رواية أميرة قلبي الحلقة الأولى - زهور جمال الدين

_

سنه 2013 .....

-جميلة / اميرةة... اميرة

-اميرة من داخل دارها / حاضر ياام اهو منطلع

-جميلة/ يابنيتى عطلتى .. الطيارة بتفوتنا..وولد خالتك يراجى قدام الباب

-طلعت اميرة من الدار حاطة وشاحها على راسها/ اهو كملت 😊..نلبس فى حجابى بس

وضحكت / تى لخبطينى يا قمر

ورجعت للدار

-جميلة تضحك/باهى غير حطي الوشاح على راسك واطلعى ساويه حتى فالسيارة

-اميرة طالعه من الدار وتساوى فى شنطتها على كتفها ولافة وشاحها تساوى فيه/ المفروض بنتك صفاء كلمتنا قبل ما يطلع راجلها من الحوش

-جميلة/ تى هيا يابنت موسع بالك .. وبعدين صفاء من امس قالتلى ان طارق بيجينا من العمل خاطر عنده توكة وبايت فيه

-اميرة/ هيا انا واتيه

طلعو اميرة وامها وصكرو الباب وراهم بالمفتاح ومشو لى سيارة طارق .. صبحو عليه وعطوه الشناطى حطهم فالكوفينو ..

-طارق / صباح الخير ياخالتى.. صباح الخير اميرة

-جميلة/ نهارك زين يا وليدى .. شن حالك اليوم ...

وشرين تليفونها... لقت وفاء تتصل ...

وفاء بنت جميلة تنادى من بلكونه حوشها / ياااام

تلفتو جميله واميرة واشرولها بايديهم حييوها وابتسمو.. وصكرت جميلة تشريينة وفاء

-وفاء من البلكونة/ صباح الخير يااام

-جميله / نهارك مبروك وعدوك مهلوك يابنيتى

-وفاء / صباح الخير يا اميرة تمشو وتجو بالسلامه انشاءالله

-طارق يشبح لى وفاء😁/وولد خالتك ماعنداش صباح الخير

-وفاء/ صباح الخير يا طارق سامحنى

-جميله/ خشى سلم بنيتى ولدك ينوض ولا تمرضى

-وفاء/ باهى بالسلامه وطمنونى اول ماتوصلو

-اميرة/ انشاءالله

جميلة ركبت من قدام واميرة فالكرسى الخلفى ......

-طارق/ شن صار فى وجع سنك اليوم يا اميرة

-اميرة/ الحمدلله احسن بهلبا بعد المسكن اللى عطتهولى صفاء امس

-طارق/ ماهو حكيتلك عليه .. مسكن مليح ديما استعمليه

-جميلة/ شن حال صفاء والصغار

-اميرة/ الحمدلله يا خالتى فخير ونعمه.. من امبارح لما روحت بيهم من عندكم ماتلاقيناش .. كلمتهم بالتليفون بس

-جميلة/ ربي يحفظكم لبعض ويخليلكم صغيويرتكم

-طارق / اللهم اامين ...

وتلفت لى خالته/ سلميلى على خالى هلبا هلبا ...

وشبح لى اميرة فالمرايا وضحك/ ولما تروحى نبيك فى موضوع بيفرحك يا خالتى

-جميلة ضحكت وتلفت للطريق/ انشاءالله تنحل العقدة يا ولدى ..منعطلوش هوا اسبوع من زمان نشوف خلك ونروحو

.. وانا شن نبى لبنياتى غير الراحة والهنى

اميرة ضحكت عرفت الدوة عليها .. ولكن قعدت ساكته

وصلو للمطار .. نزل طارق للكوفينو نزل الشناطى وخشو للمطار .. سلم الشنط للكاونتر ( مكان استلام الشنط) .. ومشى لى خالته واميرة... خدى اميرة بعيد شوى عن خالته

-طارق/ انا لو مش واثق فالولد والله مانشد هالشدة هادى كلها..ونحشم روحى ونعطى للولد امل انك بتوافقى..خسارة اضيعيه من ايديك والله ننصحك فيك كأنى ننصح فى وخيتى

-اميره/ انت تعرف رائي فالموضوع .. امى مريضه قلب

..ومانقدرش نخليها بروحها ..وو

-قص عليها /حمل الجماعه ريش..و خواتك معاك يد بيد..العمر يجرى يا اميرة هوا هداكة.. خوتك الاصغر منك بصغارهم وانتى الكبيرة

-اميرة/ مش زى خواتى زيي انا..احنا نختلفو عند امى .. وبعدين الولد انا منعرفاش ومنقدرش نتزوج هكى قطوس فشكارة

-طارق/ باهى تعرفى عليه .. نخليه ايأجل عرسه حتى شهرين ثلاثه .. وتكلمو وتعرفو وتمشى الامور..الولد بحوشه

..نصيحتى ليك ماضيعيشى

الميكرفون بدى يتكلم ان ركاب طيهارتهم لازم يركبو توة لى صالة الانتظار

-جميلة وقفت/ هيا بنيتى هى

-طارق شبح لى اميرة ويوشووشو / كيف بيصير وشن نرد عالولد فهمينى

-اميرة/ ربي يهنيه ويرزقه ببنت الحلال انشاءالله

-طارق/ يعنى مفيش فايدة فيك

-اميرة ابتسمت/ مع السلامه..

-طارق / ربي يجيبهالكم زينه يا اميرة

وتلفت لى خالته/ تمشى وتجى بالسلامه يا خالتى

-جميلة/ الله يسلمك ويحفظك وليد اختى..

