رواية أميرة قلبي الحلقة الرابعه - زهور جمال الدين

بعد ثلاثه ايام ...

فى حوش عمك حمد مقعمزين فى الصالة .. صالتهم واسعه وكلها رخام وفيها فالوسط صالون قدامه تلفزيون كبير وعالجنب بوفيه كبير فبه صاولة اكل ... دار الجنب وجنبها مطبخ ....وفالنهايه باب صغير فيه ممر يحتوى على دروج يركب فوق لى ديار المبيت متع العيله

فارس مقعمز فالصالة مع بوه وخوته وفاتحين التلفزيون عالاخبار ..وقدامهم صفرة شاهى وحلاوات

-معاد/ حطنا المبارة يا راجل ..الاخبار مافيهم الا الكدب

-حمد/ لا لا متغيرش .. خلى النشرة ..وقوللهم يديرولنا طاسه شاهى خضراء منبيش الاحمر

-محمود / خولة .. يا خولة

-خولة من دار التقعميز/ ايوووة

-محمود / ديرو لى بوى طاسة شاهى خضراء ..

-خولة من الدارر/ باهى هى

-عمتها مفيدة مقعمزة جنبها / شدى بنتك تو انوض انا نديرها

-عبير/ تو بتنوضى انتى يا عمتى .. تو نمشى انا

-مفيدة / لا لا عمك الحاج يبيها طاسه طايبه مدامه طلبها ..تو نديرها انا

طلعت مفيدة من الدار مشت للمطبخ .. لقت فيه الشغالة تمسح فالدولاب

-مفيدة / ترا مديلى البراد الصغير

انفتح باب الحوش ..

خش اشرف/ السلام عليكم

كلهم ردو / عليكم السلام

إلا فارس منتبهش سرحان ويخمم /مش كل مرة تسلم الجرة..ثلاثه ايام سادينها.. اسبوع شنو هدا اللى عاطيهولها حتى انت قداش ماتساير يافارس.. لازم نطربق عليها قبل ماتهرب ... امالا انا تصك عليا الازرق وتقولى مش نفس البنت .. تبى تضحك عليا مرتين ..

وخر لتالى حط يده ورا راسه واتكى عالمخدة وهوا ساكت ويخمم/ مدامها واخدة مبلغ كبير اكيدة صرفت منه قدام اهلها ...تو معقولة مايقولولهاش منين الفلوس..بالتاكيد عندهم علم بالموضوع كله وبالخنبه....شبحتى فيهم ناس حرايميه ومرات يساعدو بنتهم ويهربوها.... حتى انا غالط مفروض شديتها من اول مازبطها وماخليتهاش تفلت من يديا ..قال عندك اسبوع قال..تى هيا متوسدة الفلوس ومتمتعه بيهم ... لازم غدوة ندير حل ... ومعش نزيد نعطل يوم اخر

قعد يخمم ويخطط ويتكم وافكار ترفعه وافكار تجيبه ...

وقرر انه لازم يعرف المستوى اللى عايشه فيه بيش يتأكد مالفلوس لنصرفو ولالا

-معاد / فارس .. خود طاسه الشاهى خيرك بردت راهو

-انتبه ومد يده خدى طاسه الشاهى شرب منها/ خيرها مرة

-محمود / بالعكس سكرها زايد

-حطها فارس الطاسه عالطاولة / نكدب عليك يعنى ..خود دوقها مرة زى العلقم

الطاسه مالت وطاحت من الطاولة عالارضيه تكصرت وتبزعت

-حمد / بسم الله العظيم

-محمود/ ميرى .. تعالى امسحى الشاهى اللى تبزع

-معاد / خيرك خلوقك بدو فى شيشه هالايام وماطايق كلام حد ...

-محمود / نحساب روحى غير انا اللى ملاحظ ..

