رواية أميرة قلبي الحلقة السابعه - زهور جمال الدين
![]() |
رواية أميرة قلبي الحلقة السابعه - زهور جمال الدين |
لقراءة رواية أميرة قلبي كاملة للكاتبة زهور جمال الدين : اضغط هنا
رواية أميرة قلبي الحلقة السابعه 7 كاملة مكتوبة
بقلم زهور جمال الدين(7)
_
فارس سأل عمتك جميلة على سفرة مصر ...واكدتله انها مشت مع بنتها اميرةة.. نفس الفترة المتواجد فيها هوا غادى .. خلاص معش فى مجال للشك ...فارس تأكد بنسبه 100%انها نفس البنت متع يومها
ومشى على اميرة وعلى فارس يوم زى النهار لاحرف
فارس بعد طلع من عندهم مشى طول للجامع ..حضر خطبه صلاة الجمعه وصلى وروح للحوش .. طلال يتصل بيه .. وهوا مش خاطره لا يتكلم ولا يرد ولايشوف حد اصلا ... ركب لى داره طول ...
بعتوله ينزل للغداء لكنه رفض وفضل انه يرقد ..قاللهم تو نتغدا بعدين ....
حول الزبون ولبس سروال توتا ..خدى التيشرت بيلبسه وبعدين ماصارلاش لوحه عالكرسى ..حس انه مخنوق
.يخمم وفى عقله صراع .. مزال يتناها تطلع مش هيا .. يفكر زعما هيا لا مش هيا .. حتى بعد العزوز قالتله انهم مشو لى مصر ...قاعد عنده شكيه فى نفسهةويبي يعطيها العدر .. بالك يكون غالط
وقف عالمرايا يكلم فى نفسه/ انت حمااار... ماتفهمش ... المراة قالتلك شهر واحد انا وبنتى فى مصر.. وانت القصه صارت معاك يوم 3 يناير..يعنى نفس الشهر .. انت شفت شكلها وحركاتها ومتاكد مالاول انها هيا ..... ايه هيا نفس البنت ... علاش تضحك على روحك يامضحكه ..
ورجع لسريره ...قام الغطا ..رقد عالمخدة .. حط ايده ورا راسه وافكار ترفعه وافكار تجيبه/ البنات اللى تجيهم مبالغ زى اللى المبلغ اللى شفته بكرى جايها فالبوكس معروفات شن يشتغلو..
تلفت للجهه الثانيه/ لا عادى...مرات مثلا انا يخطرلى نهديلها فلوس نبعتهملها بالتوصيل والشركة تزينهم ...يعنى مش قصه
حول المخدة من تحت راسه وحطها على وجهه/والله ماريت انسان غبي زيك ..... تى فوتها ياراجل...هادى بنت واخدة راحتها وماحاسبه حد .. ومشكلة البنت كانا بدت كلبة فلوس كل شى اديره ..
ولى عليه قلبه / لكن اميرة واضح عليها مش هكى ..
ضحك/ امالا اللى شفتها بعينك منهيا ...انت موضوعك معاها تم قبل لا يبدا ...
انتبه/ لكن فلوسى والله مانى مسيبهم ..حتى كانهم زايدات عليا نبيهم .. المهم هيا ماتتهناش بيهم
اما اميرة ..
صار فيها وهيا فى دارها تخمم/ انا ماعليا بموضوع مصر
...لكن زعما شن بيقول عليا توة بعد شاف بوكس الشياطين هدا والهديه ..الله لا تربحك يا مجهول .. انت شكون بس والله كان نعرفك مافاكك منى واحد لين نخنقك ونطلع منك الروح .. الله لا تسامحك
وثانى يوم السبت قعدو الزوز فى نفس الالم .. نفس التخميم ... وقصه فالدماغ ترفع قصه تجيب .....
يوم الاحد ....
فارس متوقع ان اميرة سيبت المكان بعد مانفضحت قدامه ..........
خش للدور الخامس فتح مكتب تغريد يلاقى اميرة مقعمزة فى مكتبها ..... قامت عيونها ونزلتهم طول لما لقاته يشبحلها
نسى حتى انه يصبح عالبنات .... صكر الباب وطلع مشى لى مكتبه ....
بعد خمسه دقايق
فتح الشاب الباب/ اختى اميرة
-قامت اميرة راسها/ ايوة
-الشاب/ طالبك الاستاد فارس ع مكتبه
-اميرة تبلع فى ريقتها/ حاضر
حطت الاوراق اللى كانت تشتغل فيهم عالمكتب .. وقفت ساوت دجاكتها وطلعت من المكتب رجل لتالى ورجل لقدام
خايفه منه .. وقفت قدام مكتب فارس طقت عالباب وخشت
__________________________ __________________
_
فدوى تكلم فى نهلة اختها بالتليفون
-نهلةة/ هدا الخبر اللى يفرح .. شن اتفقتى معاه
-فدوى/ اتفقنا نمشو الساعه 4 .. جهزى نفسك بيش تمشى معانا حتى انتى
-نهلة / باهى كلمتى الناس
-فدوى / كلمت هويدا قلتلها منجى انا وخوى بيشبح ملاك وع اساس بتنسق هيا مع خوتها
-نهلة/ وامتى بترد عليك
-فدوى/ قالتلى قبل الضهر بترد عليا ..
