رواية المحامي خفايا القدر الحلقة الأخيرة
 |
| رواية المحامي خفايا القدر الحلقة الأخيرة |
لقراءة وتحميل رواية المحامي خفايا القدر كاملة pdf : اضغط هنا
رواية المحامي خفايا القدر الحلقة الأخيرة كاملة مكتوبة
♡ خفايا القدر ♡.
الحلقه :-
♤ الأخييييره ♤.
بقلمي :-
#zezo_a_saad.
عند ملاك :-
بعد ماكملت التحضيرات ف الحوش ...وصلني سامر للصاله عشان نكمل باقي التحضيرات .
وانا نجهز ف الطاولات...سمعت بصوت حد خش ويمشي وراي.
ملاك :-
سامر باهي اللي جيت ...هات الورد خلي نساويه ع الطاولات
قرب منها وشدها من يدها...ملاك تسحب فيه وراها :-
تعالي بسرعه وانت تنعس حطهم هنا .
احتارت فيه خيره مايتكلم مع أن سامر بطبيعته مدوش ومايسكتش .
تلفتت عليه وفتحت عيونها بصدمه :-
علااء.
علاء بهيام :-
ياروح علاء...اخيرا شفتك قداش مااستاحشتك .
ملاك وهيا تتلفت يمين ويسار :-
علاااء..اطلع بسرعه قبل مايجي سامر ويشوفك بالله عليك .
علاء :-
اوعديني باهي نحكو الليله وماتسكري فونك .
ملاك وهيا ادف فيه :-
علاء عيب ماتحرجنيش قدام فرح...عيب اصلا تشوفني هكي شعري بلا وشاح نهار اسود.
علاء :-
امم باهي ع خاطرك بس هالمره.
طلع علاء...وملاك مسكينه ترعش مع بعضها....وشوي وخش سامر
سامر :-
ملاك علاء كان هنا.
ملاك بارتباك :-
لالا...وينه ماتقول جي عاد.
سامر تلفت.جهه الباب :-
نعرفش وانا خاش شفت سيارته طالعه ماشفتيشي .
ملاك بتوتر :-
لا.
سامر :-
هيا تعالي باهي بسرعه خلي نكملو قبل مايجو العاملات متع الصاله .
.
.
.
.
عند سامر :-
اليوم كان يوم صعب ومتعب من الصبح بس المميز فيه انه مليان بالسعاده والفرح ع الكل.
ملاك استلمت اغلب التجهيزات ...ومكر ف علاء قعدت لاصق فيها زي البوديقارد ههههه.
تكفلو خوتي بكل التحضيرات بخصوص استقبال الرجاله والغدي .
اخيرا كملت مهمتي ووصلت ملاك للحوش ...وبعدها مشيت للصاله وين قاعدين الرجاله .
خشيت واول ماجت عيني بعين علاء شافلي بنظره شماته...حييه معقول يكون شافها بس كان هذا راهو ملاك قالتلي ليش بدس عليا.
قربت منه وقعدت بجنبه بضيقه :-
علاش انت تبي ترفع سحر للصاله ...خليني ناخذها انا بالله عليك.
علاء ببرود :-
ف احلامك ...انا خوها وانا اللي ندخلها.
سامر :-
مردودتلك ياصقر تو يبانلك الشبر كيف.
سند :-
ههههه ياسعدودي انا ...انا اللي خذيت فرح من حوشي ورفعتها لحوشي بلا جميل حد .
شافو الكل جهة حمزه اللي كان مداير الحوله وكأنه مايسمع فينا وراقيله .
سامر بهمس لسند :-
خيره حمزه راقيله.
سند :-
راقيله من سفيان اليوم قريب تعاركو.
سامر باستغراب :-
ليش.
سند :-
لان هو اللي بيدخل اسراء للصاله هههههه.
سامر :-
ياناري ع سفيان راشقيله بالعرض زيني.
علاء :-
اسكت فاتك الردحه اللي دارتها اسراء اليوم تي قلبت الدنيا فوق روسنا لما عرفت ان جدي رح يكون وكيلها ويدخلها ...ومافضتش لعند حمزه قاللها انا نكون وكيلك .
سامر :-
سفيان واسراء هاذو رح يعيشونا حرب عالمه ثالثه بعراكهم .
وقف سامر ..ومشي جهه طارق صاحبه .
سامر غمز لطارق :-
عقبالك ياكبير.
طارق بضيقه :-
مايصيرش اقسم بالله انا نخطب قبلك وانت تتزوج قبلي.
سامر :-
ههههه بلاش حسد ياراجل.
طارق :-
شكلها ماجتش صح .
سامر :-
لالا مازال.
طارق :-
شن زعما مش جايه.
سامر :-
لا ماهو عندها خوتك اكيد رح تجي .
طارق :-
خساره كنت ناوي نكحل ..بس يلا نصبر وخلاص.
سامر :-
انت ياولد لم روحك بنت عمي راهو .
نضت من بجنبه ..وقلت خلي انابش سحر شوي اتصلت بيها اكثر من مره وماردت .
بعتلها مسج 💌 :-
ردي عليا ياقلبي.
بعتتله مسج 💌 :-
شن تبي مني لو سمحت..واحد كذاب وغشاش شن مازال ناوي بدير...لو سمحت ماعاد تتصل بيا انا مراه متزوجه وزوجي راجل محترم ومستحيل نخونه فوتني ".
