رواية أميرة قلبي الحلقة الثانية - زهور جمال الدين

_

طلعت اميرة ومعاها فارس ...وقفت تشبح يمين ويسار ادور فى عمك فرغلى..لقاته واقف بعيد بالتاكسى متاعه..اشرتله بايدها جاها يجرى ... مشتله على جنب

-مدتله الفلوس/ اجرى بسرعه للمستشفى ادفع الفلوس

-فرغلى / طب وانتى يابنتى

-اميرة/ خديت اسم المستشفى تو نعرف كيف نرجعله

-مدلها كيسه/ جبتلك هدومك عشان تلبيسيها و تدخلى بيها المستشفى بعدين

-اميرة خدت الكيسه/ تمام بارك الله فيك.. مع السلامه

هدا كله وفارس يشبحلهم واقف فمكان مش بعيد...

ركب فرغلى سيارته .. وتلفتت اميرة مشت لى فارس ...

-فارس/ منو هدا اللى وقفتى عليه

-اميرة منغير ماتشبحله / قريبي

- فتح السيارة بالسويتش/ اركبي

لفت اميرة وفتحت باب السيارة وهيا رجل لقدام ورجل لتالى .. قناعتها تغيرت ..الفلوس وحصلت عليهم وياكبدى مشت السكرة وجت الفكرة .. ومعش قادرة تكمل ..

ركب فارس فمكانه وولع السيارة بالصمه وتحرك ...

-فارس/ خيرك

-اميرة ترعش/ لا لا شى

-فارس/ شنو الكيسه هادى اللى جنب رجليك

-اميرة / حاجات تخصنى جايبتهم معاى

-فارس/اهاا... انتى منين من ليبيا

اميرة قعدت ساكته وماتبيش تتكلم

-فارس / الشقه قريبه

هوا يبي يفتح موضوع ..وبردو اميرة ساكته.... تبى تبكى وشادة روحها .. المكياج صارخ وخافى كل معالم وجهها .. خافت يمتسح المكياج ويبان وجهها .. شدت روحها

اما فارس يخمم فى خاطره / بنت ليبيه شنو جابها لى هالموضوع .. تى ترعش مع بعضها .. هه ترعش ..كانها ترعش شن عرفها فى هالمكانات ..طول عمرك تقعد غشيم ونيه فى النساء

يشبح للطريق / انت ليش مشيتلها يا فارس .. مش نوعك ولا عمرك كنت متع بنات..مالك ومالها ..لو قصدك تبى تنصحها مفروض نصحتها فالبار وخلاص مافيش داعى توريها طريقك

وصل قدام العمارة

درس السيارة على جنب / انزلى ..

فتحت اميرة باب السيارة خدت الكيسة ونزلت..عندها نيه تهرب لكن ماقدرتش خافت يجرى وراها وتفضح روحها فالشارع .. صكر فارس السيارة قعد واقف يراجى فيها لفت من السيارة جت وقفت جنبه .. وخشو لى باب العمارة .. ومنه لى باب الاسانسير ..

ركبو فى الاسانسير وماعطلوش لانه كان ساكن فالدور الاول

... فتح باب الشقه وخش وهيا وراه....

اشر فارس عالصالون فالصالة / تفضلى

خشت للصالة حطت الكيسه وقعمزت عالصالون وهيا تشبح للشقه الفخمه

-فارس ماشى لى باب غرفته اللى تفتح عالصالة/ خودى راحتك حولى الجاكيت اللى لابستيه

اميرة ساكته وتشبح للتحف اللى على يمين الصالون

-وقف قدام باب الدار وتلفتلها و ابتسم/ شن اسمك

-اميرة تفاجئت بالسؤال/ اسمى وداد

-فارس/ خودى راحتك ياوداد

طلع المفتاح من جيبه وحطه فى باب الغرفه مش يفتحها .. الباب ماباش يفتح وممكن لان فارس شارب هدا ليش مش مركز

اميرة حست انه واقف وعاطيها بالضهر..هادى فرصتها فى الهروب..بحركة لا اراديه وقفت تلفتت عاليمين خدت وحدة من التحف المحطوطه على جنب الطاولة ..قامتها ومشتله بسرعه ..ومنغير ماتحس ولا تحسبها ضرباته بيهاعلى راسه ..

فارس عيط / اااه

ويجى طايح عالارض ... انخلعت ..قعدت تشبحله وهوا طايح وغارق فالدم

تلفتت للباب الرئيسى ومنغير تفكير طلعت تجرى من جنب فارس مشت لى باب الشقه فتحاته وطلعت ومانتبهتش انها تصكره خلاته مفتوح وراها....طلعت للكرادورى... شبحت لى للاسانسير بتاخده بيش تنزل ..لكن لقاته مطلوب من الدور الارضى.. معتاها لو طلباته هيا حتلاقى فيه ناس...تلفتت لقت باب جانبى فتحاته لقت فيه دروج .. خشت للباب ونزلت تجرى من الدروج وصلت فيسع لانه دور واحد .. تسمع فى الاسانسير يتحرك .. طلعت تجرى لانها لا عرفاته راكب ولا نازل طلعت من الباب الدخلانى للعمارة .. ومنه للباب البرانى

الاسانسير وقف فالدور الاول ...طلع منه شاب شبح لى شقة فارس لقى الباب مفتوح استغرب ..خشلها.. يشبح فى فارس طايح فى نهاية الصالة ومكانه كله دمايات

مشى الشاب يجرى لى فارس/ فارس ...فارس ..من ضربك

قام راسه لقى المفتاح مرشوق فى باب الدار... وقف ..