-نهلة / معقولة بترد عليك فى نفس اليوم بتقولك تعالو ولا لا .. مفروض الموعد ثابت قبلها بي ثلاثه ايام
-فدوى/ ياودى غير خوك ارطاب ووافق يمشيلهم ...عادى خلى ترد عليا امتى مايعجبها
-نهلة/ ربي يزيده مالهدايه وتكون البنت من نصيبه
-فدوى / قالى الاسبوع هدا كله فاضى ..اى يوم تحدديه نمشو ..قلت نستعجل قبل مايغير رايه
-نهلة/ انتى وين شفتيه طلال
-فدوى/ عزمته امس عالغدا هوا وفارس ..
-نهلة/ مفلحك والله .. قصدك حتى فارس جى
-فدوى / طلال جى تغدى ..لكن فارس اعتدر وماجاش
-نهلة / خسارة راهو بالمرة قلتيله على اختها
-فدوى/ مبدئيا قلتله ..وتوة غير خلى نكمل سوق طلال وبعتالى نقول لى فارس
-نهلة/ والله ياريتهم يقعدو عدايل ..كنهدا طلال نقعد مطمنه عليه طول العمر
-فدوى/ ربي يطمن قلبك ويحفظكم اوخيينى ..
خش رقم عليها اتتظار
-فدوى/ صكرى صكرى ..هادى هويدا خلى نشوفها شن بتقولى عالموعد
صكرت فدوى من اختها وردت على هويدا اللى قالتلها اتفضلو اليوم نراجو فيكم...طبعا فدوى دارت اتصلاتها لى اختها وخوها واتفقو
__________________________ ________________
_
فى مكتب فارس ...
اميرة خشت للمكتب خايفه وترعش / ايوووة استاد
فارس يشبح للطريق من الروشن وعاطيها بالظهر/ صكرى الباب
تلفت اميرة للباب مشت صكراته وخشت وقفت فالوسط وهيا ساكته ..
-فارس مزال متلفت للروشن ويجبد فالدخان يتكلم وقلبه يغلى زى البركان / خدمه مغريه ..ساهله عاللى ضميرها ميت
..الفلوس فيها هلبا يستاهلو التكوريج صراحة ...وماشاءالله هدايا قيمه وفلوس
اميرة تسمعله وساكته ..مجهزة نفسيتها لاى كلمه بيقولها ...
-فارس طلع الدخان من فمه واضح صوته متغير /مع ان سبحان الله ماناقصك شى .. عندك ام زى جوهرة .. عندك خوات .. حوش ملك .. حاير شنو اللى خلاك تخشى هالطريق
.. منو اللى وراهالك وحببك فيها ..
اميرة معش قادرة تسمع اكثر / كنت تقدر اديرلى قرار فصل بدل ماتسمعنى هالموشح هدا كله اللى مفيش منه فايدة
-تلفتلها / قصدك خلاص ربي عامى على قلبك مفيش فايدة من اى نصيحه نقولهالك
-اميرة / هدا اسلوب نصيحه ...دايرنى بنت شوارع وتبينى نتحمل كلامك اللى زى السم
-فارس/ احنا ناس اشراف عندنا العيبه ماتداواش الا بي قطع الرقبه ..يعنى كلامى وهزيبتى ساهلات جنب الموت وعمل
-اميرة/ انا بنت ناس .. والعيبه والله ماتطلع منى
-فارس فاتح عيونه/ انى بجديات حاير .. ليا يومين مش راقد .. تحلفى بالله وانتى ماشيه معاى .. كيف تبينى نصدقك بس كيف..وكان نفهم شنو اللى خلاك تمشى فى هالطريق.. شن ناقصك ..
-اميرة تبيش تشبحله / عيب عليك تشك فيا هكى
-فارس قايم ايديه / احنا مرحلة الشك فوتناها خلاص .. انا اليوم نكلم فيك وننصح من منطلق انك البنت اللى لقيتها فالبار ورفعتها وروحت بيها .....