جت ميري الشغالة تمسح فى الشاهى

-حمد انشغل / فارس خيره ..فى حاجه

-فارس انتبه لنفسه / لاااا شن فى..ماهناك الا كل خير ياحاج

__________________________________________

_

ثانى يوم العصر

فى حوش جميلة ...اميرة مقعمزة فى دارها على سريرها .. وخواتها وفاء ومروة مقعمزين معاها

-وفاء/ يعنى انتى ماصاير معاك شى .. راهى امى مشغولة عليك هلبا

-مروة / احنا مفهمناش انتى سيبتى الخدمه ولا شنو

-وفاء/ امى قالت ليك ثلاثه ايام مامشيتيش .. لا تاكلى ولا تشربى.. ليش هكى يا ميرو

-مروة / خيرك ساكته وماترديش علينا

-اميرة / امى تقدر تسألنى بروحها منغير ماتبعتكم مرسال

-وفاء/ سألاتك وانتى ماتبيش تردى

-اميرة / يعنى مارديتش عليها هيا ...بنرد عليكم انتو

-مروة / اميرة خيرك ليك فترة طويلة متغيرة .. وين اميرة الاولى اللى كانت تحتوى فينا كلنا و تسمع فى شكوتنا ومشاكلنا

-اميرة / اميرة الاولى قاعدة .. غير انتو شكلها مشاكلكم انحلت ومشت الامور .. ونوضو روحو لحياشكم هيا

-وفاء تضحك/ رجالاتنا الثلاثه مزردين مع بعضهم

-مروة / مراد مزرد مع جماعته .. وايهاب وطارق يعرفوهم كلهم شوى عزموهم معاهم

-وفاء/ يعنى توو مالاخير نطمن امى .. وشغلك قاعد وماعندكش مشكلة

-اميرة / اووووووووف من خواتى وتنقريزهم .. قصدكم بايتات وبتقعدو طول الليل تلحنو على راسى ..لا ياماما انتى وياها كل وحدة تلم صغارها وتروح تبات فى حوشها ..انا والله راسى يلعب بيا وشكلى بندوخ

-مروة تضحك / بعيد السو عليك ..متخافيش الرجالة بيروحو ماهمش بايتين برة

شرين باب الحوش

-وفاء /وبعدين حتى كان تكلمنا .. تى ماهو خايفين عليك

-اميرة / وفاء بري افتحى الباب شوفى شكون منغير طولة لسان

ممكن لحظات ....

وفتحت صفاء باب دار اميرة / نوضو يابنات.. مدير اميرة فالعمل هوا اللى يشرين عالباب

-اميرة / اااه😱😱.... مديري

-صفاء/ ايه مديرك .. مشتله امى للباب وقالتلى نخبرك

خواتها/ 😳😳

__________________________________________

_

نفس الوقت فى استراحة طلال

طلال وعفاف مقعمزين على نفس الكنبه ... واخدها فى حضنه ويبوس فيها

-طلال / نحبك

-عفاف / وانا نحبك اكثر يا روحى

-طلال / مش هاين عليا اتروحى وتخلينى..خليك باتى معاى

-عفاف/ والله بنتى مخليتها عند سعاد بنت خالتى .. تسبلت ان عندى لمه العشيه ... كيف بندير بس

-طلال / وراس عيونى خليها عند بنت خالتك .. انيس مسافر لى سبها ... اتسبلى زى المرة اللى فاتت انك بتجيبي مراة اضملك الحوش وتخافى على بنتك مالغبرة

-حضناته / يا حليلى منك .. حتى انا معش قادرة نفارقك

-حضنها / ولا انا

-عفاف/ اهو معاك من الضهر وتغدينا مع بعض .. خلى نروح على طارئ يصير المغرب مزاله ساعه

-طلال / لا طارئ لا سو .. تو يبيلك شهرين بيش نحصل عليك فى جية زى هادى

-عفاف/ تصدق ديما نخمم فى حاجه

-طلال / شنهيا حبيبتى

-عفاف/ عمرك ماقلتلى اطلقى .. وخليك معاى على طول

طلال قعد ساكت ...

-عفاف / خيرك سكتت

-طلال / من بداية تعارفنا قلتيلى مستحيل نسيب بنتى .. وانيس مستحيل يخليهالك كان اطلقتى .. ولدلك عمرى ماتكلمت فى هالموضوع

-عفاف / نتمنى يكون هدا هوا السبب اللى مخليك متحمل بعدى عليك

-طلال حضنها بقوة / بعدك عليا مخلينى زى المجنون من غيرتى وانتى فى حضنه كل ليله

-عفاف / ماعندك علاش بتغير....انت تعرف انى نقعد بالاسبوعين منغير مايلمسنى..مش انا نتمنع .. لكن هوا اللى خاين وعنده اماكن ثانيه يشبع فيها فرغباته

شرين تليفونها.. وقفت عفاف فتحت شنطتها وخدت التليفون شافت المتصل لقاته انيس.

