رواية أميرة قلبي الحلقة الخامسة عشر 15 - زهور جمال الدين
رواية أميرة قلبي الحلقة الخامسة عشر 15 كاملة مكتوبة للكاتبة زهور جمال الدين
 |
| رواية أميرة قلبي الحلقة الخامسة عشر 15 - زهور جمال الدين |
فى حوش رندة ...
رندة ناضت من مكانها خشت للحمام غسلت وجهها وطلعت رتبت سريرها ومشت لى امها فالمطبخ
-رندة/ صباح الخير ماما
-كاملة/ صباح الخير رنودة
-رندة / فشكون كنتى تكلمى نسمع فيك تحكى فالهاتف
-كاملة/ كنت نكلم فى خوك رواد.. قال ممكن بيروح الشهر الجاى
-رندة/ واحمد بيروح حتى هوا ولا شنو
-كاملة / احمد فبلاد ثانيه .. وماكلمنيش الحق
-رندة حطت سزوا القهوة عالنار وخدت القهوة والسكر تحط فيهم / كلمتى بابا
-كاملة / بالله بري دورى وين تلعبي
-رندة / نهاراتى البيض ... انشاءالله ماكلمتيشى والراجل كدبت عليه وقلتله بابا بيسأل عليك
-كاملة / مش قلتلك معش تردى عليه ولا.. والله مايسمع بوك بي هالموضوع مايبدا الا عاطيك طريحه..مزال راجل متزوج واكبر منك قريب بي 15 عام .. شنو ضفرتى الشيب
-رندة/ لكن انا نبيه ... بفلوسه بدلاله وشنو الاصغر منه بيديرلى احسن
-كاملة/ عالاقل اسمه من عمرك .. مش اتبعيلى فى راجل متزوج تحسابي مرته بتسكتلك ..والله لما تخلى الشيب ينبتلك فلسانك وماتخليك توصلى راجلها .
-رندة سرحت / لااااا من ناحية مرته انا مطمنه ...وحاطه بالى على تركينه ..
فاضت القهوة .. مدت رندة يدها فيسع طفت الغاز
-كاملة / ياااربي خير
-رندة مبتسمه /دلق القهوة عمره ماكان الا خير مامى حبيبتى
-كاملة / ربي يعطينى حتى شويا من هدوئك المستفز
___________________________________________
_
فى فرع الشركة
اميرة مشت خطوتين فالممر وطاحت عالارض
البنات بدو يعيطو / اميرةةةةةةةة
وقاموها بخو عليها اميه بيش يفيقوها وهيا شى ولا قالت نفيق ... وطارو بيها لى اول عيادة ...
اميرة فالغرفه وزميلاتها واقفات برة ومعاهم محسن وعزيز زملائهم
-محسن/ اتصلى بي وحدة من خواتها خلى تجى
-رقيه / ماعنديش رقم ولا وحدة فيهم
-فاديه / ولا انا عندى رقم ولا وحدة فيهم وتليفون اميرة وشنطتها قعدو غادى فالمكتب طايحات
-عزيز قايم التليفون فى يده/ وانا من بكرى نتصل بالاستاد فارس لقيت كل ارقامه مقفله وعمك المهدى خارج التغطيه
-امل / باهى وحدة مننا تمشى للحوش وتبلغهم
-فاديه / غير خلى نفهمو الدكتور شن بيقول قبل وبعتالى نمشو ...
-رقيه / انا بنمشى لى امها نخبرها باللى صاير.. البنت اليوم فاتحتها افرضو تصيرلها حاجه وامها ليه ليه توتى فى عشاها
-عزيز/ برو انتو للحوش واحنا اهو قاعدين هنايا
-رقيه/ هيا يا فاديه
-فاديه شدة شنطتها بالقوة / هيا وربك يستر مايصير لى امها حاجه تحكى عليها انها مريضه قلب
وطلعو البنات توجهو لى حوش ام اميرة
___________________________________________
_
فارس يسوق فى سيارته بطريقه جنونيه ويتكلم فالتليفون
-طارق مقعمز فسريره ناض على تشريينه التليفون/ انت شن تقول يا فارس .. شنو اللى صار بس فهمنى
-فارس/ اللى سمعته توة ... قلتلك الحياة نصيبات وكل حد يشوف نصيبه
-طارق معش تحكم فى اعصابه / اىىىى ليش .. فهمنى ليش كل حد يشوف نصيبه .. البنت هدا اسبوع عرسها الناس شن بتقول
-فارس/ انا بلغتك وانت بلغ خالتك .. هيا بالسلامه ..
