رواية يويو الحلقة الأولى 1 بقلم لولو محمد
رواية يويو الجزء الأول 1 بقلم لولو محمد
رواية يويو البارت الأول 1 بقلم لولو محمد
 |
| رواية يويو الفصل الأول 1 بقلم لولو محمد |
رواية يويو الفصل الأول 1 بقلم لولو محمد
فى قاعده تعارف بين عريس و عروسه فى حضور اهل الطرفين
ام العريس ( ايمان): لا يسكنوا معايا ايه شقه الباشمهندس جاهزه و متوضبه و مفروشه على سنجه عشره الله امال هندسه ايه بقي
الكل يضحك ما عدا العريس و العروسه
ابو العروسه ( محمد )/ يا جماعه لسه بدرى اوى على الكلام ده و بعدين احنا اخر حاجه نتكلم فيها الماديات احنا عارفين ان الباشمهندس احمد راجل محترم و زينه الشباب كلها و كفايا اصله الطيب و نسبكوا اللى يشرف
ابو العريس ( خالد) / عشت يا دكتور ربنا يجعلها معرفه خير باذن الله
محمد / بس انا شايف اننا نسيبهم يتكلموا مع بعض شويه بعيد عننا عشان نكسر حاجز الخجل بينهم و يدونا الاوكيه التمام
خالد / اقسم بالله يا دكتور اخدتها من على لسانى
ام العروسه (عبير )/ تحبوا نقوم احنا و لا تطلعوا انتوا البلكونه
احمد / البلكونه حلوه
خالد / طب مستني ايه ما تقوم يا ابنى تاخد عروستك و تتكلموا كدا و تتعرفوا على بعض ... مع ان التليفونات ما خلتش بكره ما نعرفش نلاقيهم من كتر الرغى مع بعض
الاهل يضحكوا و احمد يبص للعروسه و يقوموا يدخلوا البلكونه احمد يطلع موبايله و يلعب فيه و العروسه تعمل زيه و كل شويه تبصله و فجاه توريله الاكونت بتاعه
العروسه ( تقى)/ دا اكونتك صح
احمد يبص و يهز راسه
احمد / ايوه انا
تقى / تمام ... بص انا عارفه انك جاى غصب عنك عشان مامتك لسه عامله عمليه فى قلبها و مش عاوز تزعلها و عارفه انك ما بتفكرش فى الجواز خالص و انك مجهز شقتك عشان تعيش فيها لوحدك بمزاجك و ان مامتك لما عملت كدا زعلت لانك وحيدها طبعا و دا السبب فى عياها صح
احمد / ايوه بس
تقى / و الله العظيم انا كمان زيك بالظبط بس انا بقي مش محتاجين عمليه و لا عيا عشان يضغطوا عليا انا اخرهم يتخانقوا معايا و يضيقوا عليا فى الطلوع و النزول و انا لسه صغيره و اكيد مش هتحبس فى البيت يعني و اكيد برده مش هتبقي حلوه لما اتجوز اى حد لمجرد انى اخرج من الحبسه دى
احمد / اى حد !!
تقى / و الله ما اقصد انا عارفه انك عريس كويس و ابن حلال بس انت الراجل و سهل تقول ما عجبتنيش مفيش قبول يا عم قول طلعت تافهه و دماغها فاضيه خبط براحتك المهم تخلع .. بس بعيد عن اخلاقى اقسم بالله اشقك
احمد / اشقك !!