بدت ترعش مع بعضها / حيييه عليا انيس يتصل

-طلال / بالشوى عليك ..ردى خليك عاديه

-عفاف ترعش/ باهى

فتحت الخط / الوو

-انيس/ تى خير امه تليفونك خارج التغطيه ..من بكرى وانا نتصل

-عفاف /بالشويا خيرك تعيط

-انيس/ جماعتى بيشرو تمر من حوازة واحد صاحبنا .. قلت تمر الجنوب كويس نشوفكم تبو ولا شنو

-عفاف/ الثلاجه معبيه لتوة بالتمر اللى جبته المرة المرة اللى فاتت ماكلاه حد

-انيس/ باهى تمام هى

-عفاف/ امتى بتروح

-انيس/ بعد غدوة

وصكر الخط ....

طلال حضن عفاف/ خلاص معش ترعشى

-عفاف/ حتى مع السلامه زى الناس مايقولش فيها

-طلال يضحك / باهى هدى روحك

-باساته ع شفايفه/ خلى نقول لى بنت خالتى تخلى بيلسان عندها الليله

-طلال/ واخيرا ...

وقف قامها بين ايديه ...

-عفاف تضحك/ بطل يا مجنون خلينى ندير المكالمه

-طلال يضحك / ديريها حتى لداخل من دار النوم

__________________________________________

_

فى حوش جميلة ....

جميلة لابسه نضاراتها وحجابها مشت للباب / ايووه

-فارس حول نظاراته / انا فارس ..مدير اميرة فالعمل .. ونبى نسألها على حاجه فالمكتب

-جميلة وخرت شوى / تفضل ولدى خش للمربوعه.. مش قدام الباب

فارس ما مانعش خش يبي يشوف الاثاث .. وهل لاعبين فالفلوس ولا لا 😁

حول كندرته فالسقيفه .. وخش للمربوعه / السلام عليكم

-جميلة / وعليكم السلام آنست وليدى ..

-فارس تحشم من حسن استقبالها / الله ايآنسك ويحفظك يا حاجه ...

قعمز فارس عالصالون وقعمزت جميله عالكنبه.. المربوعه متعهم ممكن 4×4.. فيها صالون وتحته سجادة وفالوسط طاولة مرش وعالجنب طاولة صغيرة محطوط عليه تليلون ارضى وجنبه فازة فيها ورد

-فارس/ انا اسف انى جيت هكى لا احم ولا تستور ... لكن الله غالب عندى اوراق مهمه نبى نسأل عليهم اميرة ومعش تلاقينا

-جميلة بحدر/ يعنى هيا قاعدة تخدم عندكم !!؟

فارس فى خاطره/ انتى مش عارفه بنتك قاعدة تخدم ولاادور ولا وين ربي حاطها ياحاجه .. واااك معقولة فى عائلات ليبيه هكى

-جميلة /والله بنيتى ماحصلت هالخديمه الا بخلينى ويخليك

كل ما تقدم ملفها لمكان مايصيرش تقول عندها تابعه ..

-فارس معرفش شن يرد 😁/ اهاا

-جميلة / علاش نعطل فيك خلى نمشى اناديهالك

-فارس / باهى

طلعت جميله من المربوعه /مروة ... ديري قهوة

فارس مقعمز فالمربوعه ..يسمع فى نقاش صاير لداخل .. كأن العزوز الكبيرة تترجى فى حد .. وهيا فالاصل تترجى فى بنتها تخش لى مديرها واميرة ماتبيش.. غير الكلام اللى واصله مش واضح .. هوا مش عارف علاش جاى .. المهم يبي يواجهها فمكانها ويهددها .. حس ان امها ليبيه اصيلة وطيبه .. امالا البنت لمنو طلعت .. افكار ترفعه وافكار اتجيبه ..