وصكر الخط وخلى طارق حايس فى دوامه .. ويله بنت خالته اللى غدوة حنتها كيف بيقوللها خطيبك فسخ.. ويله خالته اللى اكيدة بدت اطيب فالعشى كيف بيزفلها الخبر..
فارس اتصل بي بوه
-عمك حمد مقعمز فى صالة حوشه/ شن هالخراف اللى قاعد تقول فيه ... انت فارس اتكلم فيا ولا شكون
-فارس/ قلتلك الغى كل شى يابوى
-عمك حمد يعيط / والناس اللى عزمتها وجاية الليله بتمشى معانا .. وخوتك واختك اللى قريب يوصلو للمطار بعد ساعه ولا ساعتين.. خير شن جاك يا ولد ...خير بلاى انا من دون الناس ربي عاطينى ضنوة خاسرة
-فارس/ انا وصلت للمطار هيا بالسلامه
-حمد / فارس سلم ولدى ماديريليش هكى رانى خوك اللى رباك ماتقصفليش وجهى قدام الناس .. تعالة وخلى نقرو الفاتحه وبعدين لكل حادث حديث حتى بطلق طلق
-فارس/ مضطر انى نصكر ...بناخد التكت من المكتب متع الحجوزات ... هيا سلام
وصكر الشفرة نهائيا ..... وجه متغير مقلوب .. واضح انه انسان محطم...المعطيات اللى قدامه ان اميرة داراته مضحكه
.. انسانه بايعه شرفها وجايه تبى اتلصق فيه عمايلها.. مش قادر يستوعب ولا يسامح .. يتخايل فى اميرة كيف تبلغ فى امها ان الفاتحه ماصارش منها .وكان امر نوعاما قادر انه يشفى غليله ولو بنسبه 1%... ماعنداش علم ان البنت بعده طاحت مغمى عليها
بالصدفه حصل كرسى فاضى فالطيارة .. حجز تكت وقتى من مكتب الطيران اللى فالمطار .. وبالفعل ركب الطيارة وطار لى تونس
___________________________________________
_
فى حوش جميلة ...
جميلة مقعمزة عالصالون / ياوخياتى بخو عليا اميه يا غبارتى بنتى فاتحتها اليوم شن طلعها بس
-خديجه مقعمزة جنبها / وحدى الله يا جميلة وخلينا نفهمو مالبنيات فرعستيهم بعياطك
-مروة / هيا امتى مشت للمكتب ياوخيتى الصبح دخلتلها فطورها وتراجى فالبنت
-عمتك نعيمه جارتهم عزوزة وفاء/ شنو ماريتوهاش لما طلعت
-جميله تبكى/ والله ماريناها يا وخيتى ..غير حولو بس ارفعونى لى بنتى خلى نشوفها خيرها
-خديجه / غير خلو الهواء... نوضى يا جميلة هى
-مروة تساعد فى امها / نوضى نرفعك انا يام
-وفاء تلفتت لى عزوزتها / خلى معاك حمودى ياعمتى
-عمتك نعيمه/ هاتيه بنقعد بيه هنايا فى حوش امك مانيش طالعه ... بنقعد جنب الطناجر
-خديجه / طفيهم الطناجر توة نشوفو البنيه قبل
-جميلة/ لااااا ماطفوش عالعصبان ..اهو منمشى نجيبها ونجى تربحو هنونى عالطناجر والعشى
" ياروووحى على عمتى جميلة شارقة"
-مريم اختها / اهو احنا قاعدين هنايا ياجميلة خيرك وحدى الله ..