مشى للباب .. لعب بيه الشيطان نزل كمه وحطه عالمفتاح وفتح الدار.. وخش للغرفه ومنها للدولاب فتحه .. لقى شنطه دبلوماسيه .. فتحها لقاها معبيه بالفلوس

كأنه يعرف مكانها..خدى الشنطه وطلع للصالة خدى حاجه من عالطاولة متع الصالة وطلع من باب الشقه يجرى وحتى هوا نسى يصكر باب الشقه وراه ..نزل وطلع من باب العمارة وفى يده هاديكة الشنطه الدبلوماسيه ...

" لكن منهوا الشاب هدا!!.. الله اعلم"

___________________________________________

_

فى ليبيا

طلال متكى على سريره .. فاتح التلفزيون ويتفرج.... وسمع صوت رساله وصلاته عالفايبر ..قام التليفون فتحه وشاف .. لقاها رساله من انيس" انا فالمطار توة وقريب نركب للطيارة نلقاك فالمطار بعد ساعتين نكون خديت شنطى "

ياودى الراجل جاته خنقه...ومعش عرف حتى يتنفس..خدى

باكو الدخان بعصبيه .. طلع سبسى ولعه.. نزل من السرير لبس الشبشب ومشى لى باب البلكونه فتحه

وطلع يتفرج عالسيارات فالكياس ويدخن ..يتخايل فى انيس كيف بيروح وبياخد عفاف بالاحضان ويتخايل فيه يبوس فيها ... اوووووف الولد غاير

يخمم/ تى تحشم على وجهك يا غبي...راهى مرت صاحبك .. ايه صاحبك اللى يخون فيها وهيا ماتستاهلش...انت ماليكش علاقه بيهم تستاهل ولا ماتستاهلش

قام تليفونه .. فتحه وخش عالصور .. طلع صورة عفاف اللى صورهالها منغير ماتشوفه..يحرك فى صبعه على وجهها وشعرها وشفايفها ...

وفى خاطره/ محلااااااك

وشرين تليفونه ... عفاف تتصل بك ....

رعش قريب طاح منه التليفون مالبلكونه ..... خش بسرعه للدار وسكر البلكونه..قعمز عالسرير وفتح الخط ...

-طلال / الو

-عفاف/ انشاءالله مش راقد

-طلال فرح بالمكالمه / لا والله .. مزال فايق

-عفاف / انيس كلمنى ...........

سكتت شوى .... وطلال سكت ...

كملت / وقالى انه بيروح الليله

-طلال بتحسر / اهاا... بعتلى رساله توة عالفايبر ووصانى نمشيله للمطار

-عفاف / باهى كويس

-طلال / شنو الكويس

-عفاف / كويس انك بتروح بي انيس .. عالاقل بالك نقدر نشوفك لاخر مرة

-جبد طلال دخانه / ليش تقولى هكى.. انتو مسافرين

-عفاف / لا قاعدين .. لكن منقدرش نجبرك تهتم وتسأل بعد ما انيس بيروح والمفروض انى معش مستحقه اى مساعده

طلال ساكت وفى صراع بين قلبه وعقله لكن احنا بنات حواء مش ساهلات والحاجه نعرفو كيف نتلونو ونوصلولها😁

-عفاف / معش بتكلمنى

-طلال / انااااا

-عفاف/ معش بتسأل عليا

-طلال/ طبعا بودى نسأل عليك.. لكن انيس!!

-عفاف /عموما براحتك ..نخليك تستريح توة قبل ماتمشى لى صاحبك فالمطار.. بس نتمنى نسمع صوتك حتى مرة مرة

-طلال / ومش ح تضايقى

-عفاف/ بالتاكيد لا ... بالعكس

-طلال يجبد فالدخان متوتر/ انا كل القصه انى نخاف نسببلك مشكله مع انيس

-عفاف بصوت هادى / احنا شن بنديرو من عيب.. مجرد وصيتك تسأل عليا .. انت تعرف انيس وطبعه وتعرف انى مش مستريحه معاه

-طلال/ تبى الصراحه

-عفاف / اهاا ... طبعا نبيها

-طلال / حرام تكون عنده جوهرة زيك فالحوش.. والله مايستاهلك ...

-عفاف / الله غالب نصيب

-طلال / الله غالب ....وجت البنت بيناتكم

-عفاف عيونها دمعو / هدا اللى قاهرنى وكاصرلى ضهرى

-طلال / تعرفى كيف..انا مش حنتصل...نخاف عليك نسببلك اى مشكله .. انتى لما تكونى بروحك ديريلى تشريينه

-عفاف / نخاف تكون مشغول ....ولااااا.. ولا انيس جنبك

-طلال / لو صكرت عليك الخط معش تعاودى لين نتصل انا

-عفاف فرحانه / تمام ....متفقين

_________________________________________

_

اميرة طلعت تجرى على طول ركبت تاكسى .. وانهارت بدت تبكى تتخايل فى الشاب مات .. او شبه متاكدة انه مات

-سواق التاكسى/ بتاخدو راحتكم وبعد كدا بتعيطو عاللى ضاع منكم

-اميرة/ اسمع ..قسما بالله كان ماتصكر فمك راهو اللى فى قلبي نحطه فيك

-سواق التاكسى/ انتى بتقولى ايه ..وكمان مش مصريه

..وعلى ايه انزلى انزلى

وقف على جنب ... نزلت اميرة وقربعت الباب .. لقت مطعم مفتوح .. خشتله مشت طول للحمام لقت نفسها نست كيسه الحوايج فى حوش فارس😱 ... ياوالله عملة ...