سامر ابتسم وتنهد براحه ورجع بعتلها مسج 💌 :-
قصدك نقضتي العهد .
بعتتله مسج 💌 :-
بموافقتك والا نسيت ...ماعاد تتصل ثاني لان مش رح نعبرك .
وسكرت فونها...شوي وقرب علاء من سامر .
علاء بتعصيب :-
سحر كلمتني وقالتلي كلمني ع فون ريناد شن درت ياسامر.
سامر ببرود:-
مرتي ياراجل خيرك انت.
علاء بضيقه:-
مرتك صح وانا وافقت ع لعبتك من الاول بس مش معناها تتلاعب بمشاعرها.ياراجل وتنكد عليها.
سامر :-
خيرك ستاكيت فيا علاء شن جاك.
علاء بهدوء :-
سامر البنت كلمتني وصوتها.مش تمام الباين كانت تبكي...ماتؤذيها بالله عليك سحر ماتتحمل ياسامر
سامر بابتسامه :-
حاضر من عيوني ...خوذها وعد من خوك.
.
.
.
.
.
عند سفيان :-
خشيت للصاله من بعد ماتكيتها انا وحمزه .
قعمزت بجنب مؤيد ...شافلي مؤيد :-
خيرك ياراجل راقيلك ...تقول غاصبينك غصب ع هالزواج.
سفيان :-
والله ماعاجبني حاجه من هذا كله ...الا ان نهاية اليوم بتكون اسراء مرتي بس .
ضحك مؤيد :-
وهذا المهم .
سفيان :-
مبسوط ماشاء الله.
مؤيد بتنهيده :-
نحاول نكون هكي...من وين بتجي السعاده وبوي محبوس..وخوي هج برا البلاد..وامي غاضبه عليا..وهويدا مغصوبه عليا غصب مشيها وخلاص .
سفيان خبط ع ركبته :-
سامحني ياغالي نكدت عليك...ارمي وراء ظهرك ربي ماينسى حد ورح يعوضك كل خير .
مؤيد بابتسامه :-
معناها حتي أنت فك التكشيره وأفرح خير ماتلصق ف وجهك وتخش ع اسراء بهالوجه .
سفيان :-
ربي مايحرمني منك يامؤيد والله انت الرفيق اللي طلعت بيه من هالدنيا.
.
.
.
.
بالليل الساعه 9 :-
عند هويدا :-
صدمني بوي لما جي وقالي ام فرحي رح يكون الاسبوع الجاي ع مؤيد ولد عمي ...يمكن حظي حلو ان ماتورطت ف حد كبير ف السن زي هديل اختي...بس ياخوفي يكون مؤيد كارهني لأن تقدملي قبل هلبا ورفضته .
طبعا.مادارولي لافرح ولاشي..جتني المزينه ف الحوش حطتلي ميك اب ولبست فستان بسيط وخلاص.
قربت مني امي :-
بنتي نوضي ..راجلك جي بيروح بيك.
قربت من امي وحضنتها وبست ع راسها ...وقربت من هديل حضنتها بقوه وبديت نبكي .
هديل بدموع :-
ماتبكي ياعبيطه رح تلبزي المكياج كله .
هويدا :-
هديل بنستاحشك ...ردي بالك ع روحك .
هديل :-
ان شاء الله حبيبتي...يلا توكلي ع الله ربي يهنيك .
ام هديل :-
هو هذا صفيه وصغارها مرتاحين وانا ايامي متحارفه.
هويدا :-
امي شن دخلها هيا مسكينه.
ام هديل بتعصيب :-
ياسرك ماعاد ادافعي عليهم مش عارفه علاش تحبيهم وراجلك بروحه زيك يناصر فيهم عاد.
هويدا.بضيقه :-
امي عيب عليك هذا زوجي وولد عمي وبعمره ماغلط ف حقنا.
لبست هويدا عبايتها وخمارها...وطلعتها هديل لمؤيد .
قربت من السياره وركبنا وطلع بيا مؤيد وكان الصمت سيد الموقف.
وصلنا ونزلت من السياره ...وشدني من يدي وركبنا ف الدروج لشقتنا..خشينا وسكر مؤيد الباب متع الشقه .
قرب مني ورفع الخمار من علي وجهي وهو يتأمل فيا بصمت تام.
نزلت الدمعه من عيوني لااراديا .
مؤيد بهدوء :-
هويدا انت مغصوبه ع هالزواج
هويدا :-
لا مش مغصوبه .
قرب مني بهدوء وباسني من شفايفي خشي بدلي براحتك ومشي خش للصاله.
هويدا خشت للدار وف خاطرها :-
قداش ماانا غبيه تو هذا وقت الدموع ...قداش ماكنت خايفه ان مؤيد يكون كارهني بسبب الماضي بس الحمدالله ماصار شي من اللي كنت خايفه منه .
غيرت ملابسي...وخففت الميك اب وطلقت شعري وطلعت من الدار وطلعت لقيته يحضر ف الاكل ع الطاوله..قربت منه وف بالي مانخرب هالليله لان ياسره اللي هو فيه مسكين لااهله حضرو.ولا عاش فرحته زي الناس.
تلفت عليها مؤيد اول ماحس بيها وراه وقعد يتأمل فيها من فوق لتحت.
هويدا بهمس :-
ماعجبكش .
مؤيد بابتسامه :-
انتي من يوم يومك عاجبتني .
