها انه بدى يشتغل معاهم .. هيا مش فاهمه قصه شغل بوها..لكن توة مش وقته خلى تشوف فارس وعمايله معاها قبل

اميرة وفارس مشو للاسانسير ركبو فيه الزوز ... فارس يشبحلها حاير خيرها وهيا ماتبيش تقيم راسها ولاتشبحله

وصلو للدور الثانى طلعو من الاسانسير ومشو لى مكتب فارس ...

فارس ساكت يراجى فيها شن عندها وشن جايه بتقول..

خش فارس للمكتب / تفضلى

اميرة شادة شنطتها وخشت بهدوء

فارس وقف فالباب / يا يونس

طلع شخص من باب جانبى/ نعم استاد فارس

-فارس/ ترا مدلى طاسه اميه

-يونس/ حاضر

خش شوية وجاب طاسة اميه مصكرة ومدها لى فارس

خش فارس لى مكتبه وهوا يحول فالغطاء اللى لاصق عالطاسه من فوق ومدها لى اميرة / اشربي

-اميرة مابتش تاخدها تتكلم وعيونها معبيات دموع ومنغير ماتشبحله/ مانبيش

-فارس قاعد ماد يده ويشبحلها / خودى

خدت الطاسه وحطتها عالطاولة

-فارس/ قلتلك اشربي

خدت اميرة الطاسه وشربت شربه وردتها عالطاولة .. وقعدت ساكته ...

-فارس/ لا حول ولا قوة الا بالله ....خيرك ان شاءالله خير

-شبحتله وخشمها احمر وعيونها دموع/ على قد ما ادمر فيا بكلامك ومضايقنى عمرى ما ضريتك ولا دوستلك على طرف

-فارس/ خشى فالموضوع طول .. شن اللى مضايقك

-اميرة / انت

-فارس/ انا سيبتلك المكان كله وطلعت بيش معش نضايقك

المفروض عائشه هيا اللى كانت بتجى هنايا لكن غيرنا الادوار وجيت انا ....

تشبحله وساكته ....

-فارس/ طلعت لانى عارف روحى محروق ومش حنقدر نسكت .... فضلت انى نخليك براحتك .. وبعد هدا كله نلقاك جايه وتبكى وتقولى انى السبب فى زعلك .... ليش؟

-اميرة/كل شى الا السمعه ... شن تقول عليا لصحابك

-فارس مستغرب/ منو صحابي؟؟.. انا عمرى ماجبت سيرتك لى حد .. ولو جبت سيرتك قدام اى حد مش حيكون الا كونك موظفه فالشركة .. اما اللى بينى وبينك

حط يده على صدره/ مات هنايا

طلعت كلينكس من شنطتها مسحت عيونها طول نزلو الدموع وقعدت تجفف فيهم

-وقفت / الباين انى تسرعت وشكلى فاهمه غلط..خلى نمشى توة نبيش نعطلك

-فارس وقف تعصب/ احكيلى شن صاير ..ماتعطينيش كلمات

متقاطعه وتطلعى وتخلينى .. انا مش طرطور

-اميرة / حاشاك .. لكن بجديات منبيش نوجعلك راسك بمواضيع تافهه

-فارس/ ياستى انا نبى نوجع راسى .. فهمينى شنو اللى سمعتيه وداير فيك هكى..

