رواية ملائكة بألف وجه الحلقة الثامنة 8 بقلم أروى طاهر المسلاتي
رواية ملائكة بألف وجه الجزء الثامن 8 بقلم أروى طاهر المسلاتي
رواية ملائكة بألف وجه البارت الثامن 8 بقلم أروى طاهر المسلاتي
 |
| رواية ملائكة بألف وجه الفصل الثامن 8 بقلم أروى طاهر المسلاتي |
رواية ملائكة بألف وجه الفصل الثامن 8 بقلم أروى طاهر المسلاتي
اول شي نصلو على سيدنا محمد ونحمدو ربي ونستغفروه ناخدو شوية حسنات قبل ما نبدو ❤️
نذير:تسحابي انتي بس يلي تحبي ؟؟؟
تسحابي انتي بس يلي معشمه شخص وتتمني تكون معاااااااه
تسحابي انتي بس يلي حياتك ادمرت ؟!
ندى:تبدلت ملامح الخوف بملامح صدمه..... كيف؟ كك كيف انت شن تحكي مفهمتش !
نذير:عطاها بي الضهر دقايق وسكر عيونه وهوا يحاول يسيطر على نفسه وميمدش يده عليها ولا يجرحها بي الكلام رغم الخيانه الكبيره يلي دايرتها من اول يوم جواز ليها
ندى:رغم خوفها لكن سألت بفضول.....انت قصدك يعني عندك ب.........
نذير:تلفتلها وقاطع كلامها .....جنيتي على نفسك ياندى
كنت بنعاملك بما يرضي الله لكن بعد يلي سمعته امس صدقيني رح تشوفي شي عمرك ماشفتيه في حياتك
ندى:هرب الكلام من فمها واكتفت انها تسكت بس وتتلقى ردة الفعل يلي بتجيها
نذير:ارجعي غرفتك
ندى:عقدت حواجبها بي استغراب ....وين؟
نذير:ارجعي غرفتك ولو طلعتي منها ما تلومي الا نفسك !
ندى:انا كنت نبي ........
نذير:عيط عليها .......تحرررركي
ندى:تحركت من مكانها بفزع....وخشت بسرررعه لغرفة النوم
قعمزت على السرير وهيا مصدومه من يلي صار وقبل ما تلحق تفكر خش عليها ندير وتعابير وجها تخوف
خش بدون مايحكي معاها مسك التالفون الارضي وطلعه معاه وسكر الباب
وبعد ثواني سمعت ان صوت المفتاح اطرق عليها مرتين
وقفت واعصابها منهاااارة استمرت ماشيه جايه في نفسا المكان ومش عارفه شنو ادير تخاف على نفسها ولا على امين
تهرب ولا تصبر علي العيشه يلي بتشوفها لان الباين ان نذير مش ناوي ابدا على خير
اما نذير سكر عليها الباب ووقف في الصاله كان ماسك التالفون الارضي بيده
ويده التانيه موبايله دور بين الاسماء لعند وصل لي اسم نجم الدين وكان رح يتصل
وقف دقايق يراجع في نفسه هل يخلي الموضوع عند خوتها وبوها ؟
ولا يقعد بينه وبينها ؟
كيف رح يتصرف معاها مهما كان هيا بنت ونذير مكانش متعود ابدا يتصرف مع البنات في مواقف زي هكي .....دقايق فصلت بينه وبين قرار مصيري
بس في النهايه سكر تالفونه وحط في جيبه ورمي التالفون الارضي في الزباله (اكرمكم الله)
_______________________________
نجم الدين:قعمز وهوا قارن حواجبه وملامح عدم الرضا كانت باينه عليه
يشوف للمكتب الانيق يلي اغلب الوان ديكوره كانت بي اللون البني والابيض وتصميم الغرفه كأنه كان مخصص لراحة العيون❤️
قاطع صوت انوثي ناعم كل هادا التأمل ......السلام عليكم
نجم الدين:رجع قرن حواجبه من جديد وبدون ما يقيم عيونه .....وعليكم السلام
معاك الدكتوره مودة رح نكون في اول الجلسات بي اذن الله وبعدين لو حسيت روحك مرتحتش معاي تقدر تغير لي اي حد من زملائي
نجم الدين :قام عيونه فيها وشاف قدامه بنت الباين ان سنها مش كبير هلبا
كانت لابسه بدله رسميه خفيفه بي اللون الاخضر وكعب ابيض ومكانتش متحجبه
سانده شعرها البني على كتفها جيهة اليمين
مودة:ابتسمت ......ها وين سرحت ؟!
