رواية بسمة مدفونة في خيالي الحلقة الأولى
لقراءة باقي الحلقات : اضغط هنا
 |
| رواية بسمة مدفونة في خيالي الحلقة الأولى |
نُرشح لك هذه الموسيقى للاستماع إليها اثناء قراءتك للحلقة
الحلقة الأولى من رواية بسمة مدفونة في خيالي
ناظرت جدتها بتعب وهي تمسح حبات العرق عن جبهتها من فعل الحرارة : جدتي نرجع للبيت !
الجدة برفض : ما هو الحين انا متاكده انها الخايسه رح تمر من هنا تظن نفسها تهرب مني !
لكن من هالشنب اذا ما امسكتها !
رفعت حاجب بطفوله: جدة انت عندك شنب؟!
ترى الرجال يقولون كذا !
الجده وعيونها على الطريق : انكتمي يا طول لسانك !،
زفرت الطفلة بضجر وهي تناظر حولها بيوت متفرقة عن بعضها وبعض بيوت متجمعة حول بعضها ..الشمس بحرارتها رح تصهرها ومن ساعة جدتها واقفه بالحر هنا !
اقبل عليهم مرزوق بصوته الجهوري: ج وش تعملين هنا !
ام مرعي بقهر: انا اراويها هالكلبة اخذت الفلوس قبل اسبوع واختفت لكني متأكدة انها رح تمر من هنا
قاطعها : اقول امشي على البيت بدل ما تضربك هالشمس ...شوفي البنت كيف صار شكلها من الشمس!
وقبل ما تعترض نطق بصوت مرتفع : يا جدتي امشي !
ذبحنا الحر !
نزل لمستوى الطفله ومسح حبات العرق عن جبينها وبابتسامه : تعبانه!
هزت راسها بالنفي وهي ترد له الابتسامة !
قرص خدها وهو يتأملها بشعرها القصير المنسدل : يلا
ام مرعي بغضب وهي تعود ادراجها : وقسم بالله ما اتركها هالسروق ..صدق ما عاد فيه حياء بذي الدنيا !
انا الغبيه إلي اعطيتها الفلوس على بالي انها تكون بنت عالم وناس محترمه لكن هالنصابة دواها عندي !
عند باب البيت ناظرت حفيدها بقهر : والله ودي ارجع وانتظرها وامردغها بالتراب هالنصابة!
ناظرت جدتها وتكلمت بمصداقية الاطفال : وش جابك لها تراها دبه وانت عصلة يا جدتي اكيد رح هي تمردغك
صاحت بوجع الطفله لما شدت ام مرعي اذنها : لسانك الطويل هذا ا قصه !
ابعدها مرزوق
عن الطفلة بضحكه : وهي صادقة اتوقع لو تواجهتي معها الا تمردغك !
خلاص انا اتفاهم مع زوجها !
ناظرت جدتها وهي تفرك اذنها وعافسه ملامحها بطفوله : زوجها النصاب اخذ فلوسك وما أرجعهم تبغاه يرجع ديون زوجته الدبة !
ام مرعي : انا هذه ذابحها الليله !
يا ويلي من طول لسانها ..انا عمري ما شفت مثلها كل شيءتعرفه !
دخلت للداخل وهي تضحك بضحكات طفوليه رنانه !
التقت بزوجة ولد عمها بالصالة وهي حامله اخوها الصغير : وش فيك ؟!
ناظرت زوجة ولد
عمها بابتسامه وهي تهز كتوفها : جدتي تبغى تضربني !
هزت راسها بتفهم وجلست على الكنبه وهي تنبه عليها : كم مره قلت لك جدتك اتركيها لا تقاطعين عليها الكلام !
مدت برطمتها ما عجبها الكلام : يا خالتي تحكي كلام ما يدش عقلي !
واشرت على عقلها باصبعها الصغير !
ضحكت زوجة ولد عمها من قلبها على طريقتها : والله يا الروضه صار كلام جدتك ما يدش عقلك هههههههه !
والله لو تسمعك الحين الا تقطع اذنك !
دخلت ام مرعي وللحين الشريط شغال : والله لاطلعهم من عيونها !
مرزوق بضجر :،يا ليل ابو لمبه الظاهر اليوم ما لنا سيرة غير ذيك الزفتة !