وقفت عالحوض غسلت وجهها وهيا منهارة .. صراحة موقف ماتنحسدش عليه.. الاولة استحقارها لى نفسها كيف ترضى تبيع شرفها .. وثانيها كيف اطاوعها يدها وتضرب حد تقتله

غسلت وجهها من الصابون وقاماته تشبح لى روحها فالمراية وتبكى / بديتى مجرمة يا اميرة .. بديتى قاتلة .. هدا كله على شنو .. فلوس .. وسخ دنيا ..

وتبكى/ لاااا مش على خاطر فلوس على خاطر امى

فاقت لى نفسها/ اااه .. امى .. زعما دارولها القسطرة ولا شن صار فيها ...

رجعت حطت صابون على وجهها ثانى وتمصمص فيه بسرعه

وطلعت من المطعم .. خشت محل لقاته كيف بيسكر .. شرت منه سروال وتيشرت لبستهم تحت الجاكيت المصكر.. ولوحت القفطان القصير اللى كانت لابساته فى غرفه قياس المحل ..

وطلعت اشرت لى تاكسى ومشت تجرى للمستشفى ..

نزلها التاكسى .. خشت للمستشفى مشت للقسم اللى فيه امها تلاقى عمك فرغلى واقف ..

وتصير معاها مفارقه ماكانتش حاسبتها ............!!

لقت امها مقعمزة جنب فرغلى يراجو فيها ....

مشت تجرى / ياااام ... خيرهم طلعوك ..خيرهم مادارولكش العمليه

-جميله مبتسمه / الحمدلله يابنيتى الدكتور اللى استلم توة صاحب خير ومش متع كدب وماديات..قالى يا حاجه ماتستاهليش القسطرة غير يكدبو على بنتك برة

عمك فرغلى مواطى راسه ويهز فيه متأسف ان اميرة مشت فى سكة غلط عالفاضى ...

قعمزت اميرة جنب امها وهيا تحضن فيها وتبكى/ الحمدلله على سلامتك يا اميمتى ...فداك راسى وفلوسى وكلى ليك

-جميلة/ انا رانى من لما خشيت مستاعية وحالتى باهية .. ونقول للبنيه ناديلى بنتى .. وهيا تقولى ممنوع

-اميرة/ وانا برة قالولى امك تبى قسطرة وتعبانه .. لكن والله لما نهارها لاحرف ممرضه الشياطين هادى

-جميلة/ يابنيتى مسكينه شن فى دنبها.. راهى العبد المأمور قالولها قولى طلعت قالت ... بينهم وخلاص

-فرغلى/ ماهو هيا دى مشكلة مستشفياتنا .. يكدبو الكدبه اللى آد كدا بس عشان المريض يدفع

-جميلة/ معش تبكى بنيتى .. انتى وين كنتى ؟

-اميرة / ااه ..اامم..اااام.....مشيت لى حوش خالى قلت بالك نلاقى ولد خوك نتسلف منه فلوس لكن طقيت وما حد فتحلى

-جميلة / هيا نوضى ... طيارتنا معش وقت عليها

-اميرة / عطوك خروج

-جميلة/ عطونى .. ودفعتلهم حق السويعه اللى رقدتها

اميرة شبحت لى فرغلى ... اشرلها براسه ان تعالى ...

-اميرة وقفت / نستادنك شويا يااام نشوف الممرضه

-جميلة/ ماتقعديش تتعاركى مع الناس

-اميرة/ لا لا عراك شنو .. غير ترا شن بنقوللها

-جميلة/ خيرك غيرتى حوايجك

-اميرة انخلعت/ ااه .. حوايجى تلبزو طحت قدام حوش خوك ..شوى قلت للتاكسى يفوتنى عالمحل خديت منه لبسه

ومشت بسرعه وهيا ترعش/ شويا بس ونجى ياام

مشت من جنب امها .. وعمك فرغلى لحقها ... وقفو على جنب

-فرغلى متأسف/ ماكنش عندك حق فاللى عملتيه... اهو امك خرجت .. انتى اتسرعتى

-اميرة/ والله العظيم ماصار بينى وبينه حاجه .. الراجل عتقنى لى وجه الله

-فرغلى / وانا بردو بقول انتى ماتأخرتيش ابدا

-اميرة تنفست شوى وفرحانه / الحمدلله

طلع فرغلى الخمسماية دولار من جيبه / فلوسك اهم

-اميرة / حاشانى يخش جيبي قرش منهم .. الفلوس حلال زلال عليك

-فرغلى/ مش ممكن ...انتى حتدينى الخمسمية دولار كلهم

-اميرة / حرام يخش جيبي قرش منهم .. وتوة بالله عليك وصلنا للفندق .. التاكسى اللى بترفعنا للمطار قريب تجينا خاطر طيارتنا الفجر