تقى / اه قولهم طلعت بيئه انا اهلى عارفين و اصلا ماما علاطول بتتخانق معايا على المهراجانات اللى بسمعها و سندوتشات الكبده و الحواوشي الكلابى اللى باكلهم من بره فعادى هم متفهمين شعباويتي كل اللى عليك انك تخلع بشياكه و اهو ناخد هدنه انا و انت لحد ما ربنا يكرم بقي بعريس تانى و اكيد انت واخد بالك من ازمه العنوسة اللى فى البلد فالموضوع هيطول عادى
احمد / عاجبنى ذكائك انا شايف ان دى فكره مش وحشه
تقى/ يعني اتفقنا ... هتخلع ... اعتمد عليك
احمد / و انتى هتقولى موافقه و لا ايه لا بصي خلينا نمسك العصايه من النص يعني برده قولى مفيش قبول
تقى / دا لو حد عبرنى و سالنى اساسا انا اخواتى بداتوا ينقوا فساتين السواريه اللى هيلبسوها من دلوقت
احمد بضحك و ما يقدرش يكتمها
تقى / و الله حقك ما على راى المثل هم يضحك و هم يبكى قال عاوزين يفرحوا بيا قال
احمد / الجواز ستره برده
تقى / بجد !! انت شايف كدا ... طب ما تستر نفسك و تتجوز و لا اااااه انت منهم بقي اللى شايف ان البنت ممكن
احمد / لا لا لا انا ما اقصدش اى حاجه خالص و انا لا ضد المراه و لا البنت و لا اى حاجه انا بس عاوز اكون نفسي مش اكتر مش عاوز اتفرم فى البامبرز و مصاريف المدارس و سباق العبوديه عشان بس اوفر مصاريف ممكن تتاجل شويه لما اكون مرتاح و وضعى احسن ماديا
تقى / طب ما انت ساعتها هتكون مفرهد صحيا و مكحكح سنيا
احمد يضحك و يبص الناحيه التانيه
تقى / انا بشتغل على فكره و بجيب مصروفى و مش محتاجه راجل يصرف عليا
احمد / و هو ده دور الراجل الوحيد بالنسبالك
تقى / لا اكيد لا بس بصراحه انا كل صحباتى اللى طلوا بالابيض لبسوا سواد و انا مش مستعده فى حاجات عاوزه اعيشها قبل ما اتجوز
احمد / زى ايه مثلا
تقى / ما اعرفش انا اصلا عمرى ما هقدر اعيش حاجه فى البيت ده كل حاجه لما تتجوزى لما تتجوزى ... دا انا رحله يا مؤمن ما طلعتش لما تتجوزى ابقي اطلعى لما تتجوزى ابقي انزلى ... المشكله ان كل اللى اتجوزوا لا طلعوا و لا نزلوا فا انا عارفه انه خازوق مش اكتر نفس خازوق اتعب دلوقت ترتاح بعدين ... طب انت باشمهندس قد الدنيا و اتفحت خمس سنين عنب ارتحت
احمد / يمين بالله ما شوفتها
تقى / شوفت ... خازوق
احمد / و الله كلامك مقنع
تقى / يعني هترفض صح يا عم قولهم اى حاجه قولهم تخينه شويه من تحت قولهم قصيره اى حاجه اى حاجه مش هتغلب يعني
احمد / ما المشكله ان امى مقتنعه بيكي جدا دى بتقول فيكي شعر
تقى / يا ابنى اقسم بالله شوف ابويا و ابوك صحاب على القهوه بقالهم كام سنه انا ما قابلت مامتك غير مره واحده فى خطوبه اسراء بنت عمو ممدوح يعني انا الغلطانه انى سلمت عليها بزوق و ضحكتلها يعني انا اصلا ما كنتش عاوزه احضر الفرح بس كنت زهقانه من حبسه البيت و ما صدقت فرصه اشم هوا
احمد / طب انا هحاول معاهم
تقى / كلام رجاله
احمد / يعني هتجوزك غصب
تقى / و الله العظيم انا استجدعتك من اول ما شوفتك و كنت متاكده ان راى بابا فى الناس عمره ما بيجلى على فكره بيشكروا فيك اوى
احمد / نفس الكلام عنك عندنا فى البيت
تقى/ النصيب بقي ... مفيش نصيب
احمد / دا بالعكس دا نصيب حلو جدا لان تخيلى لو كنت لبست فى واحده تانيه شبطت اول ما شافتنى
تقى / اقسم بالله طول الليل بصلى امبارح ان ربنا يوحشنى فى عنيك و تشوفنى قرده
احمد يضحك
تقى / انت بتصلى صح
احمد / اكيد طبعا
تقى / ربنا يا رب يرزقك ببنت الحلال اللى تسعدك
احمد / حيلك حيلك احنا لسه بنقول مش عاوز دلوقت
تقى / صح صح اللهى يا رب ما تلاقى بنت ترضي بيك و لا تقبل تبص فى خلقتك قادر يا كريم
احمد / امين
الاتنين يضحكوا و يبصوا لبعض
.........................
