رواية أميرة قلبي الحلقة الثالثه - زهور جمال الدين

_

فى حوش عمك حمد ...

مفيدة مرت حمد مقعمزة فالصالة .. وبنات ولادها يلعبو جنبها يادوبك يمشو ويطيحو

-انسام/ شوفيهم يا ماما .. ابرار طالعه انشط من تقوى

-انفال/ بالرغم نحس ان معاد انشط من محمود .. ومع هدا بالعكس طالعه بنت محمود انشط

تقوى طاحت بدت تبكى ...

-مفيدة /انفال نوضى قيمى بنت خوك و ناديلها امها

وتلفتت لى انسام/ وانتى برى نوضى خوك اشرف معش وقت على جامعته

انفال مشت لى تقوى قامتها وتسكت فيها

-انسام/ اشرف فاق من بكرى وطلع

-مفيدة/ ماشاءالله عليه وليدى .. حتى هوا الاول عالكليه.. امالا القراية تحسابوها ساهلة ...

تلفتت لى تقوى تبكى/ وين امها مش قلتلك ناديها

-انفال / امها واقفه مع خوى فارس

-مفيدة مش عاجبها/ شورها الشكوى ماتمش.. حايرة كيف مرة تجبد سيرة راجلها لى خوته

-انسام/ صح انتى ياماما مش طايقه فى ولدك .. لكن المراة معاها حق راهو

-انفال/ ماهو تقول لى بابا وخوتى خير ماتمشى تحكى لى اهلها

-مفيدة/ وشنو قاطعلها ايد ولا رجل ..دلع زايد تفتفيت نسون

..المراة اللى تشكى تقعد طول عمرها فى المدلة

-انسام تضحك /هوا حق راهو الشكوى لغير الله مدلة

وقعدو يضحكو انسام وانفال

فالممر تبان عبير واقفه ومعاها فارس .. لابس بنطلون ادجين وجاكيت ازرق كحلى وسورية بيضا.. ومعلق نضاراته فى فتحه بطمه السورية..

-فارس/ خلاص الموضوع بدى عندى .. انتى معش ادوريه ولا تناقشيه

-عبير متحشمه / انا والله لولا انى نعرف تأثيرك عليه مانجى نقولك ولا نزعجك

-فارس/ شن تقولى يا عبير..احنا اوخيين..العكس تحكى خير لان اللى يتفرج يعتقد ان المراة هيا اللى غالطه..لكن والله طلعتى انتى واختك مظلومات وخوتى هما اللى مايصلحوش

-عبير/ انا ماعليا بهدا كله ...غير يلهى بي بنته وبخدمته الباقى والله ماندور فى حاجه انا راهو .. يوم فالبحر ويوم مزرد مدامه مش قد مسؤليه الزواج علاش ايدير عيله

-فارس/ قول وفعل يا عبير ..ربي يحفظك انتى والامورة الصغيرة

-عبير/ صحيت وعن ادنك توة

- فارس/ ادنك معاك ...

..وتلفت رجع لى غرفته يبي يكلم معاد بالتليفون ...

اما عبير مشت للصالة.. خدت بنتها من انفال خاطر قاعدة تبكى

-شافت لى مفيدة / عن ادنك يا عمتى

-مفيدة منغير ماتشبحلها / ادنك معاك

___________________________________________

_

نفس الوقت فى المدرسه ...

طلعت جميلة من باب المدرسة اللوح اللى ايطل عالساحة

-اميرة دارت كلاكس/ يااام

-تلفتت جميله على يدها اليسار وحيتها بيدها / انزلى

فتحت اميرة باب السيارة ونزلت لابسه بنطلون كريمه عليه بلوزة بيضا سادة ودجاكة موف سادة..ووشاحةكريمه مخطط

مشت للباب اللى واقفه قدامه امها وابله خديجة

وصلت عندها / صباح الخير ابله خديجة

-خديجة/ صباح الخيرات يا قنينه

-جميلة / خيرك بنيتى شغلتينى

-اميرة تضحك / يعنى تقعدى طول عمرك مشغولة وديما شاكة ان فى شى غلط 😁

جميلة ضحكت / ماهو الصبح فطرنا مع بعض وماقلتيش بتجى للمدرسة

-اميرة / شفت الاوراق لقيت ماعنديش الرقم الوطنى .. قلت نفوت ناخد منك مفتاح الدرج اللى داسه فيه الحاجات وناخد الكتيب

-جميلة/ باهى مش مشكلة خشى جيبي المفتاح من على مكتبى

-اميرة خشت للباب/ باهى ...

مشت للمكتب متع امها خدت المفتاح من الدرج وطلعت

تلاقت مع استاد امجد نايب امها

-امجد😍/ اهلين اميرة

-اميرة تحشمت/ اهلين استاد امجد .. عن ادنك

-امجد / لحظه بس يا اميرة خيرك مستعجلة

-اميرة/ لاااا ...امى تبى المفتاح واقفه فى الساحة تراجى فيا

-امجد / ربي يحفظك ويوفقك فى حياتك ..