هويدا بخجل ونزلت عيونها للأرض :-
وعد مني رح ندير جهدي ونسعدك طول العمر.
قرب منها.مؤيد وشدها ليه وحضنها :-
وانا رح ندير جهدي وربي يقدرني ع هالشي...بس جاوبيني بصراحه انتي فرحانه.
هويدا بابتسامه :-
هلبا.
مؤيد بعد عليها ورفع وجهها ليه:-
ليش بكيتي امالا.
هويدا بخجل:-
لان كنت خايفه تكون زعلان مني بسبب اللي صار زمان.
مؤيد وهو يمسح ع خدها بيده :-
وليش نزعل منك ...اللي فات فات توا نحن اولاد اليوم.
هويدا باست كف.يده اللي ع خدها :-
وعد مارح نزعلك بيوم ..ورح نكون زوجه صالحه ليك.
مؤيد رجع باسها بعمق وبعدها شدها من يدها :-
هيا تعالي خلي نتعشو اول عشي مع بعض.
هويدا بابتسامه :-
ومش رح تكون الاخيره ان شاء الله.
قداش ماشلت هم هالليله ...بس الحمدالله كل شي مشي ع خير ومؤيد كان جدا حنون معاي ومراعي لمشاعري وحمدت ربي وشكرته اللي عوضني خير.
.
.
.
.
ف الصاله :-
كانت الدنيا زحمه وغلب المعازيم واصلين ...شوي وتكلمت المشرفه وطلبت من الكل يلبشو ويتحجبو لان العروس رح تخش.
خش حمزه وشاد ف يده اسراء ويدرج فيها ومعاه ريناد تساعد فيه.
اسراء بهمس :-
رينو...مش انا وحمزه ماشيين مع بعض ونهبلو.
ريناد :-
ماصحك تحشمي شن جابه ليك اكبر منك قريب ب15 سنه .
اسراء :-
عادي الشباب شباب القلب ..شن 15 مش هلبا.
ريناد :-
تو يبانلك لما نحرش فيه سفيان .
اسراء :-
ساهله رح ننكر.
وصلني حمزه للصالون وطلع ...وشوي وخش علاء يدرج ف سحر قعمزت بجنبي وطلع .
ومر الوقت ونحن ف استقبال التهاني من المعازيم .
قربت مني ريناد وغطت وجهي ..وشوي خش علاء وسامر .
قرب سامر من سحر وكان واضح عليه بيطير من الفرح ..رفع الطرحه عن سحر وباس ع راسها ولبسها الدبله وسط الزغاريط والاغاني .
بعدها قربت مني ريناد ونحتلي الطرحه من ع وجهي ...وخش سفيان وكان معاه شخص والضي ف الصاله طافي ماعرفته لعند قرب مني
اسراء بصدمه :-
هذا شن جابه ...مش قلتلكم مانبيش نشوفه.
ركب سفيان وهو ساند جده بالعكاز
...وقف حميد قدام اسراء وهيا منزله راسها وعيونها معبيه بالدمعه .
حميد :-
سامحيني يابنتي .
اسراء شافتله بغضب :-
اطلب من ولدك ف قبره يسامحك هو اللي مات والحسره معبيه قلبه .
احميد :-
انا غلطت ومنكم السماح .
اسراء مازادتش ولا كلمه ...ولمت فستانها ونزلت من ع المنصه والغضب معبي قلبه.
تخطيت سفيان...وكان الكل ف الصاله يشوفلي ومصدوم من تصرفي .
لحقني وشدني من يدي :-
اسراء اهدي ..عيب مايصير الناس تشبح.
اسراء بدموع :-
تحطو فيا قدام الامر الواقع ...استكثرتوا عليا حتي فرحتي ف هاليوم وفسدتوه عليا.
سفيان مازاد ولا كلمه وجبدها ليه وحضنها بقووه وعلت الزغاريط ف المكان .
سفيان بهمس :-
هو طلب مني ياقلبي معقول نكسر بخاطره .
اسراء ببكاء :-
من الاول قلتلكم مانبيش نشوفه توا بس عرفني .
بعدني عنه وحط ع راسي الطرحه وطلعنا ...وكنت طول الطريق ساكته ونشهق بالبكي وخلاص.
وصلنا للفندق وخذي سفيان مفتاح الجناح وركبنا .
خشينا للغرفه ...ورفع سفيان الغطاء من ع وجهي.
سفيان بضيقه :-
اسراء ياسرك من البكي شي وتم خلاص.
اسراء :-
خربت عليا ليلتي وجاي تقولي اسكتي ..من الاول حالفتلك وقتلك مانبي نشوفه ليش درت هكي.
سفيان سلب جاكيته بضيقه :-
كله منهم قلتلهم فكوني منه هالموزقو سكرو روسهم وجت ع راسي انا .
وخش بغضب لحمام الغرفه ..وقعدت قاعده ع السرير وبعدها طلع وفتح البلكونه ووقف يدخن فيها.
نظت تعوذت من الشيطان وغيرت ملابسي فكيت شعري وخليته نازل ع كتفي وعدلت الميك اب..ومشيت قربت منه وحضنته من الخلف.
اسراء بهدوء :-
اسف حبيبي مش بقصدي والله.
سفيان تنهد بقووه وماباش يرد عليها.
اسراء :-
ماتزعل مني بالله عليك ..انا اسفه .
