رواية أميرة قلبي الحلقة السادسه - زهور جمال الدين

فى مكتب طلال ...

طلال يتكلم فالتليفون

-عفاف / امالا تبنى نستنى وانت تشيت فيا النار...صكرت منك نزلت طول المعمل تحت العمارة

-طلال يضحك/ صار طلعتى تجرى والعه فيك النار

-عفاف/ والله مانحكيلك..صراحة شغلتنى ..قالى هابيتايتس

ومزال يبينى نراجى

-طلال / وامتى نتيجه التحليل

-عفاف / تحليل الحمل بس بيطلع توة .. باقى التحاليل العشيه

-طلال/ بتراجيه ولا بتروحى .. خوديه حتى بعتالى مع باقى التحاليل وخلاص

-عفاف/هوا هدا بنروح توة ..وبعدين نجى ناخدهم كلهم

-طلال /باهى ساعدى روحك واشري معاك خبزة بيش تفطرى

-عفاف/ حبيبى لحظه بس خليك عالخط اهو البنت تنادى شكله بتعطيهولى التحليل

سكتت عفاف شوى .. وبعدين قامت التليفون

-عفاف/ حبيبي اهو عطتنى الورقه مفيش حمل

-طلال غمض عيونه /باهى الحمدلله

خش مروان لى مكتب طلال / السلام عليكم

-عفاف سمعاته / هيا باى توة... نحكو بعتالى

-طلال/ مع السلامه ياحاج ...

صكر التليفون وشبح لى مروان / وين كنت

-مروان / كنت فى مكتبى

-طلال / لااا بكرى لما ركبت وين مشيت

-مروان يضحك/ ركبت للدور الخامس

-طلال / عندك اوراق راكب تجيب فيهم

-مروان مبتسم/لااا عندى قمر.. راكب نشوف فيها

-طلال / قمر!!؟ ..منوو؟؟..اكيدة مش تغريد 😁..

-مروان / تى منو تغريد هادى

-طلال انتبه / اااه بالك قصدك عالبنت الجديدة اللى اسمها اميرة

-مروان سايح😍/ اميرة..وهيا اميرة

-طلال / لاااا هيا الحقيقه ملفته للنظر

-مروان / بينى وبينك البنيه عجبتنى

-طلال انتبه / تكلمت معاها قصدك !! احكيلى احكيلى😁

________________________________________

_

فالبركيدجو ...

اميرة ركبت وفارس قعد واقف .. حس انه كبر معاها هلبا فالدوة وجرحها .. ركب سيارته ودرسها جنب سيارتها .. وركب للدور الخامس

خش للمكتب / وين اميرة

-هناء/ عند الحاج

فارس حس انها بتحرش بوه فى تصرفاته او شى...فقرر انه يخش وراها للمكتب متع عمك حمد ...مشى للباب طقطق وخش ... يلاقى شيبانى كبير مقعمز عالكرسى واميرة واقفه فى جنبه

-حمد متعصب مارضاهاش فى مقامه / انت شن تقول رانا هنايا الادارة العامه الموضوع اللى تحكى فيه مش تبعنا .. وبعدين البنت ماكملتش معانا العشرة ايام .. بالك تحسابها تخدم عندنا ليها عشرة اعوام

وشبح لى اميرة وماد يده / هدا شنو يا اميرة

-فارس قدم / خيرك يا اميرة شن فى ..وهدا منو

" زعميتا فازعلها ماتقولش عليه كان يتعارك معاها لوطا😁"

-اميرة/ بالله عليك تسامحنى استاد حمد .. والله مانعرف انه جاى ..

وتلفتت للراجل/ يابوى نوض معاى توة ...نطلعو من المكتب ونتفاهمو برة

-فارس اتفاجأ/ بوووك 😳

-المهدى/ لاااا لا شن نتفاهم معاك برة ..مانيش طالع لين نتفاهم مع التريس هنايا

فارس قرب من اميرة/ شن فى

-حمد / شنو بتتفاهم مع التريس تحساب روحك تشري فى سيارة ولا قطعه ارض

اميرة اضايقت حدها / يابوى ياسر الناس تتفرج علينا تعالة نتفاهمو برة

-فارس يكلم فالمهدى/ فهمنى انا ... انت شن جاى تبى يا حاج ...وحاضر

اميرة عيونها مدمعات تلفتتله / لو سمحت موضوع خصوصى .. ومفيش داعى تدخل فيه

-المهدى/ لا خصوصى لا شى..انا بوها.. ومستحق فلوس نبى ناخد على بنتى سلفيه بعد خدمت شنو كفرناااا ولا درنا عيب

وتلفت لى حمد / لكن الراجل هدا نصاب ...داير روحه كلمه سلفيه اول مرة يسمعها

-حمد رقاله/انا نصاب يلى ماكش محترم

-فارس/ يابوى بالشوى ماتحرقش دمك

-مهدى/ بووووك.. معناها الزوز نص واحد

-فارس يشبح لى اميرة / هدا بالفعل بوك !!

