رواية لقد وقعت في الفخ الحلقة السابعة عشر 17 بقلم حنين عادل
رواية لقد وقعت في الفخ الجزء السابع عشر 17 بقلم حنين عادل
رواية لقد وقعت في الفخ البارت السابع عشر 17 بقلم حنين عادل
 |
| رواية لقد وقعت في الفخ الفصل السابع عشر 17 بقلم حنين عادل |
رواية لقد وقعت في الفخ الفصل السابع عشر 17 بقلم حنين عادل
في الصباح
___________________
صحت وعد مبتسمة وخدت شاور ولبست لبس بيتي مريح وراحت تخبط علي اوضه سلطان..
قام وفتح الباب وكان باين عليه التعب...
وعد بصت ليه بقلق: انت كويس
دخل وقعد علي السرير : مش كويس
دخلت وعد مبتسمة : قول الحمد لله واحكي بعدين ماتقولش مش كويس لازم نحمد ربنا علطول احنا متنعمين في نعمه الكتيرة والنعم بتزول لما مابتحمدوش عليها
ابتسم وبص لها : طب مايمكن أكون مسيحي او حاجة تانية لأني اكتشفت اني اعرف حاجات برده
وعد: ممكن ليه لأ بس الله واحد خلق سيدنا محمد وخلق سيدنا عيسي احنا بقا كبشر وعادتنا الفساد حرفنا في كلامه
ضحك فبانت غمازاته بشعره العشوائي ودقنه الخفيفه :
انت جميلة أوي يا وعد علي الرغم من الظروف اللي مريتي بيها ازاي مااتغيرتيش
ابتسمت وعد: كان ممكن اتغير واكتئب انا عندي جروح في قلبي كل حاجة حصلت لي سابت علامة في قلبي بس ماسمحتش انها تغيرني في أي مشكلة بحس ان الحياة صعبة وماعتش تتعاش بس بوكل أمري لربنا بيجعل الحمل خفيف عليا
وبعدين انا لازم اتبسط لأن كل اللي حواليا ربنا بيبين معادنهم بسرعه مش أحسن ماأفضل مخدوعة فيهم
اتنهدت: يمكن اللي بيحصل ده بسبب اني علطول بدعي ربنا من قلبي يبعد عني الشر والناس المؤذية ويمكن برده الخير هو اللي قل وبقي الهدف السامي هو الماديات بس حاسه كده
استغرب لما سكتت فسألها : حاسه ايه
لمعت عينيها وضحكت: حاسه ان الخير قريب أوي ..
رفع حاجبه وهو بيضحك: علي كده انا اللي هاطلب المهر بقا
ضحكت وعد وهي بتمشي ايدها في شعرها: عايزاك من غير شنطة هدومك ثم ياسطا ليه احنا مانجيش نتقدم ليكم
اتكلم وهو بيفكر: يعني ادخل وانا شايل الجاتوه والعصير وباصص في الارض وبعدين اروح اجري واختلس النظر من ورا الستارة واقري معاكم الفاتحة
وعد بضحك : ايوه ياسلام علي الجمال
اتنهد: ومش خايفه اكون زي كمال انا نفسي مش عارف حاجه عن نفسي مايمكن أطلع اسوء من كل اللي عرفيتهم
سكتت وعد شوية وبصت ليه:
بس انا مرتاحة ليك وحاسه انك انسان كويس هو اه صحيح مافيش حد كامل بس انا واثقه ان الخير عندك يغلب الشر
سلطان سكت وهو بيبص للفراغ..
ابتسمت وعد: عارف انا لما حسيت بمشاعر ناحيتك جيت قولتلك ليه
بص ليه بتركيز...
فكملت كلامها:
عشان ضاع وقت كتير جدا من حياتي مع أشخاص غلط أشخاص اتعدوا عليا واخدوا رقات من روحي فلما أحس اني في شخص صح لازم أتمسك بيه كفايه بقا اللي راح
يلا بقا يا أبو السلاطين نفطر ريقي نشف
اقولك...
سلطان : قولي
وعد بضحك: قول قميص نفيسة نشف لأ لسه ما نشفش
سلطان: قميص نفيشه نفش لأ لسه مانفشي
ضحك وعد : ايه الهبل ده عالصبح طب انا تافهه بتجاريني ليه قوم حضر لنا الفطار يا جدع قوم
_____________________________
كان ياسين قاعد علي مكتبه وقصاده واحد...
ياسين بصدمة: إلياس هو نفسه !