ولما.مارد عليها كيف بعدت عليه ..شدها من يدها وقرب منها حضنها بعمق وبهمس :-
نحبك انا ...ومانبيكش تزعلي مني اوك.
اسراء بهمس :-
اوك .
باعد عليها ..وشد وجهها بين ايديه وباسها بعمق و.......
ومشت ليلتهم حلوه وهاديه .
.
.
.
.
عند سحر :-
قررت اليوم نفتح صفحه جديده وننسي كل الماضي ونحاول نتأقلم مع حياتي الجديده ووضعي الجديد .
يمكن صح رح نحتاج وقت عشان نتعود ع سامر وننسي وجعي ..بس الحمدالله هذا نصيبي .
وصلت انا وسامر للفندق ...ونزلنا ركبنا للغرفه الخاصه بينا .
قرب مني وقام الطرحه ..ابتسم وباسني ع راسي .
سامر وهو يمسح ع خدها :-
عندك علم من اول ماعرفتك حبيتك ..حبيت كل شي فيك هدوءك كلامك نصائحك كل شي فيك.
سحر بحيره :-
مافهمت انا بعمري ماحكيت معاك الا بالرسميات.
سامر وهو مبتسم :-
كيف وانتي اللي داويتي كل جروحي..أنتي اللي كنتي نسمه حياتي ..أنتي اللي دخلتي الفرحه ف قلب الرجل الكئيب.
سحر وخرت بصدمه :-
انت منو...
سامر بابتسامه :-
الرجل الكئيب.
سحر وهيا توخر بخطواتها ومصدومه :-
مستحيل كذب.
قعدت سامر يقوللها ف المواقف والكلام اللي كانت تقوله فيه وهيا تشوفله ومصدومه .
سامر فتح فونه وورالها مسج باعتتهوله هيا :-
وهذا الدليل
أنا اللي اليوم اتصلت بيك اكثر من مره ومارديتي بعتلك مسجات وبعدها حطيتي فونك مقفل.....افتحي فونك ورح نثبتلك هالشي.
بدت سحر ادور ع فونها ف الشنطه وهيا ترتعش ومش قادره تصدق .
طلعت فونها وفتحاته ...وأتصل بيها سامر وطلع قدامها " الكئيب ".
سحر شافتله بصدمه ودموعها ع خدها :-
انت..اااا نت.
قرب منها سامر وحضنها بقووه وهيا انهارت بالبكي .
سامر وهو يمسح ع ظهرها :-
ليش البكاء توا ياعمري.
سحر بدموع :-
ليش درت فيا هكي ليش ..حرام عليك عذبتني.
سامر :-
كنت مدايرهالك مفاجأه ...نحبك ياسحر نحبك هلبا وقداش ماكنت خايف ماتتقبليني لما تعرفي اني سامر نفسه.
سحر وهيا حاضناته بقووه :-
لو تعرف بس قداش ماتألمت وبكيت ليالي وانا نفكر فيك ونتوجع من بعدك عني.
سامر وهو يبوس ف راسها :-
ياروحي انتي...انا وعدتك ان مستحيل نتخلي عنك .
سحر بعدت عليه وتمسح ف دموعها :-
من امتي عرفت ان انا نفسها.
سامر :-
من يوم اللي نسيتي فونك ف جناحنا ..فاكره لما تساوي ف المكتب انتي وملاك.
سحر :-
هييي من هذاك الوقت ...هذا ليش ماعاد اصريت ع شوفتي من بعدها .
سامر وهو يبوس ف خدها وبهمس:-
كنت بنهبل وانا نشوف فيك قدامي ومش قادر نصارحك بمشاعري ..وزدت هبلت لما خداك علاء من عندنا وبعدتي عليا ..نحبك ياسحر اقسم بالله بنهبل عليك.
سحر بخجل :-
حتي انا نحبك ...لو تعرف بس قداش فرحانه والله مش لاقيه وين نحط فرحتي .
قرب منها سامر وقعد يبوس فيها بعنق..دفاته سحر بخجل :-
احم خليني نغير ممكن .
سامر باس ع خدها :-
ممكن اكيد ..غيري وتوضي عشان نصلو مع بعض.
سحر :-
حاضر .
غيرت سحر ملابسها ...وتوضت ولبست ملايه الصلاه وطلعت لقت سامر يستني فيها صلو مع بعض ومرت ليلتهم زي اي عرسان وكانت من اجمل مايكون.
.
.
.
.
عند ريناد :-
هالليله كانت من احلي الليالي ...اخيرا اللي فرقتهم الوصيه ووجعتهم رجعت قدرت ربي وجمعتهم ...فاضل بس علاء وملاك ان شاء الله ربي يكملهم ع خير.
بعد مابدت الزحمه تخف وروحو العرسان ...تفاجئت بزوز من عاملات الصاله وسكرو الباب .
قربت مني ملاك :-
رينو بالله خرصي طاح ..ترا شوفيهولي بلكي فوق المنصه وين كنت مع سحر بكري.
ركبت ع المنصه بندور خرص سحر...انكفي ضي الصاله وانفتحت اغنيه .
ياحبيبتي ..ياميرتي ..ياسيده كل النساء..لا تتركيني ف وحدتي ف الابتعاد عنك ابتلاء...يصعب علي تحملي وحان وقت الانتهاء ..سأكون معك برغبتي وكما مولاتي تشااء
كنت نسمع ف الاغنيه ومش فاهمه شي ..والباب انفتح وخش حد بس من الظلام ماعرفته منو .