طقطق باب المربوعه ...تلفت فارس لقى اميرة واقفه ووجهها شاحب

__________________________________________

_

فى حوش الخنساء صاحبة اميرة

شرين تليفون خنساء ...شافت الرقم لقت الاستاد مروان يتصل ...صكرت باب غرفتها وردت

-خنساء/ اهلين استاد مروان

-مروان / اهلا بيك كيف الحال

-خنساء/ الحمدلله .. كيف حالك انت استاد

-مروان / الله يسلمك ويحفظك .. قتلك

-خنساء/ اهاا

-مروان / اميرة المهدى وينها .. خيرها معش اداوم

-خنساء/ والله مندرى عليها ..حتى انا حسها شغلتنى ..

-مروان / باهى كلميها فالتليفون شوفيها خيرها

-خنساء/ اتصلت بيهاولقيت تليفونها مقفل

-مروان/ باهى ماتعرفيش السبب خيرها

-خنساء/ والله مندرى عليها .. البنت اللى اسمها رانيه معاها فالمكتب قالتلى صار نقاش بينها وبين الاستاد فارس ..ومن يومها معش جت

-مروان انشغل/ اهاا... مع فارس .. وفارس شن الموضوع اللى بينه وبينها بيناقشها فيه وبتزعل هيا وبتنقطع عالعمل .. اميرة تبع ادارة طلال وماليهاش علاقه بي قسم فارس

-خنساء/ والله مندرى عليها

-مروان / باهى ممكن تفوتى عليها غدوة من العمل واطمنينى

-خنساء ضحكت / انطمنك ... باااهى نطمنوك وعلاش لا مدام حاير عليها 😁

-مروان يضحك / ممكن نسئلك بعض الاسئلة عليها

-خنساء/ اسأل وانا نجاوبك... بس قبلها لازم تقولى انت ليش تسأل وشاغلاتك اميرة

-مروان ابتسم/ تصدقى كانا نقولك منعرفش علاش نسأل عليها..لكن من يوم ماغابت وانا نحس فى حاجه ضايعه منى

-خنساء/ ياعينى ياعينى ...

-مروان / منسئلك هيا مرتبطه

-خنساء/ لاااا مش مرتبطه

-مروان / وين تسكن

وقعدو يهدرزو على اميرة واحوالها اكثر من نص ساعه

.

.

-مروان / باهى تمام زى ماوصيتك

-خنساء/ كون هانى.. غدووة نجيبلك الاخبار كلها من اختها وفاء

___________________________________________

_

فى حوش جميلة

خشت اميرة للمربوعه وهيا رجليها يصفقو

-اميرة صوتها هارب / السلام عليكم

-فارس شبحلها / وعليكم السلام ..

-اميرة يداها يرعشو وواقفه جنب الباب/ اتفضل استاد

-فارس/ تعالى قعمزى

-اميرة صوتها يرعش/ تبى حاجه استاد

-فارس وقف/ نبى فلوسى ..نبى نرد كرامتى بعد الضحكه اللى ضحكتيها عليا

-قربت من الصالون وقعمزت وهيا تنتنفض نفض مش غير ترعش بس وبدت تبكى/ نقص صوتك .. نقص صوتك تربح خواتى عندنا يسمعوك .. وامى مريضه قلب مش حتستحمل

-فارس/ امالا اعترفى توة بيش انقص صوتى ومانديرلكش فضيحة

-اميرة/ بيش بنعترف بس...

-فارس/ اعترفى انك بنت ليل ..واتاجرى بنفسك وتاخدى فالفلوس وحاولتى قتلى .. وخنبتى منى فلوسى...هدا كله اعترفى بيه توة قدامى

-اميرة بدت تبكى بحرقه/ حسبيا الله ونعما الوكيل فيك

-فارس/ فوق اللى دايراته فيا ...جايا تتحسبي فيا فى وجهى .. تحسابي ربي بيسترك .. انتى تحلمى .. اهو فضحك قدامى وجيتينى برجليك ..

-اميرة / انت شنو اللى تبى توصله

-فارس/اللى نبى نوصله انك تتأكدى ان المرة هادى حصلتى.. ورحمه امى ماك باردة بيهم الفلوس ..توووة لازم تعترفى باللى درتيه كله..ولا حسابك معاى بيكون عسير

-اميرة / قلتلك مش انا ...البنت اللى ضحكت عليك مش انا

-فارس/ تمام ... نشهدو امك ...