-عمك فرغلى بيطير مالفرحة/ يالله يابنتى.. وربنا يفتحها عليكى من واسعه

ركب عمتك جميلة وبنتها اميرة ووصلهم للفندق .. لقت التاكسى واقفه تراجى فيهم .. ركبت امها فيها وخشت هيا للفندق دارت تشيك اوت ونزلت شناطيهم ومشت للتاكسى ركبت فيه رفعهم للمطار هيا وامها .. ومع انها نفدت بجلدها .. لكن الدموع مافارقوهاش لحظه وهيا تتخايل فى هداكة الشاب اللى قتلاته... وتتخايل فالعملة اللى دارتها فى روحها

قيس الساعه 3 ونص ركبو الطيارة متعهم .. بالرغم كانت خايفه على امها هلبا ..لكن الدكتورة فالمستشفى قالتلها ساعه او ساعتين فالجو عاديات عليها وتقدر تستحملهم

...وطارو فالجو روحو طرابلس

___________________________________________

_

بواب العمارة ما انتبهش ان باب شقة فارس مفتوح لين روح مروان صاحبه وخش للشقة ولقى فارس مضروب ...

طبعا على طول بلغ بواب العمارة ودارو اللازم واتصلو بالشرطة اللى جت بسرعه واتصلت بالاسعاف ورفعو فارس للمستشفى ...

.

.

فالمستشفى قالولهم ان حالة الشاب مش خطيرة .. بس لانه كان داير دوش ساخن .. وبعدها طول شارب خمور هلبا. فمن الطبيعى ان لو اغمى عليه او داخ استحالة يفيق بسهولة .. يعنى الضربه مش خطيرة لكن بفعل الخمور هيا اللى خلاته يغمى عليه ...

طبعا التحقيق اثبت ان الشقه كانت فيها بنت .. لانهم لقو كيس فالصالة فيه ملابس نسائية وهادى شقه عزاب ...

لما عطى فارس محتويات الشقه .. وحاجاته اللى فيها .. لقو ان شنطه فيها مايعادل مئة الف دينار ليبي مهناش بين قوسين مفقودة...وفارس رقى الازرق وقاللهم الشقه ماختهاش بنت

-مروان / قول كلام يصدقه عقل يا فارس.. تو معقولة حراميه نقزولك للشقه جايبين معاهم ملابس نسائيه مشحتينهم .. شحاتين وينقزو فالشقق

-فارس/ قلتلك شرين الباب فتحت.. ومعش نعرف شن صار بعدها

-مروان / كيف شرين الباب فتحت وهما ضاربينك من الخلف .. فارس خيرك ماتبيش تقول اللى صاير معاك

-فارس/ اووووووف ...انت تحقق معاى ولا شن قصتك

-مروان/ المبلغ اللى نسرق مش ساهل .. وانت واضح تغطى على حد لان حتى الشرطة مش مقتنعين بافادتك .. المحقق قالى حاول تتكلم معاه وتفهم منه

-فارس/ اسمع يا مروان .. اقسم بدات الله اللى صار هنايا نلقاها عند حد فالدنيا تعرف حساباتك .. الفلوس اللى ضاعت فلوسى وانت ماليكش علاقه ..

-مروان / ومن قالك انى بنحكى ولا بنخبر...الدوة بينى وبينك توة ..

جى قعمز عالكرسى اللى مقابله/ فارس.. لو فى بنت نصابه جبتها معاك للشقه اعطينا مواصفاتها وخلى الشرطة تجيبها

..انت ليش تغطى عليها وهيا حاولت قتلك

-فارس غمض عيونه / مروان ..راسى وجعنى ..قلنالك الحكاية مافيهاش بنت وقص على باقى الموضوع

-مروان / باهى ممكن تفهمنى ليش عطيتهم بالضهر بيش ضربوك على راسك من الخلف

-فارس/ اووووووف عاد .. تى ماهو قلنا فوت الموضوع

-مروان / باهى باهى غير اهدى توة بس

-فارس/غير خلينى توة ... وتو نحكيلك اللى صار معاى بالتفاصيل بعد وقت والشرطة ماليهاش علاقه

تكى فارس راسه للخلف وغمض عيونه وقلبه معصور من الالم والندم انه كلمها اصلا .. يتخايل فى شكل اميرة .. ملامحها غابو عن عيونه شوى..معش زابط ممكن لانه كان سكران .. بس فى غضب كبير فى داخله .. لانه حسها هادية ومظلومه و كان يبي يساعدها لما لقاها ليبيه ...لكن زى اللى جاياته صدمه ان البنت بالفعل نصابه وماتنفعش ..لانها اتصرفت زى النصابين ..وصلت لى حوشه بطريقتها وزلبحاته وخنبت منه فلوسه ..ووصلت انها تحاول تقتله ..