وشبحت لى صفاء/ هاتى الصغار خليهملى
-صفاء/ غير ردى بالك يمشو للغاز ياخالتى
-مريم/ لا لا ماتخافيش
وطلعو جميله وبناتها من الحوش مروة وخديجه وجميله فى سيارة وصفاءووفاء فى سيارة ...
درس طارق قدام الحوش وجهه اسود / وين ماشيين
-صفاء/ اختى اميرة طاحت مغمى عليها فى عملها بنمشو للعيادة بنشوفوها ..
طارق دس الكلام فى قلبه وقال لى صفاء ووفاء ينزلو من سيارة صفاء ويركبو معاه وبالفعل مشو ورا البنات للعيادة
____________________________________________
_
وصلو قدام العيادة ...
نزلو .. جميلة قايميينها غير بناتها وحدة منا ووحدة منا
خشو للممر ورا البنات لان البنات عارفين اميرة وين ...
طلع الدكتور / ممكن نتكلمو مع حد فيكم
مشت مروة تجرى للدكتور ووراها طارق ولد خالتها/ انا اختها يا دكتور خيرها وخيتى ان شاء الله مافيها شى
-الدكتور/ هيا الحالة عندها الضغط
-مروة استغربت/ الضغط!!؟ ... لا لا ماعندهاش
-الدكتور/ فى حد فالعيلة عنده
-مروة / امى عندها الضغط والقلب
-الدكتور/منكدبش عليكم ضغط المريضه ماباش ينزل نهائي..
واحنا نخافو حتى من جلطه .. ونتوقعو ان جاها ضغط بس احتمال يكون عارض.. وهدا كله نقرروه بعد ثلاثه ايام من وجودها فالملاحظه عندنا
-مروة تبكى/ كيف وجودها عندك .. يادكتور اختى فاتحتها اليوم وحفلتها الخميس ..
-الدكتور شبح لى طارق / والله تصرفو ..هيا المريضه فاقت لكن صعب تطلع قبل ثلاثه ايام او اسبوع من اليوم .. لان فى خطر عليها وزى ماقلتلك انها معرضه لى جلطه
-طارق فنص فى مروة / مروة بنت خالتى خلاص تعالى وراى نبى ندوى معاك دوة
-الدكتور / نستادنكم توة ..
انفتح الباب خشو ايهاب وومراد عدايل طارق / خيرها اميرة يا جماعه شن فيها
-مروة تبكى / يا حليلى على اميمتى زعما شن صاير فيها فالممر
-مراد / هوينها مقعمزة وتبكى وهيا صابرة هدا قضاء الله وقدره ودوخه بسيطه مش نهايه العالم
-مروة / مش دوخه بسيطه الدكتور شاك فى ضغط واحتمال يؤدى حتى الى جلطه
-ايهاب/ لا حول ولا قوة الا بالله
-طارق/ توة بتسمعونى نقوللكم هالكلمتين ولا كيف يصير
-مراد / ادوى خيرك ياطارق شن فى
-طارق/ فارس كلمنى .. وقالى كل الفاتحه وقفت وكل حد يمشى فطريقه ...
طاحت مروة عالكرسى شدها مراد راجلها /ااه شن تقول انت
-طارق حامق ووجهه مقلوب/ اللى سمعتوه كلكم .. فارس فسخ الخطوبة واحتمال ان اللى صار لى اميرة صارلها من تحت راس الشى هدا .. لانها طاحت فالعمل وبالتاكيد انهم تلاقو فيه
-مروة / وامى .. والعشى .. والمعازيم ..وكلام الناس ..