-اميرة ترعش/ وامى شنننن دخلها تجبد فيها توة

-فارس/ لان يا ماما المبلغ مش بسيط .. ميه الف دينار

-اميرة خبطت وجهها / ميه الف 😱😱

وقف فارس / يا حاجه .... حاجه

اميرة انهارت وبدت تخبط على وجهها / امى لا .... امى لا

واطيح عالارض ادوخ ...

فارس انخلع / اميرة .....اميرة

جت جميله لما سمعاته ناداها تلاقى بنتها طايحه/ حيه عليا بنتى ... شن صارلها... يامروة تعالى لى اختك

فارس واقف ومش قادر يحط يده على اميرة / طاحت بروحها شكلها عندها دوخه

خشت مروة بحجابها تجرى مخلوعه/ خيرها اميرة

وصفاء ووفاء قعدو برة تحشمو من فارس ...

نزلت مروة على رجليها قامت اميرة من كتافها وتضرب فيها على وجهها / اميرةةة... اميرة

وتلفتت لى فارس/ انت شن قلتلها يا وخى

-جميله / شن بيقوللها الراجل كيف خش..هدا من قلت الماكلة

.. سامحنا يا وليدى خلى بنرفعوها للمستشفى

-فارس/ طلعوها نرفعكم فى سيارتى

-مروة/ لا لا صحيت اوخى .. انا واختى نسوقو تو ترفعها وحدة مننا

-فارس تحشم / باهى عن ادنكم

مشى خطوات بيطلع وتلفت مش عاطيه خاطره يطلع

-جميلة / يا وفاء جيبي اميه اختك رزنت علينا ومعش فاقت

-فارس رجع/ حولى حولى ..وين سيارتك انتى

-مروة / الهونداى اللى مدرسه قدام الباب ...

فارس قام اميرة بين ايديه وخواتها يتفرجو / افتحى السيارة

-جميلة تمشى وراه/ هاتيلى جلابيتى يا وفاء ..

صفاء مشت تجرى فتحت باب الحوش طلع فارس وفى ايده اميرة ومشت فتحت الباب الخلفى .. خش فارس بي اميرة فالكرسى وتكى راسها ساواه ... وهوا يشبحلها كيف مغمى عليها ...وحس بتأنيب الضمير

طلع فارس من السيارة... وطلعت جميلة من الحوش لابسه جلابيتها ومروة وراها ركبو الزوز من قدام وركبت وفاء مع اميرة من الخلف وفى يدها شيشه اميه بيش اتبخ منها على اختها بالك تفيق ... وقعدت صفاء مع الصغار

مشى فارس لسيارته ولعها وهوا يشبح فى خوات اميرة وامها كيف خايفين عليها ... طلعت مروة بالسيارة وفارس وراها

__________________________________________

_

فالمستشفى ...

اميرة لداخل فالغرفه .. وامها وخواتها وفارس مقعمزين برة

جميلة مقعمزة على كرسى وفارس جنبها .. اما مروة ووفاء قعمزة فكراسى ابعد تحشمو من فارس

-جميلة / انت شن قلتلها يا وليدى..بالك جبدتلها سيرة تغشش

-فارس/ هيا قاعدة كيف خشت ..مالحقتش نجبدلها شى

-جميلة/ امالا انت علاش ناديت عليا

-فارس عيونه معلقات فالباب يراجى فالدكتور يطلع ويقول خيرها اميرة / لاحظتها بيغمى عليها قلت اناديك

-جميلة تمسح فدموعها / ياااااربي نجيلى بنيتى ...مكسوبى هالبنات يااااربي ماتخلينى نشتاق وحدة منهم

وفاء ومروة بدو يبكو سخفتهم امهم ... وقفت وفاء.. خدت شيشه اميه اللى كانت فى يدها .. ومشت لى امها شربتها وبختلها وجهها ..

