رواية إبتزاز الحلقة الأولى 1 بقلم زهور جمال الدين
لقراءة المزيد من الروايات الليبيه : اضغط هنا
لقراءة المزيد من روايات زهور جمال الدين : اضغط هنا
 |
| رواية إبتزاز الحلقة الأولى 1 بقلم زهور جمال الدين |
رواية ابتزاز الحلقة الأولى كاملة مكتوبة بقلم الكاتبة الليبيه زهور جمال الدين
نرجعو بالزمن شوى ... لى بداية سنه 88
حوش عمك صالح ناصبين خيمة قدام الحوش وسرابى ضى والعه .. والنساوين لداخل يخبزو فى البازين خاطر اليوم غدى التريس متع عرس ولدهم مختار ..
عمتى فاطمه امهم قعمزة مع النساوين وحماواتها هما اللى شادين العوالة .. وهيا شادة فى يدها فوطة صغيرة ومرة مرة تتباوع فيها .. تبى ترجع ومش قادرة .. تطلع منها حاجه صفرا وخلاص
تاريتها حامل ومش قادرة تقول قدام الناس ..بنتها صالحة قريب تجيب فى الشهر الثامن توة .. ومختار ولدها دخلته غدوة .. وهيا حامل يانارى ميته بالحشم قدام بناويتها ..
صالحة وعمتها فتحية واقفين عالقدر متع البازين ويوشوشو
-فتحية/ فاطمه عشرة عمرى شنو منعرفها اليوم ..قلتلك متاكدة منها حامل غير ماتبيش تقول
-صالحة/ زعما يا عمتى .. هكى تقولى
-فتحية / غير خلى يكمل العرس وتو نجى انا ننشدها
وتلفتتلها / وانتى شن حالك مع ولاد راجلك
-صالحة / اهو ماشى حالهم .. مرة مرة يمشو لى امهم يباتو ليله ويروحو
-فتحية / اللطف يا مولاى.. علاش تحرمو ام من صغارها ..
وقامت صبعها / كانك مشاركاته فى هالعمل راهو حرام عليك
-صالحة / وانا فيش جيت يا عمتى .. هيا اللى عطتهمله بطيب خاطرها
-فتحية/ لابدة حدفتهمله بيش يردها
-صالحة/ الله اعلم .. هوا الحق محمد باهى .. ومايوجعش بكلامه .. وهادى. علاش طلقها مانيش عارفه
-فتحية / لابدة خوك مختار يعرف .. ماهو صاحبه وهوا اللى عطاك ليه
-صالحة / والله مندرى
-فتحية / هما قداش اعمارهم
-صالحة / حمزة كبير .. يقرا فى الخامس.. ووليد عمره 7 سنين وحافظ 5
-فتحية/ معناة الحق ثلاثه تريس
-صالحة / ربي يهديهم ومايدخلش الشيطان بينى وبينهم
وتم العرس على خير ..وبعد خمسة شهور جابت عمتك فاطمه بنيه سموها هند ..وفى نفس السنه جابت صالحة ولدها اشرف .. وجابت وداد مرت مختار ولد سماته خالد ..
بعدها بسنتين تزوجو نادية ومفيدة فى عرس واحد .. وبعدهم بي سته شهور تزوج خوهم منعم ..
كلهم دارو صغار وربي عمر عليهم .. مختار عنده خالد ومحمد وسلمى وفرح واحمد..وصالحة عندها اشرف ونرمين وسامى
وشهد .. نادية عندها منير ومودة و حنين.. مفيدة عندها سحر وغادة وصهيب .. اما منعم عنده انتصار وحسن ومراد ... . بناتهم كلهم صاحبات .. وكانت صاحبتهم الكبيرة خالتهم هند
___________________________________________
_
شهر 12 سنه 2016
يوم السبت الصبح فى حوش المرحوم عمك صالح
الحاجه فاطمه مقعمزة فالصالة وحاطه الراديو يغنى جنبها ..
وخشت بنتها هند للصالة ...