-حمد/ لا حول ولا قوة الا بالله ..شنو الفوضى هادى المكتب

هدا مش مكان للدوة الفاضيه هادى .. وقلنالك بنتك كيف خدمت يابنى ادم

ويشبح للباب/ منهيا اللى دخلاتك هنايا

-المهدى/ مادخلنى حد ..انا سألت على بنتى قالولى هنايا ركبت وخشيتلك ..وبعدين حتى كانها بنتى كيف خدمت عطونى السلفيه واهى تخدم ليه ليه واخصمو منها

-حمد يشبح لى فارس/ ماهو لقاها وكاله بلا بواب ..معاه حق

يخش ويقعمز يتفتى .. اسمع اللى برة الزوز خصم اليوم ااه

-اميرة مغصوصه وبتبكى من كلام فارس فالبركيدجو وزاد عليها بوها/ بوى تربح تعالة معاى لى مكتبى نتفاهمو انا وياك واللى تبيه انا نديره

-فارس/ نوض معاى انا اللى نعطى فالسلف...وتو نوقعلك

-المهدى وقف/ باهى تعالة هى

وشبح لى عمك حمد/ المعاملة اللى درتها غلط راهو

حمد يشبحله وعيونه حمر .. ماعنداش لعب فالشغل😁

-فارس شبح لى اميرة / اهدى..ماتخافيش مش حيصير شى

.. تعالى ورانا

اميرة تشبح لى فارس وساكته.. طلعو وطلعت وراهم

________________________________________

_

فى غرفه طلال

طلال ومروان مقعمزين مع بعضهم ويهدرزو .. مروان يحكى على اميرة وطلال يسمعله

خشو امين وانيس/ السلام عليكم

-طلال ومروان / وعليكم السلام

-مروان وقف / نستادنكم شوى

-طلال يضحك / ياراجل ارزن وشد مكانك

-مروان طالع وهوا يضحك / صكر فمك يامسخ

طلال يضحك ...

-امين/ خيره مروان

-طلال /شاغلاته البنت اللى اسمها اميرة اللى فى الادارة فوق

-امين/ شاغلاته 😁.. كيف شاغلاته

-طلال/ يعنى معجب بيها .. وشادها فجرتها

-انيس اتكى للخلف انتبه لى اميرة / وهيا طايحة زيه ولا شنو

-طلال/قالك طايحه هاهاها .. تى قال هيا متندريش عليه انه يشتغل فالشركة اصلا

امين وطلال يضحكو😁 ...

-امين/ ديما نقوللكم مروان طيب

-انيس قاعد متكى ويخمم فيها / هوا طيب....وحتى هيا قنينه وتستاهل انه يهتملها

-امين/تبو الحق .. لو ناوى الزواج والحلال خلى يشد فجرتها ويجرى..لكن لو كانت نزوة..وبي سوء سمعة البنت يبعد بنزواته بعيد عن موضفات الشركة

-انيس/ لا زواج لا دياولى .. شن بيدير بيه ارتباط بلا فايدة

-امين/ كيف بلا فايدة ..وبنتك اللى حاملة اسمك مافيهاش فايدة

-انيس/ هادى الفايدة الوحيدة وين الفايدة الثانيه

-امين / سبحان الله تقول مش نفسك اللى قبل شوى كنت تحكيلى على ليلتك امبارح ..وتوريلى فى رقبتك وكتفك كيف رايحات دوائر زرق منها

-طلال تقول من ضربه على راسه فاتح عيونه وواضح عليه متفاجأ / من منو!!!!!؟

-امين / من مرته ...من شكون يعنى

طلال حل فمه ومعش يشبح فى شى ظلمت قدامه

-انيس يضحك / والله ماتتحشم.. يعنى نحكيلك تفضحنى

طلال قاعد مصدوم ومانطقش لان عفاف تحكيله عكس هكى

-امين / غير ورى لى طلال ورى

-نزل انيس رقبة السوريه وهوا يورى وفرحان ويتباهى / شوف 😁

طلال يشبح فى رقبه انيس من تحت زرقا ..مسمئز وساكت

-امين يضحك/ غير شوفها داسها بي رقبه السوريه

-انيس يضحك/ امالا نخليها باينه للموضفات

-وتلفت لى طلال / والله ياراجل عيشتنى ليله امبارح .. ولا فالاحلام

-امين يضحك/ قالك هدا كله فى جرت فيلم حضروه مع بعض ...وصار فيهم ماصار

-انيس يضحك/ هاهاهاهاهاهاها

طلال معش يشبح قدامه تبكش مالصدمه ..