-فارس/ والله ماتخافى يا حاجه .. احنا فالخدمه ملتزمين بالموضفين انعالجوهم فى اى مكان

-جميله انخلعت/ تعالجوها 😱!!...لاه هيا خيرها ...الطبيب شن قال يا مروة

-مروة / ماقال شى ياام الدكتور قاعد ماطلعش

-جميلة/ اهو مديرها قال نعالجوها

-فارس/ المقصود كانا صار ما صار يا حاجه

انفتح باب الغرفه وطلع الدكتور ...مشاله فارس ومروة ووفاء يجرو

-مروة / هاا طمنا يا دكتور

-الدكتور / انتو اهل المريضه

-مروة / احنا خواتها وامها

-الدكتور شبح لى فارس/ وحضرتك

-فارس/ انا مديرها فالعمل

-الدكتور / باهى كويس لانى نبى نسأل حتى عالعمل

وتلفت لى مروة / منسئلك ...المريضه عندها مشكلة توة ..او عندكم مشاكل فالحوش

-جميلة من مكانها / حاشانا يا دكتور ..والله ماعمرها الناس سمعت صواتنا ولا صارتلنا قصه

-الدكتور تلفت لى فارس/ وفالعمل ...هل عندها مشكلة او خلاف مع حد

-فارس/ لا لا هيا كيف بدت العمل وماصارلهاش خلاف مع اى حد

-الدكتور/ باهى هيا مخطوبة .. او عندها اى مشكله عاطفيه

-جميلة/ حاشاها بنيتى من هالكلام ولا عمرها تعرفه

الدكتور غصراته الضحكه ...

-فارس/ انت ليش الاسئلة هادى كلها يا دكتور

-الدكتور/ المريضه عندها صدمه ...والصدمه ماتجيش من فراغ ..بالتاكيد عندها اسباب

-جميلة / يا حليلى على بنيتى .. وفيش مصدومه

-الدكتور/ ماهو لازم انتو تحكولى بيش نفهم هيا فيش مصدومه .. لان المريضه لتوة مافاقتش

-فارس/ معقولة😳

-مروة تحشمت قدام فارس / مرات يكون مرض عضوى يا دكتور.. لان هيا بكرى قالتنا انها حاسه بدوخه ...قالت نحس فى روحى بندوخ

-الدكتور/ انشاءالله خير

____________________________________________

_

الساعه 1 فالليل ...

فارس واقف بعيد يتكلم فالتليفون / مافى شى عندى عرس صاحبي ....عادى ياام نسيت ماقلتلكش... باهى .. باهى عاد امتى مانكمل تو نروح .. هى تصبحى على خير

-وفاء واقفه على جنب وتتكلم فالتليفون / باهى اللى خشيت للتغطيه با باشا.. لا تقول عندك مراة ولا تقول عندك عيل بالك صارلهم حاجه بعدك

-ايهاب/ المكان اللى احنا فيه مافيشى تغطيه .. توة بس خشينا للتغطيه .. قتلك خيرها اميرة توة صفاء كلمت طارق

شن حالها

-وفاء/حال عدوك ..طاحت علينا داخت ولتوة مافاقتش .. الدكتور قال عندها صدمه

-ايهاب/ اييح .. اميرة فيش بتنصدم ديما جوها مليح

-وفاء/ هدا اللى صار

-ايهاب/ اهو بنجو انا والاولاد للمستشفى طول

-وفاء/ ااه .. للمستشفى .. بالك امخر عليكم وانتو كنتو فى زردة تعبانين

-ايهاب/ لا لا اهو جايين وقريب نوصلو

-وفاء بدت ترعش/ باهى باهى

صكرت الخط ومشت تجرى لى اختها مروة/ ياحليلى ايهاب قريب يوصل يشبحه معانا والله لما يطلقنى

-مروة / يعنى انا اللى تحسابي مراد بيسكتلى .. والله يشوفه لما يقطعنى

-وفاء توشوش/باهى كيف الحل ياوخيتى.....راهم قريب يوصلو

- مروة/ حولى تو نكلمه انا

ومشت لى فارس ...تكلمت معاه بالشوى وخبراته ان رجالاتهم جايين فالطريق ومش كويس على اميرة ان رجالات خواتها يلاقو مديرها فالعمل هنايا معاهم فالمستشفى

-فارس/ تمام مفيش مشكله

ومشى لى جميله قعمز جنبها ويوشوش / خالتى نساباتك بيجو وصح مش حلوة يلقونى هنايا ... انا بننزل لوطا .. ومانيش مروح .. اعطينى رقم تليفونك بيش نتصل بيك ونطمن

-تلفتتله جميلة / يا وليدى برة روح تعبناك معانا وانت اكيده عندك خدمه الصبح

-فارس غمض عيونه وفتحهم / منقدرش انروح

جميلة شافت الخوف فعيون فارس على اميرة ...