فى شقه احمد
احمد / يعني ايه قولتى انى موافق يا امى امال استخاره ايه اللى قولنا هصليها
ايمان / انا صليتها و شوفتها بدر منور نازل فى حجرى
احمد/ حجرك انتى مش حجرى انا
ايمان / يا احمد يا حبيبي البت زى القمر و مش تافهه خالص زى ما قولت عنها بالعكس انا دخلت صفحتها على الفايس و شوفت الكلام اللى بتكتبه دى بنت جميله جدا و مثقفه
احمد / و بتاكل حواوشى كلابى و تسمع مهراجانات
ايمان / و انت بتشرب شاى بالطفشه يا احمد ما تتعبنيش بقي و بعدين الحاجات دى ما بتبانش من اول مره كلمها مره و اتنين و تلاته و بعدين ابقي احكم
احمد/ و دا يصح يعنى لو اختى ترضيلها عريسها يفضل داخل طالع كدا يا تعجبه يا ما تعجبوش يعني
ايمان / طب ما ده الطبيعي امال عملوا الخطوبه ليه ما ممكن تبقي عجباك و لما تتعرف عليها اكتر و تقرب منها تكرهها و تفسخ كلو وارد
احمد / طب و ليه من الاساس بقي
ايمان / عشان انا حباها و مرتاحالها انا عمرى يا ابنى نقيتلك حاجه وحشه
احمد / تمام يا امى تمام بس دى اخر فرصه اتفقنا
ايمان / اخر فرصه قابلها مره كمان بره لوحدكم و اللى هتقول عليه ماشي
احمد / وعد
ايمان / و انا عمرى خلفت وعدى
احمد/ تمام اخر مره
...................
فى كازينو على النيل
تقى ترزع الشنطه و هى بتقعد احمد يتفاجئ
تقى / هى دى الرجوله يا هندسه هو ده اللى اتفقنا عليه بتنيمنى و تحرجنى يعني
احمد / اهدى بس .. اقسم بالله نفذت اتفاقنا بالحرف دا انا شركتك على الاخر دا انا حتى قولتلهم انك بتاكلى حواوشي كلابى اعمل ايه اكتر من كدا
تقى / ما دا برده مش سبب منطقى ترفض عليه عروسه ما كنت تلاقى سبب اقوى
احمد / قولت انك تافهه و شعبيه قالولى انت ما تعرفهاش و هى مش بيئه هى على طبيعتها مش زى بنات اليومين دول قولت مفيش قبول قالولى صلينا استخاره و طلعت بدر منور ... بتنزلى فى حجر امى ليه انتى
تقى / و انا مالى انا بحجر امك
احمد يتفاجى و يبرق
تقى/ سورى انا برد على كلامك اللى انت بتقوله ده انا اكيد ما اقصدش اى حاجه بس هو اللفظ كدا .. حجر مامتك تمام ؟
احمد يضحك
تقى / ما تضحكش انا نازله بالعافيه دا حتى لبسي ده هم اللى مختارينه دا انا حاطينلى مكياج .. دا انا لو فكرت احط زبده كاكاو القيامه كانت بتقوم و بسمع كل ما لذ و طاب دلوقت بحط روج و كحل عادى ... تطلع مين يعني عشان اعمل عشانك كدا انا
احمد / و انا المفروض ارد على الكلام ده يعني
تقى / ما تفرقش .. و مين يعني كان اهتم بكلامى و لا براي حتى
تقى تتقمص و تبص الناحيه التانيه و تطلع منديل و تمسح الروج
احمد / تشربى حاجه
تقى / مش عاوزه .. شويه كدا و نروح
احمد / عصير طيب ... طب اجيبلك اكل
تقى تبصله
احمد / طب المكان مش عاجبك نروح نشوف مكان تانى؟
تقى / لا المكان حلو جدا ... انا اصلا اول مره اقعد فى مكان زى ده
احمد / امال لما كنتى بتخرجي كنتى بتروحى فين
تقى / مول كافيه مطعم اى حاجه من الحاجات دى مش كازينو على النيل يعني دا ان خرجت طبعا بعد زن و معاناه و قمص و تدخلات خارجيه و قرف
احمد / و الله انا شخصيا اول مره اجى هنا انا كمان اصلى هاجى هنا اعمل ايه دا ان لقيت وقت بعد الشغل لاى حاجه اساسا... او فلوس حتى ... دا زوق بابا على فكره حتى هو اللى هيحاسب عشان كدا تلاقينى بعزم بقلب جامد
تقى / لا يا راجل
احمد / ها تطلبى ايه بقي
تقى / مش عاوزه بجد
احمد/ طب ما تقفليهاش بقي و تخلى الساعه دى خنيقه باذن الله هنلاقيلها مخرج هروح اقولهم قعدت معاها و لسه مفيش قبول
تقى / اوعى تكون بتنيمنى ننه اقسم بالله اوريك نكد من اللى قلبك يحبه
احمد / يمين بالله ما اقدر انا اساسا مضغوط خلقه مفييش نفس
تقى / اسمع فعلا ان شغل الهندسه صعب
احمد / هو مش صعب هو كتير يعني ... بيحتاج تركيز لان نسبه الغلط فيه بتعمل كوارث فبنشتغل على اكبر معاملات الامان دا غير بقي قرف المديرين و بين المكتب و الموقع حاجه اخر فرهده
تقى / ربنا يعينك و يقويك
احمد / ها تشربى و لا تاكلى ايه بقي ... انا ممكن اخد قهوه بس لو هتاكلى هاكل معاكى
تقى / لا هاخد قهوه انا كمان مظبوط بن وسط محوج
احمد / انا كمان بحبها كدا
تقى تبتسم احمد يشاور للمتر
..................