نجم الدين:مفيش دكتور ولا كيف ؟!
مودة:ضحكت ....للاسف حاليا مواعيدهم فل ونعانو نقص شوي ها الفتره معليش تحملني 😅
نجم الدين :تمام تمام
موده:مسكت مذكرتها وقلم .......عرفني بنفسك ؟
نجم الدين:كان رياكشن وجها هكي 🤨......علاش؟
موده:سيطرت على ضحكتها......شوف اول حاجه لازم تعرفني بنفسك وتتعامل بسلاسه اكتر باش نقدر نساعدك استاذ
نجم الدين :اول ما سمع كلمة مساعده خطررت عليك شيخه❤️
ضحكتها وكلامها وولدهم❤️
خدي نفس وبدي يعرف بي نفسه وبدت المحادثه بينهم تتقدم
نجمة:مكانش باين منها شي الا عينها خلف الباب تراقب بيها
مسمعتش كل الكلام ومشافتش الولد لانه كان عاطي بي الضهر ولابس لبس غريب كأنه متقصد يخفي نفسه
الشاب كان يحاول يخش لي الشقه بس رباب دفاته بقوة
رباب:اطللللع رد بالك مزال توريني وجهك اقسم بالله نخربلك حياتك وتعرف الهبال متعي لوين يمكن يوصلني
نجمه:حاولت تسمع الولد شن يقول بس كان صوته واطي ومسمعتش منه ولا كلمه
شافاته حط يده على خدها بهدوء وقالها كلام مش مسموع
فجأه رباب تغيرت ملامحها من ملامح شرسه لي استسلام وشوية دموع لمعت في عيونها💔
رباب:اختفى صوتها العالي وبدت تحكي بصوته هادي تعابير وجها كأنها كانت تحاول تقنعه يمشي ويرجع وقت تاني
بعد هدوء طويل تسكر باب ربابوتلفت الولد
وكان لابس كمامه ونضرات وبرنوص مغطي كامل راسه
نجمه:سكرت الباب بهدووووء وسندت ضهرها ع الباب مصدومه ......شنو يلي شفاته ؟!
معقول يكون خوها ؟!
لا مستحيل لو كان خوها مستحيل يلمسها بي الطريقه هادي ولا يلبس هكي كأن خايف حد يشوفه
قررت نجمه انها تخلي شوية وقت لي رباب تهدا فيه قبل ماتمشيلها
بس عقلها حرفيا موقفش على التفكير بعد يلي شفاته
_________________________________
كفاح:حطت يدها على فمها بي الصدمه ........كيفففففف؟؟؟
انور:بعلامات يأس على وجها ........هادا يلي صار
كفاح:بهستيريه غريبه ......كيييييف كيييف يطلقها شن دارت
انور:افففف منعرفش يا كفاح منعرفش شن صار بينهم الله اعلم غلطت فيه ولا علت صوتها منعرفش
كفاح:بصوت يرجف......مستتتتحيل شيخه مش هكي ابدا لا ترفع في صوتها ولا تحكي اي شي غلط مع راجلها بداااات مع راجلها
انور:خلاص عاد صرعتيني هادا يلي صار ماعندي ما نديرلهم اكيد بوي رح يخليه يرجعها مستحيل تقعد مطلقه بدات ان عندهم ولد بينهم
كفاح:اي اي طبعا لازم يرجعها شن الغباء يلي صاير هادا
كله من خوك اقسم بالله مريض وغريب كيف عاشت معاه السنين هادم وجابت معاه ولد مش عارف
انور:هييييي يابنت انتي خوي هادا مهما كان قعمزي واهدي
كفاح:قامت حواجبها .....انا تتكلم معاي هكي ؟؟
بديت زيه خلاص؟
انور:اعقلي خير ما انوضلك ؟
كفاح:توسعو عيونها .......شنننننننننو؟
نوض نوض يالله قدامي نوض روح بيا لي حوش اهلي مره وحده
انور:ضحك وكل ملامح الجديه اختفت ......كنت نبصر يابنت عاد اهدي
كفاح:ربعت يديها .....نوض ارفعني حوش اماليه تو نوريك التسهويك كيف شكله