خبطت على وجهها/ حيه عليا على وخيتى
-طارق/ اسمعو .. توة احنا الاربعه عيلة وحدة .. يعنى الكلام اللى بنقولوه هوا اللى بتعاوده الناس.. ومش عيب فى حق اميرة تقعد حكايتها حكايه العروس اللى بطلو منها يوم فاتحتها
-مروة تبكى/ باهى وشن نقولو
-طارق/ بدل مانقولو فسخو وماصارش من الفاتحه نقولو العروس مرضت والفاتحه اتأجلت والعروس مرضت
-ايهاب/ وهيا اهو حق مريضه ماكدبناش احنا
-مراد / انا رائي نقولو تخطت ولا التبست ولا خدتها عين.. اى شى روحانى ...الغو حكايه بيجيها ضغط وبتجيها جلطهو.. لان الناس تعتبر فالمرض الروحانى قضاء وقدروكل شى معاه يلتغى .. لكن المرض العضوى اتكبره واتأوله واديرله مالحبة قبة..
-مروة تبكى/ يا حليلى على اميمتى .. يا حليلى على وخيتى
-طارق/ صدق مراد .. متى امك اللى هيا خالتى توة تقوليلها ضغط اتقولك امالا سقدى خلى نمشو نسقو لجماعه الفاتحه.. لو قلتيلها تخطت تقولك حيه عليا ايديا تربطو وقفى كل شى
-مروة / هدا كله يطلع منك انت يا فارس
-مراد / يا جماعه الخير الموضوع مش هين .. وكونه يوقف
كل شى يوم الفاتحه يعنى صار بينهم شى عظيم .. ولدلك توة خلونا ناخدو بالاسباب للموضوع اللى فى يدنا توة .. اللى هوا البنت مرضت ...
-طارق/ وفارس زعل لما لقانا لغينا كل شى حاليا وهوا عابي بقرايه الفاتحه
-مراد /برافو عليك وبهكى عالاقل لمينا الموضوع حتى شوى
-مروة/ يعنى انتو هكى رايكم
-مراد / اصلا ماعندهاش حل ثانى.. حتى امك اكرملها بدل ما تقعمز بين النساوين وتقول العريس سيبها وبطل منها
بالعكس اتقعمز واتقول بنتى تخطت سمالله العظيم .... واجلنا الفاتحه والعرس كله
-طارق/ هيا نطلعو لى خالتى
وبالفعل طلعو لى جميلة وسايسوها بالشوية بيش جابولها حكايه ان اميرة تخطت بسم الله العظيم .. وهدا شن جاها وطاحت ... وعلى قد ما بكت جميله وعيطت وصفقت .. مادوروهاش خاطر قضاء اخف من قضاء .. وخدت مروة خواتها على تركينه وحكتلهم الحقيقه واللى صار ووصتهم الحكايه ماتقعد الا بينهم وبس
وفعلا طفو هادوكا الطناجر ...ومشى طارق لى عمك حمد
__________________________________________
_
فى حوش حمد
حمد مقعمز فالمربوعه يبكى ويمسح فدموعه/ والله ياولد عمى هدا مكانى من لما كلمنى..لا قدرت نطلعلهم برة نحكيلهم ولا قدرت نخلى حد منهم يخش عليا
-طارق/ ماديرش فى روحك هكى يا حاج وكل شى نصيبات
-حمد يمسح فدموعه/ انا مانيش زعلان منه ..انا زعلان عليه
ليه يدير فى روحه هكى .. هدا عريس ويقولو قبره مفتوح اربعين يوم
-طارق/ وهيا عروس..ويقولو قبر العروس مفتوح اربعين يوم
-حمد/ هادى عين قوية وضربتهم
-طارق/ ايووووه سلمك فم ... وانا هدا علاش جايك .. البنيه سمعه..وسمعه البنت زى الطاسه كانا انكصرت ماعاد شى يلمه
-حمد/ وكيف تبى
-طارق/ بالنسبه لينا احنا عايلة خالتى .. لابنقولو بطلو منها ولا بنقولو الفاتحه وقفت ..