تحركو اميرة وامها وخدو منهم التداكر وعطوهم كرت الصعود ..خشو لى صالة الانتظار لداخل ..قعمزو عالكراسى

-جميلة/ يااااربي نلقى اوخى لا سو لا سوية.. صحيح يجرى وينقز زى الحصان

-اميرة/ ربي يلطف بيه خالى .. ومايشوف شرر

طارت الطيارة متوجهه لى مصر ... تعبت جميلة شوى لانها مريضه قلب وماقالوش عليها فالطيارة لانهم خافو يمنعوها من السفر ....وصلو مصر وخدو تاكسى رفعتهم لى حوش امحمد خو جميله

" اميرة مواليد 90 .. الكبيرة فخواتها عمرها 23 .. عندها ثلاث خوات صفاء ومروة و وفاء الثلاثه متزوجات .. بوها عمك المهدى كان يبي مرته تجيبله ولد.. لكن الله غالب خلفتهم كلهم طلعت بنات ( مايحسابش ان هوا اللى يحدد فالنسل) .. المهم ماعجباش الحال قرر انه يتزوج على مرته وعمتك جميلة رضت وسكتت..لكن الباين ان المراة اللى خداها قادرة خلاته يطلق جميلة وينكر بناته مايصرفش عليهم حتى قرش..عمك لامين بو جميلة كان زمان ضابط قبل ما يطلعوه من الجيش..وماكانش ساهل..بطريقته وبمعارفه وبالتهديد ضغط عالمهدى وخلاه يكتب الحوش باسم جميلة وقعدت فيه هيا وبناتها ...

عمك المهدى كانو ملقبينه جيرانه واقاربه (الكركاشى)

يعنى الخفيف .. ديما يطيح قبل الضربه ومرة مرة يدير لى جميلة وبناتها فى مدعك ..كان مش جدهم لامين موقفه عند حده .. المهم تزوج وجاب بنات مرة ثانيه😁.. وفالاخير جاه الولد وسماه محمد ... بناته تسنيم ورنيم وفطومه .. الكبار الزوز يقرو فالثانوى .. والصغيرة فطومه تقرا اعدادى ومحمد يقرا ابتدائي ....

لكن مفيش علاقه بين العيلتين نهائيا .. اميرة شادة رجليها ورجلين خواتها ماتبيش اى اختلاط بينهم ..الامور طيبه ومن بعيد لبعيد وخلاص "

صفاء عطتها امها لى طارق ولد خالتها..مع انها لا متفاهمه مع امه ولا مع خواته .. المهم ان هوا يبيها ومشيين الامور

ومروة عطتها لى مدرسة معاها ادور لى ولدها .. ومن لما دارو مقابله انسجمو مع بعض وفيسع تزوجو..

اما وفاء اخر العنقود عمرها 19 عام خدت ايهاب ولد جيرانهم علاقه معاه من لما صغار ...ليها سنه متزوجه وكيف نافس جايبه ولد

.. جميله مديرة مدرسة ابتدائية فالمنطقه .. جاها مرض القلب على ماتكمد كيف مسخفينها بناتها بوهم حى وعينهم مشتاقاته ...

اما اميرة قعدت مع امها ماتبيش تسيبها وتتزوج .. جوها هلبا ناس..لكن هيا ترفض بحجة ماعجبهاش العريس..لكن فالاصل مش قادرة تسيب امها .. تخرجت من كليه الاقتصاد قسم محسابه ..مالقتش تعيين فالدولة ولا حتى عقد.. ف بدت تشتغل مدرسة فى مدرسه خاصه وخلاص...

_________________________________________

_

فى مصر

فارس وصحابه فى مصر ليهم اسبوعين ... هوا ماشى عنده شغل .. وصحابه انيس ومروان ماشيين يسايرو فيه

فالتليفون

-فارس/ يابوى قلتلك الوضع تمام متخافش .. البضاعه قريب توصلكم ولو تبو ثانى قولولى مش نبعتلكم

-عمك حمد / يا ولدى انا عمرى ماقتنعت بالسيراميك المصري

..طول عمرى نجيب فالاسبانى .. نخاف يقعد و ...

-قص عليه/ انت خود رائي..وتو تشوف الاسعار اللى بنضربلك بيها السوق

-حمد / سوق شنو االى بتضربه بالسيراميك المصري وهوا معبى فالبلاد مالاقيين وين يخزنوه

-فارس/ غير استقبل البضاعه غادى وخزنها وتو تفهم بعدين

-حمد/ ياودى اعتبرها اتخزنت .. لكن انا نبيك اتروح .. خوك مُعاد دايرلى وجيج ومحمود نفس الشى

-فارس / خيرهم الزوز

-حمد / وين نندرى على بلاهم شكلهم على نفس الموضع ...

-فارس/ تى شنو العيلة الكلبه اللى ناسبناها هادى .. تى منو اللى طيحنا فيهم الله لا تربحه... معقولة زوز خوات دايرات فى بعضهم الدير هدا

-حمد/ انا ماعليا بهدا كله .. تعال شوف خوتك خدو راي النساوين وبدو يتقاحرو واحد يقول نبى الدور الاول والثانى يقوله والله ماك عافسه وقريب يصير بينهم الدم

-فارس/ يا مالاك نسبه حرفه وخلاص .. وبالنسبه لولادك نبشرك من توة كتيباتهم بودريات بادن الله ..مش كيف لون كتيبات التريس ...