رد اللي قاعد قدامه : ايوه هو نفسه
ياسين بعصبية : جهز الرجالة وانا هاقول هانتحرك امتي
طلع من المكتب فلاقاها طالعة من اوضتها ولابسه لبس من اللي جابوا ليها فستان كشمير طويل منقوش بورد أبيض وحزام وشعرها كان لسه مانشفش فكان عامل زي الكيرلي وبعض خصلاته نازله علي بشرتها الخمرية
ابتسم وهو بيبص لعينيها الزرقا وفستانها بتفكير:
ايه ده جميلة تفتن اي شخص ازاي ماكانش مهتم بيكي
لاحظت انه بيبص عليها فبصت في الارض بخجل
لاحظ ده فبص في الارض وابتسم:
ها هاتفطري معايا النهاردة
هزت براسها فابتسم ومسك ايدها ونزل ..
___________________________
كانت قاعده علي الفطار وسلطان قاعد ..
بص لها وقال:
هو ايه اللي البنت بتحبه في الراجل من وجهه نظرك يعني عوزاه يكون عامل ازاي ؟!
وعد حطت العيش من ايدها :
هاقولك البنت تحب الولد الناصح اللي بيبقي فلاتي وفي نفس الوقت تحبه مؤدب يعني عينيه في الأرض
ورومانسي بقا يقولها بيبي وعمري وكل حياتي بس مايمنعش يكون متوحش جدا وقت الجد
بينام بدري ويروح الجيم بس يسهرها لحد الفجر
ويكون فقري وخفيف الدم وتنك لو يحتاج الأمر
عوزاه مشغول عنها شوية وتملي بيملي حياتها مش عارفه اوصلهالك ازاي بس هحاول ابسطها
سلطان: ياريت ..
وعد ضحكت : عوزاه يبقي بروطة وقطة ودايما واثق فيها ودمه يكون حامي انما طبعا مايغيرش وتحبه يكون غني جدا يصرف كل فلوسه عليها ويحوش علشان المستقبل يعني يموت عالقرش
من الأخر عوزاه ميكس ما بين حاجه طعمها مر وحاجة طعمة ...بس كده سهله
ضحك سلطان : ربنا يعينكم علي المهلبية اللي في دماغكم بجد...
_______________________________
قعد ومسك دماغه بألم :
ايه يا حبيبتي ايه ياروح النمر من ساعة ما صحيتي بتعيطي ليه احكيلي ارجوكي
بصت ليه بعيونها المليانه دموع وحاولت تهدي:
بابا وحشني اوي يانمر مخنوقة مخنوقة الشوق لشخص مش موجود صعب جدا
حضنها وهو بيحاول يخفف عنها :
حلمتي بايه ياروح النمر
روح : حلمت انه قاعد هو وماما في مكان كله ورد زي مايكون جنينه وحاضنين بعض ..
طلعت اجري عليهم وحضنتهم وقولتلهم ياخدوني معاهم بس قالوا لسه الوقت ماجاش
النمر: ومافكرتيش فيا ، هونت عليكي تسبيني
حضنته جامد وهي بتشهق: الفراق صعب أوي ماعدتش قادرة أستحمله يانمر احيانا بتجنن ازاي ده حصل ازاي خسرته كده ازاي حياتي اتغيرت وبين ليله وضحاها ضهري اتكسر وسندي راح وسابني بحاول أصبر نفسي بس ماعتش قادرة خلاص
النمر: الدنيا محطات وكل واحد جاي عليه الدور عمي بدر في حته احسن بإذن الله ادعي له بالرحمة وادعي انه ربنا يجمعكم بعد عمر طويل في الجنة هو عشان حاسس بيكي بيجي في الحلم وطالما في قلبك هنا يبقي مابعدش
__________________________
سلطان كان قاعد عالكنبة بيتفرج علي فيلم أجنبي
وعد: سلطان ....سولطااااااان
سلطان بانزعاج: ايه يابنتي
وعد: هانتغدي ايه
سلطان : اي حاجة
وعد: اللي هو ايه أي حاجه ده
سلطان : انتي بتعرفي تطبخي اساسا ولا لأ
وعد: والله اومال ايه المكرونه والبانية العسل اللي بعملهم دول
سلطان: يبقي مابتعرفيش اطلبي مشويات وخلاص
وعد: انا بعرف اطبخ وكل حاجه بس انا مش قادرة النهار....
وقبل ماتكمل كلامها كان في صوت ضرب نار فزعها وكلبشت في سلطان ولسه هاتصوت
مسك بوقها وهو بيحاول يهديها وقام ومسك ايدها وراح عالمطبخ خد شويه سكاكين...