حط يده على كتفها / قعمزى

وقعمز فالكرسى اللى جنبها

_______________________________________

_

فى حوش نهلة

-فدوى حطت فنجان القهوة/ خسارة والله .. تمنيتهم يكونو عدايل .. ربي يهديه فارس

-نهلة ترضع فى ولدها بالمرضعه/ احنا عرضنا عليه الفكرة وهوا على راحته ... ومرات يرجع بعد وقت ويقول عجبنى الموضوع وحتى انا نبى

-فدوى / لكن انا سمعت موضوع ...ومش عارفه هل هوا مزبوط ولا غير اشاعه

-نهلة / موضوع شنو

-فدوى/ ياوخيتى قالو سارة دايرة علاقه مع طالب عندها

-نهلة شهقت / ااه..فرخ صغير... ياودى مستحيل سارة عاقله وماديرش هالفعل

-فدوى/ الله اعلم بس قالو حكايتهم منتشرة فالجامعه

-نهلة / قصدك عندها بيه علاقه غير اخلاقيه ولا كيف .. لان مستحيلة ادير من طالب عندها راس مال وتنوى تتزوجه وتفتح معاه عيلة

-فدوى / الله اعلم منحطش فى رقبتى .. لكن الولد شاكرينه هلبا ...قالو ولد عيلة وحالتهم باهيه .. ويحكو عليه الاول على دفعته

-نهلة/ معناها الولد كويس وخلوق

-فدوى / قالو

-نهلة /ياغبيه وكيف تسمعى عليها حكاية زى هادى وتعرضى موضوعها على فارس ..

-فدوى/ امبارح بس سمعتها الحكايه .. جتنى دلال حماتى وحكيتلها على ملاك ..شوى قالتلى اختها سارة عندها حكايه فى الجامعه

-نهلة/ وقلتيلها انك كنت ناويه تقولى عليها لى فارس ولد خالتى

-فدوى/ لا لا ماقلتلهاش طبعا

-نهلة / ايووووه .. مدامه هكى مفيش داعى نقولوله بكل

-فدوى/ لا لا تم الموضوع

-نهلة/ وخوك شن قالك ..عجباته ملاك ولا شنو

-فدوى/ كلمنى من الصبح وقالى الامور طيبه وحددو مع الناس موعد العرس بعد اسبوعين طول

-نهلة/ هكى بكرى بكرى ..بالك البنت متلحقش توتى روحها

-فدوى/ شوره عنده سفرة ويبي يرفعها معاه .. وبعدين العرس توة كله حجوزاتك وتقدر اديرهم فى يومين

-نهلة/ ان شاءالله خير

-فدوى/ ان شاء الله

__________________________________________

_

فى مكتب فارس

اميرة وفارس مقعمزين جنب بعض ... ومتلفتين لى بعض

-اميرة تمسح فدموعها/ انا والله مانقدر نضر اى شخص فالدنيا .. ديما على حالى .. لكن سبحان الله الدنيا هادى معش فيها حاجه تفرح

-فارس بهدوء / معش تلفى وادورى .. احكيلى شنو اللى واجعك منى وانا نفهمك لو قلته ولا لا

-اميرة / لا خلاص انساه الموضوع

-فارس/ كيف ننساه وانتى تقوليلى صحابك ما صحابك .. شنو المعلومه الغلط اللى واصلتلك بيش انا نوضحها

-اميرة تحشمت / خلاص انا فوته الموضوع

-فارس/ ياودى ماضنى تفوتيه الموضوع.. جايه مشحونه ووجهك احمر وحالتك حالة..شنو اللى بى بيخليك تفوتيه

-اميرة /والله الموضوع فوته .. لانك امتصيت غضبى

..وخليتنى نهدا من توترى

-فارس يشبحلها برومنسيه/ضرورى بمنتص غضبك ونخليك ترةقى ... مانتحملش نشوف حد مزعلك

-قامت عيونها شبحتله /متاكد

-فارس مبتسم/ طبعا متاكد..قصدك لانى نزعل فيك .. لعلمك انا نزعلك عادى..لانك عارفه كلامى مش طالع من قلبي .. لكن حد ثانى يزعلك لا ...مانرضهاش

-اميرة خافت من نضرة عيونه الرومنسيه شدت شنطتها بايديها الزوز / خلى نمشى نولى للمكتب توة خيرلى

-فارس / مش حتطلعى لين تقوليلى عالموضوع اللى جيتى بيه شنهوا

-اميرة / نخاف تتعصب ولا اتكلم صاحبك و اتفضح بيا

-فارس/ مستحيل..تعرفينى نوعى هادى وردات فعلى عاديه

-اميرة بكل شجاعه وفى جملة وحدة / البوكس اللى فيه الفلوس وصلنى كهديه

-فارس وجه ولى احمر/ خيره

-اميرة / كانت الهدية من انيس صاحبك

وقف فارس متفاجا/ ااه..انيس..