-حمد/ سلم ولدى تربح اقطع سفرتك وروح

-فارس/ حاضر يابوى بادن الله معش نعطل بادن الله

-حمد / هيا بالسلامه

-فارس/ مع السلامه

وصكرو الخط ...

-انيس مقعمز عالصالون/ شنو بتغير رايك وبتمشى معانا ولا شنو

-فارس ساوى المخدة وراه وشد الريموت/ اكيدة لا

-مروان/ انت ماتطلع الا عندك قصه حب قديمة فحياتك احنا مانعرفوهاش .. ومش قادر تنساها .. وهدا اللى معقدك ومش مخليك تشبح لى جنس حواء

-فارس يضحك/ والله ماصارت.. انا وياكم مالثانوى مع بعضنا وماعليكم مدرق.....ولو عندى علاقه قديمه راهو حكيتلكم ومش حنتحشم منها

-انيس / امالا معقولة على قد مانمشو للبار ونجيبو فى بنات وشى انت متعقد و دايرلى روحك شيخ

-فارس/ تى ماهو نمشى معاكم للبار قريب كل ليله.. وعلاش متعقد

-مروان/ مشيه البار تبى نضامها ..شرب ورقص وحدف فلوس .. مش شادلى تركينه وادخن

-فارس يضحك/ ها ها ها ها..

-انيس/ تضحك ... مصحك

-فارس/ انت بالدات يا انيس مفروض اتحشم على وجهك وتروح لى حوشك وبنتك اللى كلاماتك مرتك وقالتلك مريضه

..مش شادهالى صياعه هنايا

-انيس/ تى فكنى يا راجل درهتلى كبدى...كلمت طلال قلتله يكلم خوها حسام يمشيلها

-مروان / والله الا غالط يا انيس ...المفروض كلمت حسام طول واتاكدت انه مشالها

-انيس يضحك/ ها ها ها طلال صاحبي وشريكى تعرفوه مدامنى وصيته عالحاجه بيديرها اكيد .. وحسام يحب يمشى لى اخته ويعاونها اول مايكلمه طلال تو يمشى طول

-فارس/ وبردو والله ماتتحشم ..بنت مريضه وانت ماشى ادور مع البنات وتصكر.. انا هدا اللى مخلينى مصكر راسى عالزواج... النمادج اللى زيك

-وقف انيس/ هيا بتمشو ولا شنو

-مروان/ نوض هى

" فارس شاب نشيط و يحب الخدمه..يشتغل فى استيراد السيراميك وعندهم معرض فطرابلس ..مواليد 75 عمره 38 سنه .. بوه وامه متوفيين..حمد خوه الكبير من الاب بس .. بعد ماتوفت ام فارس هوا اللى خداه و رباه مع صغاره وقعد يناديله يابوى ...

فارس عنده زوز خوت ثانيين من بوه( عبد السميع وفايز)

وعنده اخت وحدة اسمها سميرة .. ماعنداش فى جو البنات.. لكن عنده فى الشرب لما يسافر مع صحابه "

___________________________________________

_

فى ليبيا

طلال شاد تليفونه ويتصل بي اخته ناديه .. وصاها تجيبله رقم عفاف زوجة انيس من لمياء صاحبتها لانها تقربلها ...

يبي يكلمها .. وبالفعل جابت ناديه الرقم واتصل بيها طلال...

-عفاف / الو

-طلال/ السلام عليكم اختى .. انا طلال صديق انيس

-عفاف مستغربه / اهلين خوى خيره انيس فيه حاجه

-طلال ابتسم/ لا لا اختى متخافيش مافيه شى.. بس هوا كلمنى وعطانى رقم حسام نبلغه بي مرض بيلسان ويبيه يمشيلك لكن لقيت رقمه مقفل

-عفاف هازيه/ رقم حسام😏.. حسام اتصلت بيه منغير مايعطيهولك هوا ولقيت الرقم مقفل.. كثر الله خيره لاااا فزاع لى بنته

-طلال وجعاته انها بروحها وعارف ان اهلها خارج ليبيا ماعدا خوها / اختى انتى وين توة

-عفاف / انا فى عيادة الطفل البرئ .. ماسكين بيلسان تحت الملاحظه

شاف طلال الساعه لقاها 12 ونص فالليل ..حس انها غلط تكون بروحها فى وقت زى هدا...سكر الخط ولع سيارته ومشالها

.

.

وصل للعيادة .. وسأل على حالة الطفلة ودلوه على سريرها

وقف لقى الستار ملفوف عالسرير ماباين منهم شى ...رجل لتالى ورجل لقدام وهوا متحشم زعما نكلمهم زعما لا ..وفالاخير

-حول طلال الستار/ السلام عليكم

-عفاف مستغربه/ عليكم السلام ...

شبحله باستغراب/ حضرتك الدكتور!!؟

-طلال ابتسم/ انا طلال صاحب انيس... وشريكة مؤخراً

-عفاف تحشمت وتساوى فحجابها/ اهاا .. اهلين بيك ... ليش متعب روحك وجاى تزور فالوقت المتأخر هدا

-طلال / انا مش جاى نزور.. انا جاى انأدى فى واجبي .. وين الدكتور

-عفاف قامت راسها / فالغرفة الخارجيه ..