-اميرة تبى تفوته عارفاته دوته هلبا ويعاكس / شكرا استاد امجد ربي يحفظك ..

وخلاته واقف وطلعت لى امها / شووووية ناخد الكتيب ونردلك المفتاح

-جميلة/ لا لا مش لازم تولى هنايا .. غير حوليلى مفتاح الحوش تو توصلنى وحدة من الابلات بالك انتى تتأخري

-اميرة / لااااا كل شى نتجمل مسؤليته الا مفتاح الدرج اللى فيه الاوراق .. احتمال لو يريح نتى تشكى فيا فالمركز

-خديجة تضحك / احتمال حتى تحبسك

-اميرة / ايوووه صحة ليك ابلة خديجة

-جميلة/ باهى متعطليش .. اهو بنقعدو واقفين فى الشميسه انا وخديجة

-اميرة / منعطلش عليكم .. بالكثير عشرة دقايق ونجيبه

-جميله/ تمام

مشت اميرة فيسع للحوش قريب .. فتحاته وخشت دار امها فتحت القجر خدت الكتيب وطلعت ردت المفتاح لى امها فالمدرسه .. ومشت للمصوراتى استخرجت ورقه الرقم الوطنى متاعها وتوجهت للشركة اللى يشتغلو فيها صاحباتها

____________________________________________

_

فى مكتب طلال ....

قام طلال تليفونه واتصل برقم عفاف ... يضبح وردت

-عفاف فاقت على صوت تشرين التليفون / الو

-طلال / يسعدلى صباح الغاليه

-عفاف / صباح الورد حبيبى

-طلال /هيا حبيبتى نوضى معش وقت امتى بتطلعى وامتى بتوصلى

-عفاف/ يسلملى اللى فرحان انه بيشوفنى

-طلال/تغيبي عليا عشرين يوم ياظالمه .. نهون عليك

-عفاف تضحك / والله ماتهون ..هوا هداكة شفت اماليا حتى هما مستاحشينى .. امى مزال تبينى نقعد نكمل عندهم شهر لكن انا تسبلت بي روضه بيلسان ومنقدرش نغيبها

-طلال/ ااه ... شهر .. يااما تبينى نهبل يا اما نلحقك

-عفاف تضحك/ قداش نحبك يا ولد

-طلال/ وانا نمووووت فيك .. هيا نوضى عاد مستاحشك

-عفاف/ باص بيلسان يوصل بعد ساعه ..نجهزها ونبعتها للروضه وبعتالى نطلع

-طلال/ حتى انا بنكمل شغلى فيسع وبنطلع ...

انفتح الباب خش انيس/ صباح الخير

-طلال تلخبط / تمام نكمل شغلى ونكلمك يا حاج

-عفاف انخلعت/ حيه عليا انيس وصكرت التليفون فى وجه طلال ...

صكر طلال الخط متلخبط

انيس يضحك / صار قتلى يا حاج ...مشى امورك مشى .. ولا خايفنا نزبطو الرقم ونعاكسوها العصفورة ..

قام طلال تليفونه/ اهو حدفته الرقم ..ماعندك بيش بتزبطها ولا تعاكسها

-انيس/ صار معترف انك كنت تكلم فى وحدة

-طلال/ وراس انيس فكنى من برادتك توة.... وين فارس

-انيس/ اكيدة على وصول...بوه من الصبح هنايا

__________________________________________

_

فى حوش حمد

فارس كمل مكالمته مع معاد ... وطلع للصالة لقى مفيدة والبنات مقعمزين وفاتحين التلفزيون

فارس/ صباح الخير للجميع

-انفال وانسام / صباح الخيرات

-مفيدة🙄/ صباح الخير

-فارس باس على راس مفيدة ويضحك/ صباحك خير يا وجه الخير ..حتى كانك تصبحى عليا فوق النفس

البنات يضحكو

-فارس/ عدنان وعبسى مش عندكم عطلة خيركم فايقات بكرى

-انسام/ تعودنا انوضو بكرى

-مفيدة/انفال نوضى ديري لى خوك فنجان قهوة

-انفال تضحك / باهى

-انسام / وانا خلى نمشى معاها نديرلك توست ولا بريوش لان الباين فى نافورة بتتفجر فالصالة

-فارس خدى وردة من المزهريه وحدفها على انسام ويضحك / نوضى ام لسان طويل

مشو البنات الزوز للمطبخ ....