تقدم منه ولده الصغير بابتسامه: بابا
حمله بهدوء وجلس جنب امه إلي للحين ما سكتت ما يدري وش يسكتها !
مرام وهي تتحسس بطنها البارز : رونق اطفي الغاز وتعالي !
هزت رأسها بطاعة وطلعت من المكان !
ام مرعي بانفعال : انا اقول الحين اطلع لزوجها وكاد له كلمة عليها ويرجع الفلوس لي !
مرزوق بضجر : فصبر جميل !
يا جدتي وبعدين
قاطعته بغضب : انا ما احد ينصب علي !
ترى ما احب النصابين إلي يأخذون فلوس وما يرجعونها للناس
دخلت عليهم وهي تتكلم باندماج مع جدتها : بس انت تحبين عمي مرزوق مع انه نصاب !
فتح مرزوق عيونه : عيب يا بنت !
ام مرعي : مب اقولك دوم هذه البنت لسانها رح يجيب لها المصايب !
مرزوق بضحكه وهو يفتح ذراعه لها : واحلى نصاب لاجل هالعيون الحلوة !
جلست جنب مرزوق بابتسامه : قول يا رب يصير معنا فلوووووووس كثيره وتسدد ديونك ونشتري كل شيء
قاطعتها ام مرعي وهي تلوي فمها : اذا حجت البقر على قرونها وقتها يصير بمرزوق فائده !
من وين تيجيكم الفلوس وحضرته جالس على بسطه يبيع اغراض للعجايز !
هذه تسمينها فلوس !
والله يا مرزوق
لو تنفتح عليك طاقة من فوق كلها ذهب الا تبقى مطفر وما معك فلس لانك ما في عقلك مخ وما تفكر مثل القربة المثقوبة قد ما تحط فيها موية تبقى فاضيه !
وانت هذا حالك !
رد بابتسامه : والله ما عرفتك يا استاذة اللغة العربيه !
من متى تعرفين بالصورة الفنية وتشبيهات بعد !!- والله حركات من ورانا !،
دامك شاطره ليه ما درستينا الواحد فينا يا دوب يعرف يفك الخط !
ام مرعي مطت شفتها : والله اني ذكيه بس اهلي الله يسامحهم ما خلوني اكمل تعليمي والا انا الحين دكتوره !
مرام : ليه منعوك تكملين دراسة !
ام مرعي مطت شفتها بحسره : لاني رسبت بنفس الصف مرتين فابوي الله يرحمه قال حنا نرسلك تقيسين الطريق وترجعين اجلسي بالبيت ابرك لك على الاقل نستفيد منك وتساعدين امك بشغل البيت !
اما النصابة اهلها تركوها تكمل تعليمها مع انها اكسل مني !
والله ما اتركها بحالها والا تدفع الفلوس غصب عنها
مرام ناظرت زوجها وابتسمت : رجعنا يا طير يلي !
رونق تناظر مرزوق وهو يمسح على رأسها ويتكلم:من سنة ما تخلص سيرتها !
نزلت عن الكنبه وجلست بجانب مروان اخوها تلاعبه بابتسامة طفوليه !
دخل عليهم جاد وجه مخلوط باللون الاحمر والاسمر من فعل الشمس وباندفاع تكلم :-يبه يقولون في دورية شرطه بالقرية
فز مرزوق على حيله بفزع وقفته ام مرعي : وش فيك اجلس هم وش عرفهم فيك !وان طرقوا الباب تطلع لهم الملسونة هذه وتقول لهم ما في احد بالبيت
ناظرتها رونق وهي رافعة حاجب بطفوله: انا ما اكذب !
الجده باستنكار :والله !
كل الكذب إلي تنسجيه والحين ما عاد تكذبين !
وقفت وهي ترفع يدها بحماس : إلي يقرب من عمي اضربه !
انا اضرب بدون ما اكذب
انرعب مرزوقمرزوق
وهو يسمع دقات قوية على الباب تكلم بغضب : اكيد الزفت هوإلي بلغ عني !،
قلت يصبر كم شهر
ام مرعي بنهر: اركضي افتحي الباب وقولي ما في احد بالبيت
رونق وقفت وهي تحك راسها : اكذب يعني
ركضت للخارج بسرعةلما مسكت الجده نعالها ....