انور:وقف حضنها .......كوكتي الكويسه زوجتي الصالحه بصرنا مريره عاد اهدي
كفاح:مش مطيبه غدي مصارليش
انور:فداااك نجيبو احلى غدي لعندك
كفاح:ابتسمت بخجل.......خلاص رضيت
انور:باعد عليها ......راك تنسي اليوم العشي لوطه لان طه ومرته مروحين
كفاح:معنديش خلوق لي السلفه الجديده
انور:بديناااا عاد
كفاح:ههههههههههههه
________________________________
ناديه:ماسكه راسها بتعب .......نوضي سكتيلي ولدك راهو راسي بيتفجر مرقدتش من امس
شيخه:فتحت الرضاعه وعطتها لي ولدها وهيا ساكته
ناديه:استفزها سكوت شيخه وتبي اي نقاش يوصلها لي مشكله باش بوها يضايق من وجودها قامت حاجبها بسم ......وانتي شنو ان شاء امتى مفكره تروحي ؟
شيخه:بهدوء وبدون ما تشوفلها .....انا اطلقت مش جايه حرجانه
ياريت تفهمي الشي هادا
ناديه:عاااارفه عاااارفه من بختي المايل الاسود معشتش مع بوك الا ها ال3 سنين ورجعتيلي
شوفي طريقه يرجعك بيها راجلك ع ذمته حني مش حمل مصاريفك انتي وولدك بوك ياذوب يلحق ياكل
شيخه:نجم الدين عمره ماقصر معاي لا انا ولا ولده في المصروف ومستحيل يقصر معاي وانا هنايا
ناديه:اممممممم به ياحنه كويس مدامه حنون وكريم هكي شنو يلي جابك هنايا هاااا؟؟
شيخه:سرحت شوي في كلام مرت بوها والباين ان نجم الدين كانت في مزايا وحجات كويسه مكانتش تشوف فيهم !
ناديه:نصيحه مني حاولي ترجعيله لان بوك مهما قالك تعالي والحوش حوشك صدقيني فوق من نفسه بوك معنداش جهد لحملك انتي وولدك وخصوصا قدام الناس مطلقه الدوه والكلام بيكثر عليك روحي لي راجلك احسنلك مهما كان وضعك معاه رح يكون احسن بألف مره من بروحك
شيخه:خدت ولدها وخشت للغرفه بدون ما ترد عليها ولا اي كلمه
ناديه:بصوت عالي ....اي اي اي هادا فاش فالحه اهربي بس من الكلام والدوه
احيانا الانسان ميكونش محتاج لي حل في مشكلته او نصيحه او حتى جواب لي سؤاله
الانسان في موقف ضعفه وكسرة قلبه يحتاج لي كلمه طيبه بس❤️
كلمه حلوه مع ابتسامه قادره انها اطيب خاطره وتخفف عنه همومه
____________________________
مودة:رفعت عيونها بعد ما كتبت شوي حاجات في مذكرتها .....مفكرتش ان ممكن تحافظ عليها بطريقه تانيه ؟
غير الغصب والضرب والتهديد انك رح تتزوج وحده غيرها !؟
نجم الدين:ساند ضهره وراسه ع الكرسي ويشوف لي السقف .......لا معنديش حل تاني
مودة:ليش حسب رايك؟رغم ان جميع الناس تعرف ان البت ديمه تجي بي الكلمه الطيبه والحنيه
مجرد شوية اهتمام يخليها تغرق في حبك ومهما صار بينكم خلافات رح تقعد جنبك وقتها
نجم الدين :منقدرش منقدرش عليه الشي هادا منبيهاش تشوفني ضعيف
مودة:ابتسمت ...متقدرش ولا متعرفش ؟
نجم الدين:خدي نفس وهوا مضايق.....الاثنين
مودة:اوكي ......خبرني على علاقتك مع امك
نجم الدين:بملامح جمود وسيطره على مشاعره ......امي توفت بعد ما جابت اختي الصغيره بي 4سنين بس
مودة:كانت حنونه معاك؟!