-فارس/والله صارتلى عملة امس.. توقف بيا السيارة فالطريق وعلى قد ماتصلت بالولاد ماحصلتش حتى واحد منهم

-مفيدة تفجرت طول/ هدا على اساس سيارتك خردة ولا موديل قديم لدرجة انها وقفت ومعش عرفت تحركها

-فارس داس ضحكته/ وسعى بالك ياام .. كل شى يجى بالخناق الا الزواج يجى بالاتفاق

-مفيدة/والله تحشمت قدام المراة..اسبوع وانا نزبط فالموعد هدا نبى البنيه تجى عندنا بيش تشوفها منغير مانمشولها وتنحسب علينا مشيه .. لكن الله غالب عليا انا..ماعنديش كلمه فالحوش هدا

-فارس/ تى كيف ماعندكش كلمه وانتى الكل فالكل.. لكن انا مايعطينيش ضميري انى نقعد نتاوق فبنات الناس من بعيد.. وبعدين ليش تحشمتى قصدك قلتيلها المراة

-مفيدة/لا ماقلتلهاش لكن هيا زى اللى حست بيا .. وبعدين ياودى البنت عندها عادى انك اتاوقها وتشوفها غير ضميرك يزلبح فيك

-فارس/ ويرضيك انا اناسب العيلة اللى خالها ميلاد وعندهم كل شى عادى

-مفيدة / اووووف انت فالح عاد من يغلبك فالدوة والكلام

-فارس/ وراس اميمتى نصيبات .. ونصيب حد ماياخده حد

وانا الحق البنت ماخشتليش دماغ

-مفيدة /تو انت تعرفها بيش تحكم عليها وتخش دماغك وماتخشاش .. المراة باهيه وعاجبتنى وبالتاكيد بناتها باهيات

-فارس/ مش بالضرورة الباهيه يطلعو بناتها باهيات..كل قاعدة وفيها شواد

-مفيدة / توة اعطينى اخر كلام عندك

-فارس/ انا البنت كانا ماحسيتش بيها والله مانقدر نرتبط معاها ولا نحطها فى حوشى مراة

-مفيدة/ ماهو قلنالك تعالة شوفها وتو تحس بيها

-فارس/ نضرة من بعيد بتخلينى نحس بيها

-مفيدة/ فارس انت شن تبى

-فارس/ مانبيش نتزوج توة

-مفيدة / ولامتى بتقعد هكى.. الناس كلولى وجهى .. يقولو زوجت صغارها من عامين ومخليه سلفها يدور يحسابونى لاهيه بي ولادى ومخلياتك وانا والله ماعندى فرق بينكم

-فارس/ لاااا الا هادى..والله كان امى حيه ماكانت اهتمت بيا اكثر من هالاهتمام

-مفيدة/ باهى خيرك ياوليدى .. هنينى ..دير مراة وصغار عالاقل حتى خوك يتهنى عليك ويرتاح من ناحيتك

-فارس/ وشنو انا مشقيه ..اهو خدمتى قايم بيها والحمدلله

-مفيدة/ انت كل شى عندك خدمه .. حمد مشغول عليك فى حياتك يقولى هالولد نحس فيه داس فى قلبه هلبا حاجات

-فارس/ ومنو مش داس فى قلبه.. تو ياام انتى قلبك فاضى

-مفيدة ضحكت / قالك قلبك فاضى .. وهمك وهم خوتك وخواتك وين مشى.. غير مُعاد بروحه هدا قريب يطلعلى قرن فى راسى

-فارس يضحك/ هاا شفتى

طلعو انسام وانفال من المطبخ ..جايبين قهوة وبريوش لى فارس .. حطوها وطلعو للجنان ....

-فارس/ معش وقت عليا عندى عمل مهم اليوم

-مفيدة/ حمد مشى من الصبح بكرى

-فارس/ اهو بنلحقه حتى انا...

شبحلها وابتسم / المهم تكونى راضيه ومش زعلانه منى

-مفيدة/ ربي يحفظك ياوليدى ومايجيب زعل بيناتنا

" مفيدة فالاصل تكون بنت عمتهم .. يعنى فارس وحمد يكونو صغار خالها..ربت فارس من لما كان عمره اربع سنوات

.. كانت وقتها عروس وحامل بي محمود.. توفت عمتك خيريه ام فارس وكان بوه فالاصل متوفى .. خداه خوه حمد وقعد عنده وكبر ..

اخته سميرة وقتها متزوجه .. وخوته قعدو حتى هما عند حمد خوهم لكن تزوجو فيسع "

___________________________________________

_

فى الشركة

وصلت اميرة ودرست سيارتها فى الباركنج متع السيارات

واتصلت بي صاحبتها.. بتبلغها انها وصلت ..

-اميرة / انا وصلت

-خنساء / جبتى بطاقتك وورقمك الوطنى

-اميرة/ جبت بطاقتى ورقمى الوطنى وجوازى وكان تبو حتى امى نجيبهالكم مفيش مانع غير وضفونى بس

-خنساء تضحك/ والله انا شايفه انه خير....كلمت الاستادة عائشة هيا اللى شادة شؤون الموظفين وقالتلى انشاءالله خير ..

-اميرة / انشاءالله

-خنساء/ قصدك انتى بتقعدى تهدرزى عليا فالسيارة ولا كيف .. تى ماهو انزلى المقابلات بتبدا

-اميرة تضحك / اهو بنجى هى

-خنساء/ اركبى من الاسانسير للدور الثالث

-اميرة / تمام

نزلت من سيارتها .. خدت ملف ال cv تبعها وحطت شنطتها على كتفها ومشت للباب .. خدت الاسانسير وركبت ...