عطاها بالضهر مشى خطوات لطاولة مكتبه/ وضربتنى
.. كان من الممكن نموت ..وخنب فلوسى وخلتنى وهربت
-اميرة / اسمع يا استاد .. نعاود نفس الجملة ونقولهالك ..لو فى بنت ضاحكه عليك برة دورها .. انا لا ضربتك ولا عمرى ندكر انى عرفتك في يوم
-فارس قرب وجهها منها/ وليش نكرتى انك كنتى فى مصر
-اميرة / لانك كنت بتتهمنى بلا وجه حق... هدا علاش نكرت انى مشيت فى يوم لى مصر
-فارس/ وكيف عرفتى ان فى مصيبه صايرتلى فى مصر وبنتهمك بيها
-اميرة تلخبطت / من حركات وعصبيتك يومها عرفت ان الامر مايسلمش
-فارس/ كل الاجوبة واتيه
-اميرة / انت شن تبى توة
-فارس ضحك باستهزاء/ الفلوس فيش صرفتيهم ياوداد
-اميرة / ليش هكى بس.. هات القران نحلفلك انى ماخنبتش منك ولا قرش
-فارس/ وتحلفى معاها انك ليلتها ماخشيتيش شقتى ..باهى شن رايك انى زى اللى شاك ان كانت معاك عصابه يومتها
-اميرة/عصابه!!؟... اسمع .. خلى نعطيك المختصر المفيد .. انا وانت بدينا صعب تقعدو فمكان واحد .. وبالنسبه لى فلوسك اقسم بالله ماعندى ولا مسيتهم .... ومشكلتى ان استقاله من مكان عملك مانقدرش نستقيل ..
فارس يشبحلها ....
-اميرة / ولدلك ريح نفسك وريحنى وارفدنى.. دور اى سبب ترفدنى على خاطره .. ورسول الله بينى وبينك
-فارس/ هوا هدا اللى بيصير .. الاسبوع هدا تو نعرف كيف نتصرف وننهى هالكابوس من حياتى ....
تلفت وعطاها بالضهر/ تفضلى شوفى شغلك
تلفتت للباب وهيا حزينه من الحديث اللى صار بينه وبينها وسعيدة ان مشكلتها حكم انحلت
__________________________ _______________
_
نفس اليوم العشيه ...
هويدا مشت لى حوش بوها خاطر فدوى وخوها بيجو يشبحو ملاك .. نادت خالاتها باعتبار ان امها متوفيه ... عندهم خالتهم يقوللها نجيه .. ومتواصلين مع خالتهم جميلة بنت خالة امهم .. نادوهم الزوز بيش يحضرو الناس
-نجيه/ نساوين خوتكم وين
-هويدا/ منكدبش عليك ياخالتى ...خوى فتحى قالى متكبريهاش.. نساوين خوتى سبعه من بنادى ومن بنخلى
..ناديتكم انتو توة خالاتى وكبار .. وكانا صار نصيب وجابو بيان تو اناديهم
-نجية/ باهى عالاقل ناديتى ندى بما انها ساكنه فوقكم
-هويدا / ناديتها ...لكن انتى تعرفى ان ندى فى شهرها...مش قادرة لا تقعمز ولا تتحرك .. اعتدرت وقالتلى كأنى حضرت
-جميله/ نجيوة خيرك تنقرزى ع المراة من بكرى .. مدامه فتحى مايجى حد خلاص اسمعو كلامه.. هوا يعرف اكثر مننا
-هويدا / هوا هدا
-نجيه/ اختك وين
-هويدا / لداخل فى دارها
-نجيه/ وكيف بدير فى قرايتها
-هويدا / والله انا قلتلهم راهةدى تقرا .. وقالو ماعنداش مشكلة كانها تبى تكمل عنده القرايه
-جميلة/ كانا هكى باهى
-هويدا / خيرها اميرة ماجتش معاك يا خالتى
-جميلة/ ياودى ماعليكم مدرق .. اميرة هاليومين مش عاجبتنى بكل .. زى اللى متعبينها فالعمل
-نجيه/ باااهى باهى.. بدت تخدم
-جميلة/ الحمدلله دارت عقد فى شركة يخدمو فيها صاحباتها .. واهو ماشيه امورها
-هويدا / كيف حال وفاء وصفاء ومروة
-جميلة/ الحمدلله ... فخيار الخير
شرين باب الحوش.. فتحت هويدا.. فدوى ونهله جايين فى سيارتهم بروحهم...شوى ثانيه بيلحقهم خوهم بيش يشوف البنت... جابو شوكلاته راقيه وسفرة بكلاوة ..وخشو تعرفو على جميلة ونجيه
وقعدو اكثر من نص ساعه وهما يهدرزو ويتعارفو .. وطلعو عندهم معارف
العصير شربوه ليهم وقت جابت سارة سفرة الشاهى والحلاوات مدتهم للضيوف
هويدا / سارة نادى على ملاك
-سارة تلفتتلها / حاضر هى
خشت سارة من الباب الفاصل للممر بتقول لى اختها تعالى
ممكن بعد خمسه دقايق
نهلة وفدوى مقعمزين وجت ملاك خاشه للصالة لابسه قفطان قصير .... وكندرة كعب .. وهاداكه الشعر مفتوح ... البنات مالاول عاجبتهم وزادت عجبتهم اليوم .. سلمت على فدوى ونهلة وقعمزت عالصالون مع ابتسامه خجولة وهيا ساكته
__________________________ __________________
_
فالقهوة ☕
فارس مقعمز وقدامه شيشه ارقيله .. ويكلم فى طلال بالتليفون ...