وقعمز يشبحلها / وانيس شن موصله ليك كيف.. وليش خطر عليه يهديلك ويودك

-اميرة بدت ترعش/ غير اهدى وبالشوى بيش نفهمك

ياخد تحفه من على الطاولة اللى بين الكراسى ويضربها تنحدف عالارض تتكصر/ ماليكش علاقه بهدوئى.. فهمينى ليش خطرتى عليه

-اميرة انخلعت / بالشوى .. مش توة قلت نوعك هادى

-فارس عيونه حمر/فهمينى ليش يبعتلك فلوس .. انا مش قلتله البنت هادى ماتقربهاش

-اميرة / وين نعلم عليه ليش يهدى فيا .. ولما قلتله انت جيت للبنت الغلط ومش نوعى ..قالى صدق فارس فاللى قاله عليك .. انا هادى اللى وجعتنى ..انت شن مقايل عليا يا فارس وشن مفتفت قدامه ... بالك شارب وطلعت منك كلمه هكى ولا هكى

-فارس قرب منها وانتبه لكلامها/ وانتى من قالك انى نشرب

-اميرة تلخبطت / انا قلت بااللك .. انا وين نعلم عليك

فارس يشبحلها / امتى جاك .. ووين كلمتيه ..وكيف عرفتى ان هوا اللى بعت الهديه

-اميرة / بالشوى عليا خيرك ..جانى للمكتب اليوم .. وهوا اللى قالى انه بعت الهديه

-فارس/ ومنين عرف عنوان حوشكم

-اميرة / اكيدة من ملفى فالشركه ...

وقفت وتلفتتله/ خيرك تعيط ... يعنى جايه وبنلوم عليك اديرلى تحقيق

-فارس/ الوسخ اللى اسمه انيس معش ليك علاقه بيه.. انتى فاهمه ...

-اميرة زى اللى فرحانه بحرق دمه / باهى حاضر غير بالشوى

-فارس/ مش غير هوا بس .. حتى مروان وطلال واى عامل فالشركة مانلقاكش واقفه على واحد منهم

-اميرة / حاضر

-فارس/ الراجل هدا فاسد .. يصطاد وخلاص ..مانبيكش تتواصلى معاه ولو كلمك مرة ثانيه اتصلى بيا.. هاتى فلوسه تو نعطيهمله انا

-اميرة / فلوسه!!؟؟ فلوس شنو اللى تحكى عليهم ..انا الهدية رديتها فى نفس اليوم مقبلتهاش

-فارس اتفاجأ/ وخيرك ماقلتيليش

-اميرة / وانا وين منلقاك بيش نقولك

-فارس/ رقمى عندك ... المفروض فهمتينى

-اميرة / وكيف بنفهمك وانت لقاءاتك معاى كلها اتهامات وكلام مسموم

-فارس/ ليش ماتبيش تعترفيلى

-اميرة / بيش بنعترفلك

-فارس/ انك انتى اللى كنتى معاى يومتها

-اميرة / انا عمرى ماشفتك

-فارس عنده نيه مسك يديها الزوز ومقدرش/ اميرة .. انا نبى نبدا معاك صفحة جديدة .. ليش ماتبيش تفتحيلى قلبك

-اميرة / نفتحلك قلبي ونقولك انا بنت ليل .. وين الصفحة الجديدة اللى بنفتحوها بعدها