انفتح الاسانسير طلعت اميرة منه وتنخبط فى مروان كان واقف بالصدفه وبينزل

-مروان/ بسم الله

-اميرة / سامحنى ماشفتكش

-مروان / حصل خير

مشت اميرة .. وقعد مروان واقف يشبحلها لين كملت الممر

وقفت وراه الاستادة عائشه/ صباح الخير .. وين هارب

-مروان تلفتلها وضحك/ ماعندى وين هارب نازل بنجيب نسكافيه

-عائشه/ جيبه وسقد روحك اللجنه متع اختيار الموضفين الجدد قريب تبدا

-مروان / وانيس شن صار فيه

-عائشه/ بلغت طلال .. قلتله كان خش انيس للجنه مش حنخشلها انا...

-مروان / مش عارف شن مشكلتك مع انيس

-عائشه/ يعنى مش عارفه يقعد يبصبص عالبنات ومايديرش ثمرة

-مروان خش للاسانسير/ ربي يهديكم

-عائشه/ متعطلش

___________________________________________

_

بعد نص ساعه ....

قعمزت اللجنه .. متكونه من الاستادة عيشه ماسكة شؤون الموضفين فالشركة .. والاستاد انيس والاستاد طلال

-طلال/ انا عندى شغل ضرورى مش حنقدر نحضر الموضفين كلهم ..

-استادة عائشة توشوش/ مدامك فرضته عليا...مش حتطلع الا لما يتمو كلهم

-طلال/ تى ماهو من حقه يحضر

-عائشه/ لو طلعت حتى انا منطلع وراك

-طلال / غير باهى توة ...تمام

بدو يخشو البنات بالوحدة .. طبعا هما نظامهم يديرو ستار بين اللجنه والموظف..باعتبار ان المفروض ميهمهمش الشكل.. يهمهم الخبرة والاسلوب فى الرد ...يبو الموضف يستريح ومايرتبكش وهما يسألو فيه ..

خشو البنات بالوحدة ومن ضمنهم اميرة ..ومنهم حتى شباب مقدمين عالوظائف ..وكان طلال مستعجل لان عنده موعد مع عفاف ليه هلبا ماشافهاش ..فكان يسأل بسرعه يبي ينهى المقابلات وخلاص

كملو البنات اللى مقدمين عالوظائف.. وكانت الشركة دايرتلهم فطور بسيط تحت فى الكافيتيريا .. نزلت اميرة ومعاها صاحبتها خنساء ...وجتهم هبة صاحبتهم الثانيه مستاحشه اميرة تيى تشوفها ...

-هبة/ الله كان تشتغلى معانا يا اميرة يبدا احلى جو

-خنساء/ غير فكونا من كثر الدوة ..الاستادة عائشة وعدتنى ان اسم اميرة حيكون من ضمن الاسامى

-اميرة / ياريت .. والله جميلكم ماننساه

-خنساء/ جميل شنو يا هبلة ... انتى قاريه ومتخرجه من المجال هدا ومن حقك تشتغلى فيه

-اميرة مرتبكة/ امتى بيطلعو النتائج

-هبة/ توة شوى ثانيه ينزلو القائمه واللى اساميهم نزلت ح توقعو العقود

-اميرة/ هكى بالسرعه هادى

-خنساء/ هما مستعجلين هلبا .. الشغل واقف ويبو موضفين

وبالفعل الساعه 1 الضهر نزلو الاسامى اللى قبلوهم .. وكانت اميرة اول اسم ... كلمت امها وهيا فرحانه وبشرتها ان الشركة بديرلها عقد توة ...وبالفعل قعدت تراجى لى نهايه الدوام وقعو العقود

___________________________________________

_

فى كرادورى ممر الدور الارضى

واقفين عائشه ومروان وطلال .....

طلال واقف على جنب بعيد عليهم / والله حبيبتى نعوضهالك مرة ثانية..انا خفت عليك لانه قال بيروح للحوش

شوى وبيجى

-عفاف متعصبه/ اهو ماروحش

-طلال / لكن هوا بالفعل طلع .. خفت يكون روح للحوش ومايلقاكش ويديرلك مشكلة يتصل ولا يقولك وينك انا درت جميع الاحتمالات ...

-عفاف/ باهى قداش بتقعد فى بنغازى

-طلال / مانعطلوش ..كله اسبوع زمان ونروحو

-عفاف/ اسبوع بس.. والله اسبوع ويوم نوريك

-طلال يضحك/ حاضر حبيبتى كل شى ولا زعلك

-عفاف/ بالنسبه للموضفات الجديد .. ولا وحدة بتجى معاك .. اهو قلتلك من توة

-طلال/ انتى تؤمرى على راسى امر واللى تقوليه يتنفد

-عفاف/ باهى امتى منشوفك ... ستاحشتك

-طلال/ الاسبوع هدا اكيد ... حتى انا ستاحشتك هلبا

خش فارس من الباب / السلام عليكم

-عائشه/ باهى اللى جيت

-فارس/ كنت فى اجتماع مع بوى وجماعه ثانيين ...