-مدت جميلة تليفونها / هاك خود رقمى واكتبلى رقمك

خدى فارس التليفون وبدى يكتب فى رقمه وضربه بيش يطلعله رقم جميله ..

قام راسه/ لو استحقيتى اى حاجه كلمينى طول ...انا بننزل نقعد فى سيارتى مش حنبعد

-جميلة حست بيه وعيونها دمعو / سلم وليده

-مد يده ضم راسها وباسها على جبهتها/ والله زى اميمتى وماتكونى الا راضيه

وقف شبح للبنات/ نستادنكم توة

ونزل للبركيدجو لوطا فتح سيارته وقعمز فيها .. وقعد كل ربع ساعه يكلم فى جميلة يطمن

.

.

.

فالفجر فاقت اميرة .....

فرحو امها وخواتها ... خشولها وقعمزو جنبها .. لقو حالتها كويسه وعاديه جدا ..هاديكة الدوخه غير عارض..لانها جت نتيجه صدمه ..

جميلة تكلم فالممرضه/ يابنيتى نقدرو نروحو بيها توة

-الممرضه/ لا يا حاجه ...لين يمرو الدكاترة الصبح ويكتبولها على خروج

-جميله / كلام زين .. اهو الصبح مش بعيد

-ايهاب ايأشر من قدام الباب/ انشاءالله لاباس يااميرة

ومراد وطارق نفس الشى

-اميرة مبتسمه / لا يوريكم باس ...

شرين تليفون جميله ... فتحت الخط وردت بالتوشويش ماتبيش نساباتها يسمعوها

-جميله/ سلم وليدى روح انت اللى عليك درته.. وتوة نساباتى معاى كأنك ركبت وشفتها.. ربي يحفظك ويبارك فيك

اميرة تلفتت لى مروة وتأشر على امها / شكوون

مروة بالهمس وغمزتلها/ مديرك

-اميرة انخلعت/ ااه .. وشن يقوللها

صكرت جميله التليفون

-اميرة/ شن كان يقولك يااام

-جميلة/ خيرك ترعشى يابنيتى....ماكان يقولى فى شى

..اطمن عليك فقتى ولا لا بس...وقلتله روح

-وفاء تضحك / ياقلبي عليه يانارى رجليه طاحو وهوا واقف معانا .. ماعطاشى قلبه يروح ويسيبك ..قصدى ويسيبنا

-اميرة / هادى شن تقول انا مافهمت شى راهو

-مروة / ضمى فمك اختك مريضه مش وقت برادتك

-جميله / انشاءالله لاباس عليك يابنيتى ...ريتها فيا ولا فيك

-بناتها الثلاثه / بعيد السو عليك يااام

فارس بالفعل ولع سيارته ومشى للقهوة فطر وكان ناوى يرجع للمستشفى يشوف اميرة

___________________________________________

_

ثانى يوم الساعه 9

اشرف طلع بكرى ومشى للجامعه ...

طول خش جهه مكتب الدكاترة اللى يقرو فيهم ... طق البلب وفتحه .. لقى الاستادة سارة اللى تقري فيه مقعمزة بروحها

-اشرف/ صباح الخير دكتورة

-سارة / صباح النور انا استادة مش دكتورة..مزال ماخديتش الدكتوراة

-اشرف/ لعلمك درجه الاستاد اكبر من درجه الدكتور

-سارة / باهى برة للقاعه اهو جايه انا غادى

-اشرف/ سارة ليش تتهربي منى

-سارة / انت ماعييتش ولا كيف

-اشرف/ انا نحبك

-سارة / وانا اكبر منك بي سبع سنوات

-اشرف/ الرسول تزوج السيدة خديجه وهيا اكبر منه بي 15 سنه

-سارة / لكن انت مش الرسول وانا مش السيدة خديجه

-اشرف/ لكن انا نبيك بالحلال وانا مسؤل عن كل تصرفاتى وقراراتى

-سارة / واهلك .. ونضرة المجتمع لينا

-اشرف/ الرجال قوامون على النساء .. حتى لو كانت المراة اكبر من الراجل

-سارة / الدوة مايغلبك فيها حد

-اشرف يضحك/ لانى طالب عند الاستادة سارة

-سارة / باهى خلاص اطلع ..مانبيش حد يلاحظنا ونقعدو حكايه

-اشرف/ ليش هما قاعدين مالاحظوناش .. تى انا كل سنه نقعد ننقل فى اوراقى من مكتب لى مكتب بيش ينقلونى للمجموعه اللى عندك