لعند انفتحت الاضواء وعلت الزغاريت وكان حمزه هو اللي خاش ويشوفلي ويبتسم وانا مصدومه مش قادره نصدق.
وصلني وركب ع المنصه ووقف قدامي ..قرب مني وباس ع راسي.
حمزه وهو مطلع بوكس صغير من جيبه :-
سامحيني لان بيوم ماقدرت نديرلك فرح زي اللي تتمناه كل بنت ...وحبيت اليوم نعوضك ولو بشي بسيط .
وطلع دبله ولبسهالها وسط الزغاريت والفرحه .
ريناد بعفويه قربت منه وحضناته ودموعها ع خدها .
حمزه بهمس :-
لو بيدي نرد الزمان للخلف...كنت درتلك فرح وليله اجمل من هالليله.
ريناد بدموع :-
يكفيني اللي درته ع خاطري ...لو تعرف قداش ماعوضتني الليله كان شي كبير بالنسبه ليا وفرحني .
حمزه بعد عليها وابتسم :-
تخلينيش نتهور ...يلا البسي عبايتك وخلينا نمشو.
ريناد باستغراب :-
وين ...باهي استناني خلي نجيب جبران.
حمزه :-
لا جبران خليه الليله لجداه ادير بالها منه...الليله ليلتنا رح نكملها للأخر وكأنك عروس جديده .
لبست عبايتي بفرحه وطلعت معاه وركبت ف السياره وطلع بيا لفندق ع البحر .
الحمدالله ع عوض ربي اللي لما يجي يامحلاه ..نحمد ربي ونشكره اللي عوضني عن كل الالم والقهر اللي شفته واللي حط حمزه بطريقي وهداه ليا وخلاه الشخص اللي نتمني نكمل كل عمري بحداه وبجنبه.
.
.
.
.
تسريع بالأحداث وتحديدا بعد اسبوعين :-
عند ملاك :-
اليوم هو يوم فرحي ومش اي يوم ومش اي فرح...الفرح اللي طول عمري كنت نحلم بيه ومن الشخص اللي نحبه ورايده قلبي.
زبيده وهيا ادور ع ملاك وتتأمل فيها.
ملاك :-
زبيده ياسرك عاد دوختيلي راسي.
زبيده :-
بسم الله ماشاء الله لاقوه الا بالله تجنني اقسم بالله نبي نطلع فيك ولو شي واحد غلط مالقيت .
ملاك ابتسمت :-
وليش يعني.
زبيده :-
واضحه باش نتجنبه ف فرحي.
ملاك :-
خزوو انانيه .
زبيده :-
بجد والله تبارك الرحمن عليك طالعه ملكه ..المزينه هذه تهبل برزتلك كل ملامحك واجمل مافيها ان الميك اب متاعها جديد ومش متكرر..مش عارفه خوك كيف حصلك معاها موعد.
ملاك بضحكه :-
اه من سامر اقسم بالله يهبل..فوق ماسافر بيا معاه ف اسبوع العسل متاعه وشرالي كل لبسي من برا ومانقص عليا شي وقالي مازال مفاجأتي ماتمتش تصدقي.
زبيده :-
ربي يحفظهولك من كل شر..بس احلي شي ان اخيرا بديتي حرم علاء جمعه .
ملاك :-
انا بروحي مش قادره نصدق لدرجه حاسه روحي ف حلم وخايفه نفيق منه.
زبيده :-
بلاش تشاؤم عاد..وافرحي الليله ليلتك ياعمري.
شوي وخشت زهيره :-
هييييي تبارك الله ملاك شن هالجمال يابنت تجنني .
ملاك :-
تسلميلي حبيبتي والله انتي اللي عيونك حلوات ويهبلو.
زهيره :-
اقسم بربي لو كنت انا راجلك لما يغمي عليا من جمالك.
زبيده :-
هههههه ..صوت فونك يرن عمره طويل شكله يتصل.
ملاك شدت فونها :-
لا هذا سامر وردت عليه .
ملاك :-
الو.
سامر :-
عروستنا الحلوه كيف حالها.
ملاك ابتسمت :-
قل اعوذ برب الفلق رد بالك تشوطني بعين .
سامر :-
هههههه خزو لئيمه ماتنسيش بكل..هيا شن كملتي والا مازال ..علاء نفخلي راسي.
ملاك :-
ايه كملت خلاص واتيه .
سامر :-
تمام وتي روحك اهو جايك وقولي لبنات عمك يوتو رواحهم بنرفعهم للصاله معاي عمك قال مشغول ف المعازيم وحوسه العشي.
ملاك :-
اوك تمام .
بعد حوالي 10 دقايق ..اتصل سامر وقال انه وصل.
نزلت بمساعده بنات عمي الزوز لعند وصلت لتحت..طلعو الزوز وخلوني بروحي خش سامر ورفع عن وجهي الطرحه.
سامر بتصفير :-
اوووو ماشاء الله ماشاء الله انتي يابنت من اهل الارض والا ملاك فعلا.
ملاك بابتسامه :-
ليش البشر يسكنو ف كوكب تاني غير الارض.
قرب منها سامر وباس ع راسها :-
ملوكه حبيبتي ..صح اليوم رح تتزوجي بس انا معاك ع طول وف ظهرك وامتي مااحتجتيني رح تلقيني قدامك ومستعد عشانك نقتل حتي القتل والله .