-عائشه/ امين قبل من 12 ونص قال الاجتماع تم وطلعو

-فارس/ هدا علاش غلط انك تشتغل مع مراة وراجلها فى نفس المكان.. لانهم زى المخابرات كل واحد يفتن للثانى

-مروان / دفتهالك طول بيش كانك بتكدب ولا تقول عطلنا تجيبلك الشاهد امين

عائشه تضحك ...

فارس اشر على طلال / تى هيا صكر التليفون وتعالة

طلال ايأشرله / اصبر شوى

-فارس/ اخترتو الموضفين الجدد

-عائشه/ حتى العقود وقعوها

-فارس/ باهى ماشاءالله بكرى بكرى

-عائشه/ اوامر الحاج حمد ....

-فارس/ وينهم

-عائشه/ وقعو العقود وروحو .. الدوام يبدا من غدوة

-مروان / شنو حجزتو لى تونس ولا اجلتو

-فارس/ لا وين اجلنا .. طيارتنا غدوة الساعه 8 بادن الله

يومتها اميرة روحت لى امها بطير من الفرحة انها وقعت العقد .. وجميلة فرحت لى بنتها عالاقل وقعت عقد ثابت

ماتحسابش نفسها مشت بي رجليها لى عرين الاسد

__________________________________________

_

بعد اسبوع ....

طلال وفارس كيف نازلين من الطيارة كانو اسبوع كامل فى بنغازى ... المفروض بيمشو للشركة طول

-طلال / احسن حاجه درتها فحياتى انى دمجت معاكم انا وانيس

-فارس/ صح انيس يحب السفر واللعب.. لكن عبقري فى خدمته .. وعنده حظ

-طلال / ياسيدى اهى شركة وطنيه مساهمه .. المهم فالاخير للدولة حتى كانا طحنا يقيمونا

-فارس/ لا هوا هدا

-السواق/ بتروحو للحوش ولا للشركة

-فارس/ لا ارفعنا للشركة طول

-السواق/ تمام

بالصدفع فالشركه وقت فطور

الشباب والبنات الجدد تعرفو من اول يوم دارو فيه عقودهم قبل اسبوع ... مقعمزين يفطرو مع بعض

-فاضل مقعمز جنب اميرة / انتى فى اما قسم

-اميرة / انا فى قسم الاستاد طلال

-فاضل/ باهى وشنو معاملته

-اميرة / الحق انا ماشفتاش اصلا ..هوا مسافر من لما جيت

وانت مع شكون

-فاضل/ انا مع الاستادة عائشه ..

اميرة تشبح فى هبه صاحبتها خشت للكافتيريا

-اميرة/ عن ادنك يا فاضل

-فاضل/ ادنك معاك ..

وقفت اميرة خدت النسكافيه متعها والكريب ومشت لى طاولة هبه .... شوى وجتهم خنساء .. جابو نسكافيه وبريوش وقعمزو يهدرزو ... هما يعطو فيهم فرصه نص ساعه للفطور

وقفت السيارة اللى جايبه فارس وطلال برة .. فارس خش وطلال قعد واقف يكلم فى عفاف برة ...

فارس لابس نضارات وماسك فى يده شنطه ..خش للممر اللى مقابل الكافتيريا بيمشى للاسانسير

-شاب زابطه قام يده / استاد فارس ...

تلفت فارس زبطهم الشباب الجدد اللى مقدمين عالوظائف ودارولهم عقود..حب يحييهم خدى الشنطه ومشى للكفيتيريا

-فارس وقف عند الباب/ صباح الخير ياشباب

اميرة كانت عاطيه بالضهر تلفتتله ... خدت صدمه حياتها ...

زبطاته طول نفس الشاب متع ليلتها اللى كانت شاكه انه مات

الشباب كلهم / صباح النور

-فارس/ آنستونا فالشركة ... نورت بيكم ..انا الاستاد فارس وانشاءالله تستفيدو منى ونستفيد منكم

-الاولاد/ غنى عن التعريف يا مدير

واميرة ساكته ومصموته صراع فى داخلها وهيا فاتحه عيونها/ هواااا لا ..هوا لا ... ايه هوا هوا ...انا متاكدة هوا الشاب متع مصر ..... ياربي هواااا ولا لا ... ياحليلى ياغبارتى كانا هوا بالك يزبطنى .. ايه ايه هوا .. والله هوا ..الحمدلله اهو حى.. لكن شن مصيري كانا زبطنى

فارس يتكلم ويشبحلهم كلهم لاحظت انها مالفتتش نضري او بالاحرى زى اللى اطمنت انه مازبطهاش

-فارس حول النظارات من عيونه / احنا كام بي ودنا نشغلو كل اللى تقدمو .. لكن انتو تعرفو ان المطلوب عدد معين.. الله غالب

فارس يتكلم ويشبح للشباب والبنات كلهم .. واميرة تبى تلبد لكن ماعرفتش كيف لان الكافتيريا مفتوحه على بعضها مفيش مكان متقى ...