**
**
**
بعد العصر جالسة على احدى البسطات جنب جدتها بملل طفولي واخوها الصغير بجانبها !
ام مرعي بصلابه : اقولك ما تمشي معي تبغين بهذا السعر يا هلا ما تبغين مع السلامه !
الحرمه بتصميم :اذا اخذت هذه مع الاغراض وش تحسبينها لي !،
ام مرعي وهي ترتب البضاعه ؛ ولا فلس واحد !-
مطت الحرمه شفتها بقهر : امري لله هاتي الاغراض !
ام مرعي بعد ما غادرت الحرمه مطت شفتها : والله عالم احترق تحت الشمس حتى اوزع البضاعه ببلاش !
هالبخيله تموت اذا طلع فلس من جيبها!-
رونق بعبوس : سبحان الله مثلك يا جدتي !-
ماانتبهت لكلامها ام مرعي وانشغلت مع حرمه ثانيه ...الحرمه تناظر رونق : هذه ابنة خالد الله يرحمه
ام مرعي : الله يرحمه راح وترك خلفه هالبزران اراكض بالدنيا حتى اصرف عليهم !-
الحرمه بابتسامة : باكر تكبر وتزوجينها وتفرحين فيها
ام مرعي وهي تهز راسها : ان شاء الله الله يطول بعمري حتى يكبرون وارتاح انهم بخير !
ناظرتهم رونق وحولت نظرها للجهة الثانية بعد ما بلعت غصتها ....
ناظرت اخوها جالس بهدوء ويناظر اطفال يلعبون جدتها تمنعهم من اللعب تخاف عليهم من النسمة !-
تتمنى امها وابوها عايشين !
التفتت لها ام مرعي : تعالي شوفي لي هنا مثل هذه القطعة !
قامت وتوجهت تبحث مع جدتها بملل من الروتين الحياتي الممل !
اعطت جدتها : هذه !
ام مرعي سحبتها منها : ايوه !
الحرمة : ولدك مرعي ليه ما يساعدك بمصروف هالأيتام !
رونق مطت شفتها وهي تغلظ صوتها حتى تقلده :يقول يا دوب اصرف على عيالي حتى اصرف على دار الايتام !
ام مرعي قرصتها بخفه بكتفها حتى تسكت ...عفست رونق ملامحها من القرصه وتابعت كلامها : وش فيك يا جدتي نسيتي لما قام يضربك لانك طلبت منه فلوس
ام مرعي اعطتها نظرة نارية بعد ما شهقت الحرمه : ولدك يضربك !
ام مرعي بترقيع : هذه الخبله قصدها عن ابن مرعي الصغير يا حليله بعده صغير واحب اعانده
تكتفت رونق : الا اقصد ولدك العووووود الكبير ما هو ولده الصغير
ام مرعي بغضب : اقول اجلسي عند أخوك اعوذ بالله من لسانك الطويل ما ادري لمن طالعة كذا !
رونق ببراءة أشرت على الحرمة الواقفه : ام سويلم تقولي لي لسانك بشعبتين مثل جدتك ام مرعي
الله يكفينا شر لسانها !
الحرمه فتحت عيونها ونلجم لسانها ما تدري وش تقول او ترقع
ام مرعي اشتعلت عيونها بغضب : انا تقولين عني كذا ...ما هقيتها منك !
الحرمه بترقيع : بزر وش يفهمها يمكن مخربطه بحرمه ثانيه
قاطعتها ام مرعي بغضب : حفيدتي ما تكذب وترى دواك عندي يا قليله الحياء
تركتها الحرمة وغادرت ما لها حيل توقع بلسان ام مرعي !
ام مرعي للحين مولعه من الغضب ...ناظرت رونق جالسه جنب أخوها وتلاعبه وتضحك بطفوله : وليه ما قلت لي من زمان يا زفته !
والا كان مسحت فيها الارض اول ما جاءت ..مال عليها جدار !
رونق ناظرت جدتهابلامبالاه : نسيت !
وبأمل كلمت جدتها : ليه ما نسكن بالمدينة ؟!
يقولون كل شيء فيها والحياه هناك اجمل !
قاطعتها ام مرعي : والله فكره زينه على الاقل نرتاح من وجوه الفقر إلي نشوفهم كل يوم !