-هند / يااام فطرتى
-فاطمه / نراجى فى خواتك اهم على جيه
-هند/مزال الوقت .. صالحة بناويتها ماينوضوش بكرى .. ونادية لين تكمل محاضراتها اللى تعطى فيهم فى المعهد
-فاطمه / حتى مفيدة قالت بتفوت على محل قبل وبعتالى بتجى .. لكن عادى .. ماهو كل يوم نفطرو من التسعه .. معليشى كان اماخر السبت
-هند / باهى على راحتك
وخشت للمطبخ .. هما دايرينه زى ريسبشن او بار
-عبت هند السزوا اميه وحطتها عالنار/باهى عالاقل نديرلك معاى قهوة ولا نطيبلك شاهى
-فاطمه/ درت قهوة من بكرى ..والشاهى تو ناخده مع الفطور
-هند/ باهى
دارت هند القهوة وطلعت للجنان وقعمزت عالطاولة ..
حطت الفنجان وفتحت تليفونها عالفيس بوك .. صورت قهوتها ونزلتها فى صفحتها ..
تشرب فى القهوة وتتصفح فى اخر الاخبار عالفيس..
لقت منشور فى قروب سرى اسمه الفراشات ضايفينها ليه بنات خواتها ...المنشور يقول من تتمنى تشوفيها عروس .. نرمين بنت اختها صالحة معلقه كاتبه" نتمنى نشوف خالتى هند عروس"
ابتسمت هند ودارت لايك عالتعليق ... وكملت تصفح
الساعه 11 ونص الصبح خشت مفيدة وبناتها .. وبعدها بى نص ساعه خشت نادية ووراها صالحة والبنات
فطرو مع بعض زى كل سبت .. هما عادةً يلاقو امهم وهند بس فالحوش .. الكناين يمشو لى اماليهم هما وصغارهم ..
والمغرب يروحو للحوش بيش يتلاقو مع حماواتهم ..
يعطو فيهم فى مساحة يقعمزو بروحهم خوات وامهم ( وهدا الصح)
_________________________________________
_
فى غرفه هند
البنات متشرتعات فى الدار .. اللى عالسرير واللى عالكنبه اللى عالجنب واللى عالبساط ... اللى شادة التليفون واللى تهدرز فى سر لى بنت خالتها ..
انفتح باب الدار خشت هند/ اللى تبى شاهى تطلع للصالة
-حنين / درتى كيكه ياخالتى
-هند مبتسمه / طبعا .. زى كل سبت
-غادة / انا نبى كيكه بس ..
وتلفت لى حنين / هيا نوضى
طلعت هند من الغرفه .. ولحقوها حنين وغادة
عالسرير مقعمزين نرمين ومودة وسحر ..
نرمين / حقة ماقلتلكمش.. لخبطت واحد اسمه سيف من قروب فالفيس
-مودة/ حتى انا كلمنى اولامس واحد اسمه سيف
-نرمين / بلحق .. شوفى الصدف ماهو عارفينا صحاب حتى الاسامى تطلع نفسها
-سحر/ يا خوفى يطلع نفس الولد ياشاطرة
-نرمين تفتح فى تليفونها / ترا اصبري توريهولك ..
-مودة / هاتى ..
فتحت نرمين الماسنجر .. ورت صفحة سيف لى مودة
مودة بدت تضحك / حيها حيه .. هوا نفسه
-سحر / مش بعيد شافك فى المنشور اللى درتى بيه تاق لى نرمين
-مودة / احتمال راهو 😁😁😁
-نرمين / قالى انه هكر.. يعرف يخش ويطلع فى البروفايلات
معناها ردى بالك منه
-مودة / هوا طالب صورتى
-نرمين / غير خلى يفتح ونبعتوهاله .. نشوفه شن بيدير😁
-مودة وقفت/ تم يا قلم .. هيا نطلعو نشربو الشاهى
وطلعو البنات للصالة
_________________________________________
_
فى الصالة ...
الخوات وامهم مقعمزات عالصالون ... وجو البنات ..
يشربو فى الشاهى ويحكو ويضحكو ..