وفى خاطرها/ معرفنيش .. غريبه كيف معرفنيش .. اهو شافنى ومازبطش انى نفس البنت... لكن انا متاكدة انه هوا نفس الولد ... الحمدلله ياربي شكله نسى شكلى

كمل فارس دوته وطلع وخلاهم يفطرو براحتهم ......

__________________________________________

_

بعد ربع ساعه

-اميرة/ ياودى ليش كثر الدوة توة.. خلينى نروح .. انتى مادخلكش فيا معش نبى نكمل معاهم فالشركة

-خنساء/ تى خيرك ترعشى ..بيش تعرفى انه حق لما نقولك انتى عندك صده ..معقولة بتروحى وتسيبى شغلك اللى ماحصلتيه غير بستين الف واسطه .. ليش اديرى هكى

-اميرة/ معش نقدر

-هبة/توة ليك اسبوع تشتغلى وامورك تمام التمام ... اميرة لو صاير معاك شى قولى ..من لما شفتى الاستاد فارس وانتى حالك اتشقلب ...فى حاجه انتى تعرفيه !!؟؟

-خنساء/ وبعتالى تحسابي دخول الحمام زى خروجه.. هدا عقد وفيه بند جزائي كانك ماخدمتيش لمدة سنه

-اميرة / كيف يعنى

-هبة/ يعنى لو سيبتى فى فلوس بتدفعيهم لان تسييبك للشغل سببلهم فى عطلة

-خنساء/ وبالتاكيد مش حيديرو مبلغ بسيط كبند جزائي

اميرة سكتت وتشبحلهم .. ونفس الوقت خايفه وترعش وتبى تهرب من فارس بالك يزبطها .. مع انها حكم مستريحه انه خش وشبحلهم كلهم ومع هدا مازبطهاش ولا شبه عليها .. ممكن لانها لابسه الحجاب وشكلها يختلف ..

-اميرة/ اللى خش توة شن اسمه .. وشن يكون فالشركة

-خنساء/ هدا هوا الاستاد فارس اللى قلتلك توة حالك تبدل بعد خش للكفتيريا ...وياحنه يكون نائب المدير العام للشركة كلها

-اميرة/ قصدك المكان ملكهم

-هبة / المكان يعتبر ملك الدولة..لكن هما جهه خاصة واخداته

استثمار .. وعندهم شركاء طلال وانيس وغيره

-اميرة / انا سامحونى لما بنركب بنلم الحاجات اللى تخصنى ومنطلع .. وبعتالى تو نتفاهم معوالاستادة عائشه

تبى تنفد بجلدها ..المهم فارس مايشبحهاش فى خاطرها / ربك يستر

___________________________________________

_

فالدور الثالث

فارس ركب فوق لقى عائشة وانيس ومعاهم زوز بنات تغريد وهناء يتناقشو فى نقاش حاد

-فارس/ خيرك شن فى ..معقولة من اول يوم نلقى عركة

-عائشه / العركة باديه من امس ..الاستاد انيس مشكك فى نزاهه اللجنه اللى اختارت الموضفين .. واللى كان هوا واحد منهم

-انيس/ لما نقولك فى واسطه فالاختيارات ..معناها انا متاكدة من كلامى منقولهاش عبط

-هناء ماسكة اوراق ومتلفته لى فارس / هادى النتائج جتنى جيان استادى .. يعنى اللجنه هيا اللى تفاضل وتختار مش انا

-انيس / عاد معقولة يومتها طلعت شوية ورجعت الساعه عشرة ونص نلاقى الاسامى اللى مختارينها واتيه عالطاولة

امتى اخترتوهم وامتى راجعتو السيفيهات وامتى شفتوهم كلهم .. شنو السرعه هادى

-تغريد مقعمزة على تركينه/ مش محتاجه علم ولا درة استاد انيس .. والاستادة عائشة هيا اللى تفهم فى موضوع الموضفين اكثر مننا

-فارس شبح لى عائشة/ انتى اللى اخترتيهم

-عائشة حست بالاتهام شبحت لى انيس/ انت بدفها فى راسى ولا شنو .. ماهو كنتو معاى خطوة بخطوة

-انيس / انا طلبى واضح .. هاتو السيفيهات يراجعهم فارس ويحكم ان فى ناس مستواها وخبراتها اقل من المكان

-فارس/ بنراجع اللى تقدمو كلهم .. انا والله ماعندى وقت

-انيس/ لا لا نراجعو اللى اخترتوهم .. وكان تبى نعاونك فيهم

...كم شخص هما ...