خدى تليفونه ووقف/ نستادنكم شوى ..تو نجى

وطلع من المكتب

___________________________________________

_

فى الادارة فوق

طلع المهدى وفارس ووراهم اميرة.. مشو لى مكتب فارس..

اميرة خشت مع بوها ..وفارس ستادنهم يجيب فى قهوة من الممر متع قدام مكتبه الدور ...هوا زعميتا يبيهم يقعدو بروحهم .. قعمزو اميرة وبوها عالطاولة الكبيرة عالجنب اللى فى مكتب فارس ...

-اميرة / ليش هكى يابوى تفضحنى قدام الناس

-المهدى/ وانا وين نمشى وشن ندير.. المركب اللى كنت نطلع فيها للبحر غرقت.....وحتى حقها مزال ماكملتاش للى مافزعتلى وحدة فيكم

-اميرة / من بيفزعلك بس ..خواتى متزوجات وعند رجالة احنا ماليناش علاقه بيهم .. وامى مطلقها وانا الاسبوع هدا بس كيف خدمت منين بنجيبلك فلوس نعاونك بيهم

-مهدى / باهى توة انا امر واقع واستحقيت.. نجى لى بنتى تعاونى ولا نمشى نساسى قدام الجوامع

-اميرة دموعها نزلو معش تحكمت فيهم / انت قداش تبى

-المهدى/ هما 5 لاف .. كان تقدى تحصليلى منهم ثلاثه باهى

-اميرة / تو نبيع سيارتى ونشوف قداش نقدر نعطيك وقداش نقدر نخلى

-المهدى/ نبيهم الثلاثه لاف ضرورى

-اميرة /والله يابوى مانقدر نقعد منغير سيارة وانا كيف بادية العمل ..

خش فارس وفى يده مقين قهوة / السلام عليكم

-مهدى/ عليكم السلام

-حط فارس المق قدام مهدى/تفضل

وشبح لى اميرة جت عينه فى عينها .. حولت عينها طول

انفتح الباب خشت تغريد وجهها متغير / فارس ترا لحظه

-فارس/ شوى و جايك

-تغريد / لا لا توة ضرووورى

طلعت تغريد وصكرت الباب

فارس يشبح لى مهدى/ ماتروحش... شويا ونجيك

-مهدى/ باهى

طلع فارس وخلاهم

-اميرة/ يابوى نوض روح توة ونتفاهمو العشيه

-المهدى يكشخ/ ماك سمعتى الراجل قالى راجينى

__________________________________________

_

فالممر ...

-تغريد / انا وهناء دارلنا خصم عشرة ايام ... وتقريبا حتى انت دارلك معانا لانك النايب

فارس يشبحلها

-تغريد / وقالى جيبيلى ورقه قرار فصل .. شكله بيديره لى اميرة يا نارى ...خشله فيسع كان تقدر تلحق عليه

-فارس/ ااه ... قرار فصل ..حولى

ومشى لى مكتب بوه خشله وصكر الباب ..

حمد ترا شن يكتب فى ورقه عالمكتب ..

-فارس/ شن ادير يا حاج

-حمد / ندير فى قرار فصل لى اميرة

قرب فارس من الطاولة وسحب الورقه اللى يكتب فيها حمد

-حمد / غير شن ادير ... هات الورقه

-فارس/ انت اللى شن ادير.. اميرة مش حتطلع من المكتب

-حمد/ البنت سببت ربكة وتجاوزت اللوايح ..وح تنفصل ...

-فارس/ وكانا بوها جاها ..وين اللوائح اللى تجاوزتهم هيا

-حمد/ لما بوها ينعتنى بالنصاب ومانتخدش موقف ...معناها الكل بيتمادى

-فارس/ ومن سمعه نعتك بالوصف هدا .. المكان كان مغلق على ناس معينه وتمام مشت الامور

-حمد /اى امور اللى مشت .. شغلنا مافيشى عواطف ..لو بنتعاملو مع اى موضوع يصير بطريقتك هادى كنهدا راهو ماوصلناش اللى احنا فيه توة....