-سارة / باهى امشى

-اشرف/ اليوم بنكلم امى

-سارة / باهى تخرج قبل

-اشرف/ لولا العامين اللى درت فيهم حادث كنت توة متخرج ليا وقت ... يعنى الدراسه مش عائق بينا

-سارة / باهى اصبر شوى متكلمهاش

-اشرف/ انتى خيرك خايفه ..امى نعرف من اما باب نخشلها

وماتخافيش خلينى نواجه ضروفى بروحى

-سارة / انشاءالله خير وخلاص

____________________________________________

_

ثانى يوم

خنساء فالعمل مقعمزة فى مكتبها .. ومروان مقعمز عالكرسى اللى مقابلها

تتكلم فالتليفون / معقولة .. وخيرك ماكلمتينيش يا وفاء...لا حول ولا قوة الا بالله ... الف الف سلامه عليها

ومروان مقعمز مقاباها ايأشرلها خيرها ...

كملت مكالمتها وفهماته ان اميرة فى المستشفى

مروان وقف/ بنمشيلها

-خنساء/ فكك تو تلاقى رجالات خواتها غادى

-مروان / عندى زوز دكاترة صحابي يشتغلو غادى .. تو نشوف كانها بروحها وقت مرور الدكاترة بنخشلها

-خنساء/ براحتك

بالفعل ركب سيارته وطلع ...توجه للمستشفى ....

وصل درس سيارته فى الباركنج ... ويكلم فى صاحبه دكتور يشتغل فالمستشفى ...

ركب للدور السابع بالاسانسير .... طلع من الاسانسير وهوا شاد النقال ويتكلم يدور فى صاحبه الدكتور .. تلفت عاليمين ويدور فيه ....... فارس واقف نهايه الممر وراه ...بيناتهم ناس وموضفين وزحمه .. لكن فارس شافه ...قعد حاير فيه شنو يدير هنايا ....

وقف عالدكتور شوى ورجع للاسانسير فتحه ونزل ..

فارس ماطاقاش الصبر .. مشى للدكتور ...

فارس/ اهلين يا دكتور كيف الحال

-الدكتور / اهلا خوى

-فارس/ شورنى غير مشبه عليك

-الدكتور/ اهاا لا تمام

-فارس/ تقريبا شفت مروان واقف عليك توة ..بعد ماخش معش زبطه وين

-الدكتور / قصدك تعرفه ...لا هوا نزل توة

-فارس/ اهاا شكله مستعجل

-الدكتور/ سأل على حالة اسمها اميرة قلتله طلعت قبل شوى ف روح

-فارس/ اميرةةةةة..... باهى باهى

نزل بالاسانسير تحت ... مشى لى سيارته ركب فيها وطلع رقم عمتك جميله واتصل بيها

-فارس/ حمدالله ع سلامه اميرة

-جميلة / الله يسلمك يا وليدى ويحفظك

-فارس/ جيت بعدكم توة للمستشفى ..قالولى طلعتو

-جميلة / عطاها الدكتور خروج

-فارس/ ممكن نكلمها

-جميلة / باهى شويا هى نعطيها التليفون

مشت جميلة لى دار اميرة فتحت الباب لقت اميرة متكيه فسريرها ...

مدت جميله لى اميرة التليفون

-اميرة خدت التليفون / شكون

-جميله / فارس ...مديرك

-اميرة حاطه يدها على سماعه التليفون / ليش بس تقوليله قاعدة

-جميله طالعه من الدار/ باهى تو نكدب عقاب عمرى على خاطرك

طلعت وردت الباب وراها

قامت اميرة التليفون وبصوت واطى / الو

-فارس/ خوفتينا عليك