-فارس/ سرك انكشف خلاص وامك قالتلى انكم كنتو فى مصر وقتها

-اميرة/ كونا فى مصر هدا مايعنيش انى ضرورى نكون شفتك او تعرفت عليك فيها او نكون نفس البنت اللى حضرتك ادور عليها

-فارس/ وليش نكرتى انك كنتى مسافرة غادى وقتها

-اميرة / لانك تحكى فى موضوع اخلاقى .. بالضرورة بننكر انى كنت متواجدة غادى وقت صارلك

-فارس/ يعنى مصرة اننا مانفتحوش صفحة جديدة

-اميرة / قصدى انت ليبي ولا من ملة ثانيه .. صفحة شنو بتفتحهالى بعد نقولك انى بنت ليل

-فارس/ الكلمه هادى معش تدكريها على لسانك

-اميرة صوتها انغص وقفت/ الكلمه هادى انت اللى تدكر فيها كل ماتشوفنى ..

-فارس وقف/ انا نقولها عادى .. لكن انتى لا

-اميرة / هيا هيا نفس الشى

-فارس/ انا حتى نقول فيها من غيظى ...لكنى متاكد من اخلاقك ومن انك بنت عيلة

-اميرة / هه بعد شنو ..

وخدت شنطتها ومشت للباب بتطلع

-فارس/ انا بننقلك معاى هنايا .. لانى بالفعل نبى نفتح معاك صفحة جديد

ماردتش عليه وطلعت وخلاته .... نزلت للاسانسير مشت لى بوها .. وفهمت منه ان فارس يومتها لقاه تحت فالشركة وقنعه يشتغل معاهم ويفوت المركب اللى غرق وهالدوة الفاضيه كلها .. ومشى معاه للمحل ودارو تخليص باقى فلوس المركب على اقساط ... المهم مشكلة بوها انحلت وبدى موظف فى قسم المشتريات

__________________________________________

_

فالليل الساعه 11....

اميرة متكيه مكانها ... كملت قراءة قران وناضت حطاته مكانه .. ومشت لى دار امها اطمنت عليها انها راقدة .. وولت لى دارها ...

لقت تليفونها يشرين .. مشت للتليفون شافاته ..زبطت اخر رقمين انه رقم فارس....

ردت بدون تردد/ الو

-فارس/ مساء الخير

-اميرة / مساء النور

-فارس/ احمم.. ان شاءالله مش رقدتى

-اميرة بهدوء/ لا قاعدة فايقه

-فارس/ كيف حال عمتى جميلة

-اميرة / الحمدلله كويسه

-فارس/ زعما مازالت عازمتنى على فنجان قهوة ولا فاتتنى

-اميرة/قصدك امى عازماتك

-فارس/ من زمان

-اميرة / اهاا

-فارس/ بوى قريب بيروح... وقلت نشاورك قبل مانكلمه

-اميرة / وعلى شنو بتشاورنى

-فارس/ نبى نحولك معاى للفرع

-اميرة / قصدك سكرتيرة .. هادى مش خدمتى راهو

-فارس/ اكيدة مش سكرتيرة .. بنحولك مديرة مكتبى .. يعنى زى وضع تغريد وعائشة فالشركة