-صالحة / انا غير كان نفهم بس انتى علاش بتحولى من مدرستك
-هند/ هكى وخلاص .. مفيش سبب معين
-نادية/ مش درتى فيها صاحبات وقلتى الامور تمام
-فاطمه / عييت نقوللها اقعدى .. وحتى المدرسة قريبه
-هند /لا لا .. انا معش عجبتنى
وسرحت وهيا تخمم فى مديرها استاد صلاح اللى يتلصق عليها ويبي يدير علاقه معاها بأى طريقه
سحر فاتحة تليفونها وتتصفح ... قامت راسها غمزت لى نرمين ومودة .. ناضت مشت لى دار هند وهما وراها
-نرمين / خيرك
-سحر/ شوفى منو رادة على تعليقك
-نرمين قامت تليفونها / اما تعليق
-سحر/ متع قروب الفراشات على هند
-نرمين فتحت الفيس/ ترا
قعدت ادور فى الاشعارات لحد ماوصلت للاشعار اللى دكرت فيه هند .. شافت لقت خديجة لرؤيه الطالع رادة عليها
" تعالى للخاص نفتحلها عالنصيب ونشوف كانا عندها عارض والا لا "
نرمين دارت سكرين شوت للتعليق ..
-مودة/ ترا خشى عليها اسأليها
-نرمين / نشاورو هند قبل
-سحر/ تىابعتيلها اضافه انتى عارفه هند مش حتوافق انها تخش على مواضيع زى هادى
-مودة / ترا خشى على بروفايلها
فتحت نرمين البروفايل وهما يتفرجو معاها وحدة منا ووحدة منا .. لقو البروفايل معبى بي سكرينات لى رسايل بنات يشكرو فيها انها حلتلهم مشاكلهم فى عقدة الزواج .. لكن ماسحة اساميهم
-سحر حطت صبعها على مكان بعت الاضافه لى بروفايل خديجة وضغطت عليه
-نرمين تلفتت لى سحر/ تى علاش باعتتلها اضافه
-سحر/ امالا كيف بتشبح رسالتك يافالحة ..
سمعو صوت رسالة تلفتو للتليفون لقوها من خديجة
-خديجة باعته/ " السلام عليكم "
مودة / ردى عليها
-نرمين / تصدقو .. زى اللى خفت منها .. فكونى متع شعودة وشبح ..
-سحر/ تو انتىصدقتى انها فاتحة بروفايل عالفيس وتشبح ... تى هادو كدابات
-مودة/ لو كانت كدابة امالا ليش منردو عليها
-نرمين / ياودى خلى نكورجو ونردو .. بالك تصدف معاها ويجيها النصيب خالتى 😁😁😁
-سحر/ عندك علم ان تعليقها انحدف .. شوره حضروها
-مودة/ باهى اللى شفناه قبل ماينحدف
-نرمين / غير اسكتو
فتحت نرمين الرسالة وردت / " وعليكم السلام
-ردت خديجة / خديجة لقراءة الفنجان والكف بالصورة وجلب الحبيب ورد المطلقة .. وتحتها رابط
-مودة / افتحى الرابط
-نرمين / منفتحة امالا شنو
فتحت الرابط خشت على صفحة مكتوب متابعه او لا
اختارت متابعه ..
خشت على صفحة بعدها مكتوبة بالاجنبى ومكتوب تحت قبول او رفض ..
دارت نرمين قبول .. وتصكر تليفونها
البنات اتفاجئو / خيره التليفون تصكر ..
وكملو سهريتهم ورحو منغيررماتبعت مودة الصورة اجلوها للاسبوع اللى بعده
___________________________________________
_
بعد يومين
هند مشت لى مدرستها .. ركبت لى ممر الدور الثانى تاخد فى الغياب لانها اخصائية قارية علم نفس
بعد ماكملت طلعت من الممر .. جتها ابله / استاد صلاح يبيك فى الادارة
-هند فى خاطرها / اوووف
نزلت وصلت لى ممر الادارة .. استجمعت انفاسها.. وقفت قدام غرفه المدير وطقت ..
-استاد صلاح/ تفضل
خشت هند للمكتب / السلام عليكم
-صلاح بنضرة عتاب / وعليكم السلام ... تفضلى
-هند / ايووه شن تبى استاد قالولى طالبنى
-صلاح / تفضلى قعمزى
-هند/مفيش داعى قولى اللى تبيه وخلى نمشى نشوف شغلى
-صلاح / ليش دايرة طلب نقل
-هند تبيش تشبحله / المدرسة بعيدة .. وانا مش مستريحة
-صلاح/ طلب الانتقال تم رفضه
-شبحتله / ليش
-صلاح/ سبب الرفض اللى بعتهولهم ان مفيش بديل .. لازم تجيبى حد فمكانك بنفس شهادتك بيش نوافقلك
وقف من مكانه وطلع من المكتب / لكن السبب الحقيقي انى منقدرش نبعد عليك
-هند بعصبيه/ اللى قاعد ادير فيه عيب يا استاد .. انت راجل متزوج ومعصوم .. عيب تطلع عينك من حوشك لى برة
-صلاح/ قلتلك مانبيهاش .. قلتلك خدتهالى امى لانها بنت خوها
-هند / الكلام هدا مالاول كنت تقدر ادير حل .. مش توة بعد درت ثلاثه صغار جاى تقول خدتهالى امى
-صلاح/ يعنى مازلتى رافضه ومعاندة
-هند / وماتحلمش يوم انى حنغير رائي
-صلاح/ وماتحلميش انك فيوم حتحولى من المدرسة هادى
__________________________________________
_
السبت اللى بعدها
كان اخر سبت فى السنه ... البنات متلمدات عند امهم ..