نجم الدين:منتفكرش اغلب الوقت قضيته مع بوي في الشكل
مودة:تمام اعتقد الجواب هادا كافي لي مشكلتك يعتبر
نجم الدين:مدخلش الشي هادا
نشوف في خوي مع مرته كويس ويعرف يكلمها بي بطريقه يعني
مودة:ماسكة ضحكتها ...يعرف يكلمها بحب
عادي احكي ها المصطلحات مش عيب طالما في الحلال
نجم الدين :خدي نفس .زاي شي زي هكي
مودة:مداير علاقات قبل زواجك؟
نجم الدين :قام راسه وشافلها وقارن حواجبه ...شن تقصدي .؟
مودة:اهدى خيرك ؟
نقصد مش عايش قصة حب ؟!
نجم الدين :لا طبعا مش صنعة تريس نكلم فلانه وعلانه وناخد وحده تانيه شن تقولي انتي
مودة:سرحت فيه دقايق بي اعجاب ❤️
شخصيته وكلامه كانو غير عن اي حد مر عليها .....
مودة:نفهم منك ان مرتك مخديتهاش علاقه وحاليا هيا اول حب ليك ؟!
نجم الدين:اي
مودة:سكتت وهيا تكتب في مذكرتها كم كلمه لقطتهم من مشكلة نجم الدين وشخصيته
وبعدها قامت راسها وشافتله ......شوف نجم الدين
بدايتاً خطوة حلوه منك هلبا انك جيت بدون اي ضغط وحاب تتعالج وتحسن من نفسك
بس الشي هادا مش رح يصير في جلسه او اثنين
لهادا نضمن انك رح تتحسن لكن كل شي رح يجي بي الصبر
تمام؟
نجم الدين :ان شاء الله
مودة:ابتسمت ......وقتنا تم ونراجي فيك للجلسه الجايه موعدنا بعد بكرا❤️
نجم الدين:شكرا.....وطلع بدون ما يشوفلها
___________________________________
ندى:وقفت بي فزع لما سمعت الباب انفتح
ندير :فتح الباب وحط كيسة والواضح ان فيها وجبة غداء وجي بيطلع بس وقفه صوت ندى
ندى:نذير ممكن دقايق نحكو فيهم ؟
نذير:شن تبي ؟
ندى:اسمعني انت فاهم ان .......
نذير :قاطعها ...تبي تحكي ؟
تمام في شنو بتحكي بزبط ؟طلاقك ولا زواجك منه بعدين ولا شنو بزبط
ندى:اءء انا
نذير:تحشمي الزح حتى حنة عرسك قاعده في يديك
ندى:بلعت ريقها وهيا تشوفله ......كانت عارفه لو بتحكي رح يقاطعها للمره الالف
نذير:قرب منها والغضب مالي عيونه ......كنتي حاطه في بالك اانتي واهلك ان انا ممسحه ؟
تتزوجيه باش الناس تنسى يلي صار ومحدش يجيب سمعة سلالتكم الملكيه بي العاطل
وبعدين تطلقي وتعيشي حياتك وتخليني وسط حوشي يلي مش كامل ووسط حياتي العاطفيه والنفسيه والعمليه يلي خربتيها
ندى:طاحت دمعتها........انا مكانش قصدي ندير هكي !
نذير:ودرتيه
درتيه يا ندى
مش انا يلي يتعلم عليا ونرضى بي المهزله يلي بتصير
مش كان كنت معاك محترم وكويس معناها تقدري اديري كل شي وتحطي راسي في الارض
ندى:شش ش شن يعني ؟
نذير:معناها وتي روحك
ندى:بلهفه......بطلقني ؟
نذير:بي استهزاء........هه من جاب سيرة الطلاق !