-اميرة / كانا زى عائشه عادى

-فارس/ ويعنى انا معقولة بننقلك عندى فى شغلة اى كلام

-اميرة / تمام متفقين

-فارس/ غدوة ماتمشيش للشركة غادى .. تعالى هنايا طول

-اميرة / عندى اوراق نبى نسلمهم وملفات وحاجات .. لازم نمشى غادى

-فارس/ انيس ماليكش علاقه بيه لا تكلميه ولا تردى عليه ..اهو قلتلك

-اميرة / لااا ... مستحيل

-فارس/ نبدو صفحة جديدة

اميرة قعدت ساكته لانها عارفه روحها تكدب

-فارس يهمس/ ماجاوبتينيش ... نبدو ولا شنو

-اميرة ضحكت / تمام ... نبدو

-فارس/ خلاص نراجى فيك غدوة

-اميرة / باهى غير اسأل بوك

-فارس/ قرارى انا مايناقش فيه حد .. غدوة كملى تسليم امورك وتعالى لى شغلك

-اميرة مبتسمه/ حاضر

وصكرو الخط وهيا فرحانه انها بتنتقل معاه .... مشت للشكماجه اللى فى دارها ...تشبح لى روحها فالمرايه وهيا سعيدة / وووه يا اميرة ..الفرحة باينه فعيونك .. زعما غدوة شن منلبس ...لازم نلبس احلى لبسه عندى .. لازم نبدا نشري فى مكياج ماركة بيش مايبداش وجهى زى الشلافطيه ...

قعمزت فالسرير وتدكر فى صوته فى ودنها والسعادة كبيرة فى نفسها

____________________________________________

_

ثانى يوم الصبح مشت اميرة للشركة لقت البنات عندهم خبر بي تحويلتها ...استلمو منها الملفات وسلمو عليها وتوجهت لى الفرع اللى فيه فارس .. اول ماخشت دورت على بوها قبل .. سلمت عليه وخبراته انها انتقلت لنفس الفرع بتشتغل فيه

وركبت بالاسانسير فوق ... لقت ثلاث بنات وشاب مقعمزين فى نفس الغرفه كل حد منهم على مكتب

-اميرة / صباح الخير

-الشاب والبنات / صباح النور

وقف فارس وراها / صباح الخير

تلفتتله اميرة وعيونها يضحكو/ صباح النور

-فارس/ تعالى نوريك مكتبك

مشى ومشت وراه فالممر ... مكتبه هوا عاليسار .. ومقابله باب مصكر .. فتحه فارس وخش واميرة وراه ...

فارس/ هدا حيكون مكتبك

-اميرة سعيدة / انشاءالله

-فارس/ خدمات مكتبى عند السكرتاريه .. بس انتى شغلك كله فالوارد والصادر.. يعنى كل الملفات المهمه تحت يدك انتى

-اميرة / تمام

-فارس/ تحتك خمس موضفين .. اربع شباب وبنت

-اميرة / تمام

-فارس/ يالله ورينا شطارتك

-اميرة / بادن الله مش حنخدلك

-فارس يشبحلها / عارف

خش مروان / اهلين استادة اميرة

فارس يشبح للسقف/ ياوالله ليله بيضا

-اميرة تضحك / اهلين استاد مروان

-مروان / ليك وحشات

-اميرة / شكرا

-فارس/ اميرة عندها شغل توة .. هيا يا مروان

طلع مروان قدام فارس وهوا عنده نيه فالهدرزة ..

فارس خدى معاه الباب وتلفتلها / الهى بشغلك وفوتى الهدرزة الزايدة

بعد ماطلع فارس اميرة قعدت تضحك بروحها فرحانه بي غيرة فارس الواضحة..اللى مايحاولش حتى انه يخبيها

__________________________________________

_

وفات اسبوع

فارس كل مشاعره متحركة مع اميرة... شبه قاعدين مع بعضهم وقت الشغل كله .. يا هوا فى مكتبها يا اما هيا فى مكتبه.. مروان دارله نقل للشركة الاصليه

يوم الخميس اميرة تأخرت عن العمل .. للساعه 9 ونص وهيا ماوصلتش .. اتصل فارس بتليفونها لقاه مقفل ..

حس انه مخنوق .. يبي يوصلها بأى طريقه.. يفهم خيرها .. حس انه صبح متعلق بيها وبدى يصارح فى نفسه انه يشعر بالحب من ناحيتها ...

واقف على شباك مكتبه ويتفرج عالطريق ويخمم/ قداش مرة بنغلط واناديها حبيبتى ..معش متحمل فراقها .. نحبها

..ايه نحبها ...من ايامات مصر...