-فارس/ لكن اميرة ...

-حمد / البنات اللى برة لازم يتعاقبو لان فى شخص فاتهم ووصل عندى منغير علمهم ....واميرة لازم تنفصل لان فى حد من طرفها اطاول عالادارة ......هكى الوائح ولا انا غالط

-فارس مزق الورقه/ اسمع يا حاج فالوقت الحالى صعب نفصلو اميرة لان احنا اللى مستحقيلها اكثر ماهيا مستحقتنا

..واللى صار مش عيب .. اب طلب سلفه عن بنته .. يا اعطيه يا ارفض ..وتم

-حمد/ ماهو مستفز حرقلى دمى الله احرق دمه عالصبح.. امالا انا يقول عليا نصاب المسخ هدا

-فارس/ حصل خير .. وامسحها فيا انا

-حمد / لكن الخصم قاعد والله مانى محولة ... لازم يعرفو انهم غلطو.. وانت معاهم فالخصم

-فارس/ ثلاث ايام خصم سادهم .. علاش عشرة ايام هلبا

وطلع من مكتب بوه للممر .. لقى اميرة مقعمزة فى مكتبها .. وحاشيه راسها فالاوراق اللى قدامها مش قادرة تقيمه متحشمه مالبنات سببتلهم فى خصم .... ومروان كيف خاش للمكتب😁

_________________________________________

_

اااه يا كبدى طلال طلع زى الطلقه .. مايشبح فى شى الا فى عفاف اللى بايته ليله عسل وهوا غاير قريب بيموت

قام التليفون واتصل برقمها ردت

-عفاف/ ايووووه حبيبي

-طلال / حبيب امك يا مسخة يا خاينه يا متع التريس

-عفاف/ طلال ..حبيبي خيرك

-طلال / مش تقوليلى ماترقديش معاه راجلك ..وكان رقدتى تسايري فوق النفس

-عفاف مخلوعه/ وشن جابه على بالك الموضوع هدا توة

-طلال / ماجاش ع بالى .. شفته بعينى كيف مقطعاته تقطيع ومخليا جسمه كله دوائر زرق

-عفاف/وراس حبيبي هوا يستهبل عليا امس..سكران ويتفرج على فيلم قالى نبى جسمى يبدا زيه اللى فالفيلم بالزبط

-طلال / طبعا وانتى المسكينه الحمل الوديع اللى سايرتيه بدون ماتحسى بشى

-عفاف بدت تبكى/ طلال .. حبيبي والله هوا سيف عليا وماكانش فى وعيه خفت منه

-طلال / كدابة...

-عفاف / طلال انا .....

-طلال صكر عليها الخط / تى بري يا خامرة

_________________________________________

_

فى مكتب اميرة

مروان خش للمكتب ووراه فارس ....

-فارس / مروان هنايا ... انشاءالله خير ..نخدموك فى حاجه

تغريد تمد لى مروان فى مجموعهه اوراق فى يدها / هدا نص الورق والنص الثانى يتسلم بعد مايرجع هدا

مروان شبح لى فارس وابتسم / الحاج فى مكتبه ولا طالع ياتغريد

تغريد وقفت / موجود اكيد

وتلفتت لى هناء/ نجيب قهوة ونجى

-هناء/ تمام

-مروان /هناء ترا استادنيلى منه الحاج بنخشله

-هناء/ هوا يراجى فيك .....تفضل

خش الشاب/ هناء .. ينادى فيك الحاج

-هناء/ اهو جايه هى ..

وتلفتت لى مروان/ تفضل معاى استاد مروان

-مشى مروان للباب بيطلع شبح لى فارس وضحك/ خيرك يا فارس.. شن مشكلتك كل ماتشوفنى واقف هنايا تتكنطى

-فارس/ وعلاش بتنكنطى.. غير ماتعطلش خدمتك واوقف وين مايعجبك

-مروان / هيا نستادنك توة

ومشى لى مكتب عمك حمد هوا وهناء ....

__________________________________________

_

فى الكافتيريا

انيس مقعمز فى طاولة ..قدامه فنجان قهوة ...

يجبد فالدخان ويخمم /صار مروان يتكم فى اموره بكرى بكرى يختار ويحدد ويخلينا احنا فالفضله ..