المغرب حل ... ناضو صلو ويراجو فى نساوين خوتهم بيروحو من اهلهم ..موتيين القهوة والشاهى
وصلت وداد مرت مختار هيا الاولى جايبها ولدها خالد ....
باعتبار ان مختار ماشى مزرد مع صحابه ..وخشت بعدها عفاف مرت منعم ..
البنات فى دار هند
-مودة / شن رايكم فالصورة هكى كويسة ولا نزيد نقصها
-سلمى/ لعلمك لو درتى ملصق على وجهك فى برنامج ايحوله راهو ..
-نرمين / شنوهبلت هيا ادير ملصق ..ماهو ادير قص وخلاص
-انتصار/ بالرغم وجهك طالع قمر فالصورة يامودة .. فلتر السناب الجديد مش عادى
-سحر تضحك / شكارة العروسه 😁
-مودة / حقة على دكر شكارة العروسة .. شن صار فى هاديكا الشباحة الشيخة خديجة
-انتصار/ تى نقصى فى صوتك خوى حسن ديما يدور فى الممرات
-مودة تضحك / شن صار فى شيخة الجامع خديجة ختمتى معاها القران ولا مزال
كلهم يضحكو
-انتصار/ ايوووه هكى 😁😁
-نرمين / من ثانى يوم دارتلى حظر الواطية
-سحر / بلحقة
-نرمين / والله
-سلمى / فيها خيرة .. افتكيتى منها
فتحت هند الباب / انتصار يبيك مراد .. وسلمى تبيك امك .. وضمو الدار فيسع قبل ماتروحو
طلعو سلمى وانتصار من الدار وسكروها وراهم الباب
-نرمين / نراجوهم ولا نفتحو
-سحر/ الولد من بكرى وهوا يبعت فى رسايل .. غير افتحى وبعتالى ساهل تو يجو
-نرمين تضحك / شن رايكم نفتح حتى انا ماسنجر ونبدا نكلم فيه من تركينه ومودة من تركينه
-مودة / غير لا عاد ..خلى نبعتله صورتى وانفجأه بالعملة 😁
فتحت مودة التليفون لقت عرم رسايل من سيف
-نرمين تضحك / الخاين
-سحر / تقول عليك دايرة منه راس مال😁
-مودة / غير اسكتو ..
وبعتت رسالة " ايوووة"
-سيف/ تى وينك من بكرى انراجى .. مش وعدتينى الليله بتبعيهالى صورتك
-مودة/ نخاف نبعتلك وتوريها لى حد من جماعتك
-سيف/ خيرك مش واثقه فيا ..ابعتيها وشوفينى راجل ولا لا
-مودة / عارفاتك راجل.. لكن خايفة ماتمسحهاش وحد يشوفها بالغلط
-سيف/ تى خيرنا عاددد
-مودة/ احلف مايشوفها حد غيرك
-سيف/تى قلتلك ابعتى .. ورحمه بوى مايشوفها واحد غيري
-مودة/ باهى احلف مامعاك حد توة
-سيف/ نفتحلك ام الكاميرا .. قلتلك بروحى
-مودة/ بينك بين ربك
-سيف / اوووووووف تى ابعتى النم
صوت رسالة وصلت توت توت....
مجموعه شباب مادين وجوههم قدام اللاب توب يشوفو فالصورة ... تاريته سيف الكداب مش بروحه معاه صلاح ومفيد وعبدالرحمن وباسم ...