فى بيت تقى
محمد / يعني ايه ما اكلمهاش دول بقالهم فوق الاربع ساعات
عبير / طب ما دى بشره خير يا ابو العروسه
محمد/ يا وليه اطمنى عليها حتى
عبير / لسه قافله مع ايمان و قالتلى ان مفيش اخبار عن احمد هو كمان و البت كلمتنى اول ما دخلت الكافيه و شافته يعني هم سوا و احمد ابن ناس و اكيد هيوصلها
محمد/ بقي ده اسمه كلام يا ناس
عبير / سيبهم ياخدوا و يدوا مع بعض زمانهم بيتفقوا فى التفاصيل دلوقت
محمد / برده كفايا كدا ما يصحش ... امال لما يتخطبوا و لا تتقرى فتحتهم هيقعدوا قد ايه .. انا ما كانش المفروض اسمع كلامك و اسيبها تروح لوحدها
عبير / بقولك ايه انت هتقعد تقولى شورتك و ما شورتكيش ... كلمها انت يا خويا
محمد / هكلمها ايه هخاف يعني و لا ايه .. هو فين التليفون ... هكلمها طبعا
......................
فى الكازينو
احمد و تقى قاعدين بيتكلموا و الوايتر بيشيل اطباق فاضيه و يحط عصير
تقى / و تخيل بقي بعد كدا بيقولها ايه
احمد / ايه
تقى / بيقولها ما دام بتاخدى من وقت بيتي يبقي تشاركى فى المصاريف يا اما مفيش شغل
احمد / الله مش هو اللى كان موافق من الاول ايه اللى غير الكلام
تقى / عشان تصدقنى
احمد يشرب من العصير
احمد / و سابت الشغل
تقى / بعد ما كانت اتثبتت و قعد ست شهور كاملين ينشف ريقها على جنيه مصروف حتى لما طهقت و رجعت اتحايلت على صاحب الشغل يرجعها تانى بس مكانها كان اتاخد و بدات من الصفر يا قلبي
احمد / و بعدين عملت ايه
تقى / هتعمل ايه ما هى مربوطه بعيل و اهلها على كلمه واحده اصبرى اصبرى اصبرى اصبرى
احمد / طب ما يمكن امكانياته كدا
تقى / ما هى كانت فاكره كدا لحد ما عرفت انه بيحوش مع امه و يعمل جمعيات و يكنز على قلبه و هى منشفها عليها رجاله ناقصه بعيد عنك
احمد / صنف واطى انا عارف الاشكال دى كويس
تقى / تعرف اهى دى حكايتها اهون من حكايه اميره صاحبتى
احمد / هم كلهم نيله خالص كدا
تقى / طب انا مش هحكى انت بقي صحابك عاملين ايه
احمد / و الله اخر مره سالت و يا ريتني ما سالت سمعت كلام زى الزفت
تقى / طب هو اهالينا ما بيسمعوش الكلام ده
احمد / ما عاشوهاش حتى
تقى / اعتقد وقتها الرجاله كانوا رجاله و البنات كانوا بنات و اكيد برضه عاشوا حاجات منها بس هم كانوا عاوزين يعيشوا
احمد / و احنا ليه بطلنا نعيش
تقى / اعتقد ما عادش فى دافع لجلد الذات لقوا ان اخرتها زى اولها اشتروا روحهم
احمد / يعني تفتكرى وسط كل الناس دى مفيش اتنين حتى اتجوزوا و ما ندموش
تقى / اكيد فى
احمد / يعني العيب فينا و لا فى الجواز
تقى / فينا
احمد يهز راسه و يبتسم
تقى / انا مش قادره اشرب العصير ده انا اتلكمت اوى
احمد / و الله و لا انا خلاص بناقص بقي
تقى / انا هقسم معاك الفاتوره احنا طلبنا حاجات كتير اوى
احمد / كفى نفسك يا ماما انا ممكن ابان جنتل مان بس شوفيني فى الموقع عربجى
تقى تضحك
تقى / براحتك ادفع يا سلام الحق عليا اصلا قال يعنى دافع من جيبك