وتي روحك باش تكوني مرتي بجديات في كل شي
ميحتاجش نفهمك اكتر من هكي وسريب الطلاق نحيه من راسك نهائيا
اليوم ساهر برا بكرا نروح نلقاك مجهزة نفسك .....وطلع وسكر الباب بدون ما يزيد ولا حرف
ندى:بصوت يرجف....مستحيييييل لا ياربي نقدرش
ككك كيففف كيف بيكسني لا لالالا
خبطت على وجها اكتر من مرا بهستيريه وهيا تقول .......بيدخل عليا 💔
منقدرش لاااااااا
___________________________________
ريحانه:كانت لابسة قفطان شيفون بسيط لونه ابيض وعليه وردلونه فوشي داكن❤️
حاطه مكياج خفيف وقايمه شعرها
كانت مقعمزه على الكرسي وسارحه في ولدها يلي كان بين يديها
جميله:شنو شايفاتك حبيتيه !
ريحانه:تفركست.........لا طبعا تعرفيني منحبش الصغار
جميله:اطلعي عزوزتك وحماتك جت
ريحانه:مبردهم كل يوم في وجهي
جميله:زي موصيتك يا ريحانه متخربيش ع نفسك
ريحانه:افففف ماما خلاص عاد .......وطلعت من الدار وهيا ماسكه ولدها
كانت الصاله واسعه بوها ونصر مقعمزين اخر الصالون
ونبيله وبنتها هدى وامها مقعمزين في الجيها التانيه
ريحانه:بي ابتسامه....نورتو
نبيله:فرحانه بي التغير يلي صاير .......بنورك حبيبت قلبي
هديل:اكتفت ترد بي قلبت عيونها بس
ريحانه:مسكت نفسها بهدوء على العراك
سمير:احمد ربك ان المعارف هلبا والفلوس ادير طريق في البحر
كنهادا راك محبوس انت واها والولد الله اعلم شن صاير فيه
نصر:واضح علامات الضيق على وجها .....خلاص الولد وانتسب ليا معش فيه موضوع
سمير:والناس؟
كيف بتحلها معاهم ؟
اقاربك واقاربها ولا حتى هادي تبيها تنحل بي الواسطات ؟
ريحانه:قاطعتهم ....اهم شي ان التوبه يابابا
حني تبنا والحمد الله ربي جمعنا بي حلاله والولد زي ما انت شايف بينا وربي يكبره في طاعته ويغفرلنا
جميله :مصدووووووووووومه من كلام ريحانه وقدرة التلاعب يلي عندها !
سمير:مش عاجبه الوضع.........اي اي
شاف لي نصر ......شن الاسم يلي تسجل بيه ؟
نصر:محمد
سمير:احسن ما اخترت ....خليه مع الايام يصير خير قدام الناس
ديرو بالكم على الولد واعرفو كيف تتصرفو الاثنين
نصر:كان بيتفجر من المسايره ...ان شاء الله عمي
كملت العزومه الصغيرونه هادي على خير ❤️
وكانو العائلتين منسجمين ونصر وريحانه جايبين الدور صح
حاليا نعرف كويس القارئ شن يحس ممكن بي الغضب او الاستغراب
معقول جريمه زي هادي يديروها ويفلتو منها بكل سهوله ؟
يتزوجو ويعيشو حياة عاديه واهاليهم يسامحوهم وعادي ؟معناها ممكن هلبا ناس يتشجعو ويديرو الغلط هادا
نحب نجاوبكم بي شي واحد بس
(الناس تنسى لكن ربي مينساش ومهما كان عندنا الذب عادي وتافه ربي عنده عضيييم وكله مع الايام يبان )
_________________________________
نجمه:فاقت من نومها بفزع على صوت شريانة الشقه
ناضت واكتشفت انها رقدت وهيا تراجي في الوقت يفوت باش تمشي لي رباب
استمر صوت الشريانه والباب يدق
صحصحت شوي وحطت ع راسها وفتحت الباب
ادهم:وينك شغلتيني
نجمه:ابتسمت .....اهلين ادهم
اسفه كنت راقده والله مافقت الا ع صوت الباب
ادهم:اسف كان نوضتك مكانش قصدي
نجمه:لا ولا يهمك
ادهم:اءءء اممم كنت بنعرض عليك لو تطلعي مشوار معاي تغيري جو
نجمه:بي سرحان .......كيف كيف يعني مفهمتش
ادهم :عندنا مزرعه انا وخوي مش بعيده هلبا
نجمه: بي انفعال...لا طبعا شن تحكي انت
ادهم:لا الواضح انك فهمتيني غلط انا مكانش قصدي هكي
رباب:فتحت الباب
نجمه:شافت لي رباب وهيا ساكته
رباب:تعالي نبيك
نجمه:تمام جايه
رباب :تعاااالي توا قلت
ادهم:انحرج ......تمام امالا بعدين نحكو
نجمه:سكرت شقتها ومشت لي رباب بدون ما تحكي
نزل ادهم من العماره ورباب قربعت الباب بصوت عاااالي كافي يسمعه ادهم قبل ماينزل
نجمه:خيرك ؟!