-طلال واخد شيشه عطر يتعطر قدام المرايه ويحكى فالسماعات/ بالك تحسابنى مش ملاحظ انك متغير
-فارس ياخد فى نفس ارقيله ويحكى فالسماعه/ وعلاش بنتغير ... شن جد فحياتى بيقلبها
-طلال / فارس انت تحب .. او عندك علاقه
-فارس/ وعلاش تقول هكى
-طلال/ كأنى حاسك موجوع ...او مصدوم فى حاجه .. احنا المفروض نعرفو بعضنا من نضرة العين ...وعينك تقول ان بالك مشغول بي حد معين
-فارس/خليها على الله ولد خالتى برة لى مشوارك وانشاءالله ربي يجمعكم عالخير
-طلال /والنعم بالله .. لكن اسمع كانها عجبتنى انشاءالله ربي يجمعنا عالخير...وكانها ماعجبتنيش ربي يجيبهالها زينه
-فارس/لااا هدا الصح امالا ربي علاش دارها المقابله الشرعيه بيش كل واحد يقول رايه ... وبالك انت ماتعجبهاش هاها
-طلال يساوى فى شعره / ممكن ..حتى هدا يجوز 😁
-فارس/ نحس فيها بتعجبك فدوى تشكر فيها هلبا
-طلال / كانها عجبتنى بنشرط عليهم ..يا اما انا وياك عدايل
يا اما مايصير من شى ...وكانك على فدوى تشكر حتى فى اختها
-فارس/ هاهاهاها ..ماتشرطش عليا وعالناس .. بالك انا نبى اناسب حوش ثانى
-طلال / مش قتلك انا موضوع فيه بنت تحبها وطايح فيها على بوزك
فارس خدى نفس ارقيله وضحك
-طلال / جاوب يا جبان
-فارس/ ربي يوفقك ولد خالتى
-طلال يساوى فى دجاكته / العقبي ليك انشاءالله
-فارس خدى نفس ارقيله/ انشاءالله
__________________________ __________________
_
بعد ساعه ..
اميرة فى المطبخ ادير فى قهوة .. تسمع فى الفايبر فى تليفونها يشرين ... مشت للدار شافت لقتها تغريد
فتحت الخط/ اهلا تغريد
-تغريد / اهلين اميرة كيف الحال
-اميرة / الحمدلله حبيبتى كيف حالك انتى
-تغريد / الله يسلمك ويحفظك ... قتلك بالله منتعبك
-اميرة / تعبك راحه حبيبتى تفضلى
-تغريد / من بكرى نكلم فالشباب كلهم مصكرين نت ..
ماحصلتش ولا واحد منهم حتى عائشه .. بالصدفة لقيتك انتى فاتحه نت قلت نكلمك ..
-اميرة/تفضلى حبيبتى .. انشاءالله خير ..
-تغريد / بادن الله خير ..غير بالله نبيك تتصلى بي فارس قوليله يكلمنى ضرورى عالفايبر
-اميرة اتفاجئت/ منوووووو.. منو فارس هدا
-تغريد / تى كيف منو فارس... فارس المدير فالشركة ..خيرك مزبطيشى انتى كم فارس تعرفى 😁
-اميرة /غير استغربت علاش تبينى نكلمه ماهو كلميه بنفسك
-تغريد / حبيبتى انا نكلم فيك من عمان الاردن
-اميرة/ عمان .. امتى مشيتى ..وخيرنى مسمعتش انك بتسافرى
-تغريد / سفرية شغل جت بسرعه مع الحاج حمد وانيس ... اسمعى بالله عليك قوليله توة يفتح نت ويكلمنى لان الاجتماع بيبدا بعد شوى ولازم نكلمه قبلها
-اميرة استغربت/ قصدك تسافرى معاهم بروحك عادى
-تغريد تضحك /اكيدة مش بروحى... معاى خوى
-اميرة انتبهت لى نفسها/ سامحينى حبيبتى مش قصدى ندخل..غير استغربت
-تغريد/ توة انتى شديتى الديل وسيبتى القرون .... اتصليلى بي فارس توة غير فيسع شوى رصيدى مايديرش مكالمه دوليه معنديش وقت انتى نطلع ونعبي رصيد
-اميرة / انا ماعنديش رقمه فارس
-تغريد / اهو تو نبعتهولك سقدى بالله
وبالفعل بعتتهولها ....خدت اميرة رقم فارس وهيا تشبحله نتصل لا نتصل لا نتصل لا ... وفى نفسها ماتبيش تتصل بيه
__________________________ _________________
_
فى حوش ملاك
البنات يهدرزو على جميله ونجيه .. وهما ماواطوش عيونهم من على ملاك ..
وشرين باب حوشهم ..