انتبه لنفسه/ مصر!!... وشنو اللى مخليك متاكد ان الوضع اللى ريتها فيه مش خدمتها ... البنت نكرت انها تكون نفس البنت اللى يومها .. لكن انت متاكد انها هيا نفسها ...اعود بالله منك يا شيطان لما تبى توسوس ..

يتخايل فى صورتها عالمرش متع الشباك ...

مد يده/ نحبك ...

يتخايل فيها تبتسم / خاطرى اناديك حبيبتى

شرين تليفونه فيقه من سرحانه ... شاف لقاه رقم اميرة

-رد عليها طول / وينك .. وخيره تليفونك مقفل

-اميرة / امس طول اليوم الضى هارب مالقيتش كيف نشحن تليفونى ..يادوبك توة شحن شوى وكلمتك

-فارس/ باهى وينك توة خيرك ماجيتيش العمل

-اميرة / اختى مروة مريضه فالعيادة حالة اجهاض.. رفعت امى ومشيتلها ...قلت نستادن منك

-فارس/ بالك مستحقين حاجه ...تبى نجيك

-اميرة / لااا راجلها هنايا وعزوزتها وحوسة .. مفيش داعى اتعب روحك

-فارس/ انتى تعرفى ان تعبك راحة

-اميرة / المهم انى مانقدرش نجى

-فارس/ وانا مانقدرش منشوفكش

اميرة سكتت وهيا فرحانه بكلامه

-فارس/ نشوفك العشيه

-اميرة بهدوء/ وين بتشوفنى .. صعب نطلع

-فارس/ اى كافيه.. عادى اهو البنات كلهم يطلعو

اميرة سكتت

-فارس/ شنو

-اميرة / والله مانقدر

-فارس تنهد / حتى انا والله مانقدر

-اميرة / الاحد مش بعيد ...

-فارس/ بنجيكم للحوش الليله

-اميرة / شنو تحسابنا توانسه ولا اتراك ... امى لو تقوللها بنجى احتمال يركبها السكر تحسابك ترا شن جاى تحرش فيها عالعمل

-فارس يضحك / اميرة بلاش جو زايد.. انا وامك احباب ومن زمان عازمتنى على قهوة

-اميرة / وتحساب كانك لبيت الدعوة وجيت بتشرب القهوة بتخلينى امى نقعمز معاكم ...انت تحلم

-فارس/ اووووف/ باهى كيف يصير

-اميرة تضحك / ماعندكش حل الا تراجى للاحد

-فارس/ امرى لله

-اميرة / والنعم بالله

__________________________________________

_

نهايه ثانى اسبوع عرس طلال

عفاف سافرت برة ليبيا..... ماتبيش تحضر عرسه ..لانها عارفه ان راجلها بيقوللها بري معاى عرس صاحبي ...

ياحنه طلال داير عرس قوى .. صالة للدخول وصالة للمحضر وزمزامات .. المهم خواته قايمات القدر ...

طبعا اميرة حضرت الحفلة لان ملاك تقربلها من ناحيه امها

...و هلبا موظفات غيرها حضرو الحفله..

فالصالة اميرة وامها وخواتها مقعمزات على نفس الطاولة .. بدى تليفونها يشرين .. شافت لقاته فارس يتصل .. فتحت الخط

-فارس/ الو

-اميرة / الووو

-فارس/ الو منسمعش فيك دوشه جنبك

-اميرة / حتى انا مانسمعش فيك كويس

-فارس/ اطلعى من جنب الزحمه وكلمينى

-اميرة / حاضر

صكرت الخط ووقفت حطت تليفونها فى شنطتها وتلفتت بتمشى

-جميلة / وين ماشيه

-اميرة / شووويا بس نساوى شعرى

تلفتت بتمشى .. لابسه قفطان بترولى شيفون .. قصير من قدام ومن الخلف طويل وفيه ديل ... معاه كعب وشنطه ومكياج سمبل ...