-حمد/ امالا كيف بديرو
-طارق/ احنا بنقولو البنيه اتخطت وممكن حتى التبست والفاتحه اتأجلت والعريس غضب
-حمد/ هيا سمعت ولا مزال .. وشن صار فيها حسك شغلتنى
-طارق/ والله ماندرو عليها سمعت ولا لا ...اتصلو بينا من مكان عملها قالو بنتكم طاحت ورفعوهة للعيادة .. وفالعيادة الدكتور شاك ان جاها الضغط .. واحنا ماناش عارفين ليش صار معاها هدا كله
-حمد بجديات اتأثر ويمسح فدموعه / فالعيادة .. احنا شن جانا... شن صارلنا..للصبح اتصلت بي ناس عزمتهم عالفاتحه لقيت روحى ناسيهم ...
-طارق/ المهم انا ياحاج جيت قتلك عالفايدة..بيش ماتقولش قلتو ولعبتو من وراى
-حمد / لااا شنو بنقول ... اللى درتوه ماشى عليا
-طارق وقف/ هيا امالا نستادنك
-حمد قاعد متأثر / ادنك معاك
وطلع وخلاه مقعمز .... وبعد اكثر من ربع ساعه
-حمد ينادى/ مفيدةة... يامفيدة
-جت مفيدة خشت مالباب/ نعم يا حاج
وخبرها حمد بان الفاتحه ماصارش منها.. عييت وهيا تلاجى وهيا تخبط ..... وبعد ساعه وصلو سلافيها وحماتها وسمعو بالبنيه مرضت وماصارش من الفاتحة... لكن سميرة مافاتتش عليها خشت مع حمد لى مكتبه بروحهم وحكالها القصه كلها وفهمها ان ام البنت معتقدة ان الفاتحه اتأجلت بس
____________________________________________
_
طبعا العويلة اصحاب واجب ... دارو بعضهم فى سيارة ومشو للعيادة ايزورو فالعروس ...
-جميلة / والله بنيتى لا بيها لا عليها .... شافتها عين وماصلتش عالنبى
-هيفاء دكتورة وتفهم مافاتتش عليها / ياحاجه هوا تقرير الدكتور شن قال .. الحالة اللى عندها شنهيا
-مروة / الدكتور معرفش شن عندها .. ومانع اى حد يخش عندها ..
-سميرة / قدر الله وماشاء فعل ...
عمك المهدى مشو جابوه نساباته من حوشه ... وخبروه باللى صار لى بنته .. الحق بناته جو معاه لى خواتهم فالعيادة وحمدو بالسلامه
وكلم حمد عمك المهدى وتعدر منه انهم بيأجلو الفاتحه على خاطر حالة اميرة .. وبالفعل اتصلو بالمعازيم كلها واعتدرو منهم بحجة ان العروس مرضت وراقدة فالعيادة .. المهم عمك حمد لمها كيف ماجت ... انيس وطلال ومروان قعدو يتصلو بي فارس بيفهمو منه وبيواسوه لقو كل ارقامه والنت مصكرين بالكامل
اما عمتك جميلة روحت للحوش قاللهم الدكتور مايقعد حد فالعيادة..لقت اختها وجاراتها سامعين بالخبر خاطر خديجه صاحبتها روحت قبلهم.. لقتهم جميلة ضامين العشى ولامين العصبان فى حوافظ .. والخبر انتشر وبدى الحوش يملى ويفرغ... والناس تجى تحمد بالسلامه وكلهم فى قولت هادى عين قوية وضربت العروس
ثانى يوم
اميرة قاعدة فالعيادة .. فايقه مش فى غيبوبه .. لكن راقدة من فعل الابر اللى يعطولها فيها....لان الدكتور خلاها فايقه ساعتين لقى الضغط مشيط ودموعها ماوقفوش .. ولدلك كتبلها على منوم يضربوه فى يبرة الشكارة .. بيش ترقد ولما يوزنوضغطها يعطى قراءة صحيحع ..هما يقيسولها فالضغط ثلاث مرات فاليوم ...بيش يتأكدو جاها الضغط ولا لا
اما فارس نزل فى مطار قرطاج ... مشى خدى نزل عادى مش فندق .. مايبيش يتلاقى مع حد يعرفه .. ماخاطره يشوف حد .. ولا يتكلم مع حد ... يطلب فى شيش الويسكى للغرفه فوق وخلاص... وماعنداش حتى معلومه شنهوا اللى صار فى اميرة ولا فى بوه ولا خوته واخته وصلو ولا لا ... باع كل شى وراه واستقر فى النزل هدا ... حس انه مبيوع .. وحس بالاهانه
___________________________________________
.