-فارس/ فالمراجعه مفروض ولا واحدة من اللجنه يكون موجوده

-عائشة قايمه سى دى فى يدها/ هما 17 شخص وهادو سيدياتالتسجيلات متع المقابلات كلها

-فارس / تغريد ..هاتى (سي فى )كل واحد فيهم بروحه و تسجيل المقابله متعه والحقينى بيهم على مكتبى انتى وهناء

-تغريد / تمام

-هناء/ حاضر

____________________________________________

_

بعد نص ساعه

فتحو ملف شاب اسمه معز وفتحو تسجيل صوتى متع المقابله تبعه..وقعدو يسمعو ويقارنو بمعلومات ملفه

-فارس/ تو هدا اسلوب ومنطق نحطوه معانا فالشركة....

مايعرفش يربط جملتين مفيدات فى مجال خدمته

-تغريد/ كلنا جينا مانعرفوش وتعلمنا

-فارس/ انا مش كليه هنايا بيش نعلم .. انا عطينى احسن الخبرات الحكايه مش واسطه ومعرفه وخلاص صار معاه حق انيس..

-هناء/ تى ماهو هدا من طرف الحاج حمد نفسه

-فارس/ يجيبلى حاجه باهيه ويقولى من طرفى.. تى هدا يلكلك .. خايف تقول مراة

البنات يضحكو

-تغريد / تبى الحق الباهى مش محتاج واسطه راهو

-هناء / فارس ارخى شوى خيرك اعصابك راقيات ..

-فارس/ ماهو اديرو فى حركات اتعصب..هدا خامس تسجيل نسمعه ايدره الكبد .. عندك زوز بس امورهم تمام والثلاثه الثانيين اكس .. اوت ... تلتغى عقودهم .. افتحى التسجيلات اللى مازالو ...

مدت هناء ملف/ الاسم اميرة مهدى

-فارس / هاتى الملف ..وافتحى التسجيل ...

-هناء/ لحظه ندور سي دى تبعها

فتح فارس ملفها ... شاف صورتها .. طول جت فى باله البنت متع مصر .. سبحان الله تشكيلة فمها وحناكها كأنها هيا ..حتى كانه هاديكة الليله سكران وهيا كانت مكثرة مكياج لكن سبحان الله تقاسيم الوجه ماتتبدلش ...

-فارس وجهه احمر/ افتحى التسجيل متعها وينه

-تغريد اطلع فالتسجيل من الحافظه متعه .. اهو لحظه بس

فارس فى خاطره/ والله صوتها مزال يرن فى ودانى لعند توة .. انطلعه من الف صوت .. لكن هاديكة اسمها وداد .. وهادى اميرة

قام راسه/ افتحى التسجيل خيرك

-تغريد رعشت / باهى اهو بينفتح الصبر

فتح التسجيل وبدى فارس يسمعو وهوا فاتح عيونه

فالتسجيل ...

عائشه/شن اسمك

-اميرة/ اسمى اميرة

ويدكر فيها لما قالتله / اسمى وداد ..

نفس الصوت نفس مخارج الحروف

-انيس فالتسجيل / اسمك بالكامل ياماما

-اميرة / احم اححم.. اسمى اميرة المهدى

-عائشة / منين متخرجه

-اميرة / كليه الاقتصاد

فارس يسمع ومش مصدق ودانه ... نفس الصوت .. نفس البنت متع مصر .. عنده صراع ان هاديكة اسمها وداد وهادى اسمها اميرة .. يدكر فيها كيف تتكلم.. عندها نفس الهدوء فى مخارج الحروف .. ايه نفس البنت ...هياااا .. عندها رنه فى حرف الراء نفس رنه هاديكة البنت

-فارس وقف/ ترا عاودى التسجيل من الاول

-هناء / حاضر

عاودوله التسجيل وهوا يسمع

قعد يتخايل فيها لما تقوله / اسمى وداد ....

نفس الصوت ..........فارس زبط صوتها ....

شبح لى تغريد/ شن طلبتو عليهم اثبات هويه

-تغريد/ اكيد طلبنا اثبات هويه

-فارس يعيط/ يعنى طلبتو جوازاتهم ولا شنو

-انيس/ طبعا كلهم خدينا صورة من جوازاتهم ...خيرك تعيط

-فارس فاتح عيونه/ اميرة هادى تبع اما ادارة

-هناء/ تبع طلال

وخر فارس كرسيه متع الطاولة لين طاح .. ومشى طلع من الغرفه بسرعه ... خلى البنات حايرات شن فى

نزل فارس من الاسانسير ثلاث ادوار ..مشى طول للكافتيريا فتح الباب بطريقه وحشيه ..لدرجه ان العاملين فيها تلفتوله

ولكنه لقاها فاضيه من الموضفين

رجع للاسانسير .. طلب الدور الثانى ... خش لى مكاتب طلال ..

فتح الباب تلفتو الخمس بنات يشتغلو فى نفس المكتب

-فارس/ وين اميرة المهدى

-اميرة وقفت فى مكتبها ترعش مع بعضها / ااااانا اميرة

-فارس شبح للبنات/ ترا اطلعونا برة شوى

رانيه زميلتها فالمكتب لاحظت ان عيونه حمر/ استاد فى حاجه ..