وبالفعل طلع طلال ومشى للدكتور سأله .. وباهى اللى جى ...طلعت البنت تبى ابر وفلاجيل واكياس تغديه من الصيدليه المفروض يجيبوها .. طلع طلال يجرى يجيبلهم فى كل شى

___________________________________________

_

بعد خمسه ايام

فى حوش امحمد خو جميله

-جميلة / الحمدلله يا وخى ..اهو لقيتك صحتك باهيه .. وامورك تمام.. قولى زينه وخلينى بنروح

-امينه مرت خوها / هاك قاعدة يا جميله مزال ماشبعناش منك .. وانتى اصلا حاجزة عشرة ايام مزال الوقت

-امحمد / صدقت امينه .. خيرك تشت فيك النار وبتروحى

.. بناتك يكلمو فيك وحالهم كويس ..مفيش داعى للاستعجال خيرك قلقتى مننا

-جميلة / والله يا وخى ماينقلق منكم ومن القعدة معاكم.. والبنات حتى يتصلو وكويسين يقعدو شاغلينى ..وتبى الحق الوحشه فى قلبي من قداكم مشت لما ريتكم .. وانتو يادوبك توتو روحكم لى مشية العمرة

-امينه/ ربي يحفظهم بنياتك فحياشهم مع تريسهم ماشاغلك فيهم شى.. واميرة اهى معاك .. ومشيه العمرة انأجلوها عادى احنا كل عام نمشو

-امحمد / توووة تمشى تسلمى مفتاح الغرفه للفندق وتجيبي شناطيكم وتزيدو تقعدو معانا هنايا حتى اسبوعين ولا شهر

-جميلة تضحك/ والله ماهى قصة فلوس الحمدلله الخير كاثر .. وبالنسبه للعمرة لا تأجلوها لا سو .. اصلا انتو رحلتكم بتجى فى نفس اليوم اللى حاجزين فيه احنا للمرواحة

-امينه/انا اللى نعرفك يا جميلة كانك حطيتى حاجه فدماغك

تقعدى مصرة عليها .. توة المهم ماتقصيش رحلتك وتقعدى معانا المدة الاصليه اللى حاجزتها

-جميلة / انشاءالله خير 😊

-خدت جميلة طاسه الشاهى وتلفتت لى خوهت / وانت يا اوخى مش ناوى المرواح ... اهو ليك فوق ال25 عام فى مصر ... ماحنيتش لى بوى ولى اهلك وناسك وصغار عمامك

-امحمد / الحاج قبل شهرين كان عندى .. وماغبناش على بعضنا بكل..وصغار عمامى على تواصل دايم بيهم.. والمرواحة مستحيلة لبلاد طلعونى منها وسمونى كلاب ظالة..

وحط طاسه الشاهى/ حتى الحاج بوى طلعوه من خدمته بعد ماكان ضابط معاهم بسبب كلام ماله معنى

-جميلة/ اللى طلعك مالبلاد النظام الاول وهوينا طاح .. يعنى مفيش داعى لى قعدتك هنايا .. انت حتى من لهجتك بدت مصريه

-امحمد / انا تأقلمت هنا خلاص ...بديت زى الحوت اللى معش يقدر يطلع من الميه

-جميلة/ ربي يهديك

.

.

.

.

فى غرفه دنيا بنت عمك امحمد

اميرة واقفه ورا الباب وحاصل عليها وليد ولد خالها امحمد قارب منها هلبا وكأنه يبي يبوسها 😨😱

-اميرة ادف فيه/ تى حول يا خامر احترم نفسك ياحيوان انا زى اختك اطلع برة تحشم اختك راقدة فسريرها بتسمعك

-وليد قارب منها/ انتى عجبتينى هلبااا .. ماشاءالله عالجمال والرقه ...

اخته دنياراقدة فسريرها غامه وجهها باللحاف/ وولييد

اخرج برة ياواطى ( البنت تتكلم مصري)

-وليد يضحك ويشبح لى اميرة/ توة هربتى منى .. لكن وراسك لما تجينى تزحفى وقتها تو نعرف كيف نتصرف معاك ونتملح من جلدك ...

وطلع وهوا يضحك بالصوت العالى

اميرة مشت لى دنيا وهيا حايرة / تى هدا شنو .. سامحينى انتو عيلة فليت ولا خالكم ميلاد .. ولا شن قصتكم .. الولد يعاكس عينى عينك قدام اهله لا حشمه لا جعرة .. والبنت مروحة عقابات الليل بروحها مع صاحباتها .. وكيف هكى خالى مخليكم

-حولت دنيا الغطا من راسها / الواد معجب بيكى وبيحبك يختى نعمله ايه

-اميرة / حبه برص وعشرة خرس.... اللى يحب يتصرف هكى بالحقارة هادى ... وبعدين تعالى جاى .. انتى وين تمشى كل ليله

-دنيا/ بسهر مع صاحباتى طبعا .. يعنى بروح فين

-اميرة/ السهر مع صاحباتك يومى .. ولى وجه الصبح .. كيف خالى راضيلك بي هكى

-دنيا/ انا مابخرجكش كل يوم .. على حسب

-اميرة/ على حسب شنو

-دنيا / يووووه عايزة انام

___________________________________________

_

فى عيادة الطفل البرئ

عفاف واقفه جنب السرير والدكتور يقيس لى بيلسان فالحرارة .. انفتح الستار اللى بين الاسرة...خش طلال وفى يده كيسة ..