-هويدا / ساارة .. نادى فتحى يفتح الباب
-سارة وقفت/ حاضر
فدوى توشوش لى نهلة/ اهيا سارة اللى قلتلك نقولو عليها لى فارس
-نهلة/ قنينه الحق
-فدوى / ودكتورة فالجامعه تعطى فى محاضرات
-نهلة/ ماشاءالله تبان صغيرة
-فدوى/ ماشاءالله عليها
-نهلة تلفتت لى هويدا / هدا ممكن خوى طلال
-ملاك تحشمت وقفت/ عن ادنكم
ومشت طلعت من الدار و خشت للممر ...
بالفعل اللى وصل طلال .. جايب معاه بوكيه ورد .. وباكو شوكولا راقى ...خش هوا وفتحى عالصللون فى المربوعه
وقعدو يهدرزو
__________________________ _________________
_
فى حوش اميرة ..
اميرة تقيس فيها زعما تكلمه زعما لا ...
تخمم فى خاطرها / مايصدق ندوى معاه لازم يعطيهملى زى السم يخلينى دمى محروق يوم كامل
وصلتها رساله عالفايبر/ شن صار
-اميرة ردت/ نكلم فيه ومايردش ..شوية بس ..
وهيا تقيس فيها زعما تتصل زعما لا
وفالاخير خدت الرقم من رسالة الفايبر متع تغريد .. واتصلت ..
الخط ينادى ....
رد فارس/ الوو
صكرت اميرة طول الخط فى وجهه 😁
تغريد بعتت رسالة ثانيه .. شكلها مستعجله وتبيه ضرورى
عاودتله ثانى .. الخط يضبح ..
-رد فارس/ الوو
-اميرة / تغريد تبيك تتصل بيها ضرورى توة بالفايبر
-فارس زبط صوتها / من معاى ....اميرة
-اميرة / ايه اميرة
-فارس/ امممم ..تفضلى شن تبى
-اميرة / قلتلك تغريد تبيك تكلمها عالفايبر..سمعتنى ولا .. هيا بالسلامه
- خدى نفس ارقيله/ سمعتك امالا اطرش..خيرك مستعجلة
-اميرة / ماعنديش رصيد
-فارس/ امالا الفلوس اللى خنبتيهم فاش درتيهم وانتى حتى رصيد ماعندكش
-اميرة / بالله برة برة .. برة دور من ضحك عليك وانت كل ماتلاقى فرصه تتهمنى واطيح تندب على راسى
-فارس/ بالك كدبت عليك ولا نديرلك فالاشاعات ..انتى متاكدة ان كلامى صح
-اميرة / الحق مش فيك .. الحق فاللى ضربت رقمك و اتصلت بيك .. هيا خود الوسع
وصكرت عليه الخط ....
فارس قعد يشبح للتليفون وقريب يمووت كيف كيف تصكر فى وجهه.. وفى داخله يبي يضحك عاللقطه اللى صارت ..
واتصل بي تغريد هدرز عليها شوى وسألاته عالاوراق اللى تبيهم ... وعطاته انيس يبيه
-فارس/ شنو الاخبار يا راس
-انيس/ وهوا بوك خلى فيها اخبار
-فارس يضحك/ خيره
-انيس/ الصبح خدمه والليل خدمه..ياراجل تعبنا..كلمه يفوتنا الهم لاحرف ويعطينا حتى يوم واحد راحة ....قوله راهو لنفسك عليك حق
-فارس يضحك/ كان مادرتهاش بصحة الوجه وفوتتهم وهربت والله ماك لاقى معاه يوم ولا حيفوتك
-انيس/ حتى فرخة الشوم تغريد زايدتنى عالطين بلة ... الو وينك يا انيس.. الوو تعالة الو عمك حمد يبيك ... فرطستنى يا راجل
-فارس يضحك / اهوا شغلكم تم وهاك بتروح لى حوشك هنايا وخود راحتك كيف ماتبى
-انيس/ ياودى المحلى ماعنديش ليه نكهه ...تعرفنى نعشق الخارجى بس
-فارس/ وين الطعمه والبنه فالخارجى .. كانا مابداش انتاج داخلى من الاب والام والله مايجى فى خاطرى ولا ندوره
-انيس/ لا هوا حق راهو ...بلادك بلادك
-فارس/ ياراجل حتى تبدا شينه و قارنه حواجبها وتتجكتر تبلعها لانها لحم وطنى .. مش تبدا لحم خارجى وثانى تبي تتجكتر عليك ...
-انيس/ والله ليك وحشه يا صاحبي ..بالله كيف حال هناء .. والبنت اللى معاها اميرة
-فارس انتبه ان انيس يجبد فى سيرة اميرة ويعرف نوعه ونيته / هناء كويسه الحمدلله ...واميرة نفس الشى
-انيس/ بالله منسئلك شن جوها اميرة
-فارس حس بخنقه لما لقى انيس قاعد يسأل عليها/ننصحك
اميرة فوتها راهى نسخه من هناء وتغريد.. ماعندهاش فالدوة الفاضيه ولا تفتفيتك يلعب معاها
-انيس يضحك/قعمزت معاهم فالمكتب اسبوعين عرقو عليها
-فارس/ لا هيا هكى مالاول نفس نظامهم قبل حتى ماتختلط بيهم
"يدافع عليها متقولش عليه نفسه اللى يسب فيها 24 ساعه ويخنب فيها ففلوسه😁"
__________________________ _______________
_
فى مربوعه حوش ملاك
طلال هدرز على فتحى وتعرف ... لقاهم عيلة راقيه.. عجبوه
شوية وطلع فتحى وقعد طلال بروحه مش بتجى العروس بيشوفها ...