قام فنجان القهوة ورشف رشفه/ مش انا اللى تخليلى الفضله يا مروان الكلب ... وراس امى الغاليه ماك رافعها البنت لين ناخد منها انا غايتى

رد الفنجان عالصحن / طبيعه البنات فالدنيا كل وحدة وعندها مفتاح .. فى اللى مفتاحها غالى .. وفى اللى خفيفه مفتاحها رخيص ....والبنات الجدد اللى درنالهم عقود... كل وحدة باينه من وجهها جعانه ولا عينها مليانه.. توة البنت الجديدة امل بي شكارة شكلاطه ماتسواش خمسين جنى طاحت طول..وفايزة قاومتنى قد ماتقدر وفالاخير ساعه رولكس جابتها على منقارها...وكل وحدة وثمنها

مد يده خدى رشفه ثانيه من فنجان القهوة / لكن البنت هادى اميرة شكلها راقيه ومفتاحها عالعلالى.. خطفوها طول وطارو بيها للدور الخامس قبل ما يطق فيها الدور هاهاها

لكن انا مايفوتنى شى وجايها جايها الدور ماعندها وين هاربه

خشت تغريد للكافتيريا.. وقفت عالكاشير طلبت قهوة ..خدت واصل ورفعاته للولد .. مدتهوله وتلفتت بتمشى لاى طاولة تقعمز عليها مش تراجيه ...

لما تلفتت لقت انيس مقعمز ....مشتله

-تغريد / صباح الخير استاد انيس ..

-انيس ماخاطراش فالهدرزة / صباح النور يا تغريد

-تغريد / باهى لقيتك هنايا كيف منمشيلك فى قسمكم

-انيس/ تفضلى قعمزى انشاءالله خير

-جبدت تغريد الكرسى وقعمزت / معش جبتنا اوراق مناقصه تونس .. والملف صنفناه ...وقعدت نراجى فيك وانت شكلك نسيتنى

-انيس جبد الدخان/الاوراق عندى فالمكتب غير ماستعنيتش

.. تو بعتالى نبعتهملك مع البنت اللى فالمكتب

-تغريد/ بالله عليك تبعتهم اليوم لو يشوفه الحاج ويلقاه ناقص يديرلى قصه

-انيس/ عادى مش اول مرة تصير..والحاج مش مشدد عليكم

-تغريد / والله صارتنا معاه لقطه اليوم .. ومانبوش نديرو حاجه تنرفزه واطلعه عن طوره ماصدقنا الحكايه هدت

-انيس/ خيركم شن صاير معاكم.. احكيلى احكيلى

-تغريد / هدا يا حنه بو اميرة جاه الصبح وراسه والف سيف يعطيه سلفه على بنته ثلاثه لاف دينار

-انيس ركز/ اميرة البنت الجديدة ولا

-تغريد / هيااا

-انيس/ وعلاش يطلب عليها فى سلفه ..تعطيه منغير سلفه

-تغريد / منينلها .. والبنيه كيف تعينت الاسبوع اللى فات وقبلها ماكانتش تخدم

-انيس/ وبعدين شن صار

وقعدت تغريد تحكى لى انيس عاللى صار كله والعراكات والخصم والحكايه من طقطق لى سلاموعليكو

كملت حكايتها خدت القهوة وركبت لى مكتبها ....

وخلت انيس يخمم/ بخبرتى وقيس عليها لقينالك مفتاح يا انسه اميرة ..

خدى فنجان القهوة وهوا مبتسم/ هاهاها هالدماغ مايقدر يقاومه حد.. وكانها هيا ماعندهاش فلوس وماعندهاش منين تعاون بوها ...نعاونوه احنا

_________________________________________

_

فى مكتب اميرة ..تغريد نزلت تجيب فى قهوة وهناء خشت لى مكتب الحاج مع مروان ....

فارس خلاله الجو فالمكتب مع اميرة بروحهم .. قرب من مكتب اميرة قعمز عالكرسى اللى قدامها وشبحلها ...

-فارس/ وين بوك

-اميرة منغير ماتشبحله / روح

-فارس/ مش قلتله يراجينى

-اميرة تساوى فى اوراق قدامها/ قال عنده خدمه وطلع

فارس عنده ميه سؤال وسؤال يدور فى راسه يبي يسألهولها ومقدرش خايف يجرحها اكثر ماجرحها الصبح .. حس ان العلاقه بين اميرة وبوها عليها علامه استفهام لكن سكت ...