دماغه قريب يتفجر وهوا يخمم/ معقولة انا قاعد ننخم فالناس لتوة .. معقولة بنت تنصب عليا ..معقولة بديت مضحكة بنات اللى عمرى مانقربهم .. باهى من وراها وعارف ان عندى فلوس .. انيس..ولا مروان.. لكن انا اللى كلمتها مش هيا اللى جتنى بيش نقول حد باعتها .... وااااك راسى بيتفجر منى منين جتنى هالمصيبه

داروله دخول للمستشفى

_________________________________________

_

فى ليبيا

انيس وصل ليبيا ... لقى طلال يراجى فيه ....سلمو على بعضهم ومشو ركبو فالسيارة

-طلال/ ياراجل مش معقولة التأخير البايخ هدا متع الطيارات

-انيس/ هدا سبرنا وصعب يتغير 😁

شرين تليفون انيس... شاف لقاها عفاف تتصل

-انيس/ اووووف بدينا فالنقان

-طلال / شكون ؟

-انيس/ العيلة عندى

تلفتله طلال لان الدوة على عفاف وزى اللى ماطاقش فيها

-فتح انيس الخط / الوو... اهلا ... ايه روحت .. امممم .. مندرى ... هاتيها ...اهلين بابا كيف حالك بيسو.. طبعا حبيبه باباجبتلك حلوة وشكلاطه وكل شى قعدة تسألى ...باهى حتى انا نحبك يابابا ..باى"

-طلال لسانه ياكل فيه/ تلقاك ستاحشتهم قداش ليك غايب عليهم

-انيس/ وشن طاريلهم كانا غبت عليهم .. الثلاجه مليانه والجيب عامر بالفلوس والسيارة معبيه بنزينه

-طلال / فى حاجات اهم من هدا كله ... زى الاهتمام .. الكلمه الحلوة

-انيس/شن تخرف انت يا راجل .. تحساب الاهتمام والكلمه الحلوة اهم من الجيب العامر بالفلوس .. كدابات كلهم راهو.. وراسك اللى جيبه مش عامر مايشبحوله حتى بربع عين

-طلال / والحب

-انيس/ يطير من الشباك بعد اول شهر من الزواج

-طلال / منطق غريب

وصلو قدام عمارة انيس .. نزل طلال فتح الكوفينو نزل منه شنطه انيس ..

-انيس ماشى لى باب العمارة / هيا تصبح على خير وصحيت ياراس تعبناك معانا انا والعيلة

-طلال / انت اوخىى يا انيس وماهناك تعب

-انيس/ لا والله كنت عابي على خو العيلة قاعد شوى طلع احرف منى ماشى يدور

-طلال يضحك / مطيحها فيهم .. هيا ليلتك سعيدة

-انيس / ليلتك اسعد مع السلامه

وتلفت مشى لى باب العمارة وقام طلال عيونه فوق لقى عفاف اطل من بلكونه حوشها فاتحه شعرها ولابسه توته .. اشرتله بيدها .. ماردش عليها ركب سيارته وهوا الغيرة تاكل فى قلبه كيف متكمه لى راجلها

..وهيا فالاصل متكمه ومساويه شعرها لانها كانت ناوية توقف فالبلكونه وتشوف طلال

" عفاف بنت صغيرونه ممكن مواليدها 90 تزوجت بكرى .. هيا تزوجت شهر واحد 2011.. وقامت فبراير فى شهر 2 .. بوها كان مع النظام السابق ..طلع مالبلاد هوا وصغاره ومرته

..وعفاف طبعا قعدت مع راجلها .. عندها خوها اسمه حسام مرات يقعد فى ليبيا متكم اموره مع المليشيات....ومرات يسافر .. لقت روحها وحدانيه منغير امالى ولا اهل زوج لان حتى اهل انيس مسافرين برة.. وانيس لاهى فى اللعب والسرمحه وخلاص ومخليها هيا وبنتها للحيوط "

____________________________________________

_

وصلو اميرة وامها مطار طرابلس .. لقو طارق يراجى فيهم عالموعد متع الطيارة ...خدو شناطيهم وطلعو .. اميرة وجهها مقلوب تقول ميتلهم حد ..

-طارق/ حمدالله عالسلامه يا خالتى.....حمدالله عالسلامه يااميرة

-جميله/ الله يسلمك ويحفظك ولد اختى .. كيف حال صفاء والصغار

-طارق/ الحمدلله فخيار الخير .. بايتين من امبارح عندكم هيا والبناويت يراجو فيكم

-جميلة/ سلم بنياتى تلمدو فى حوش اميمتهم يراجو فيها ... وربي يحفظهملى يااارب

-طارق يشبح لى اميرة/ اميرةةةة... اميرة

-اميرة انتبهت/ هاا.. ايوة

-طارق/ خيركم فى حاجه

-جميلة / لاااا ماهناك شى ياوليدى...خيرنا

وشبحت لى بنتها ...