رباب:مستحيل نخلييييييك تتورطي معاه تسحابيني مسمعتكمش
بعقلك انتي هادا شايفك وحيده قعد يستدرج فيك
نجمه:سحبت يدها من رباب .....به بشويه عليا
رباب:ردي بالك نجمه ردي بالك اديري شي من وراي وتخليه يضحك عليك
نجمه:خدت نفس وسألتها ......الصبح ع اساس بنجيك لقيت عندك ضيوف
رباب :توترت ..........افففف هادا خوي الصغير جاي بياخد من مصروفي تعاركت انا وياه
بعدين عادي وكان جيتيني حتى لو عندي حد شنو المشكله !؟
نجمه:اقتنعت نص اقتناع بي كلام رباب.....شن عرفني قلت نراجي شويه لين يطلع وخداني النوم
رباب:خشي خشي نديرو نسكافي وحكيلي قصة السنيور ادهم هادا بي التفصيل
نجمه:خشت ورا رباب والابتسلمه في وجها
_________________________________
الساعه 9 في الليل :
كفاح:كانت في حوش العيله تجهز في العشي وتشوف لي سلفتها الجديده بي استغراب
لان البنت كانت رغم انها عروسه بس مش واضح عليها ابدا
ذااابله وسنها صغير
مش باينه انها متزوجه جديد لا مكياج لا شعر ولا حتى لبس
كانت لابسه بدلة سروال واسعه على اللون الاسود
ملامح البنيه طفوليه بشرتها بيضاء يغطيها النمش وشعرها يعطي ع البرتقالي شوي
طول الوقت متوتره وماسكه وشاحها خايفه من حد يخش ع غفله
كفاح:مدة سفرة العصير ......تفضلي اسمك نغم ولا ؟
نغم:اي نغم ........ومدة يدها خدت كاست عصير وابتسمت بي شكر❤️
كفاح:قعمزت جنبها ......شوفت عينك هادا حوش العيله
مفي حد غير الحاج فتحي توا مدام طه تزوج
كل يوم الغدي على وحده لكن اغلب الوقت نجي انا وشيخه نتغدو ونتعشو مع بعض بس اكتر شي غدي
نغم:اهااا كويس مشاء الله وينها شيخه؟
كفاح:تعبانه شوي وقاعده عند اهلها اليومين هادم
نغم:الف سلامه يارب
كفاح :سلمك
ساد الصمت بينهم لي دقايق وشافت كفاح حال نغم يلي مكانش طبيعي ابدا
قررت تتشجع وتسأل
كفاح:فيك شي نغم؟
محتاجه لي شي ؟
نغم:جاوبت بي غصه وكامته في قلبها .....لا انا كويسه الحمد الله
كفاح:شوفي عارف ان اهلك بعاد وصعب تمشي عليهم وتجي هلبا وباين انك صغيره واكيد الجو الجديد صعب عليك تبي حاجه انا اختك الكبيره ادللي
هنايا خلاصصصصصصصص
نغم معش قدرت تسيطر ع نفسها
حضنت كفاح ونفجرت بكي كأنها لقتها طوق نجاة وسط عذاب كبير
____________________________________
نبيله:شنو بنتي كملتي ؟
هديل:اي كملت الماعين يا امس ان شاء الله ربي يلحقني نجيكم عروسه وينزلو نساوين خوتي يغسلو الماعين بسسس
ريحانه:نجوم السماء اقربلك😌
نبيله:يالله عاد انتي وياها ياسر
شافت لي ريحانه..هي بنتي مدام اهلك روحو يمشو ويجو بسلامه هاتي حمودي منك
رحيانه :بتوتر .ها؟!