ووعد خايفة بتترعش..
سلطان: في هنا اي بندقيه أو اي حاجة
وعد بصوت واطي: لأ طبعا هانمووووت ايه الغلب ده ياربي عايشين في فيلم اكشن
دخلوا الفيلا 5 يكسروا في الحاجة وبيدورا عليهم ...
واحد قرب منهم سلطان نشن عليه بالسكينة وجات في قلبه وقع علطول
اتنين خدوا بالهم وقربوا منه نشن عليهم وقعوا .
وعد : احسن هاتروحوا من ربنا فين يا بعدااا
مشي يتسحب وهو بيحاول يطلع بره الفيلا
واحد هجم عليه ومسكه من رقبته وزنقه في الحيطة طلع سلطان السكينة واداهاله في جنبه وبعدين في قلبه لحد مابعد عنه ..
بص عليه لقي في جيبه مسدس اخده..
مشي لقي واحد مقابله عمر المسدس وضربه
ووعد وراه
في نفي الوقت بيبص لقي واحد فوق ماسك المسدس ومصوبه عليه ضربه وقع في حمام السباحه والدم لون الميه
طلع يجري والرصاص محاوطه من كل جمب ...
وعد: عكيت الميه مش مسامحاك يااللي موت..
سلطان: بتفكري في ايه اجريييييييي
قابل اتنين علي البوابة ضرب واحد بالسكينه والتاني حط المسدس في رقبته واستخدمه كدرع لحد ماخد يجي عشر طلقات لحد ما خرج بره الفيلا وطلعوا يجروا بعييد
وعد وهي بتجري: انا اعرف ان المداهمات وشغل المافيا ده بيحصل بالليل انما بالنهار غريبة يعني
سلطان : ڤيلا عالصحراوي البيت الجاي بعد كيلو احسن حاجه هو حد شايف حاجه دا لو اتقتل قتيل ماحدش يعرف عنه حاجة
وعد: طب هانعمل ايه والناس اللي ماتت جوه دي
سلطان: ماتقلقيش اللي باعتهم هاينضف الدنيا
وعد: مانكلم البوليس
سلطان: وبعدين مش بعيد تلبسنا !
وعد: أنا قطعت الخلف خلاص ياعم وبعدين هانبات فين احنا...كل حاجه جوه بطاقتي الفيزا كل حاجه
فضل سلطان ماشي ساكت فترة طويلة لحد ماوصلوا قدام البحر
وعد: ايه الجمال ده وكمان قرب وقت الغروب
سلطان: هو فعلا قرب اوي
وعد قعدت علي الأرض: بحب اتفرج عليه علطول بس كنت علطول لوحدي اول مرة حد يبقي معايا
قعد جمبها ومد رجليه للمية وابتسم ..
وعد: هما ليه عاوزين يقتلوك مع ان انت طيب
ضحك سلطان: مايمكن انا مش طيب وشرير كبير او زعيم مافيا مثلا
قال كلمته الاخيره وبص لها بتركيز
فردت:
ما اعتقدش زعيم المافيا زي الروايات مابيبقاش زيك بيبقي مغتصب وعنده مرض نفسي وامه سابته وبيطلع عقده في الناس قاسي ومابيضحكش حاجات كتير.
وانت الي حد ما محترم
ضحك : الي حد ما !
وعد: شايف نبرت فيها اهو مافيش غدا حتي قوم اصطاد لنا سمكتين نشويهم ونعيش زي الانسان القديم بقا ..
ضحك سلطان: هانموت من الجوع في ساعتين يعني اصبري
وعد : بس لاحظت انك بتعرف تنشن ياجدع ماشاء الله حتي المسدس مابيخيبش مين اللي علمك
سلطان: مش عار.......
قبل مايكمل كلامه رشته بالمية فقام شالها ودخل بيها جوه الميه ...
وعد: عااااااا مابعرفش أعوم مابعرفش يخربيتك مابعرفش اعوووووووووم ليه يادنيا بتحطي علي جرحي كولونيا
ضحك وهو بيبص ليها ودخل جوه البحر لحد ماعدش باين غير وشهم ...
وعد : حسدتك انا اللي جبت سيرته
بص ليها وهو بيضحك: ايه ده !
وعد: هاقولك لما تكبر بقا عاااااا ايه اللي هناك ده قرش
سلطان: ياااه فين ده ...
يتبع...
لقراءة الفصل الثامن عشر اضغط علي (رواية لقد وقعت في الفخ الفصل الثامن عشر)
لقراءة باقي الفصول اضغط علي (رواية لقد وقعت في الفخ)