.
.
.
.
.
.
.
.
.
.
.
.
.
.
بعد ثلاثه شهور ..
اميرة مقعمزة فى سريرها ومسهمه دموعها فعيونها وماتسمع فى حد
-خديجه جنبها / يابنيتى امك بتموت .. يعنى لازم اطيح وقلبها يوقف بيش يرجعلك عقلك ولا شنو
-مروة / بعيد السو عليها اميمتى .. غير خلى نسايسوها بالشويا ياخالتى خديجه
-خديجه / صكرى فمك يامروة .. انا نعرف شن نقول
وتلفتت لى اميرة / فسختى انتى وخطيبك ماهيش نهايه الدنيا .. الحمدلله طلعتى منها صبيه امالا كانا طلعتى منها مطلقه كيف صار فيك
اميرة بدت تبكى من دون ماتتلفت لى خديجه .. ومروة قعمزت جنب اميرة وحضنتها مش طايقه فيها
-خديجه / انا مامدرق عليا شى .. اهو ولد خالتك قال اميرة متخطية.. والفاتحه اتأجلت .. يعنى لا من قال فسخو ولا من قال سيبو ... حتى السمعه قعدتلك باهية يابنيتى .. المفروض ترخى روحك شوى وعالاقل تاكلى دواك ...
-مروة /صدقت خالتى خديجه..الضغط مش ساهل ياوخيتى
ويبي المريض ياكل الماكلة.. وياكل دواه بانتظام
اميرة تبكى منغير صوت
-خديجه / يابنيتى ياسرك اللى اديري فيه قتلتى امك بالعرق
برة فالصالة ...
جميلة مقعمزة عالكرسى تبكى وتمسح فدموعها
-مريم اختها / بنية امى عيونك بيعمو مالدموع .. وحدى الله واحمدى ربي بنيتك قاعدة معاك وماصارلها شى ...شنو اللى زيها يتخطو فى اللى توصل الجن يكصرلها رقبتها
-وفاء حضنت ولدها / سمعنا وسلمنا
-جميلة تبكى/ بنتى ماصارلها شى... شن مزال بعد عرسها اتأجل .. وجاها الضغط فالعمر هدا ..
-مريم/ وانتى امتى جاك .. ماهو مش بعيد عليها فالعمر
-جميلة / انا نختلف .. وقتها متزوجه وجايبه الصغار ..مش زيها هيا قاعدة كيف بتبدا حياتها
-مريم/ وشن فيه الضغط .. مافيشى شى تقدر تعيش بيه وتجيب الصغار زيها زى كل الناس
-صفاء/ بعدين الدكتور ياخالتى قال عارض ..يعنى يزول بزوال السبب
-جميلة / فى ضغط اسمه عارض.. انتم تضحكو عليا ولا على ارواحكم
-وفاء/ صح ياام والله الدكتور قال عارض
-مريم/ ازمه وتعدي ياوخيتى وتبدى تتفكرى فيها كأنها حلم ...الحمدلله شيبانيها وعزوزها امس زايرينها هنايا وواضح عليهم ناس باهيه..خاصة عمك حمد يزازى ويوازى بيها .. وشن تبى ثانى
-جميلة/ انا حايرة غير فى فارس اللى لا اتصل ولا انشغل ولا جى ولا قال كيف السبى
-وفاء/ مش قالتلك امه خوه دار حادث فى نفس اليوم وسافرو بيه برة
-مريم / الصلاة عالنبى ...هادى عين حااااارة وتكصرت فيهم الزوز ... الله غالب
-جميلة / عليه الصلاة والسلام ... انا غير تنوض بنتى .. مانيش مدورة حد
-مريم / ايووووه هدا هوا الكلام
وفارس ماحد يندرى عليه وين ولا وين اراضيه ... ممكن خوه محمود او اشرف عارفين مكانه ومتواصل معاهم .. وممكن حتى هما ماقدروش يوصلو فيه ... المهم بالتاكيد حالته اتسخف
__________________________________________
_
فى حوش انيس ...