شبح لى عفاف وابتسم/ صباح الخيرر

-عفااف والدكتور والممرضه/ صباح النور

-طلال/ كيف حالها الامورة اليوم

-الدكتور/ حالها احسن ..بس ضرورى من المحافظه والاكل الصحى .. اكل الشارع تنسوه نهائيا .. لا كيك لا بريوش

-عفاف/ انشاءالله يا دكتور .. ح نتبع التعليمات كلها

-الدكتور/ انشاءالله لاباس

وطلع ومشت وراه الممرضه ...

طلال شبح لى عفاف وابتسم .. وهيا بادلاته نفس الابتسامه

-طلال/ كيف حالك اليوم .. انشاءالله مفيش تعب

-عفاف مبتسمه بارهاق/ الحمدلله على كل حال

قام طلال الكيس وحطه عالسرير .. طلع منها باكو كريب وباكو بريوش وترمس فيه قهوة

-عفاف متحشمه / مش معقولة هكى.. كل يوم بتفطرنا انت

-طلال /والله مافى تعب..انا نشرب فالقهوة ونعرف اهميتها ..

والبريوش يزيد الطاقه ومايخليش الانسان يدوخ

-عفاف / والله ماكان فى داعى اتعب روحك.. واطيب القهوة حتى اليوم بنفسك ...

-طلال/ اول مرة فحياتى نطيب القهوة وانا سعيد.. ان فى من بيشاركنى فيها ويشربها معاى ..

هوا يتكلم برومنسيه وهيا مش قادرة تتحكم فى نفسها وتحول عيونها من عليه

-طلال/ اهم شى ماتكونيش مضايقه من جياتى

وهيا تشبحله فى صمت ... وداخلها صراع ...

وبعدين انتبهت/ لااا ولو .. وليش بنضايق

بيلسان تشبح فى راس دبدوب طالع من الكيسه ... قصت عليهم انسجامهم / عمووو جبتلى دبدوب

-طلال انتبه للبنت/ايه جبتلك دبدوب يا عمو تلعبي بيه

وطلع دبدوب لبسه فى يده ..وبدى يتكلم بصوت زى الرسوم زعميتا صوت الدبدوب..وبيلسان تضحك ...

اما عفاف تشبحله وتتحسر فى داخلها ..ليش انيس ما يهتمش بيها هكى .. لمسات بسيطه فحياة المراة زى القهوة الساخنه عالصبح.. تحس ان الاهتمام بزايد من الزوج ..هدا غير جيانه للبنت واهتمامه بالسؤال عليها .. وكيف مهتم بيها هيا وكيف يكلم فيها فالتليفون كل شويا يسأل ..شئ غريب اللى صار معاها واحساس جديد عليها اول مرة تحس بيه

"طلال عمره 33 سنه ..يكون صاحب فارس وولد خالته فى نفس الوقت ..كان عايش هوا وامه لحد ماتوفت قبل عامين وقعد بروحه عنده زوز خوات متزوجات ويزنو عليه يتزوج .. احواله الماديه كويسه"

____________________________________________

_

فى الفندق 9:30 ليلا

-جميلة / والله خالك قعد شاد قالى كيف كيف تجى فيسع وتروحى فيسع

-اميرة تساوى فى شنطتها / انا ماقلتلكش روحى ياام ..

خليك كان تبى تزيدى مع خوك .. لكن انا ماتجبرينيش نمشيلهم ثانى

-جميلة / يابنيتى انتى غير شن ريتى منهم

-اميرة / ماريت شى .. لكن سلامتهم البيئة هادو

تليفون جميلة يشرين ...

-جميلة / هاتى التليفون .. اكيدة مريم بنت خالتى وصلت

خدت اميرة التليفون ومداته لى امها وردت .. بالفعل طلعت مريم بنت خالتها اللى عايشه فى مصر وصلت للفندق وبتركب لى غرفتهم بتشبحهم ....

ركبت مريم فوق .. ومعاها ازدهار صاحبتها ليبيه مقيمه فى مصر.. خشو لى غرفه اميرة وامها وسلمت مريم على جميلة بالاحضان ليهم سنين ماتلاقوش ..

مريم وجميلة قعدو مقعمزين على تركينه عالصالون .. اميرة عطتهم راحتهم لان مريم ترا شن تحكى لى جميلة وتبكى بالك تحكى على ضيق الحال وقلة الفلوس الله اعلم .. المهم كله بالهمس..ف مابتش اميرة تحرجها وخدت ازدهار وقعمزو عالسراير ويهدرزو وكل مرة يجبدو موضوع ..لحد ماوصلو لى موضوع دنيا بنت خالها

-اميرة / انا ماحتكيتش بيهم هلبا .. صح نشوف فيها تروح متأخر لكن ماقدرتش نعلق

-ازدهار/ البنت تمشى لى بارات وديسكوات..تخدم على راسها

-اميرة / نهارات الحرش..وخوها وين من هدا كله..وخالى وين

-ازدهار / بالله فكينى....تقوللهم نمشى مع صاحباتى وهما مصدقينها .. يحسابوها قاعدة هاديكة البنت البريئة

-اميرة/ ومن وراها الطريق ووين تلبس.. نشوف فيها تطلع من حوشهم بريئة

-ازدهار/ الديسكو نفسه يلبسها فى غرف معينه لداخل .. وبعد تحصل فلوس تقسم عليهم بالنص اعتقد .. وهما اصلا الملابس هادو عندهم محلات متخصصه

-اميرة/ صح .. امس فايتين انا وامى من قدام محل حسيت ملابسه مشبوها

-ازدهار/ ماهو قتلك

-اميرة /لاحول ولا قوة الا بالله معقولة هكى!! ... الموضوع مش مستاهل

-ازدهار/ لما تبدا يوميتك ثلاث الف جنيه ... يكون مستاهل

وبعدين هادى اسرع طريقه حاليا لى تحصيل مبلغ مالى كبير مع بعضه بلا جهد يندكر

-اميرة/ لا حول ولا قوة الا بالله

____________________________________________

_

بعد 3 ايام

الساعه 7 المغرب

فى شقه فارس .. انيس مجهز شنطه .. بيروح ليبيا .. ومروان بيوصله للمطار ...