طقطق باب المربوعه... قام طلال راسه .. شاف ملاك وهيا خاشه لابسه الحجاب ..
-ملاك/ السلام عليكم
-طلال يشبحلها / عليكم السلام
-خشت ملاك سلمت منغير ماتمد يدها/ اهلين كيف الحال
-طلال وقف/ اهلا بيك ..
قعمزت ملاك عالكنبه .. وطلال مقعمز عالصالون الفردى
هيا مواطيه راسها ومبتسمه .. وهوا يشبحلها ...
-طلال مبتسم / تشرفت بيك
-ملاك شبحتله وابتسمت / وانا متشرفه بيك اكثر
طلال يشبحلها ...البنت لاعجباته ولا ماعجبتاش ..عادى وخلاص.. قارنها بي عفاف لقى عفاف احلى
-طلال/ بالجودة
-ملاك واطت راسها وضحكت / بيك اكثر
-طلال ضحك/ منقعد نرحب بيك بس.. احكى
-ملاك مغمضه عيونها / الله على صنه الريحة اللى باخها تجنن سان جيوفانى
-طلال حسها جريئة / صح سان جيوفانى..كيف عرفتيها... انتى تفهمى فالروائح
-ملاك /طبعا لانها عشقىىى
-طلال/ بس غريبه انتى مش باخه ريحه
-ملاك / خوى فتحى ميخلينيش 😔
-طلال/ ليش
-ملاك / يقول حرام وعيب وهكى
-طلال / وانتى تحبيهم
-ملاك/ نحب الروائح وعروض الازياء والسفر والضحك وكل شى
-طلال/ حلوو.. باهى وكانا صار نصيب شنو شروطك
-ملاك / معنديش شروط .. بس نكمل قرايتى مزالى سنه وحدة بس
-طلال / هادى ساهلة
-ملاك / ونبى وحدة اضملى الحوش مرتين فالاسبوع لانى نحب النظافه وانا منقعد لاهيه فقرايتى
-طلال يضحك على طلباتها البسيطه / فى حد قالك ان دمك خفيف
-ملاك / اكيدة فى
-طلال شبحلها/ شكون
-ملاك / خوى فتحى
وقعدو يضحكو الزوز ...
شبحتله / وكانا صار نصيب انت شن شروطك
-طلال / شرط واحد بس عندى
-ملاك شبحتله / شنهوا
-شبحلها بحزم /انك تسمعى كلامى
وكملو هدرزتهم.... ملاك تتكلم عالاحمدى منغير تصنع وهوا عجباته الميزة هادى فيها .. لكن باقى الحاجات مفيش شى لفت نضره كل شى عادى وزى الناس ..
ممكن لان عفاف كانت بين عيونه طول مدة المقابله
كملو وناضو روحو هوا وخواته
__________________________ ______________
_
نفس الليله فالليل
عفاف اتصلت بالصدفه بي طلال .. ماعندهاش علم بالخطوبة
-طلال يتسبل بالكدب / حبيبتى نقولك اختى بايته عندى فالحوش هيا وصغارها راجلها مسافر مانقدرش نطلع ونبات برة
-عفاف/ وراس حبيبي عارفاتك زعلان من اللقطه الاخيرة اللى صارت .. غير تعالة بيش نفهمك اللى صار ونرضيك
-طلال ارتخى /انتى بتباتى ولا بتروحى
-عفاف/ انا بايته ... انيس فالاردن
-طلال/ لكن حطى فحسابك انا منقدرش نبات
-عفاف/ باهى روح مش مشكلة ..
-طلال/ وبنحكيلك على موضوع
-عفاف/ انا بنحكيلك على مواضيع .. غير تعالة بس
طلال مالاول ماكنش ناوى يمشى..وبعدين لقاها فرصه انه يخبر عفاف بموضوع زواجته..حتى كانا صار ماصار يهديها بما انها بتقعد عنده الليل كله ..ولع سيارته ومشالها للاستراحة
.
.
.
.
.
.
.
فى استراحة طلال ...