احمد يضحك / انتى عارفه احنا بقالنا قد ايه قاعدين بنتكلم
تقى / الاكل كان حلو
احمد يبتسم
تقى / زمانهم قلقانين عليا
احمد / تمام تعالى اوصلك
احمد يقوم يروح ناحيه الكاشير يحاسب و تقى وراه احمد يروح يفتحلها العربيه
تقى / هتقولهم ايه
احمد / هم مين .. عادى هقولهم كنا بنتكلم و بعدين انا اكيد هوصلك لحد فوق يعنى
تقى / انا قصدى على مامتك ... هتقولها ايه
احمد / بصراحه مش عارف اصل مش منطقى اقولها ان دمك تقيل و قفيله و مع كدا قاعد معاكى كل الوقت ده
تقى / انا كمان بفكر فى كدا
احمد / اركبى
تقى تركب احمد يقفل الباب و يروح يركب
....................
فى شقه تقى
محمد / كلفت نفسك اوى يا احمد مش كفايا المصاريف اللى دفعتها فى الخروجه
احمد / لا ابدا دى حاجه بسيطه و حقيقي اسف جدا على التاخير بس الكازينو كان بطئ جدا و انا كنت جعان و طالب اكل فاخرتها انا بعتزر مره تانيه كان المفروض اتصل اطمنكوا
محمد / لا يا حبيبي و لا يهمك ... ها طمنى ايه الاخبار اتفقتوا ... انا مش مستنى منك رد انا عاوزك تاخد وقتك فى التفكير الجواز خطوه مهمه و ما ينفعش ابدا نستعجل فيها
احمد / اكيد
محمد / على العموم انا زى ما قولت مش مستنى منك رد ... خد وقتك و انا كمان هاخد وقتى و اتكلم مع تقى و اخد رايها و باذن الله اللى فيه الخير يقدمه ربنا
احمد يبتسم بحرج
....................
فى اوضه تقى
عبير / امال بتتكلموا فى ايه فى كل ده
تقى / اهو عمال يطلب فى اكل و عصير و ياكل
عبير / لوحده !!
تقى / لا طبعا جابلى
عبير / و انتى طبعا ما صدقتى و فضحتينا بكرشك ده كالعاده
تقى / انتوا متأكدين انى بنتكم و انكوا ما لقيتونيش قدام المعبد اليهودى
عبير / خفه دمك ... يا بت ركزى معايا كل الوقت ده بتاكلوا بس مفيش كلام خالص
تقى / لا فى اتكلمنا عن قد ايه الجواز وحش و كل اللى اتجوزوا قبلينا مش سعدا
عبير / بالله عليكي انتى مش عاوزه تنقطيني و تخلصى منى بدرى بدرى لو انتى يا بنتى مش محتاجانى اخواتك محتاجيني انتى رايحه توفقى الدنيا على بعضها و لا رايحه تطفشيه
تقى / اوفقها ازاى يعني و بعدين انا اصلا رايحه غصب عنى
عبير / يا بنتى احمد ده عريس لقطه مش هتلاقي زيه كفاياكى بتر
تقى / و انا كمان ما اتعوضش و الف من يتمنانى على فكره
عبير / يا اختى اتوكسي احنا مش عاوزين الف احنا عاوزين واحد بس يتقى ربنا فيكي
تقى / و انتوا واثقين فيه اوى كدا ليه ما اى حد بيدخل اى بيت بيطلع احسن ما عنده و بعد كدا النور بيقطع
عبير / تقى ... انتى مش عوزاه اقول لا
تقى / ما انا قولت لا من الاول ايه اللى حصل
عبير / اللى حصل انك ما كنتيش قابلتيه دلوقت قابلتيه و اتكلمتى مرعاه و اتعرفتى عليه قوليلى لو مش عوزاه خلاص مش هضغط عليكى
تقى / مش عاوزه اتجوز دلوقت انا
عبير / تمام يا تقى انا هقول لابوكى يعتزرلهم
عبير تطلع بره و تقى تقعد تقلب فى الموبايل
...........................