-مروان يشبح لى فارس / نوصله ونجيك ... وين نلقاك

-فارس/ فى الديسكو اللى مشيناله اولامس

-انيس/ يا امسخين بتمشو من غيرى ..خيانه

-فارس/ لااا تو نشدو تركينه ونتباكو خليتنا وروحت

-انيس يضحك/ والله ماتتحشمو

-مروان / كانا كملت شغلك فيسع ارجعلنا هنايا لى مصر

-فارس/ لا لا ماعنده مامولى بيه .. انا بدايه الاسبوع الجاى مروح ليبيا بادن الله.. عندى ماشاغلنى ..وحتى طلال ليه ايام ماكلمنيش مش عارف خيره

-مروان / مستغرب فيه كيف ولد خالتك مالحقكش.. وانتو راسين فى جسد ..تقول توامه

-فارس ضحك/ تى ماهو سى لافندى انيس جاى يدور هنايا ويتسرمح .. عالاقل يقعد طلال غادى شاد الشغل اللى كيف باديينه مع بعضهم

-مروان / ياودى من توة نشوف فى طلال بيندم على شركته مع انيس ..وقولو مروان قال

انيس يضحك/ والله ماتتحشم

-فارس/ بعدين بيديره فيا انا حق وباطل.. لانى انا اللى شكرت انيس وقلتله توكل وشاركه

-انيس/ هيا نسلم عليكم توة

-فارس/ مع السلامه..

وطلعو مروان وانيس....وخش فارس للدوش .. دوش وحلق وجهه وطلع .. غير حوايجه وجهز نفسه وطلع متجه للبار

_________________________________________

_

نفس اليوم ...

اميرة وامها فى حوش امحمد .. سلمو عليه لانه امحمد بيطلع توة مسافر للسعوديه هوا ومرته..وعمتك جميلة تبكى حالة .. سلمت على خوها وودعاته لانها حتى هيا بتروح ليبيا ..

امحمد/ يابنت اختى خلى نقول لى وليد ولدى يوصلكم للمطار ..

-اميرة/ هوا يراجى فيكم انت ومرت خالى توة للمطار.. علاش نزيدو نتعبوه احنا

وهيا فى خاطرها ماتبيشى يوصلها البارد هدا

-امحمد / خيرما تتبهدلو بروحكم فالمطار

اميرة اصرت عالرفض وقالت لى خالها مايكلماش اصلا لان الطيارة بتقوم الفجر ومفيش داعى انهم يقلقو نومه ويتعبوه

بعد مابيروح من توصيل بوه وامه ...

طلع امحمد للجنان .. وطلع الشناطى متعه هوا ومرته .. وطلعو ركبو فالتاكسى .. ولدهم وليد سابقهم للمطار عشان الاوراق

طلعو اميرة وامها بيش بيروحو للفندق والفجر بيطلعو للمطار

حاجزين حتى فالسيارة اللى بتوصلهم للمطار .. خدو تاكسى وركبو جميلة واميرة فالكراسى من الخلف.. عطت اميرة عنوان الفندق للسواق .. ولع السيارة واتجه للفندق ...فى نص الطريق قبل مايوصلو للفندق جميلة لون وجهها تغير وزبطتها بنتها طول ان زى اللى بتجيها ازمه قلبيه .. وعلى قولت يااام خيرك .. وضربات القلب عند جميلة بدت تتسارع.. فرفشت من بنتها وفرفشو السواق معاهم ...

اميرة ماسكه امها وتضرب فيها بالشوى على خدها تبى توعيها / ياااام خيرك شن جاك...ياوخى اعطينى شيشه اميه كان عندك

وجميله تشهق تقول اطلع فالروح .. صوتها مش طالع بكل

-السواق يمد فالميه / خودى يا بنتى ربنا يستر

اميرة تبل فى شفايف امها بالميه وتوعى فيها وتبكى

-السواق مخلوع/ اوديكو المستشفى

-اميرة تبكى/ ارفعنا بسرعه للمستشفى تربح بالله عليك

-السواق يجرى بالسيارة / فى طريق مختصرة ح وديكو منها

وبالفعل مشى السواق يجرى فالطريق وصل بيهم للمستشفى

لف فتح الباب وعاون اميرة فى تنزيل امها وهيا تقول اتخرج فالروح .. جى الممرض يجرى جايب سرير حطوها عليه واميرة مفرفشه وتبكى.. دخلو جميلة يجرو للحجرة وصكرو الباب وخلو اميرة برة .... السواق بارك الله فيه قعد معاها ماباش يروح ويخليها

-السواق/ يابنتى معندكوش اقاريب هنا تكلميهم

اميرة ادكرت ان خالها مهناش ماشى المطار بيسافر ... وتدكر فى وليد ولد خالها لما يقوللها "وراسك لما تجينى تزحفى وقتها تو نعرف كيف نتصرف معاك ونتملح من جلدك"

تلفتت للسواق/ لا ماعنديش اقارب .. جايا انا وامى دهوارى

-السواق/ يعنى ايه دهوارى ..