وصلت صورة مودة.. باينه من كتافهاوصدرها وبطنها ورجليها لابسه سروال جينز
-صلاح / شفتها بنت الكلب .. مابعتتش وجهها
-سيف / تستهبل على امى بنت الكلب ..
حط ايديه عالكيبورد يكتب/ انتى تستهبلى
-مودة/ 😁😁😁
-سيف / تضحكى .. تى وين صورتك
-مودة / اهيا صورتك
-سيف / هادى صورة جسمك .. نبى وجهك انا
-مودة/ ايام سورى ... وجهى تشوفه عالطبيعه...
هيا باى ماما تنادى
-سيف/ تعالى
-مودة/ بااااااى
وصكرت نت ...
-مفيد/ وراس امك لما تدفع ... خسرت الرهان يا حبوب
-سيف/ تى اصبرو النم .. مفروض تعطونى يومين لين نقنعها
-صلاح يضحك / اصبرو عليه روح الما ما
الشباب كلها تضحك
-سيف خدى الطفايه وحدف بيها صلاح / تى صكر فمك ياتافه 😁😁😁
-عبدالرحمن / ورحمه امى الغاليه ماتبدا الا حاط المية توة
-سيف يضحك وحاط يده فى جيبه / مفيش رحمه بكل
وحط ميه دينار هالسجادة
- مفيد خدى الفلوس / الرحمه فى الاخرة يا حبوب .. هيا نوضو ياجماعه
-صلاح / وين
-مفيد وقف/ المشاريب والشيشه اليوم على سيف .. بنخلصو بالميه اللى حطها توة
-عبدالرحمن وقف / تم .. هيا نوضو
-سيف يحدف عليهم فى المخاد / يامسخين ...
وطلعو الشباب من حوش سيف ماشيين للقهوة
_________________________________________
_
فى دار هند
-مودة تضحك/ ههههه دمه انحرق
-نرمين/ انشاءالله يموت
-سحر/ مصح وجهه ايكلم فيكم انتو الزوز..وعارفكم بنات الخالة ..اما عار بعد هكى ماريتش
-مودة / غير نوضى نادى سلمى وانتصار بنات خوالى
-نرمين / احنا بابا قريب ايجينا .. ياريت ايخلونا نباتو مع بعضنا الهم
-سحر/ ياااريت .. فى حكم المستحيل هدا
-فتحت نرمين تليفونها / هوا بعتلى صورته غير خلى نوريهالكم
فتحت عالرسائل ...
-مودة/ واصلينك رسايل عالمفلتر ... شوفى
-نرمين حاطة صبعها تفتح فى رسائل المفلتر/ والله ماندور فيهم ... اكيدة رسايل من شباب
البنات يضحكو ...
-سحر/ غير افتحى اول رسالة .. كاتب اسم بروفايله عشقى انتى
فتحت نرمين الرسالة ..... تنصدم بي صورها ....
وفالاخير كاتب رسالة " لو تبى صورك .. كل صورة بثمنها .. وعندى غيرهم هلبا "
نرمين بدت ترعش وتخبط على خدودها / حيييه عليا صورى كيف حصلهم يا غبارتى
-البنات مخلوعات / يانهارات الحرف .. غبارة ..
وهما يخبطو فى وجوهم حايرين على نرمين اللى خدت صدمه عمرها
-سحر / غير ادكرى بالك بعتى صورك لى حد
-نرمين تخبط / مسسسستحيل نبعت صورتى ...تعرفونى ماندرق عليكم فى شى .. مستحيل نديرها
-مودة مصدومه / حتى لما بنبعتو صورة .. ناخدو فيها من الغوغل ونبعتو زعميتا احنا
-نرمين / ياغبارتى ... ياحليلى من خوى اشرف كانا يسمع لما يقتلنى
-انفتح الباب / نوضو ... تعالو يابنات
-البنات انخلعو / خيرك يا انتصار شن فى
-انتصار / عمىىىىى... عمى مختار دار حادث ومات
وطلعو البنات يجرو يتعايطو
__________________________________________
_
فى الصالة ...
جو البنات يجرو يتعايطو ...