فى شقه احمد
خالد / يعني انت ما قولتلهاش اى حاجه تضايقها خالص
احمد / اقسم بالله ابدا و بعدين الحاجات دى قسمه و نصيب يعني هنعمل ايه
خالد/ انا مش فاهم اى حاجه خالص منين تقعدوا كل الوقت ده و تروح تكمل فى بيتها و ترجع مبسوط و فجاه نلاقيهم بيتصلوا يقولوا البنت مش مرتاحه دا انا قولت اتفقتوا و خلصتوا و بدات اجهز فى لسته المعازيم من دلوقت
ايمان تدخل / يا سيدي هو يعني اللى خلقها ما خلقش غيرها دا حتى البنات اكتر من الهم على القلب و انا كدا كدا ما كنتش حاطه امل كبير اوى عليها
احمد / قولى و الله
ايمان / اصل انا عرفاك مرزق من يومك و ربنا مش هيكرمك غير باحسن حاجه عشان كدا الحكايه ما مشيتش مع اننا عملنا كل اللى علينا يبقي الخيره فيما اختاره الله و نشوف سالى بنت طنط ايه و دى بقي ايه دنيا تانيه خالص مصممه ازياء و فاشونستا و بلوجر و ليها متابعين بالهبل
احمد / حيلك يا امى هو سلق بيض
ايمان / استنى اما افتحلك صفحتها و اخليك تعملها فولو
احمد / ايوه بس موضوع تقى ما خلصش انا بس محتاج اتكلم معاها و اعرف المشكله فين
ايمان / ليه يا ابنى و انت باير
احمد / يا ستى انا مرتاحلها خليني اديها فرصه اخيره
خالد / خلاص بقي يا ام احمد الواد بيقول مرتاحلها و انا بصراحه كمان مرتاحلها اوى
ايمان / هو الجواز بالعافيه ما البت رفضت يا راجل
احمد / يا امى هتكلم معاها مره أخيره يمكن حصل سوء تفاهم اصلحه
ايمان / انت حر بس انا شخصيا اتقفلت من الحكايه دى و مرتاحه اكتر لسالى بصراحه
احمد / سبيها بس على الله سبيها انتى و باذن الله ربنا هيحلها من عنده
ايمان / براحتك هروح اجهز لغدى بكره عن اذنكوا
ايمان تمشي
احمد / اللحقنى يا بابا بلوجر ايه دى كمان انا ناقص
خالد / بقولك ايه انا ما ليش دعوه زى ما عرفت تطفش تقى هتعرف تطفش دى
احمد / انا يا بابا
خالد / ايوه انت و ما تستهبلش عليا انا عارف كل حاجه
احمد / يا بابا
خالد / احمد ... تقى بنت ممتازه و عمرك ما هتلاقى زيها .. فكر كويس و عيد حساباتك .. اليوم اللى بيعدى من عمرك ما بيرجعش
احمد يبص الناحيه التانيه
...................