قربت منه ملاك وحضناته بدموع .
سامر بمزح :-
انتي يابنت فكينا من البكي احسن اللي دفعته كله ف ااميك اب يمشي دحي هههههه.
عدلي الطرحه ع وجهي وطلع بيا وسمعت صوت خطوات تقرب.
سامر :-
اهو رح نسلمهالك وترفعها انت ..بس ودين ربي لو تفكر حتي ترفع الطرحه لما نفسد الليله ع راسك.
علاء بصوت هادي :-
باهي ياراجل شن هالحصله الله يسامحك يابوي جبران مالقي يختارك الا انت خوها .
سامر شد يد ملاك :-
ملاك تعالي معاي هذا ماينفعش معاه الطيبه .
علاء :-
لالالاا..خلاص انا اسف خوي حبيبي .
سامر :-
ايوه .
علاء بهمس :-
اخر الوقت قعدت نترجي فيه عشان ناخذ مرتي .
ركبت ملاك وركب علاء بجنبها وساق السياره وكان فاتح اغنيه لأليسا .
ساق السياره ف صمت ..ههه تقول سامر مهدده مايحكيش حتي الحكي.
بعد شوي رن فونه ورد :-
ياوالله ليله شن تبي الهم الاسود ماعندكش غيري شكله.
شوي ومدلي الفون :-
خوك الحصله يبي يحكي معاك.
خديت منه الفون ودخلته تحت الطرحه .
ملاك :-
الو.
سامر :-
قلبي نبيك تقيمي الطرحه شوي وتشوفي من المرايا الجانبيه .
ملاك :-
تمام .
درت زي ماقالي سامر ..وشفت من المرايا الجانبيه وكان سامر هو وخوته كلهم مدايرين زفه وراء سياره علاء والعاب ناريه ومنبهات .
نزلت دموعي ...محلاك ياسامر كان يبي يحسسني انه مش هو بس خوي وانهم كلهم خوتي واهلي وعزوتي .
وصلنا للصاله...فتح علاء الباب وشد يدي ونزلني ..واول مدخلني سلمني لشخص تاني .
مشينا ف ممر طويل ..وركبنا ع منصه ..وبعدها هالمنصه دارت بينا نص دوره ولقيت روحي ف القاعه متع الحفله .
علت الزغاريت والاغاني وكان ضي الصاله خافت ..قرب مني سامر قام الطرحه باس ع راسي وطلع.
وبعدها اشتغلت الاضواء وكانت الصاله معبيه بالناس وزحمه .
وعلي صوت الزغاريت والاغاني...قربت ريناد مني وباركتلي وبعدها فرح وخالتي ..وبعدهم سحر واسراء.
ملاك تهمس لريناد :-
رينو الحفله مطوله.
ريناد بابتسامه :-
كيف قلنا بسم الله ..لهالدرجه مشتاقه لعلاء ملوكتي.
ملاك بتوتر:-
مش هكي قصدي ..بس نخاف من الاماكن المزدحمه زي ماتعرفي.
ريناد :-
معليش حبيبتي اصبري شوي ..حتي ع خاطر سامر اللي تعب ف كل شي.
بعد شوي ركبت ام اسراء باركتلي..وركبو بنات عمي ومرت عمي باركولي.
زهور :-
زفتك كانت تهبل ..من اول ماطلعتي لعند وصلتي.
ملاك باستغراب :-
من قالك عليها .
زهور :-
سامر خوك مركب شاشات عرض ...ومن اول ماطلعتي لعند وصلتي كان بث مباشر.
زهيره :-
اااه ياربي..ليش انا ماعندي خو زيه بس.
ملاك :-
عيونتك ..سامر مافي زيه حد .
استمرت السهريه وجابو العشي ...وبعدها جابو قاتو كبير ع ست ادوار.
كنت طول الوقت حاسه بخنقه وصدري ونفسي غامات عليا.
اشرت لريناد وجتني قربت مني.
ملاك بتعب :-
ريناد بالله عليك احكي مع سامر خليه يجي ماعاد نقدر نتحمل اكثر.
ريناد :-
اوك حبيبتي اهو تو نكلمه.
اتصلت ريناد بحمزه وبلغاته يحكي مع سامر ويقوله يجي هو وعلاء خلاص.
بعد شوي اتصلت سامر وطلب من ريناد انه يحكي مع ملاك.
ريناد :-
ملوكه سامر يبي يحكي معاك.
ملاك بتعب :-
ايوا سامر.
سامر بلهفه وخوف :-
قلبي شن في ...فيك شي حاسه بشي.
ملاك :-
لالا...بس عندي فوبيا من الاماكن المزدحمه مانتحملش.
سامر باستغراب :-
ليش
ملاك :-
هالشي متعلق بالماضي ..تعالالي بالله عليك راهو خلاص.
سامر :-
تمام حبيبتي اهو جايك انا وعلاء حاضر.
بعد حوالي 5 دقايق ..انطفي ضي الصاله ...ورجعت شاشه العرض تشتغل...وخش سامر ف الممر هو وخوته الاربعه وكلهم لابسين نفس اللبسه .
كان منظرهم يسحر والكل يصفق ويسمي باسم الله ويصلي ع النبي .
وصلو لعند باب القاعه وانفتح الباب وخش سامر وعلاء ولحقهم عمي العارف.