-حسن/ صكرى فمك انتى وياها
-نرمين تبكى / من قاللكم خالى مات
-هند تبكى/ تى ضمى فمك انتى وياها .. توة كيف صكر عمر صاحبه كلم احمد وقاله انهم فى المستشفى حيين كلهم
-سحر/ خالد وين
-هند فنصت فيها / خالد مشى لى بوه هوا مراد
خلوها واقفه هيا وحسن وخشو للدار الدخلانيه فى الصالة لقو حناهم وبناتها يبكو ... ووداد مرت مختار تبكى حالة وجنبها بناتها سلمى وفرح يبكو
-فرح/ نبو نمشو لى بوى يااام
-وداد / معقولة خالد يخلينى ويمشى لى بوه بروحه .. يا حليلى زعما شن صار فيه
عمتك فاطمه على تركينه تبكى جتها بنتهاهند قعمزت جنبها
-صالحة/ كيف يرفعك للمستشفى ياوداد وهوا مليان رجالة .. اهو قاعدين مع بعضنا
-نادية/ يااااربي احفظ اوخىى
-وداد / ماعنديش صبر نقعد هنايا خلونى نطلع للجنان
-عفاف سلفتها / ياوداد الصبر باهى ... خليك هنايا اهو نكلم
فى مراد تو يرد عليا يطمنا
صار صمت كامل وعفاف فاتحة المايك والتليفون يرن
رد مراد / ايووة يااام
كلهم يشبحو لى عفاف ويترقبو فى مراد شن بيقول
-عفاف/ شن صار مع عمك يا اوليدى
-مراد / عمى كويس عنده كسر فى رجليه الزوز .. طلع واحد معاهم هوا المضرر .. وحتى هوا اسمه مختار
كلهم فى صوت واحد / الحمدلله
باتو هاديكة الليله كلهم مقعمزين
__________________________________________
_
بعد اسبوع
نرمين كل مرة تجيها رسالة من بروفايل .. يبعتولها فى صورة وجهها متركبة على اجسام عارية ويهددو فيها
وبنات خالتها وخوالها معاها اولا بأول باللى صاير .. سحر نصحتها انها تقول لى خالتها هند .. وانها هيا الوحيدة اللى ح تساعدها
مشو هداكة السبت لى حوش حناهم .. وقعمزو البنات الخمسة مع نرمين وهيا تحكى لى هند فى حكايتها اللى صارتلها
-نرمين / وزى ماحكيتلك .. قالى لازم غدوة نتلاقو بيش يسلمنى الميمورى ..
-هند / يانرمين ماترعشيش روحك .. هما صور وفالاخير تقدرى تقولى ان تليفونك انخنب ..وبعدين منسئلك انتى اتنزلى فى صورك فالفيس
-نرمين / فقروب الفراشات بس ..ماهو ضفاك ليه وتشوفى فينا.. وجهى كله مانبينش فيه ..يانحط هلال يا نحط وردة المهم نصه بس يبان
-هند/ والصور اللى انبعتولك .. منزلتهم كلهم
-نرمين / لا .. منزلة منهم صورة وحدة بس
-هند / انا توة لا نبى نهزبك ..ولا نبى نكشخ عليك .. الشى وصار وردانه محال.. لكن انا ننصحك نصيحة
-نرمين / شنهيا
-هند /اولا موعد غدوة ردى بالك تمشيله .. ثانيا لاااااازم تقولى لى واحد من خوتك عالموقف اللى صارلك ..بيش لو صارلك اى خطأ او اى حاجه يكون واحد من خوتك عنده علم
-نرمين ترعش/ مستحيللللللل ... مستحيل تقول لى واحد من خوتى.. شنو تبيهم يدبحونى..ماك تعرفيهم يا خالتى
-هند / باهى عالاقل قولى لى واحد من خوتك اللى من بوك
-نرمين / حتى هما واعرين .. مستحيل نقوللهم ان صورى خدوهظ منغير مانبعتهم انا
-هند / نبى نفهم كيف وصلوهم .. كيف خشو على تليفونك
-سلمى/ هادو برامج هكر يا عمتى..يبعتولك رابط تخشى عليه وادا بيهم يخشو عالفيس متعك
-هند / لكن نرمين ماتنزلش فى صورها فالفيس متعها
-مودة/ معناها هكرو تليفونها نفسه .. وخشو للاستوديو وخدو الصور اللى يبوها
-نرمين تخبط على وجهها / ياغبارتى ... ياغبارتى
-هند/ ادكرى ماخشيتيش روابط ..ماحد تشكى فيه
نرمين قعدت تدكر فى هاديكة الشباحة اللى قعدت تبعتلها فى روابط وهيا تخش عليها
-سحر/ هادى المشكلة.. حد يبعتلك رسالة ..تخشى تشوفيها وهيا تطلعلك هكر منغير ماتزبطى
-هند تشبح لى نرمين/ حسب علمى ان خوك الكبير ضابط ولا
-نرمين / خوى حمزة ضابط لكن منقدرش نقوله حاجه زى هادى
-سحر/ كلميه انتى يا هند
-هند/ هاتى رقمه .. تو نكلمه انا ونقوله
-نرمين / نخاف يكشخ عليا ولا يضربنى يتهمنى انى باعته صورى
-هند / ماعندكش حل ثانى .. لازم تقولى لى واحد منهم ..اشرف نعرفه عصبي ..ولدلك لازم تقولى لى واحدمن خوتك الثانيين ..واقرب واحد الكبير..