-فارس/ انتو متزاعلين

-اميرة قامت راسها / منهما

-فارس/ انتى وبوك

-اميرة / حكايه طويلة يبيلها وقت بيش نحكيهالك.. .. وانا تشوف فيا عندى شغل توة

-فارس/ كيف حال خالتى جميلة

اميرة مواطيه راسها وتبيش ترد عليه

-فارس/ باهى وين....

وقف واحد عالباب/ طلبتنى استاد فارس

-فارس تلفتله / اهلين يا صلاح

-صلاح / اهلا بيك

-فارس/ خود مفتاح سيارة الابله ..ارفع السيارة صلحلها الستوب وجيبها

-اميرة تشبحله متفاجئة/ لاااا صحيت تو نصلحها انابمعرفتى

.. بارك الله فيك

-فارس مد يده / هاتى المفتاح ..

-اميرة تهمس/ قلتلك مشكور

-فارس/ الضربه جت من سيارتى انا.. يعنى المفروض انا نصلحهالك

-اميرة / وانا ماناخدش فالغرامه

-فارس/ كلها الناس تصلح لى بعضها لما يضاربو

-اميرة / لكن انا امى عاطيتنى قلت السماح

-فارس انحرج ويهمس/ هاتى المفتاح

-اميرة/ لا شكرا

-فارس تلفت لى صلاح / باهى برة انت يا صلاح صحيت

-صلاح / لو غيرتو رايكم انا فالبركيدجو نادينى

-فارس/ تمام ..

مشى صلاح وخلاهم ...

فارس تلفت لى اميرة / انتى خيرك اديري هكى...كل مانحاول نغير اسلوبي ونفتح صفحة جديدة معاك مايصيرش

-اميرة/لانى نحاول مانوسخش المكتب اللى لقيته نظيف

-فارس/ الكلام لما يبدا ساعه شيطان وفالعراك ماينحسبش

-اميرة تشبحله وزعلانه / لكن انا نحسب

-فارس/ انا مادلك يدى نفتحو صفحة جديدة .. بالرغم من انى متاكد انك البنت متع ليلتها هيا نفسها انتى .. لكن خلاص انا متنازل وكونى احتديت عليك..

-قصت عليه / انت ماحتديتش عليا .. انت جرحتنى

-فارس/ باهى انا نتأسف منك .. شن تبى بعد هكى

-اميرة تبى تبعده لانها عارفه روحها كدابة / استاد فارس .. بالك تحساب قلبي ميت ولا ماعنديش مشاعر .. ولا يتهيئلك ان نفسى هاينه عليا..

-فارس/ انتى...

كيف بيكمل خشت هناء قصت عليهم حديثهم ....قعمزت فى مكتبها....ناض فارس من الكرسى شبح لى اميرة .. مع انها ماقامتش راسها ولا شبحتله .. ومشى لى مكتبه ...

___________________________________________

_

اميرة وفارس كل واحد يخمم فمكانه

-اميرة / الشركة لازم تطلعى منها .. شنو بتخبى عين الشمس بالغربال .. الولد مدكرك ومتاكد منك .. وحكايته فيها سرقه .. لو ثبتت عليك منين بتجيبيهم الفلوس هدا غير الفضيحة

-فارس مقعمز عالشباك ويخمم / البنت وراها قصة.. تصرفاتها مش واضحة لاعرفتها مسكينه ولا عرفتها طيبه ولا عرفتها مسمومه ..

ابتسم/ دمها خفيف هلبا..فالبدايه كان عندى اصرار قوى نبى نثبت عليها التهمه ... لكن توة تساوت عندى لو طلعت هيا والا لا..مع انى متاكد انها هيا

-اميرة تساوى فالاوراق قدامها / مع انه كل مايشوفنى يحاول يجرحنى .. لكن حاسه بحنيته عليا .. وحاساته يبي يتقرب منى .. لكن ياخوفى يحاول يتقرب بيش يزبطنى شكون ويطالبنى بي هداكة المبلغ اللى قال عليه يا حليلى اميمتى تمشى فيها

-فارس قعمز على مكتبه ويتخايل فيها / تفاصيل جسمها ..

مشيتها .. عيونها .. حركاتها .. كل شى فيها حلو ..

اتكى بالكرسى للخلف/ البنت عجباتك من ايامات مصر ...

عجبك كلامها ورعشه صوتها ودموعها ..... وضعفها ...احلى حاجه فيها ضعفها مع انها تمثل فالقوة لكن الضعف باين فى نضرة عيونها ...

-اميرة / انا خلاص لازم نبعد عنه ..وعن المكان اللى يجمعنى بيه ... انشاءالله ندير حاجه نخليهم هما يرفدونى .. وهدا قرارى الاخير ..