فى اوضه تقى
تقى بتتكلم فى التليفون
تقى / رحله لاقصر و اسوان ايه بس يا بنتى دا انا بحمد ربنا ان شغلى بيتعمل من البيت ما كنتش لقيت اى حاجه تسلينى و توحدت مع الموبايل و التى فى
امانى / هو مش كنتى لسه خارجه من يومين
امانى تضحك
تقى / هو انتى كمان هتحسبي دى عليا خروجه
امانى / بت ما تصيعيش عليا انتى انبسطتى
تقى / يا بنتى احنا الكلام اخدنا مش اكتر
امانى / بس ارتاحتى و الا ما كنتيش قعدتى الوقت دا كله معاه
تقى / مرحله و عدت خلاص
امانى / طب ما تحاولى تكلميه انتى مش عارفه البروفايل بتاعه ابعتيله رساله
تقى / بت انزلى من على ودانى انا مش فيقالك
امانى / براحتك
تقى توصلها رساله تشوفها
تقى / استنى دا باعتلى رساله على الماسنجر ايه ده
امانى / مين احمد
تقى / عاوز يتكلم معايا ... هو فى ايه
امانى / طب اقفلى بسرعه و شوفيه عاوز ايه و ارجعى كلميني على طول انتى فاهمه عاوزه اعرف التفاصيل
تقى / تفاصيل ايه يا بنتى مش الموضوع انتهى بيكلمنى ليه تانى اصلا
امانى / يا شيخه بس ما تقوليش الكلام الوحش دا انتوا بقي فى بينكوا عيش و ملح كلميه كلميه و شوفى هيقول ايه يمكن ندمان و عاوز فرصه تانيه
تقى / دا انتى الفراغ واكل دماغك
امانى / يا بنتى يا خبر بفلوس اقفلى مع امى و ردى عليه يبقي ببلاش انجزى بقي ... بت انا مش هنام كلميه و ردى عليا هسهر
تقى / هى فيها سهر انا هرد عليه دقيقه اشوفه عاوز ايه و اكلمك
امانى / اه نفس الدقيقه هروح اقابله ساعه واحده و ارجع و ركبت الناقه و شرخ
تقى / تصدقى ان انا غلطانه انى بقولك اى حاجه اصلا اقفلى اقفلى
امانى / ما انا هقفل طبعا و هستناكى تكلميني
تقى / مش هكلمك سلام
تقى تقفل و ترد على الرساله
تقى / خير
تليفونها يرن تستغرب و ترد
تقى / انت سجلت رقمى !!
احمد / ما انتى لسه مسجله رقمى
تقى / عادى يعني نسيت امسحه و اتلخمت و نسيت بتحصل
احمد / ما علينا انتى عامله ايه الاول
تقى / الحمد لله تمام خير حضرتك عاوز تتكلم معايا فى ايه خير
احمد / هو انتى قولتيلهم انك رفضتينى ليه
تقى / نعم !! ازاى يعني مش دا كان اتفاقنا اللى اعتمدت عليك و حضرتك ما نفذتوش
احمد / مش ذنبى انى ما لقيتش فيكى غلطه مقنعه اقولها لاهلى و بعدين انتى فهمتى ايه انا اقصد اتحججتى بايه اقصد ازاى قدرتى تقنعيهم يبطلوا زن
تقى / ما اقنعتش حد انا قولت مش مرتاحه و الموضوع اتقفل و يبقي الوضع على ما هو عليه لحين ظهور عريس جديد
احمد / يعني كدا مفيش عريس تانى
تقى / ايه الهبل ده و انت مالك فى و لا ما فيش اصلا
احمد / بصي انا عارف ان اكيد هتفهم غلط و هلبخ و انى اخيب واحد فى المواضيع دى بس انا بقالى كام يوم بفكر و كنت عاوز يعني اسالك فى حاجه
تقى / خير قلقتنى
احمد / هو احنا ما ينفعش يبقي فى بينا فرصه
تقى / انت بتتكلم جد و لا بتهزر ... داهيه لتكون فاكر ان الحمد لله فلت من الجواز منى تشقطنى بقي و الهبل دا دا انا اطلع عينك و عين ام
احمد / حيلك حيلك اهدى اقسم بالله ما كدا ابدا و بعدين انا انسان محترم و متربى شقط ايه و قرف ايه يعني بعد ما دخلت البيت من بابه اروح انط من الشباك انا ما ليش فى السكك دى اصلا و اكيد عارف انك ما لكيش فمش هقل من نفسي اوى كدا انتى ايه الدماغ دى
تقى / ما انا مش مصدقاك بصراحه فرصه ايه اللى بتسال عنها
احمد / بصراحه امى جابتلى عروسه زى الزفت هى مش وحشه بس مش طموحى خالص بصراحه انتى جنبها نعمه
تقى / هو انا ليه حاسه انى بتشتم داهيه لتكون فاكر ان ده مدح
احمد / ابدا و الله انا ... انا اقصد انى مرتاحلك اكتر ما قدرتش اتكلم معاها و لا اقبلها زى ما اتكلمت معاكى