وقفت بسعاده:-يعني موافقه يا جدتي !
ام مرعي : نروح اسبوع نجرب الحياه هناك ونرجع
قفزت بالهواء من السعاده واخيرا رح تروح للمدينة !
غمضت عيونها وهي تحاول تتخيل شكل المدينة كيف رح يكون !
ام مرعي تنهدت وهي تفكر بحال هالاطفال المستوصف يقولون لها لازم تراجع بالمستشفى ..رفعت نظرها للسماء وهي تردد بداخلها يا ربي اعني على حمل هاالامانه !
اقترب منهم كالعاده مرزوق ومعه صديقه : حيها ام مرعي !
ام مرعي : هلا
مرزوق ناظر صديقه تعال شوف يمكن يعجبك شيء وتشتريه !
ابتسم صديقه لام مرعي :،كيفك يا خالتي !
ام مرعي وهي تعرف الوضع المادي لهذا الشخص جيد وساكن هنا لقربه من الشركه إلي يشتغل فيها : هلا الله يحييك !
بخير يا يمه !
كيفك انت وكيف شغلك !
رد بابتسامه : بخير الله يسلمك !
وقفت رونق بابتسامة واشرت لصديقتها بالمدرسه وبصوت عال : تعاااااالي
ام مرعي ناظرتها بحده : هذه البنت لا تلعبين معها امها للحين ما سدت الديون إلي عليها !
رونق عفست ملامحها :- يعي اقاطع كل المدرسة لانهم ما اعطوك فلوسك !
مرزوق ابتسم لها : صادقة !
رجعت تلوح لصديقتها وجدتها انشغلت بالبيع ...تحس الدنيا ما هي واسعيتها واخيرا رح تروح للمدينة !
**
****
**
ناظرت الملفات قدامها يا كثرهم ...تحسه يتعمد يثقل عليها الشغل حتى تطفش وتترك الشغل بارادتها لكن حامض على بوزه مستحيل تخسر أمامه !
تنهدت بوجع مر على زواجها سنة ما شافت ابنتها !
يقولون مع الايام بتنسى لكنها للحين وجع الفقد مدفون بقلبها !
صحيح مع الأيام واندماجها مع اهل زوجها تعيش حياة طبيعية وتعدت ازمات كثيرة ...لكن زادت مخاوف عندها للحين ما تم الحمل !
امنيتها طفل تعيش معه كل مراحل الطفوله !
وبنفس الوقت خايفة يضيع مثل ضاعوا
قطع افكارها دخوله لمكتبها بيده قهوة وهو يبتسم : حيا الله ام وسيم !
ناظرته وهي رافعه حاجب بعد ما وضع القهوة قدامها
ضحك بخفه وهو يشوف الملفات امامها :-عجلي بالملفات عنا صفقات!
تناولت القهوة وارتشفت منها بقهر: ليه هالملفات ما كانت على دور ابو محمد ليه لما استلمت هنا صارت السالفة تطفيش ! انا لازم اشوف المدير واتفاهم معه!
عقد حواجبه : ليطق لك عرق وانت معصبة!
المدير ما هو موجود وانا مكانه !،عندك اعتراض تكلميني أنا !
وبعدين سيرة ذاك ما لها داعي ! عندك شغل تكملينه بدون ضجر مب عاجبك الباب يوسع جمل !
ويا حلاتها الجلسه بالبيت!
-قرصته بعيونها : جالسه على قلبك هنا !
ابتسم : براحتك !
تنهدت ورجعت تشرب القهوة بهدوء وهي تتكلم : عمتي رح تمرني بعد ساعة عشان ترتيبات زواج اختك
ظهر على ملامحه الضيق من تدخلات امه دوم طالعه وساحبه زوجته معها والمشكله م يعرف يجلس بدونها والحين اكيد ما رح يرجعون الا متأخر : طيب والغداء ؟!
ردت : ما رح ننتأخر !
وش قلت؟!
رد بهدوء :-متى يخلص هالزواج ونشوف اخرتها !
ابتسمت بمحبة لهذا الانسان غصب عنك تحبيه من تعامله الراقي والهادي !
عمره ما مد يده عليها او صرخ بوجهها او اشتكى عنها لابوها !
وهي بنفس الوقت محترمه نفسها تعامل اهله باحترام وتقوم بواجباتها تجاه زوجها على قدر استطاعتها !