عفاف خدت تحفه صغيرة حدفتها عالحيط وتعيط / ااه .. بتتزوج .. كيف ... واناااااا
-طلال/ انتى متزوجه ولا نسيتى
-عفاف/ مش قلتلى نحبك انتى بس فالدنيا كلها
-طلال/ ومازلت نحبك انتى بس فالدنيا كلها
-عفاف انهارت بدت تبكى / لكن انت ليا انا بس..مش وعدتنى حبيبي .. مش قلتلى انا ليك انتى ومستحيل تشاركك فقلبي وحدة
-طلال /وانا قاعد عند كلمتى .. الحب فقلبي ليك انتى بس وماعندكش شريك .. لكن احنا عمرنا ماتكلمنا عالزواج .. اهو انتى متزوجه وانا راضى ..ليش تحكمى عليا نقعد ديما عازب
-عفاف/ باهى وانااااا... كيف يصير فيا انا اللى سيبت راجلى وحوشى ودنيتى ودينى على خاطرك
-طلال سخفاته حضنها/شن بيصير فيك.. انا وانتى قاعدين كيف ما احنا .انتى بس حبيبتى وفى قلبى وعيونى ..
عفاف تبكى/ وبعتالى هيا منهيا .. منين عرفتها ووين شفتها ... ماتتزوجش تربح احتمال نقتل روحى
-طلال / خواتى هما اللى يعرفوها وقالو عليها وهما اللى مشولها وشافوها
حضنها / حبيتى انا مانعرف حد غيرك
عفاف قريب بتموووت بي قرار طلال بالزواج .. وقعدت تقنع فيه انه يوقف ويتراجع
-طلال/غير افهمى معاى.. انا اليوم ولا غدوة بنتزوج .. شنو حق انا منقعد راهب طول عمرى
-عفاف تبكى/ لكن انا منقدرش نتحمل تكون اى وحدة غيري فحياتك
-طلال/ اهو انا متحمل وجود راجل ثانى فحياتك
-عفاف تبكى/ لكن انا منحباش.. ومنحبش حد غيرك
-طلال/ حتى انا منحبهاش ومش حنحب حد غيرك ..
طلال متأثر هلبا.. بالرغم زعلان منها وغاير عليها .. لكن مش متحمل فيها الالم ... الم كونه بيتزوج وبتخش حياته وحدة ثانيه ..
.
.
.
بعد نص ساعه نقاش
-طلال راقد عالصالون وحاضنها / انا ليك انتى بس.. اى وقت تطلبينى فيه ح تلقينى .. قلبي ماتسكناش وحدة غيرك ..
-عفاف حاطه يدها على صدره / توعدنى ماتمسهاش
-طلال حط يده على يدها / منقدرش نوعدك بي حاجه ونزلبحك من وراك وتعتبريها خيانه... منقدرش مانمسهاش هادى حتكون زوجتى قدام الله وقدام الناس
-عفاف حضناته بالقوة/ لاااا لااا انا بس مرتك
-طلال حضنها / توة انتى ترقدى مع انيس ولا
عفاف سكتت
-طلال / لكن معقولة تحسى معاه نفس اللى تحسى فيه معاى
-عفاف حضناته / اكيدة لااااا... مستحيل نحس بيه زى منحس بيك انت
-طلال/ هدا اللى نبى نوصلهولك .. هيا تحصيل حاصل... لو ماخديتهاش حناخد غيرها.. يعنى الموضوع زى بعضه المهم نتزوج وخلاص .. بس انتى موضوعك غير واحساسى معاك استحالة نحسه مع وحدة ثانيه غيرك
-عفاف/ ااااه من الايام اللى بتجينى .. ومالغيرة اللى بتخلينى نطيح روحى من بلكونه حوشى
-طلال يضحك/ ماجايك الا الخير بادن الله ... علاقتنا حتقعد هيا هيا .. زى ما احنا توة.. بل بالعكس حتقوا اكثر واكثر ..
وحنقعدو زى زمان على ظرفك انتى..اول ماتحصلى فرصه
ح تلقينى جايك نجرى
-عفاف تدلع/ وكانا قالتلك ماتمشيش
-طلال / ومن يقدر يشدنى عليك يا حبي..
-باسها ع شفايفها / خلاص معناها متفاهمين ..نقعدو كيف مااحنا .. نتلاقو ع حسب ظرفك ..مش حنتغير عليك درجه
...موافقه ولا شنو
-عفاف حشت راسها فى رقبته/ المهم نقعدو نفس العلاقه .. وعادى حنتحملها حكايه زواجك
-طلال / نحبك
-عفاف/ نموووت فيك
وعلى قد ماحاولت اتخليه يبات معاها ليلتها رفض واتسبل بي ان اخته عنده وهوا يكدب .. هوا يحب عفاف بجديات بس خايف من الاعيبها لانه عارفها تبى تحمل منه
__________________________ _________________
_
بعد اسبوع
فارس ليه اسبوع مايشبحش فى اميرة..متقصد انه مايشوفهاش .. متجاهلها .. واجعه انها قاعدة مصرة عالكدب
. عندهم فرع ثانى لى شركتهم ماشى يداوم فيه ويساوى فى شغله غادى .. وهيا تتمنى غير تشبحه فى مكتبه .. صح هما يتعاركو لما يتلاقو .. لكن المهم انها تشبحهالجو فالمكتب بايخ من غيره ومفيش حاجه حلوة فعيونها..طبعا رافع معاه مروان كنوع من الغيرة عليها😁
فى المكتب
اميرة مقعمزة فى مكتبها .. وهناء وتغريد عند الحاج حمد
طقطق الباب وخش الاستاد انيس
-انيس/ السلام عليكم
-اميرة قامت راسها/ عليكم السلام
-انيس قريب ياكلها بعيونه/ وين تغريد وهناء
-اميرة / فى مكتب المدير
-انيس يهمس / اهاا باهى كويس
وخش قعمز عالكرسى اللى مقابل كرسيها فى مكتبها
-انيس/ انا كنت مسافر ليا اكثر من اسبوع فى الاردن
-اميرة/ الحمدالله على سلامتك استاد
-شبحلها وابتسم/ خيرك رديتى الهديه للشركه
-اميرة قامت راسها وماستوعبتش الكلام / هديه .. رديتها .. هدية شنو قصدك...