تقى / هو ايه ده انت بتتكلم جد
احمد / هكدب يعنى اه حصل انا ارتحتلك و ما تنكريش انك انتى كمان ارتحتيلى و بعدين انا مش عاوز اضغط عليكي احنا الاتنين مش مستعدين للجواز نفسيا و احنا الاتنين محطوطين تحت ضغط
تقى / ايوه ايه المطلوب بقي
احمد / فرصه
تقى / ما احنا اخدناها و اتقابلنا مرتين مره هنا و مره بره
احمد/ و فى المرتين كنا مرتاحين فى الكلام مع بعض بس كنا مقررين انه لا من الاول و فعلا ركنا كل اللى حسينا بيه و روحنا قولنا اللا
تقى / فانت عاوز فرصه تانيه نقول فيها اه مش كدا
احمد / هم عملوا الخطوبه ليه يعنى
تقى / هو انت عشان تهرب من العروسه الوحشه التانيه فقولت اخف الضررين اخد تقى مش كدا
احمد / على فكره التانيه قمر
تقى / و ما دام الهانم قمر جيتلى ليه بقي ان شاء الله
احمد / ما قولت مش قادر الاقى معاها نفس الكيميا اللى لقيتها معاكى
تقى / بص انت بجد مختار وقت غلط خالص تكلمنى فيه فى الموضوع ده و حرفيا انا مش مستوعبه حرف من اللى بتقوله
احمد / ليه خير فى حاجه حصلت و لا ايه
تقى / و انا المفروض احكيلك يعني يا باشمهندس بص ... انا هقفل مع السلامه
احمد / طب اجى و لا لا
تقى / مع السلامه
تقى تقفل و هى مش مستوعبه حاجه تتنهد تليفونها يرن امانى تضحك
تقى / انتى ايه كنتى داخله معانا على الخط
امانى / ربنا يخليلنا التروكولر طول ما انتى بيزي كنت بفرك اول ما ادانى الاشاره رهوان
تقى تضحك/ دا انتى مجرمه
امانى / طمنيني كان عاوزك ليه
تقى / قال ايه اللى رماك على المر قال اللى امر منه مامته جابتله عروسه مش عجباه قال اللى نعرفه احسن من اللى ما نعرفوش
امانى تضحك اوى
تقى / و الله ليكي حق
امانى / بحسه برئ اوى و طيب و ما بيعرفش يلف و يدور دا واحد تانى كان دخل عليكي بالحنجل و المنجل و ما عرفتيش تفلفصي منه
تقى / بس دى اخرتى يعني عروسه على ما تفرج
امانى / بصي مش هنكر انه جلنف و ما كانش المفروض يقولك الحقيقه او على الاقل كان حاول يجملها بس مش هنضحك على بعض انتى كمان مرتاحاله
تقى/ بت غيرى السيره دى و شوفيلنا طريقه لولبيه مهلبيه نقنع بيها اهلى يطلعونى معاكوا رحله لاقصر و اسوان دى بدل ما اولعلكوا فى عم جاد بتاع الحواوشي و احق قلبكوا على كيس ميه السلطه بتاعه
امانى / انتى اللى بتحبيها يا متخلفه احنا كل مره نسيبهولك يا مفجوعه
تقى / يووووه بقي يعني هنعمل ايه دلوقت
امانى / هنمخمخلها طبعا
.....................
على القهوه
خالد / و فيها ايه ما يترفض مره و اتنين و عشره كمان
محمد / انا مش عاوز ابقي بضغط عليها خصوصا الفتره دى
خالد / خير مالها ... احمد لما حاول يفاتحها فى الموضوع فهم ان فى حاجه مضيقاها بس طبعا ما نعرفش ايه هى
محمد / اهو يا سيدي حوارات البنات ما بتخلصش ... صحباتها طالعين رحله لاقصر و اسوان تبع الشغل و نازلين زن على ودانها و امها مش راضيه تطلعها
خالد / و طبعا الرد الازلى لما تتجوزى ابقي اطلعى
محمد / عليك نور
خالد / لا كدا ليك حق طبعا ... بس انا مش شايف مشكله انها تطلع الرحله تغير جو و تنبسط شويه
محمد / لوحدها ازاى بس
خالد / ما هى مع صحابها
محمد / يا خالد البنات بتبوظ بعض
خالد / انت ليك ببنتك و ما دام انت مربيها و واثق فيها ما تخافش اديها الثقه دى مره
محمد / ما تلعبش فى دماغى انت كمان مش هتبقي انت و صحباتها عليا
خالد / طب انا عندى فكره هتحللك الموضوع ده و تريح كل الاطراف اسمعها يمكن تعجبك بس محتاجك تثق فيا شويه
محمد / ما طبعا بثق فيك قول خير
يتبع...
لقراءة الفصل الثاني اضغط على : ( رواية يويو الفصل الثاني )
لقراءة باقي الفصول اضغط على : ( رواية يويو )