قرب مني سامر بلهفه وحضني :-
ملوكه سامحيني بالله عليك والله ماكنت نعرف.
ملاك :-
ولا يهمك ياروحي انت .
شوي وقرب مني عمي العارف وباس راسي وحضني ودمعته نزلت :-
نتمني مانكون قصرت ف حقك يابنتي ..وسامحيني ع كل اللي صارلك بسببي من وجع .
ملاك بعدت عليه وباست يده :-
انت اللي سامحني..ولو مهما شكرتك ع كل اللي درته ع خاطري مش رح نوفيك ولو جزء بسيط من حقك.
العارف :-
بنتي انت راك وغلاوتك من غلاوت بناتي والله.
نزل عمي طلع ...وعدلي سامر الطرحه ع وجهي وشدني من يدي ونزل بيا لوين واقف علاء .
قربنا من علاء وحط يدي بيده .
علاء بضيقه :-
باهي اللي تفكرتني..نحسابكم بترقدو هنا.
سامر بمكر "-
احمد ربي انها طلبت اتم الحفله بسرعه والا كنت شحطك للفجر...هذه امانتي وامانه بوي وبوك ليك ياعلاء..استلمها توا وحافظ عليها وخاف ربي فيها بس هذا اللي طالبه منك .
علاء بابتسامه :-
في عيوني من غير ماتوصي ياسامر.
طلع سامر...وقرب مني علاء قام الطرحه وباس ع راسي وعيونه معبيه دموع .
علاء بصوت مخنوق بالدموع :-
مبروك عليا حلمي اللي صار واقع...حبي اللي تعذبت عليه سنين ..روحي اللي كانت مقسومه بجسم تاني ...مبروك عليا انتي ياعمري .
ملاك دموعها نزلو وماعاد قدرت تتماسك اكثر ...قرب منها علاء حضنها وسط تصفيق الكل ...وخاناته دمعته ونزلت .
ملاك بهمس :-
ماتبكي حبيبي بالله عليك والله مانتحمل .
علاء بعد عليها ومسح دمعته :-
اليوم بس حسيت روحي خلقت ف هالدنيا وتنفست ورح نعيش ..اللي فات من عمري بدونك كله سراب ومش محسوب .
لبسها الدبله وقربت منه امه ومرت بوه واخته وقعدو يحضنو فيه ويباركوله ...وقربو منه نساوين خوته وباركوله .
وطلع هو وملاك من الصاله ...ومشو للمكان اللي رح يبدو فيه حياتهم الزوجيه اللي حلمو بيها سنين وسنين.
..
.
.
.
عند خيري :-
اكيد كلكم بديتو تتشاؤمو من وجودي وظهوري ف سطور هالروايه ...بس هالمره غير.
جيت نبيض في صفحتي معاكم ...وبنحكيلكم شن صار معاهم بعد مرور خمس سنوات من هالاحداث :-
بالنسبه لريناد وحمزه رزقهم ربي بولد تاني يعني بدي عندهم جبران وجابر .
ريناد تحسنت علاقتها هلبا بحمزه ..واخيرا سمحلها تشتغل المهنه اللي تحبها واللي هيا كتابه مقالات صحفيه ف مجله كبيره بالبلاد.
سند وفرح رزقهم ربي حتي هما ببنوته تانيه وبدي عندهم ملاذ و ميار وحاليا فرح حامل للمره التالته والطريف ان حتي هذا يتمني سند انه يطلع بنت.
بالنسبه لفرح حياتها فوق من التمام مع سند..وبعد مااصر عليها تستلم املاكها وتشتغل بروحها بمساعدته طبعا استلمت الشغل باأملاك بوها رحمه الله عليه.
سفيان واسراء عندهم ولد واحد أيساف وعمره 4 سنوات وطبعا سفيان مصر ع تأجيل الانجاب .
بالنسبه لأسراء كملت قرايتها وتخرجت محاميه ومن زمان كان حلمها تصير محاميه وتساعد كل مظلوم.
وعارفين اول قضيه استلمتها قضيه من ...عمها هاشم فتحت عليه خط النار ونبشتله من جديد ف القضايا متاعه .
علاء وملاك ربي رزقهم بتوأم ولد وبنت واختارولهم اسماء عهد و جبران وكان هالشي تكريم لذكرى الراجل اللي رباه وربي ملاك ..حاليا ملاك حامل من جديد وعايشه السعاده المطلقه مع علاء.
اما بالنسبه لسامر وسحر فمن سنه بس رزقهم ربي ببنت واختارولها اسم بلسم لأن هالاسم ليه ذكريات خاصه بيهم وكان سامر رافض فكره الانجاب ووجهة نظره ان مازال هو وسحر صغار ويبو يعيشو حياتهم.
بالنسبه لسحر كملت قرايتها وتخرجت من كليه الاداب زي ماكانت تحلم.
اليوم سكرت ملف قضيه خوي جبران.
جبران الانسان الوفي بالعهد..جبران الانسان العادل والعدل لله...جبران الانسان المحنك والخبير ف امور الحياه...جبران الاب الفاضل اللي كون أسره اساسها الحب والتفاهم والموده.
رحمك الله ياخوي وصديقي ومثلي الاعلي جبران ..وفعلا أن #خفايا_القدر كانت درس لأسرتك وجبر لكل أحلامك اللي ماقدرت تحققها وانت حي .
أخترت نكتب تفاصيل هالروايه مش لمجرد كلمات يخطها القلم وتتكدس ف حلقات للتسليه وتفويت الوقت.