طلعت للممرات الخارجيه... قعمزت عالصالون وطلعت تليفونها واتصلت بي فارس ...

-اميرة / ايوووة

-فارس/ يا اهلين

-اميرة مبتسمه / اهلا بيك ..

-فارس/ شنو الحفله حلوة

-اميرة / كل شى مرتب .. والتقديم راقى

-فارس/ حتى طلال عاطيهم مبلغ مليح

-اميرة / نحس ان الدوق ماليشى علاقه بالفلوس .. وملاك ماشاءالله اصل الدوق

-فارس/ شوفى سبحان الله ملاك بنت خالتك وطلال ولد خالتى

اميرة ضحكت من كلامه وسكتو الزوز

-فارس/ خيرك تضحكى .. بديت نخرط صح ولا

-اميرة / لا مابديتش.. انت من زمان هكى

-فارس يضحك / ربي يهنيهم .. طلال يستاهل كل خير

-اميرة / حتى ملاك تستاهل كل خير

-فارس/ توة شن منقولك .. نسيتينى حتى علاش متصل

-اميرة مبتسمه / سمى باسم الله تو تدكر

-فارس/ بسم الله العظيم.. اكيدة شويا وندكر.. قتلك شن لبستى

-اميرة / هدا علاش متصل

-فارس/ لا ..هدا سؤال عالسريع مابين ادكرت موضوعى

-اميرة / لبست قفطان سواريه

-فارس/ شن لونه

-اميرة / تركواز

-فارس/ باهى ورينى فالفايبر

-اميرة / اخس.. تبينى نبعتلك صورتى وانا بلا حجاب

-فارس يضحك/ والله نمسحها طول

-اميرة/ لا لا فكنى... وبعدين بتشوفنى بالمكياج ينوضو عليك مواجعك وتقولى انتى نفس هاديكة البنت متع مصر وانا ماصدقت هالسبوعين نسيتلى الموضوع

-فارس يضحك/ هاهاها على من تخطر...

-اميرة / وتقعد تقولى اهو تشري وتصرفى فى فلوسى اللى خنبتيهم

-فارس/ نموت ونعرف فيش صرفتى هاداكة المبلغ كله

-اميرة / هاا شفت

-فارس يضحك/ نبصر ..نبصر

-اميرة / والله نزعل منك

-فارس/ كل شى الا زعلك ...اوراق مكتبى كلهم عندك وتودرينى

-اميرة / ايووه كويس انك فاهم ... روحك فى ايدى ماتلعبش معاى نودرلك مكتبك 😁

-فارس/ من ناحية روحى معاك .. فهدا شى صدقتى فيه

-اميرة حست ان الكلام بيطور/ باهى توة خلى نمشى امى تقريبا تنادى

-فارس/ غير اصبري نقولك علاش كلمتك

-اميرة/ ليش

-فارس/ اولا نبى نسمع صوتك .. ثانيا نبى نقولك امى لداخل تعرفى عليها

-اميرة/ قصدك امك جت للحفله

-فارس/ امى تعرف اخت العروسه وعزمتها للحفله ...مشت هيا وخواتى

-اميرة / حاضر.. انشاءالله غير نزبطها وتو نسلم عليها .. واحنا قداش عندنا حاج احمد

-فارس/ باهى سلميلى على امك

-اميرة تشبح فى اختها جايه / باى توة

وصكرت الخط .. وخشت للصالة .. ومامشتش لى مرت عمك حمد وسلمت ولا دورت عليها .. مش عارفه نفسها علاش حست ان غلط منها تمشى هيا اتعرف بي نفسها وتسلم

الحفلة جت واااو .. والعروسه طلعت تحفه .. وفى نهايه الخفله جى طلال وخش هوا وياها .. وتمت الحفله وروح طلال بي ملاك لى حوشه

-طلال/ نورتى حوشك يا عروس

-ملاك منزله الطرحه/ الله ينور عليك

.