تكلم بهدوء : وش رايك نطلع نتمشى شوي برا الجو حلووو غائم !-
وقفت بثقل وي ترتب الملفات : كان ودي اطلع معك بس انت شايف الشغل كثير وابغى انجز قبل وصول عمتي !-
ما اظهر ضيقه رد بنفس الهدوء،: براحتك !
اخذ قهوته وخرج بهدوء من مكتبها !
تندمت بداخلها على تصرفها ...بس هي عملت كذا لعل وعسى يقولها خلاص اتركي الملفات وتعالي !
لكنه عنيد وهي رح تكون اعند منه!،
زفرت بضيق ورجعت تجلس بمكانها تحس نفسها واقفه بمكانها ناهي راضيه تتحرك !
اليوم سمعت من امها انه جدها مريض بالمستشفى قلبها رافض يسامحه لانها تحس كل إلي صار لها بسببه او كان له يد في ذلك !
شتتوها وضيعوا مستقبلها ...ما رح تسامحهم ابدا !
قلبها للحين ينزف ما تعافى من الطعون القديمة !
**
**
**
**
ناظرت عمها مرعي الغاضب وهو يكلم امه: وش يوديك للمدينه ؟!
انا ما لي حيل هناك اجلس ادور فيك لا وبعد رح تاخذ البزران معها !
عفست ملامحها رونق من تدخله !
ام مرعي وهي تجلس : ما عليك كل مصاريف الطلعة علي !
قاطعها : بدون ما تقولي اكيد رح تكون عليك !والله فلس واحد ما معي !
وهذه ام مرزوق اسآليها !
ناظرته رونق وهي عابسه : ما معك فلوس ليه تجيب كل هالبزران !
أشرت على عياله !
قبل ما يتكلم نطقت ام مرعي : وهي صادقه !
لعنبو ابليسك انت بالسنة تخلفوا بزران اثنين !
12 بنت واربع عيال !
من وين تلحق عليهم بالمصروف !
لا وفوق هذا تزوج البنات يرجعن عليك بعيالهن بعد !
سكتت وهي تحس بشيء ضرب راسها !
ناظرت الارض وشافت النعال إلي ضرب براسها ) !
واحفاد ولدها متشابكين مع بعض وحتى الامهات اشتبكن مع بعض !
مرعي بصوت عالي :بس خلاااااص الله يأخذكم من عيال !
وش هذا !
رونق تناظر حولها وهي تعد بطفوله الموجودين وازعاجهم وصراخهم طالع لخارج البيت!
ام مرعي وهي توقف : قومي يا رونق اعوذ بالله من هالازعاج!
رونق وهي مستمره بالعد : لحظ14،*15 ،16
سحبتها ام مرعي من شعرها : امشي قدامي حشى هذا معسكر!
عز الله لو جلست لباكر ما تكملين عدهم !
ما معه فلس واحد والله راتب وزير ما يكفيك !
ابعدت واحد من البزران من قدامها بضجر : استغفر الله وش هالعيال هذي !
حست بأحد سحب شالها بقوة وهو متمسك فيها : اايني بتاتا
رفعت شالها ونقابها وهي تعدل فيها وبعدها التفتت على الولد ونزلت فيه ضرب : هذي بتاتا يا بتاتا الله ياخذكم من عيال !
ذول قرود مب ادميين !
عفست ملامحها لما بدأ يبكي الطفل واشتغلت صفارات الانذار !
جلست رونق على الارض تمسح على شعره بحنان طفولي : خلااااص لا تبكي !
خذ هذه بتاتا واشتري إلي تبغى !
سكت الطفل وهو يبتسم للفلوس !
مسحت دموع الطفل بيدها الصغيرة : يلا يا بطل لا تبكي !
هز راسه وركض يشتري من البقاله!
ركضت خلف جدتها حتى تلحق عليها واخوها الصغير ماسك بيد جدتها !
زفرت لما وصلت لجدتها : ليه ما انتظرتوني!
ام مرعي بابتسامة : صجوا رأسي هالبزران !
ناظرت جدتها والابتسامه باينه من عيونها ..تنهدت والفرح يدغدغها وهي تشوف جدتها مبسوطة !
تحبها كثير وما تتصور حياتها بدون جدتها !