-نرمين تبكى/ ياحليلى عالعملة اللى صارتلى من دون البنات
-هند / انا لو تصيرلى عملة ..يانمشى لى خوى مختار ..او نمشى لى اختى صالحة.. ماعنديش حل ثانى .. ولدلك لازم تقولى لى خوك بيش يمشى معاك بالخطوة
-نرمين / باهى نعطيك رقمه وانتى تعرفى كيف تجيبهاله
-هند / وموعد غدوة ردى بالك تمشيه .. ولا اقعدى باتى عندى هنايا خير
-نرمين منهارة / لا لا والله مانقدر.. خالى كيف مروح والناس تجيكم ..
قامت التلبفون / اهوا رقم حمزة وانتى قوليله بطريقتك
-هند متأثرة 😔/ تمام
وروحو البنات فالليل
________________________________________
_
ثانى يوم الصبح
هند فالمدرسة .. اتصلت بي نرمين اطمنت انها ما ممشتش للموعد اللى دايرينهولها الجماعه اللى خانبين صورها ..
صكرت منها واتصلت بي حمزة ربيب اختها
-حمزة / الو
-هند / السلام عليكم
-حمزة / عليكم السلام
-هند / استاد حمزة
-حمزة / ايوووه
-هند / والله انا عندى مشكلة .. وعطونى رقمك قالولى انك ضابط وتقدر تساعدنى
-حمزة / من عطاك رقمى
-هند / احنا توة فالمشكلةة.. مش فى منو عطانى رقمك
-حمزة/ باهى شنهيا مشكلتك
-هند / عندى بنت اختى خانبين منها صورها
-حمزة😏/ خانبين منها ولا هيا باعتتهم
-هند / لا واخدينهم منها🙄 ..المهم انهم توة يهددو فيها بصورها .. ويبو يتلاقو معاها زعميتا بيش يردولها الميمورى اللى فيه الصور
-حمزة / صغار الكلب .. ووين يبوها تجيهم
-هند / انا الحق نبيك اتابع موضوعها وتوقف معاها
-حمزة تعصب/ اعطينى رقمهم الناس هادو
-هند تشجعت اكثر/ هما ماعطوهاش رقم .. عندهم اكثر من بروفايل يكلمو فيها بيه
-حمزة يعيط / ماهو هدا الغلط .. تفتحو لبناتكم العولمة عالبحرى وبعتالى تجو تشكو
هند تسجعت اتقوله ان البنت نفسها اخته واللى يصير يصير
-هند / قتلك .. نبى نقولك البنت من تكون
-حمزة / شكون
-هند / انا نتكلم على اختك نرمين
-حمزة / نرميييين ... خيرها نرمين ومنو يهدد فيها
وتصكر تليفون هند
-هند تحاول تفتح فيه / ياوالله عملة ... غير ياريتنى قلتله انهم يهددو فى اخته ...
اتكتكت فالتليفون تبى تفتحه / الهم
حمزة ولع سيارته وطار للجامعه ....