ركبو للسيارة جميلة من قدام واميرة مالخلف ..وطارق مشى للكوفينو يركب فى الشنط

-جميلة/ يابنيتى افردى وجهك تو خواتك ينخلعو وانتى تقول سامعه خبر يفجع ولا خبر حد ميت

-اميرة انخلعت/ ااه ..من ميت

-تلفتت جميلة للخلف/ عارفاتك خديتى خلعتى .. وصار فيك ماصار لما طحت .. لكن احنا اتفقنا فالطيارة اننا مش حنحكو الموقف اللى صار لخواتك .. فليش تخليهم ايلاحظو

قامت اميرة ايديها بتمسح وجهها نزلو دموعها

-جميلة / انتى صايرة معاك حاجه غير رقدتى انا فالمستشفى

-اميرة انتبهت لنفسها/ لا لا اللطف شن بيصير معاى

-جميلة/ معناها ريحى نفسك وانسى اللى صار وفكينا

-فتح طارق باب السيارة / نورتو ليبيا يا خويلة

-جميلة / الله ينور عليك ويرحم والديك ياوليدى

طارق لاحظ ان حتى وجه خالته انقلب ... ياودى الموضوع فيه ان .. لكن دار الحولة

وصلو لى حوشهم ..لقو صفاء ومروة ووفاء فاتحين الحوش ويراجو فيهم ... خشو اميرة وامها والبنات لاحظو ان اميرة وجهها متغير ...ماسكتوش

فالمطبخ البنات متجمعات على اميرة وامهم فالصالة

مروة توشوش/ اميرة مش بنعرفك اليوم .. خيركم فى حاجه .. بوى كلمكم غادى وضايقكم

-اميرة / منغير شهق ولا صوت .. امى مرضت غادى والدكتور كان متوقع قسطرة ..وبعدين ربي لطف بينا ورجع القلب لى حالته الطبيعيه

-وفاء حطت يديها على خدودها/ ياحليلى على اميمتى شن جاها

-اميرة/ ضمى فمك .. اتفقنا انا وامى ان مانقولوش قدامكم..

شبحتلهم/ ولا وحدة منكم تسأل امى ولا تقوللها كيف صار .. اهو حدرتكم من توة

-صفاء/ تى باهى باهى... انا والله زبطت ان فيكم حاجه من لما خشيتو .. غير سكتت

شرين باب الحوش

-وفاء/ هادى اكيدة عمتى .. قالتلى بعد الفطور بنجى نسلم على امك

-تلفتت اميرة بتطلع / ديرو قهوة .. وافتحى الباب يا وفاء

___________________________________________

_

فى مصر....

فارس متكى فى سريره ويكلم فى طلال فالتليفون

-فارس/ ورحمه بوى فقبره مانى عاتقها .. اقسم بالله لما نخيط عليها مصر شارع شارع

-طلال / انت متاكد انها ليبيه .. بالك مصريه ولا تونسيه ودارت عليك الجو

-فارس/ ياراجل متعصبنيش انت الثانى..شنو انا معش نعرف الليبيات من الناس الثانيه ولا كيف

-طلال / غريبه لا فى كاميرات قدام شقتك ولا قدام باب العمارة ...

-فارس/ العمارة اللى ساكن فيها انا مافيهاش كاميرات الحق

-طلال / ولا حتى فى محل قدام العمارة داير كاميرا

-فارس/ تى شنو انت تحساب روحك فى اوروبا... راك فى مصر الكاميرا عندهم بي هاديكة الحسبه مش حاجه ساهلة

خشت مكالمه انتظار على تليفون طلال ...مدورهاش

-طلال/ وانت من امتى تجيب فى بنات لى شقتك ...شن جاك يا راجل لما حطيت يدك طول تحطها غلط

-فارس/ انا والله ماغايضينى الفلوس..ماغايضنى الا الضحكه

-طلال/ حتى الفلوس يغيضو ... تو شحنه السيراميك اللى بعتها بيش بتخلصها..تى والله كان يسمع بوك لما ينتش شعره

-فارس/ وبوى من بيقوله ... رد بالك يا طلال

-طلال / انا تعرفنى الكلام يموت عندى .. لكن انت توة انسى الموضوع ...لم حوايجك وروح بلادك

-فارس بغيض/ ننسى.. تى والله لما نشردها ونشرد اهلها كلهم تو تشوف الخامرة..تى والله مانى مخلى بار ولا ديسكو وسيورنى نلقاها ....انا يلعبو عليا خامرات..نموت خيرلى

خشت مكالمه ثانيه انتظار فى تليفون طلال

-فارس/ كثرت الانتظارات فى تليفونك يا سى

-طلال يضحك/ ياودى شكله القلب بدى يتحرك

-فارس/ صار بناكلو لحمه وبنرقصو عالزكرة قريب

-طلال/ ياودى ماضنيش

-فارس/ وعلاش

-طلال / ظروف خاصه

-فارس/ ناقص فلوس ولا ماعندكش وين تسكن

-طلال/ لا هدا ولا هدا .... خليها على الله

__________________________________________

_

ثانى يوم ...

حوش جميلة فضى من بناتها .. باتو معاها الليله اللى قبلها لما روحت .. واليوم العشيه جتها بنتها مروة رفعتها لى بوها سلمت عليه وجابتله سلام خوها امحمد معاها ..هدرزت وتعشت وروحت لى حوشها ... واميرة فالحوش صاير فيها ماصاير ...