الممرضه من بعيد / بنت المريضه اللى جت دلوقتى فين

وقفت اميرة ومشتلها تجرى / انا بنتها يادكتورة

السواق مشى بسرعه لى اميرة متوقعه الممرضه بتقوللها امك ماتت

-الممرضه/ لو سمحتى شوفى الخزينه

-اميرة/ وين مكانها

-اشرت الممرضه / اهيه

مشتلهم اميرة تبكى / انا بنت السيدة الليبيه اللى خشت قبل شوى

-البنت متع الريسبشن / ام حضرتك لازم يتعملها قسطرة حالا

اميرة تبكى..ماسألتش لانها عارفه ان القسطرة تعنى تسريح

وامها دايرتها قبل سنه

-البنت فالريسبشن مدت ورقه/ مجموع الحساب كلو اربعة الاف جنيه مصري

-اميرة فتحت عيونها / ااه

يانارى هيا ماعندهاش الا الف جنيه توة .. لانها عابيه بتروح هيا وامها الليله ..وكل شى محجوز ...مش خاطر عليها انهم يبو فلوس ثانى ..

-اميرة / لكن انا ....

-السواق واقف وراها/ يابنتى عشان كدا بقولك لو عندكو قرايب هنا .. عالاقل يساعدوكو

واميرة مصرة انها ماتبلغش خالها ومرته وولده.... طول خطر على بالها مريم قريبه امها اللى جت زارتهم .. لكن مريم ماعندهاش فلوس تشكى وتبكى... اوووو حلها من عندك يا حلال العقد ...

وقف الممرضه جنب اميرة وفى يدها ورقه / نعمل الدخول ولا ايه يا مدام

قامت اميرة راسها ومنغير ماتخمم / طبعا اعملى الدخول

-الممرضه/ حتدفعى دلوقتى

-اميرة / لا اعطينى شوية وقت

-الممرضه/ قد ايه يعنى الحالة مستعجلة

-اميرة /اعطينى ساعه..لاااا ساعتين عالاقل ندبر فيهم راسى

-الممرضه/ تمام

اميرة مقعمزة عالكرسى بروحها وتخمم منين بتجيب المبلغ .. حتى لو كلمت خواتها توة مستحيل يقدرو يبعتوهولها فالتو واللحظه يبيله يومين او ثلاثه عالاقل..وحالة امها مستعجلة

كيف بدير بس ...

وبدت ترن فى ودنها جملة اعتدال لما قالتلها( لما تبدا يوميتك ثلاث الف جنيه ... يكون مستاهل وبعدين هادى اسرع طريقه حاليا لى تحصيل مبلغ كبير مع بعضه بلا جهد)

وفى خاطرها صراع قوى / معقولة يا اميرة تخممى هكى

.. تبيعى نفسك!!... ايه نبيع نفسى على خاطر امى..ماعنديش

طريقه ثانيه نجيب بيها مبلغ زى هدا.. الا لو كلمت ولد خالى وبردو حنبيعله نفسى بيش يساعدنى ... فالحالتين بنخسر.....

كلمى خواتك.. لا لا خواتى مش حيقدرو يديرولى حل توة ..

نمشى للسفارة وخلاص .. السفارة صكرت توة ومن بنلقى وشن بيديرولى اصلا وامى لازم ادير القسطرة توة .. ياحليلىىىى من هالعملة اللى صارتلى لا فالعلم لا فالدرى

قامت راسها تشبح للممرضه اللى تساوى فالاوراق/ يااااربي سامحنى .. ماعنديش حل ثانى بيش ننقد امى...

وتقنع فى نفسها / انا اصلا مش مخليتلهم وجهى....

رجعلها عقلها / نهار احرش .. كيف اندير هكى ..هكى نبيع نفسى ...كيف نمشى لمكانات زى هادى... اخرتها نمشى لى بار... لو مهما كان السبب مايعطيكش حق تبيعى نفسك يا اميرة ....

وقفت بحزم/ حياة امى نبيع روحى ومالى وكل ما املك على خاطرها ...

شبحت للسواق/ اسمع ياااا

-جاها السواق/ نعم

-اميرة/ شن اسمك

-السواق/ فرغلى

-اميرة / نبيك ترفعنى لمكان بنجيب منه فلوس

-السواق / الحمدلله اهى فرجت ... يالله نمشى

وطلعو للسيارة

___________________________________________

_

فارس وصل قدام البار...بالسيارة اللى مستأجرها .. ويحكى فالتليفون ..

فارس/ مفهمتش هوا بيركب والا لا

-مروان / الطيارة اتأخرت عليهم .. خليته فالمطار وطلعت .. خديت حوش ولد خالتى كيف واصلين بنرفعهم للفندق وانجيك

-فارس/ قصه تأخير الطيارة مش جديدة .. طول عمرهم الطيارات الليبيه تتأخر .. ولد خالتك حصل عليك فالمطار

-مروان يضحك/ حصل عليا يا راجل معش فيها كيف نفوته

-فارس / تمام انا فالبار كمل وتعال

-مروان / تمام انوصله للفندق اللى حاجز فيه وانجيك

نزل فارس من سيارته وعطى المفتاح للشاب اللى واقف برة بيش ايدرسهاله .. وخش للبار مشى لمكانه اللى يقعمز فيه ديما .. عالجهه اليمين عالطاولة .. طلب ويسكى .. جابله الشاب كاس كبير ..وقعمز بروحه ك العادة

_________________________________________

_

بعد ساعه ...