وادكرت هاديكة الهديه اللى شافها فارس / بالك تقصد على هداكة البوكس المعبي فلوس
-انيس يضحك/ هاهاها ... كلمونى الصفحة قالولى الهديه ولت واللى انعتتلها رفصت تستلمها
-اميرة تعصبت مزال دايرة الحولة تبى تتاكد منه/ هديه شنو .. وشن الكلام الفاضى اللى تقول فيه
-انيس/ الاسبوع اللى فات .. وصلتلك هديه من صفحة..هاك عرفتيها توةة وقلتى بوكس معبي فلوس
اميرة وقفت متفاجئة / وانت شن علاقتك بيها الهدية
-انيس/ غير قوليلى توة ليش كلمتى الصفحة قلتيلهم تعالو ارفعوها
-اميرة مدت يدها/ماتقوليش انت المجهول اللى بعتتهالى
-انيس وقف/ صراحة حبيت انها اتكون اول هديه بينى
وبينك ... لكن الباين ان الاسلوب كان غلط مالاول وانك خفتى منى
-اميرة عيونها دمعو وجى فارس بين عيونها / طبعا اسلوبك غلط لانك جيت للبنت الغلط .. انا لانعرفك ولا نبى منك هدايا
ولا انا البنت اللى فى بالك
-انيس وقف/ والله صدق فارس لما حكالى عليك الايامات اللى فاتو
وطلع وخلاها فى دوامه وتخمم/ ااه .. فارس يدوى عليا .. حيه عليا يا نهاراتى السود شن يحكى
دارت بيها الدنيا ..
انخلعت وتخمم/ زعما شن يدوى عليا .. وشن الكلام اللى يوزع فيه .. زعما حكالهم قصتى معاه ... حيه عليا يا غبارتى يا فضيحتى بين موضفين الشركة
طبعا بما انهم متعاركين ..عقلها طول رفعها انه يتكلم عليها بالعاطل .. مش معقولة بيشكرها وهوا يخنب فيها ويسم فى بدنها كل مايشوفها ....من حمقتها .. خدت شنطتها وطلعت من المكتب حتى منغير ما تستادن من البنات
.
.
.
نزلت للبركيدجو .. ولعت سيارتها وطلعت .. مشت لى فارس فى فرعهم الثانى للشركة ...
طول الطريق وهيا افكار ترفعها وافكار تجيبها.. تدكر فى
مواقفهم مع بعض مالقتش انه يشهدر بيها..ديما الكلام بيناتهم بس ....لكن الشيطان لما يبي يعمى صورلها فارس متكى ويحكى ويجيب فى سيرتها لى صحابه وهيا فى خاطرها / الا الشرف والسمعه مافيهمش لعب
وصلت
درست السيارة ونزلت ... خشت من الباب تلاقى فارس واقف عالريسبشن وجنبه وحدة اجنبيه ترا شن يحكو .. ياودى المنظر ماعجبهاش و الغيرة فى قلبها موووت...تلفتت عاليمين تلاقى بوها واقف على موضف ترا شن يهدرزو ويضحكو
اميرة / بوووىىىى ....شن ادير هنايا
-المهدى مشالها / اهلين اميرة
-اميرةة ابتسمت بصعوبه / انت شن ادير هنايا يابوى
-المهدى/ بديت نخدم هنايا ليا ايام
-اميرة / اهاا
فارس سمع اسمها انتبه تلفت لى جهه الباب لقى اميرة واقفه وتسلم على بوها ... قلبه طق .. استادن من الاجنبيه ومشى لى اميرة
-فارس/ اميرة.. خيرك جايه هنايا انشاءالله خير
-شبحتله بزعل ووواضح انها باكيه /نبى حضرتك شوى
-فارس/ تفضلى معاى للمكتب فوق
ومشو للاسانسير ركبو فيه الزوز ... فارس يشبحلها حاير خيرها وهيا ماتبيش تقيم راسها ولاتشبحله
وصلو للدور الثانى طلعو من اللسانسير ومشو لى مكتب فارس
__________________________ ________________
تمت .. ويتبع