بعد ماروحت جميله توضت وصلت العشى ودارت قهوة وجابتها للصالة .. ومشت لى دار بنتها اميرة وطقت الباب

-اميرة / خشى يااام

-جميلة/ درت قهوة فالصالة تعالى اشربي معاى

-اميرة / باهى شوى تو نجيك

ومشت جميله للصالة ... واميرة فى دارها تبكى ووجها مقلوب تخمم فى هداكة الولد شن صار فيه / لا لا مستحيلة يكون مات .. لو كان مات راهو سمعنا بي ليبي لقوه مقتول فى شقته.. مرات ماماتش .. يااااربي مايزبطش شكلى ويبلغ فيا ... وحتى كانا بلغ انا روحت وين مزال بيلقانى ...

تمسح فدموعها/ معقولة انا بديت مجرمه ونخمم ونساوى فى جريمتى .. انا كيف خطر عليا نمشى لى هالاماكن.. اهى جت على راسى .. لو كان الولد قعد فايق رانى توة انتهت حياتى وانتهى شرفى .. كيف فكرت هكى بس يااااربي ياريتنى موتت ولا خممت هالتخمام

-جميلة تنادى/ اميرةةة... تعالى نبيك

-اميرة / باااااهى نصلى ونجى

-جميلة/ القهوة بتبرد

-اميرة طالعه للحمام / تو نسخنها

خشت للحمام غسلت وجهها ... وطلعت مشت لى دارها لبست المصليه وصلت ..... كملت وقعدت تخمم/ تى كيف ماماتش وانتى خليتيه نص راسه مفتوح ودمه يصب وقريب يتصفى ... ياااااربي اغفرلى والله ماكان قصدى يموت الولد

ياحليلك يا اميرة كيف بيصير فيك بعد هالعملة

وطلعت لى امها خدت سزوا القهوة ودخلتها للمطبخ سخنتها ورجعت للصالة منغير ماتحط عيونها فعيون امها

-جميلة/ اسمعى يا اميرة ... انا مش بنعرفك اليوم ...انتى صاير معاك حاجه ...يا تقوليهالى يا اما والله نزعل منك

-اميرة / ايه ...صايرة معاى حاجه

-جميلة/ احكيلى يا بنيتى .. صغار خالك غششوك

-اميرة/ لا

-جميلة/ امالا خيرك

-اميرة حطت فنجان القهوة عالطاولةو غمضت عيونها/ انا بنصيم شهرين

-جميلة حطت فنجان القهوة عالطاولة/ اللطف علينا .. شنو قاتلة رقبه

-اميرة / غير افهمى معاى يا اميمتى .. واسمعى الحكايه مالاول

-جميلة وجهها انقلب / حكايه شنو يا اياماتى السود

____________________________________________

_

فى سيارة طلال

خدى طلال تليفونه وطلع رقم عفاف واتصل بيها .. التليفون ايضبح وعفاف متردش ... عاود ثانى ردت

-عفاف تتنفخ/ الو

-طلال / يا اهلين

-عفاف/ باهى ادكرتنى توة وقلت نكلمها ... تليفونك من الصبح انتظارات

-طلال / والله نكلم فى صاحبي فى مصر

-عفاف/ ماشاءالله هادى كلها مكالمه خارجيه .. مكثر رصيدك

-طلال/ هوا مريض والفايبر يقطع اضطريت نتصل بيه بالتليفون وخلاص

-عفاف/ باهى

-طلال/ زعلتى

-عفاف/ وحتى كان زعلت .. شنو منحاسبك انا

-طلال / اول مرة نشوف وحدة حلوة وهيا زعلانه

-عفاف تضحك/ توة تشوف فيا انت بيش تقول عليا حلوة

-طلال / طبعا نشبح فيك

-عفاف/ وبيش تشبح فيا انشاءالله

-طلال / بقلبي

عفاف قعدت ساكته .. وهيا سعيدة ان طلال متجاوب معاها

-طلال / خيرك سكتى

-عفاف فرحانه / وشن بنقول

ياودى شكلها العلاقه بتطور مابيناتهم 😏😨

________________________________________

-اميرة / غير افهمى معاى يا اميمتى .. واسمعى الحكايه مالاول

-جميلة وجهها انقلب / حكايه شنو يا اياماتى السود

-اميرة / اخر يوم لما مرضتى ورفعتك للمستشفى

-جميلة/ خيره اخر يوم

-اميرة / خديت تاكسى بيش نمشى لى حوش خوك

-جميلة / يابنيتى خيرك تحطيلى فيهم زى الكلمات المتقاطعه احكى فيسع طيحتيلى قلبي

-اميرة/ مشيت فالتاكسى طقيت على حوش خوك مالقيت حد .. وليت مع التاكسى.. وهوا طالع ضرب ولد نطره .. رفعه طول للمستشفى وانا معاه .. لما طلع الدكتور قال الولد مات

-جميلة/ وانتى شن دخلك .. لا كنتى تسوقى ولا السيارة سيارتك

-اميرة/ مهما يكون ان كنت مع السواق فالسيارة .. ويلحقنى الشك

-جميلة/ انتى كنتى اتكلمى فالسواق ولا لهيتيه لما كان يسوق بيش ضربه

-اميرة / لا

-جميلة / خلاص امالا ماليكش علاقه .. الدين بيّن مش لعبه ..

جميلة لفتت وجهها/ والله عرفتك يومها مش بلاش من لما خشيتى المستشفى ..لكن غصيتها وسكتت ..قلت يوم مرواح علاش نعك فالكلام

-اميرة وقفت/ ياام انا حكيتلك حكايتى .. وانا بنصيم .. ومفيش داعى يسمع بيا حد علاش صايمه .. ومفيش داعى اصلا يسمعو بيا انى صايمه ..المهم اهو قلتلك وحكيتلك

-جميلة/ ربي يهديك يا بنيتى

___________________________________________

.