اما هند اتحاول تفتح فى تليفونها وفى خاطرها / غير نكمل حصصى وبعتالى نروح للحوش نحط التليفون فالشحن تو ينفتح ونكلمه .. مزال عندى وقت مدامه نرمين كنصلت موعد اليوم
شرين جرس الحصه .. حطت التليفون فى الشنطه وركبت من الدروج لى فصولها
__________________________________________
_
نرمين بالرغم وعدت خالتها انها مش حتمشيلهم .. ولكنها خلت بروفايلها مفتوح على اى عملة تصير
وصلوها منهم رسايل تهديد انها لازم اتجيهم توة .. هما مدرسين السيارة خارج الكلية ... اتصلت بي خالتها هند تشوف شن صار ... لقت الرقم مقفل
مع زنهم وتهديدهم طلعتلهم ..عالاقل تشوف وجوههم وتتعرف كيف شكولهم
لما طلعت برة ...لقت سيارة حمراء زى ما قالولها فى الماسنجر ... مشت للسيارة .. لقت شخص واحد بس مقعمز فيها
-الشخص/ اسمى عبدو .. افتحى السيارة واركبى
-نرمين بتهكم/ وين الباقيين
-عبدو/ انا بس اللى نكلم فيك بكل البروفايلات
-نرمين / كداب
حرك عبدو المفتاح ولع السيارة
-نرمين / وين ماشى .. هات الميمورى
-تلفتلها / اخر مرة نقولك اركبى .. نعطيك الميمورى ونردك
-نرمين / قلتلك لا
ولع السيارة ووخر يبي يمشى
-نرمين / اوعدنى انك تعطينى الميمورى
-عبدو/ باهى ... غير اركبى
فتحت نرمين الباب وهيا ترعش .. ركبت معاه ..
تلفتلها عبدو/ ماتخافيش
وبخ فى وجهها بخاخ اغمى عليها ... و مشى عبدو بالسيارة
وبعد ماطلع عبدو قريب بي نص وصل خوها حمزة مع زحمه الطريق قريب 11 ونص ... سأل على نرمين قالوله عندها محاضرة تقعد 3 ساعات تطلع منها غير 2 ونص.. قعد فى سيارته ايراجى فيها
__________________________________________
_
الساعه 1 ونص
وصلت هند للحوش...لقت الدنيا خايضه ..شن فى .. قالولها خوك مختار جاته مضاعفات ورفعوه ولاده للمستشفى .. امها شدت فىالمشيه .. قالتلها شى ترفعينى ... ركبت امها فى السيارة وطارة للطبى .. لحقو مختار .. ونست انها تشحن تليفونها
مع 2 ونص ..
طلعو الطلبه من المحاضرة .. حمزة يسأل فى البنات على نرمين .. قالوله انها ماخشتش للمحاضرة...ولعت فيه النار .. كلمها على تليفونها لقاه مقفل ...زادت النار .. عاود يكلم فى رقم هند لقاه مقفل زادت النار اكثر واكثر ...
مع الساعه 3 ونص
وصل حمزة للحوش سأل صالحة مرت بوه على نرمين قالتله ان محاضارتها اليوم للساعه 5 ونص .. ولع سيارته ورجع ثانى للكليه ...بيخش من الباب الرئيسى لقى الدنيا زحمه .. قالو لقو جثه ملوحه شورة ضاربتها سيارة وهاربه...
نزل من سيارتة ومشى يجرى يبي يشوف الجثه باعتبار انه ضابط ...
وصل للشباب طلع بطاقته .. وعرو على وجه الجثه ....
انصدم وفتح عيونه يلقاها اخته نيرمين ....
خداها بين ايديه وهوا يعيط .. ركبها سيارته ومشى يجرى بيها للحوادث بوسليم ...
وهوا فى عز المعمعه حس ان فى جريمه .. والبنت اللى كلماته بكرى مشتركة فيها ..
فتح تليفونه واتصل ...
-حمزة / الو كيف حالك يا فندى فوزى
-فوزى / اهلين حمزاوى كيف حالك
-حمزة/ اسمع انا مش فاضى توة .. منبعتلك رقم .. اكشفلى عليه فى شركة المدار باسم شكون
-فوزى / انشاءالله خير يا فندى
-حمزةيعيط/ قلتلك شوفهولى بسرعه
-فوزى حاير فيه خيره / حاضر ..حاضر يافندى ..اهو تو نمشى بنفسى
وصكرو الخط ...
طلع الدكتور / وينه خوها
كل من جى معاه من الجامعه انتبه
-حمزة بحدر / انا خوها
-الدكتور 😔/ البقاء لله ... الحالة جبتوها متوفيه
الكل واقفين مصدومين بما فيهم حمزة
لقراءة الحلقة التالية من الرواية : اضغط هنا