-فارس/ لو سمحتو نبو الانسه بروحها

طلعو البنات وخلو اميرة ترعش مع بعضها ..من اول يوم شافاته جتها بالقاضيه...

-فارس صكر الباب وتلفتلها عيونه حمر/ اهلين ياوداد ..ليك وحشه

-اميرة ترعش/ ممممنننو وداد ... انا اسسسسمى اميرة

-فارس قرب منها ومد يده / ترا لو سمحنى جواز سفرك

اميرة تشبحله بصدمه / جوازى

-فارس ماد يده / هاتى جوازك لو سمحتى

-اميرة / تتتتقريبا قاعد فى شنطى شوى نشوفه

فتحت اميرة شنطتها وطلعت جوازها اعطتهوله ..

خداه وهوا يشبح لعيونها فتحه يفتش فيه ....

فتح الجواز فتشه مالقاش فيه ولا ختمه سفر

-قام الجواز قدام وجهها/هدا جوازك الازرق امتى درتيه .. نبى جوازك الاخضر وين

اميرة عرفت انها انكشفت .. لكن الموضوع مخجل بالنسبه ليها لان فيها بيعه شرف ومحاولة قتل .. فقررت انها ترقى الازرق

-فارس/ جوازك ......الاول اللى سافرتى بيه مصر.....وين

-اميرة / ماكانش عندى جواز .. ومصر عمرى مامشيتلها

-فارس/ والله صوتك نطلعه من بين ميه شخص .. حتى نضرة عيونك هيا هيا .. ياوداد .. يانصابه

-اميرة / انت شن تحكى احترم نفسك.. انا مش فاهمه على شنو تحكى .. الباين حصل لبس وحضرتك معتقد انى حد انت تعرفه

-فارس يشبحلها / انا كنت معتقد ....لكن توة انا متاكد

-اميرة عيونها دمعو ورفعت يدها / متاكد من شنو .. انا مافهمت شى

-فارس/ نفس الدموع .. نفس تشكيلة الخدود لما تبكى.. نفس رفعت اليد لما تقوليلى انت مادخلكش فيا.. شفتى الدنيا كيف صغيرة .. تحسابى نفسك هربتى خلاص ومعش نقدر نوصل فيك

-اميرة / حضرتك شن تبى توة .. عيب هكى راهو.. البنات طلعو واحنا قعدنا بروحنا والباب مصكر شن بيقولو عليا

-فارس/ المفروض انتى متعودة على هالنضرات وعلامات الاستفهام وشك الناس فتصرفاتك ...خيرك اتأثرتى .. انتى منحلة جاية توة وزعميتا بتمثلى عليا الحشمه

-اميرة/ اقسم بالله لولا انى متربيه كنت فضحتك توة فالشركة

-فارس/ انتى متربيه هاهاهاها.... بتفضحينى هاهاهاها

انا اللى بنفضحك توة ... وين فلوسى

-اميرة فتحت عيونها/ فلوس شنو

-فارس يشالى بايديه/ نقولك كلمتين من توة ...الفلوس اللى خنبتيهم ليلتها بعد ماضربتينى على راسى يطلعو ...والا قسما بالله لما نخلى فضيحتك عالنت

-اميرة انهارت بالبكى / حسبيا ونعما الوكيل فيك ... والله ماخديت منك حاجه

-فارس مقرب وجهه منها وعيونه حمر/ وحق هاديكة الليله خديتيه ولا لا .. الخمسمية دولار ...خديتيهم ولا حتى هما مهناش

-اميرة / قلتلك انا مانعرفكش .. منعرفكش ...

حدف جوازها عالطاولة / اسمعى .. لا حنسأل عليك .. ولا حنتاكد من صاحباتك انك كنتى فى مصر والا لا.. لانى متاكد انك نفس البنت .. ولدلك عندك اسبوع..سبعه ايام .. تجيبي

فيهم الفلوس اللى خديتيهم .. ولو صرفتى منهم هاتى العقاب

...اما الضحكة اللى ضحكاته عليا .. هاديكة حسابها بروحه وحيكون عسير ...

وطلع وهوا زى البركان اللى يغلى ... وخلاها مقعمزة على مكتبها وتبكى ....

خشو البنات يجرو ...

-اسماء/ خيره الاستاد فارس

-اميرة خدت جوازها وشنطتها / لخبطتلهم فى ورقه سببتلهم ازمه ...

-رانيه/ انتى وين ماشيه توة

-اميرة / بنروح

وبالفعل نزلت لى سيارتها..... ركبتها وروحت لى حوشهم وهيا فى وسط صدمه ان بالفعل الدنيا صغيرة وهيا قاعدة كيف طلعت من الكآبه اللى كانت فيها معقولة تتلاقى معاه طول

....خشت للحوش وماحكتش لى امها اللى صار