.

.

.

.

بعد ثلاث شهور

فارس مقعمز عالطاولة فالبار ومروان صاحبه معاه ....

تلفت فارس عاليمين لقى بنت واقفه جسمها زى جسم اميرة .. مشالها بخطوات سريعه ...شدها من كتفها ولفتها ليه

لقاها مش اميرة

-فارس/ انا اسف

-البنت / فى حاجه

-فارس / لا لا سامحينى

وتلفت رجع للطاولة اللى كان مقعمز فيها

-مروان/ مش معقولة كل ماتشبح بنيه بتمشيلها تجرى تحسابها هاديكة النصابه .. البنت دارتلك وجيج فى راسك

-فارس/ لازم نلقاها لااااازم

-مروان/ ياراجل قلنالك انساها وروح بلادك ..بوك يوميا يتصل بيا ويقولى خيره فارس متغير ...حتى عرس خوتك الشهر الجاى الباين عليك مش ناوى تحضره.. وقبل هدا كله برة لوح كيسة الحوايج متع فرخة الحرام النصابه وانت تقول عليك تشم عليهم فالصنه

-فارس/ وعليا اليمين ماح يهدالى بال لين نلقاها بنت الكلب هادى .. فارس ماينضحكش عليه ولا ياخدو فلوسه

-مروان / ياودى الحكايه بدت اكبر من فلوس .. وكانك عالازمه اللى كنت فيها انحلت خلاص.. هوينا ولد خالتك لقى بيعه فى الاستراحة متعك وبيبعتلك الفلوس والسيراميك اللى بعته بيتخلص ...خلاص روح لبلادك

فارس وقف ثانى ومشى لى بنت واقفه من بعيد ..قرب منها منغير مايكلمها.. زبطها مش اميرة رجع لمكانه

-مروان / انت بتهبل راهو ....اسمع انا بنحجز على طيارة الاسبوع الجاى ...وبوك قالى كانا ماروجتش بيجيك...قولى توة نحجزلك معاى ولا شنو

فارس ساكت ويخمم حارقاته اللقطه

-مروان / قولى نحجزلك ولا شنو

-فارس/ احجز ...تو انروح ...ووالله على خاطر بوى بس

___________________________________________

.

.

.

.

.

.

.

.

.

.

.

بعد سنتين .... سنه 2015

جميلة مقعمزة مع مدرسة معاها صاحبتها اسمها خديجة

-خديجة/ شنو صار فى المدرسة اللى قلت عليها لى اميرة

-جميلة/ لا لا مامشتش .. عاطيينها هلبا حصص ومتعب الجدول ..

-خديجة/ ياودى هيا كان ادور حاجه فى تخصصها خير .. هيا متخرجة من المحاسبه ولا

-جميلة/ الحق قداش فرحت بالمصرف اللى حصلاته الشهر اللى فات عالاقل بدت تطلع وتخالط وتنسجم ...ماك شفتيها العام اللى كنا فيه صار فيها عام نكد اسود على راسى لا طلعه ولا خشه منطوية على روحها وخلاص

-خديجة/ تى ماهو على قد مادرتلك وقلتلك هادى عين وضرباته نرفعوها نلودو عليها مابيتيش

-جميلة/ انا مابيتش.. حشانى ...هيا اللى على قد مادرتلها مابيتش تمشى معانا

-خديجه / هيا خيرها سيباته المصرف

-جميلة/ المصرف هوا اللى استغنى عليهم ...21 بنت شغلو عشرة و11 قالولهم بالسلامه ماعندناش مكاتب

-خديجة/ خدو حمد وحميدة وقالو للباقى روح

-جميله/ هوا هدا .... وتبى الحق اليوم عندها مقابله فى شركة صاحباتها يشتغلو فيها... يااااربي يسخرلها وتوقع العقد

-خديجة/ ياودى غير مادام عقدتها انحلت وولت تكلم فى صاحباتها ويجوها وتمشيلهم ... احمدى ربي وقولى بركات حتى كانها ماحصلتش عمل معاهم

-جميله / يانهارى كل ماندكر هادوكة الايام قريب هبلت بنيتى ...عام كامل وهيا من دارها ماتطلعش راكبتها كآبه

...ووك عليا حتى انا قريب هبلت على خاطرها

-خديجة/ ربي يحفظك ليهم ومن عندهم غيرك بالله

طقطق باب الادارة ...

خش مدرس/ ابله جميله

-جميلة/ ايوة استاد منير

-الاستاد منير/ بنتك اميرة تبيك

-جميلة انخلعت/ اميرةةةة... وينها

-الاستاد منير/ واقفه برة فالساحة قالتلى ناديلى امى

-وقفت جميلة/ حليلىىى على بنيتى شكلها رفضوها فالعمل

-خديجة/ غير بري شوفيها

-جميله/ تعالى معاى يا خديجة

-خديجة/ تعالى هى

وطلعو من باب الادارة للممر مشو للساحة بيشوفو اميرة خيرها شن تبى