عفاف ترعش مع بعضها وتخبط فى ايديها وتمشى بين الصالون يمين ويسار كأنها تراجى فى شى ... انفتح باب الحوش خش منه انيس
-انيس شبحلها زبط فى حاجه وكأنه الهدوء اللى يسبق العاصفه / السلام عليكم
-عفاف تاكل فى ضوافرها / وعليكم السلام
-انيس حول جاكيته/ وين بيلسان
-عفاف / راقدة فى دارها
-انيس/ فى حاجه
-عفاف تاكل فى ضوافرها وترعش/ صاحباتى توة يكلمو فيا قالولى انك خطبت .. حق الكلام ولا كدب
-انيس عطاها بالضهر/ منو صاحباتك هادو
-عفاف طلعت من طورها وبدت تعيط/ قولى حق الكلام ولا كدب
-انيس / نقصى صوتك
-عفاف شدت رقبة سوريته بايديها الزوز/ انيس جاوبنى
..انيس ريحنى .. راهى نار راكبه فيا للصبح
-حولها ايديها الزوز وحدفها عالصالون/ ايه خطبت ... وعرسى يوم الخميس نهايه الاسبوع هدا
بدت عفاف تخبط فى وجهها وتريش فى شعرها ومن كثر اعصابها مزقت حوايجها اللى عليها/ صار حق الكلام والميه تجرى من تحتى وانا مش عارفه
طلعت بينتها تجرى خايفه وتبكى/ ماما .. ماما
-قامها انيس/ ماتخافيش يا بابا
-عفاف تعيط / وانا خيرنى ... شن ناقصنى ...علاش تاخد عليا
-انيس يعيط / يا فيكى تعالى خودى بيلسان
طلعت بنيه صغيرونه ترعش مالعياط دايرينها مربيه لى بنتهم خدت بيلسان فى غمرها وخشت للباب الفاصل سكراته وراها
-انيس/ قلتلك نبى ولد ... ليا شهور وانا نقولك احملى وانتى مش حاسبتنى معاك راجل اصلا
-عفاف/ لكن هدا مش سبب يخليك تاخد عليا يا مسخ يا ولد الكلب
-انيس/ تعرفى بنسكتلك لانى منبيش نعكر مزاجى بس .. كنهدا اقسم بالله تعرفينى وجهك انفسده
-عفاف تعيط/ ومنهيا الفاسدة اللى ضحكت عليك يا مضحكه
.. والله التوقيعه ماك رافعها منى
-انيس يضحك/ مقدمك .. توة بدينا نتزوجو بلا توقيعكم
-عفاف / والله لما نوصلها .. ولمانديرلها قضيه اخلاقيه
-انيس تعصب/ كانك مراة وامك جابت اوصلى فيها
-عفاف / صار خايف عليها وتتحلف .. اصبر عليا شوى بس نزبطها منهيا وتو تشوف .. رانى عفاف
المشكلة ان عفاف سمعت متأخر .. لان ثانى يوم من العركة هادى كانت حفلة رندة منغير ماتسمع عفاف لانهم متعاركات
ونفس الليله خداها انيس وسافر بيها .. وبعت لى عفاف مسج خبرها انه سافر .. لكن ماقاللهاش انه تزوج .. ولا خبر صحاب.. مشو لى ايطاليا شهر عسل
_________________________________________
.
.
.
.
.
.
.
.