بهالروايه حبيت نحط النقاط ع حروف هلبا قضايا عايشينها بمجتمعنا ونفتقرولها وف اللي نعانو منها .
● سلطت الضوء علي مهمه الاب ف الحياه ...عمود البيت الاساسي واللي بيه تبني الاسره وتكبر وهنا حطيت نموذجين للأباء ..الاب القامه والمثل الاعلي اللي هو #جبران وكيف قدر يوازن ويجمع عيله تحت جناحه ومافرق بينهم ولا خلاهم هما يفرقو بين بعض .
وبين أب زي #جمعه الاب اللي شتت اولاده وعيشهم الظلم والعذاب وحرمهم من أبسط حقوقهم.
● سلطت الضوء ع الام شمعة البيت والرعيل الاول لتربيه الابناء واستخلاص معدنهم سبحان من جعل مكانه الام عظيمه وجعل الجنه تحت أقدامها.
وهنا حطيت نموذجين للأمهات #صفيه اللي ربت اولادها ع عزه النفس والمحبه والترابط مع بعض وكانت نعم السند لزوجها .
وبين #رباب اللي غلبتها اهواء نفسها وضيعت نفسها وضيعت ولدها معاها لولا لطف ربي بيه..لو مهما قست علينا الحياه وظلمتنا نحاولو نصححو من نفسنا ونمشو ف الطريق الصح ومانتعثر ونتعذر بالظروف لان الدنيا مش دار راحه الدنيا دار شقاء .
سلطت الضوء علي قضيه الخوت اللي صدقا وللأسف اغلبنا نفتقدو لمثل هالترابط والحنيه بين الخوت وصارت شي نادر عندنا .
وهنا حطيت نموذجين الاول اولاد جبران اللي تربو علي انهم يكونو يد وحده وقلب واحد وأن الخو هو سند الظهر بخوه وان ربي سبحانه كان عنده حكمه كبيره في قوله سبحانه " قَالَ سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَانًا فَلَا يَصِلُونَ إِلَيْكُمَا " فعلا الاخ هو الحائط اللي لو اتكيت عليه مش رح تميل .
اما النموذج التاني ..اولاد هاشم مؤيد وسراج اللي كان فيهم بذره طيبه وبذره خبيثه وكان لازم يتفرقو وكل واحد يستنبت بالارض اللي تليق بيه.
● سلطت الضوء علي العلاقه الزوجيه وكيف تكون الزوجه سند لزوجها والمتكئ اللي يتسند عليه ف كل مراحل حياته ..كيف الزوجه بالصبر والحكمه تقدر تكسب زوجها وتقرب من قلبه وتكون راحته النفسيه وصدق قول الله عز وجل عندما قال "ومن اياته ان خلق لكم من أنفسكم أزواجا لتسكنو اليها وجعل بينكم مودة ورحمه ".
● سلطت الضوء علي الوفاء بالعهد والوعد وكان جبران هو المثال اللي يحتذى بيه ف الوفاء ف زمن كثر فيه الغدر يقول النبي صلي الله عليه وسلم "ﻣﻦ ﻛﺎﻥ ﺑﻴﻨﻪ ﻭﺑﻴﻦ ﻗﻮﻡ ﻋﻬﺪ ﻓﻼ ﻳﺸﺪ ﻋﻘﺪﺓ، ﻭﻻ ﻳﺤﻠﻬﺎ ﺣﺘﻰ ﻳﻨﻘﻀﻲ ﺃﻣﺪﻫﺎ، ﺃﻭ ﻳﻨﺒﺬ ﺇﻟﻴﻬﻢ ﻋﻠﻰ ﺳﻮﺍﺀ ".
● سلطت الضوء علي العدل ف اقتسام الارث واللي اغلبنا بدينا انعانو منه وهو اكل الناس حقوق بعضها وبعض الاباء سامحهم الله اللي يمنعو ف بناتهم من اخذ الورث بحجة من باب الجهل ان المرأه لاترث مع ان القرأن كان صريح ف هالشي ف قوله تعالي " للذكر مثل حظ الانثيين ".
وجاء النهي واضح وصريح عن اكل حق المراه ف قوله تعالي " ﻭَﺁﺗُﻮﺍ ﺍﻟﻨِّﺴَﺎﺀَ ﺻَﺪُﻗَﺎﺗِﻬِﻦَّ ﻧِﺤْﻠَﺔً ﻓَﺈِﻥْ ﻃِﺒْﻦَ ﻟَﻜُﻢْ ﻋَﻦْ ﺷَﻲْﺀٍ ﻣِﻨْﻪُ ﻧَﻔْﺴﺎً ﻓَﻜُﻠُﻮﻩُ ﻫَﻨِﻴﺌﺎً ﻣَﺮِﻳﺌﺎً ".
نتمني نكون توفقت ف الجوانب اللي حاولت نسلط الضوء عليها ...ونتمني مانكون اخطأت ف الحكم عند اي جانب استوقفت فيه بهالروايه .
ملتقانى بعون الله ف روايه جديده واحداث جديده وقضايا جديده لو ربي راد وعطانى عمر...ولهذاك الوقت تقبلو تحيات أختكم وصديقتكم اللي تحبكم دائما ...وكل عام وأنتم بألف خير ورمضانكم وافر الحسنات ومتقبل للعبادات وغفران للزلات .