.

وثانى يوم دارو محضر ... وموضفات الشركة كلهم زى الدبان على عمتك مفيدة وبناتها .. ماعدا اميرة بردو مامشتلهاش بالرغم شافتها من بعيد

وثالث يوم سافر طلال وملاك لى تركيا .....

وفى حوش عمك حمد ...

-اشرف/ ياام شفتى سارة فالحفلة والمحضر

-مفيدة / شفتها وقنينه ومحترمه ... لكن مش من ثوبك

-اشرف/ 🙄😣

_________________________________________

_

يوم الاحد ...

تلاقو فارس واميرة ... قعدو يحكو عالعرس وعلى بعض المواقف المضحكه اللى صارت ...

فارس خاطره يعبرلها عن مشاعره .. لكن فى حاجه تشد فيه ممكن انه يراجى فيها تعترفله بانها نفس البنت وتحكيله وين حطت الفلوس ومقرر انه يسامحها ..بس يراجى فى مبادرة منها

الساعه 10 ونص

جايتهم بضاعه واصلة من مصر .. والمخازن الكبيرة متع التخزين دايرينها فى نفس الفرع اللى هما فيه... وبما ان فارس هوا المسؤل عن استلام بضاعه مصر من زمان .. نزل تحت للمخازن بيش يستقل السيارات الكبيرة

وصلو 15 سيارة .... بدو يدرسو جنب بعضهم .. وعمك المهدى وثلاث انفار ثانيين جايبيين عمال بيش اينزلو البضاعه ويخزنوها .. فارس محول جاكيته وصافن كمامه ويفهم فالعمال عن طريقه تنزيل الكراتين وكيفيه وضعها عالارض ...

تلفت فوق لقى اميرة واقفه فالروشن من ورا المرش وتشبحله.. شبحله وضحك .. وخرت لتالى ..

اتصل بيها ... ضبح وردت

اميرة / الوو

-فارس يضحك / شن رايك ننفع عامل ولا

-اميرة / لااا حاشاك .. مدير ومايلبقلك الا تكون مدير

-فارس يشبح فوق/ ارجعى للشباك خيرك وخرتى

-اميرة / بوى واقف لوطا تحشمت

-فارس/ امممم صار خفتى من بوك

-اميرة / فالاخير ماهو الا بوى

-فارس/ باهى شوى وتو نركب هى

-اميرة / تمام

صكر فارس تليفونه وحطه فى جيبه ومشى جهه السيارات

يسمع فى المهدى ينادى/ جيب الفطور للسواقين يا سالم

-سالم / واتى اهو بنجيبه هى

-فارس مشى للمدى/ منو مسؤل عليهم السواقين ياعم مهدى

-مهدى / خلى نشوفهم ونجيبهولك ونجى

-فارس/ باهى خلى يفطرو قبل وبعتالى جيبهولى

-مهدى ماشى/ اهو وصلتلهم انا ننشدهم بس

ومشى المهدى للمصاروة اللى كانو يسوقو فى الشاحنات اللى يغسل فى وجهه واللى محول كندرته يغسل فى رجليه

المهم سلم عليهم المهدى وعرف بي نفسه..وسألهم عالشخص

المسؤل على سلامه وصول الشاحنات ..دلوه على واحد واقف بعيد ويصلى ...

قعد يراجى لين كمل صلاته وجاه تكلم معاه شوى ورفعه لى فارس ...

فارس يسلم عليه / اهلا بيك

-مهدى/ الراجل هدا يقولوله عم فرغلى .. وهوا اللى مسؤل على سلامه وصول الشاحنات

-فارس لابس نضاراته وصافن كمامه/ اهلا بيك

-فرغلى/ اتشرفنا يابنى

فرغلى 😳😳😳😳😳😳....

_________________________________________

تمت ... ويتبع