بعد ثلاثه شهور ثانيات
اميرة احوالها بدت تتحسن .. قاعدة حابسه روحها فى دارها لكن عالمهم احسن وتاكل مرة مرة .. مع ان واضح ان وجهها مطبق وخاسه النص
عمها حمد مقعمز على كرسى فى دارها جنب سريرها
..وحاطيله طاسه شاهى
-حمد / ماهو انتى اكيدة عندك المعلومه .. وعارفه ليش درتو فى بعضكم هكى ...نورينى يابنتى نبى نفهم
اميرة لما لقت فارس ماحكاش رقت الازرق ...
تمسح فدموعها / مانعلمش عليه خيره دار هكى .. انا بروحى متفاجئة زيكم
-حمد / وعلاش صارلك هكى امالا
-اميرة / لانى تفاجئت وانصدمت
-حمد/ باهى معش كلمك
-اميرة / لا
-حمد / ولا تعرفى مكانه وين
-اميرة / لا
خشت جميلة / شنحالك يا حاج
-حمد / اهلين بيك يا حاجه .. سألت عليك وفاء قالت تصلى
-جميلة / كنت نصلى فالعصر .. وجيت بنسلم عليك ونقولك الموضوع طال وقته ...وانا الحق معش طايب على خاطرى نستمرو فيه..ولدك لا نشد لا جى لاهى فى خوه برة وخلاص
اميرة تشبح لى امها ومسخفتها كيف لتوة معتقدة ان فارس قاعد خاطب اميرة
-حمد انتهزها فرصه/ والله الراى عند بنتك ..كانها بتفسخ على راحتها
-اميرة عيونها دمعو / اللى قالاته امى ماشى عليا
-حمد / لكن نقعدو عيلة وحدة
-جميلة/ مارينا منكم الا كل خير .. وانشاءالله ماتشوفو مننا ال كل خير ... قتلك القفه قاعدة فى سوابيتها بالتول بي صفرة الدهب والكنادر وكل شى... بلغ مفيدة غدوة الصبح بنبعتهالها
-حمد / لا كيف عاد .. توة كنت نشكر فيك يا حاجه... رزق الدنيا شن بنديرو بيه احنا تردو فيه
-جميلة/ هادى الاصول يا حاج .. وربي يهنيه .. غدوة بنبعتلها الحاجات كلها فى سوابيتها
اميرة تبى تبكى وشادة روحها بالسيف
___________________________________________
_
فى مصر
فارس شاد طاسه ويسكى ويرقص فى وسط شباب وبنات وداير لحيه فى وجهه ... وجوه فوق فوق فالرقص
زوز ولاد مقعمزين على تركينه ...
سامى/ غير شوف فارس خو اشرف
-عصام / معقولة فارس ايدير هكى برة قصدك
-سامى / الليبيين كلهم ياخدو فى راحتهم برة ويعيشو كيف مايبو
-عصام / غير صوره وابعته لى اشرف فالخاص
-سامى يضحك/ غير انشاءالله مايزبطنيش بس
وبالفعل درق سامى تليفونه وصور فارس وهوا يرقص . وبعته لى اشرف فالخاص ... لكن اشرف مصكر نت وماشافش الفيديو
عقاب الليل خدى فارس معاه بنت وطلع بيها من البار ومشو لى سيارته ركبها وطلعو لى شقته .... خشو العمارة وركبو للاسانسير ... فتح الشقه وخش هوا وياها ... مشى للصالون رقد عليه ..
جاته البنت/ ايه .. هوا احنا جايين هنا عشان ننام
-فارس فتح عيونه / مش اعطيتك الميه جنيه
-البنت رقصت كتافها / ماهو انا عايزة اديك بدالهم بضاعه
-فارس غمض عيونه / ارقدى كانا ناعسك النوم ولو ماتبيش روحى ..
فتح عيونه / وللعلم مفيش شى ينسرق فالشقه هنى روحك
-وقفت البنت/ هنى روحك!!... ماشى تصبح على خير ماعطلكشى
-فارس/ صكرى الباب وراك