اميرة فالتاكسى فاتحه شعرها .. ودايرة مكياج صارخ ..

لابسه بالطو كمامه طوال ومستور .. لكن قصير ..اللبسه شرتها من محل .. وهوا نفس المحل تقدرى تخشى لداخل تمكيجى واتساوى نفسك وتدفعى

فالسيارة

-عمك فرغلى / يابنتى اللى بتعمليه دا حرام

-اميرة متعصبه/ انت عندك ثلاث الاف دينار تعطيهملى

-فرغلى/ منين يا بنتى

-اميرة / امالا خلاص ماتزيدنيش على مابيا

وصلو للبار

-اميرة/بالله ماترخى بيا مدامك اطوعت اتساعدنى .. خليك قريب هنايا..بيش نعطيك الفلوس ترفعهم للمستشفى وتخلص

-السواق/ تمام يابنتى

نزلت اميرة ورجليها يرعشو مع بعضهم .. ماشيه للباب ولا من قاللها انتى شكون ولا شن اديري هنايا ولا وين خاشه... خشت من الباب تلاقى الدنيا خايضه .. موسيقى قوية وناس ترقص وسكرانين ويضاحكو ... قعدت واقفه حتى البالطو القصير مافتحتاش من كثر ما متفاجئة باللى تشوف فيه

فالطاولة اللى مقعمز فيها فارس زوز ولاد يشتغلو

الولد الاول/ مين دى اللى دخلت .. وش جديد

-الولد الثانى/ باينها جديدة ...مالناش دعوة

انتبه فارس لى كلامهم ..... تلفت .. يلاقى بنت واقفه وهيا تتفرج مصدومه فالمنضر... واضح انها متفاجئة .. وكأنها اول مرة تخش المكان ...

اميرة ادور بعيونها فالمكان كله ... جت عينها على واحد مقعمز من بعيد ويشبحلها ....حولت عيونها .. وولت شبحتله لقاته قاعد يشبحلها ... هيا مش متعودة ولدلك شعور جسمها غلبها وزادت رعشه ايديها ورجليها..وواضح حتى على وجهها

فارس حس انها لفتت انتباهه .. منغير مايحس ... وقف من مكانه .. مشى خطوات متوجه جهه اميرة .. حس ان البنت مش مكانها .. كأنه يبي يفهم منها خيرها واقفه ومستغربه .. قرب منها.. وصل عندها

-فارس/ مساء الخير

-اميرة/ مسسساءء النوور

-فارس انصدم من لهجتها / ليبيه !!؟

-اميرة اتمتم/ اييي ليبيه ..المكان معبي ليبيات ..خيرك فى حاجه !!!

-فارس / انتى اول مرة تجى هنايا

-اميرة مش قادرة تشبحله/ وليش تسأل

-فارس/ اول مرة نشوفك

-اميرة شبحتله/ وانت تعرفهم كلهم

-فارس/ سألتك جاوبينى

-اميرة/ ايه اول مرة نجى

-فارس عجباته / وانتى شن جابك للاماكن الوسخة هادى

-قدمت خطوتين/ انصح نفسك قبل ماتنصحنى.. اهو حتى انت فيها الاماكن الوسخة

وقفت بنت قنينه جنبهم وهيا تضحك / غريبه انت من امتى بتوقف على بنات

-فارس/ تى بري يابنت الوسخة

-اميرة/ اهو البنت قالتلك ماتوقفش على بنات .. خيرك انا خشيت وانت شديتها فى جرتى ..خلينى فى حالى يا اخى

فارس يشبحله بعيون حارة / نبيك

-اميرة بدت ترعش من جديد/ ااه

-فارس/ نبيك تروحى معاى لى شقتى..انتى جايه تشتغلى ولا

-اميرة منغير ماتحس بنفسها/ نشتغل ايه..و سعرى ثلاث لاف جنيه مصري

-فارس/ تم الكلام

-اميرة ترعش/ تووووة تعطيهملى قبل كل شى

-حط فارس يده فى جيبه/ اهما وياخى بالدولار

مدلها خمسمائة دولار ... واميرة تشبح للفلوس ..حست ان البحر قدامها والعدو وراها .. ومع هدا كله مشكلتها تعتبر حكم انحلت ...

خدت الفلوس وتلفتت بتطلع

فارس/ وين يا شاطرة

-اميرة/ هيا نمشو وين ماتبى..والفلوس منعطيهم لى شخص

تلفتت بتمشى ...مسك فارس يدها/ هدا هوا اللى يشغل فيك

-اميرة/ ااه وجعتلى ايدى... لا مش هوا .. غير هيا اطلع

طلعت اميرة ومعاها فارس ...وقفت تشبح يمين ويسار.. لقت عمك فرغلى واقف بعيد بالتاكسى متاعه..اشرتله بايدها جاها يجرى ... مشتله على جنب

-مدتله الفلوس/ اجرى بسرعه للمستشفى ادفع الفلوس

-فرغلى / طب وانتى يابنتى

-اميرة/ خديت اسم المستشفى تو نعرف كيف نرجعله

-مدلها فرغلى كيسه/ جبتلك هدومك عشان تلبيسيها و تدخلى بيها المستشفى

-اميرة خدت الكيسه/ تمام مع السلامه

هدا كله وفارس يشبحلهم واقف فمكان مش بعيد

.

.

.

____________________________________________