-فارس/ انا لازم نقرب منها .. نحتويها .. اوووووف قداش عندى نيه نضمها لى صدرى ... غيرتى عليها ماليهاش حدود

لما نشوف فرخ الحرام مروان دماغى يطير منى ....زعما هوا هدا الحب؟؟!......... ولا غير عناد فدماغى وانا متمسك بيه

-اميرة / قبل مانسيب المكان لازم نتعارك معاه عركة كبيرة بيش يفوتنى من حياته

-فارس/ لازم نطلع علاقتى بيها من المكان هدا .. لازم نتعرف على رجالات خواتها ونقوى علاقتى بأمها ....صراحة بدت هيا الملح فحياتى .. منغير حياتى بلا طعم

___________________________________________

_

ثانى يوم الجمعه

فارس لابس زبون سماوى وطالع بكرى من الحوش ..شرين تليفونه

-فارس/ صباحك فل وياسمين ياتاج راسى

-فدوى / صباحك حلو ولد خالتى

-فارس/ كيف حالك انتى وصغارك

-فدوى / الحمدلله مشتاقين لى خالهم

-فارس/ بالك ندير عليكم دورة الايامات الجايه

-فدوى/ لا بدير عليا دورة الايام اهيا .. لانى نبيك فى اهم موضوع فحياتك

-فارس/ اووف .. شنهوا اهم موضوع فحياتى

-فدوى/ الزواج يا الغلا... عندى لك عروس حتعجبك .. وحتدعيلى لو كانت من نصيبك

-فارس/ انا امأجله الموضوع هدا توة ..وو

-قصت عليه/ الكلام هدا قوله لى نهلة .. انا فدوى رانى

-فارس يضحك/ قصدك بالتهديد حسستينى مدرب الملاكمه امتعى ...

-فدوى/ امتى بتجى

-فارس/ حاضر انسق مع طلال ونجوك

-فدوى/ نراجى فيكم غدوة عالغدى... وكانك فالح متجيش

-فارس/ تم متفقين

-فدوى/ سلم اوليد خالتى الغالى

صكر من فدوى ... وقعد يشبح للتليفون ... طلع رقم جميله

خاطره رافعه عندهم ويبي يمشيلهم يشرب معاهم قهوة ليش مش عارف ...

ضرب رقمه المدار لقاهم حاطينه فالحضر ...اوووف..

ضرب من رقمه الليبيانا لقاهم حاطينه حتى هوا فالحضر

يضحك فى خاطره/ اكيدة هاديكه المسمومه حاطه رقمى فالحضر فى تليفون امها .... ويضحك

قرر انه يولع سيارته ويمشيلهم للحوش.... يتسبل بأى شى

.

.

.

.

قدام حوش جميلة .....

شاب واقف يطقطق عالباب وفى يده هديه ...

فتحت جميله الباب / نعم اوليدى

-الشاب/ فى بنت فالحوش هدا اسمه اميرة

-جميلة/ ايه اوليدى فى ...اميرة بنتى

-الشاب / عندنا ليها هدية توصيل

-جميله/ توصيل شنو !!؟ وهديه شنو

-الشاب/ ناديهالنا .. تستلم التوصيل بنفسها

-جميله مستغربه خاطر الحركات هادى جديدة وقتها/ حاضر شووويا بس

-خشت للحوش/ اميرة ...يا اميرة

ومشى الشاب للسيارة جاب الهديه ..عبارة عن بوكس شفاف معبى شوكلاته وفيه مبلغ مالى قريب اربعه لاف دينار مستفات ومشكلين منهم ورقات بطريقه جميله

فارس درس السيارة قدام حوش جميلة ...وهوا سعيد ..ليش مش عارف ... ممكن ان علاقته كويسه بي عمتك جميلة ..

نزل من السيارة ..صكرها .. ومشى للحوش..لقى شاب واقف

وفى يده بوكس معبى فلوس ...

-فارس مستغرب/ تفضل خوى ... لمن جاى

-الشاب قايم البوكس/ عندى توصيل هنايا

طلعت اميرة لابسه حجابها ..تلاقى شاب وجنبه فارس واقف..مافهمتش هما جايين مع بعضهم ولا شنو

-اميرة/ فارس

فارس شبحلها وهوا ساكت ... وبجديات فى نضرة حزن فعيونه او نضرة صدمه

-الشاب/ حضرتك اميرة

-اميرة / انا اميرة تفضل

-الشاب/ الهدية هادى ليك

ومدها لى اميرة ...وهيا بحركه لا شعوريه خدتها بين ايديها .. البوكس كبير

-اميرة تشبح للصندوق / ليا انا 😳...وبعدين شنو الفلوس هادو ..وشن مناسبتهم ومن منو

-الشاب/ الهدية جاياتك من مجهول

-فارس يشبح للشاب/و منهوا المجهول هدا..وشنهيا المناسبه اللى باعت على خاطرها المجهول هالمبلغ هدا كله

-الشاب/ بالتاكيد هيا تعرفه..وتعرف المناسبه...نستادنكم

مشى الشاب وخلاهم الزوز يشبحو لى بعضهم ...فارس فعيونه نضرة اتهام واميرة فعيونها نضرة دفاع عن نفسها

-فارس ضحك ضحكه هزوة/ عرفتيه منهوا المجهول

-اميرة / اكيدة لا ....

-فارس/ بالك هلبا اللى تخدمى عليهم ... لدرجه مش فارزة اما هوا فيهم

-اميرة / عاشر مرة تتهمنى ...تى ماهو قلنالك احترم نفسك

-فارس ياكل فى بعضه/ يعنى بتقنعينى ان شخص علاقتك بيه بريئة بيبعتلك المبلغ هدا كله ...عيل امالا منفهمش..

-اميرة / قتلك منعرفش الهدية من منو ...

-فارس/ الهدية من شخص عندك بيه علاقه

-اميرة / انا ماعندى علاقه بي حد

-فارس/ علاقه غير اخلاقيه...تى واضحه بديتى تخدمى حتى هنايا ..حولتى نشاطك من مصر

-اميرة/ تحشم على وجهك يا واطى ...انا عمرى ماكنت هكى

انا عندى اخلاق

-فارس/ كانا مش شادك بايديا

اميرة تشبحله مصدومه .........انصمتت

طلعت جميلة/ شن هالهرجه ..... خيركم

لقت فارس واقف/ فارس... امتى جيت

-فارس/ شن حالك خالتى جميلة

-جميلة / الله يسلمك ويحفظك اوليدى ...

وتلفتت لى اميرة / شنو جايبيبك كريمه ولا شامبو اموصيه عليهم ...

شبحت لقت صندوق معبي بالفلوش شهقت/ هيييييي هادو فلوس منو ...

تلفتت لى فارس / فلوسك يا وليدى ولا فلوس شكون

اميرة عيونها معبيات دموع

-فارس/ خالتى جميلة منسئلك ... شهر واحد السنه اللى فاتت كنتو فى مصر

-جميله / وعلاش تسأل

-فارس/ غير جاوبينى

-جميله / ايه مشينا انا واميرة بنتى

-فارس/ ايووووه ... ماهو قلتلك شادك بايديا .. بتضحكى عليا مرتين

وصفق ايديه الزوز فى بعضهم وهوا كاظم غيضه/ سلميلى عالاخلاق اللى تعرفيها

ومشى بخطوات سريعه...ركب سيارته وخرها زى المجنون ومشى للطريق .... فاتح عيونه وهوا مصدوم ...

جميلة / يابنيتى منين هالفلوس

اميرة معرفتش شن تقول لى امها ... فاخترعت كدبه من راسها

-اميرة/ من فارس ...ماك شفتيه واقف توة

-جميلة/ وخيره يخبط فى ايديه ورافع فى قلبه

-اميرة/ خاطر بوى سييف عليهم يعطونى سلفه

-جميلة/ شنو الهبال هدا ...سلفه بالورد والشوكلاته وهوا مايبيش

-اميرة / واضحه يااام منغير مانشرحلك ...الشركة بعتولى الفلوس وهوا جاى يعارك كيف كيف يعطونى

-جميلة/ بالرغم الكلام ماخشش راسى ....خشى لداخل

ومشى على اميرة وعلى فارس يوم زى النهار لاحرف .... وثانى يوم السبت كدلك .....

يوم الاحد ....

فارس متوقع ان اميرة سيبت المكان ..........

خش للدور الخامس فتح مكتب تغريد يلاقى اميرة مقعمزة فى مكتبها ..... قامت فيه عيونه ونزلتهم طول ....

نسى حتى انه يصبح عالبنات .... مشى لى مكتبه ....

بعد خمسه دقايق

فتح الشاب الباب/ اختى اميرة

-قامت اميرة راسها/ ايوة

-الشاب/ طالبك الاستاد فارس ع مكتبه

-اميرة تبلع فى ريقتها/ حاضر