نبيله:الولد هاتيه بننزل
ريحانه:اممم ع عع عادي تخليه عندي اليوم !
نبيله:قامت حواجبها بي استغراب .....علاش؟
ريحانه:تت تبي الحق الحليب قاعد متعبني رضعته مبكري ةحسيت روحي ارتحت
خليه يرقد جنبي اليوم شوي ونرضعه
هديل :تشوف لي امها مصدومه ...رضعتيه ؟😳
ريحانه:ايييي شن فيها يعني
وبعدين انتي مكلمتكش
نبيله:تحكي وهيا مستغربه ......تمام تمام خلاص خليه عندك الليله نمر ناخده الصبح
ريحانه :تمام كويس بكل
طلعت نبيله وهديل وخشت ريحانه وولدها لي غرفة النوم وداخل ريحانه شعور ملخبطططط مش مفهوم
_______________________________
شرين تالفون اب شيخه واقرب حد ليه كانت ناديه مقعمزه
ردت عليه بفرح
ناديه :اهلا نجم
نجم الدين :اهلين وين عمي الهادي؟
ناديه:والله في الحمام يدوش تبي حاجه؟
نجم الدين :اي بنبعت شوي حاجات لي شيخه ومتين و ......
ورقة طلاقها طلعت اليوم
ناديه :به صحيت يبارك فيك
ربي يسهلك طريقك وان شاء الله تلقى يلي خير منها
اما هيا خلاص لقت غير تكمل العده
نجم الدين:وقف من مكانه ....كيف؟
ناديه :والله يا ولدي جارتي اول ما سمعت بي الخبر على طول حجزتها لي خالها وقتلي غير تكمل عدتها وبصراحه كلمت بوها في الموضوع ووافق
خصوصا ان يلي بينكم ولد مش بنت
والولد يعيش مع بوه عادي
نجم الدين :شن تدوي انتي .؟
ناديه:علت صوتها ......يلي سمعته يا بابا وكان مش مصدق تعال اسئل بوها
بنات الناس مش لعبه انت طلقت يجي سيد سيدك ياخدها وبوها عجبه العريس وخلاص سكر راسه عليك حتى لو بتحاول ايواه
هي بسلامه .......وسكرت الخط
ناديه:تنهدت ......سحيقه ليك وليها
لكن على طلاقك فيها هادا وجه لو رجعتلك ومخليتكش تشوف بي عيونك كيف نزوجها
____________________________________
ندى:كانت مقعمزه على السرير عينها وارمه من البكي
عاكسه مراية الدولاب عليها وتشوف لي شكلها
كانت لابسه بجامة ستان ورديه والحنه تلمع في يديها
شعرها يلي كان مش مرتب ومختلط بي دموعها مكانتش نادمه على مكامتها لي امين
بس كانت نادمه انها متصلتش ونذير برا الحوش
كانت مقتنعه انها مش دايره غلط ومن البدايه نذير يعرف كويس ان قلبها معلق في شخص تاني
انفتح الباب وها المره ما انخلعتش
اكتفت انها تقيم راسها بس
نذير :خش للغرفه
ندى:كانت متوقعه انه جايب عشاء بس مكانش ماسك في يده ولا شي
هنايا قلبها طاح
ووقفت وهيا تسأل بصوت يرجف
ندى:مم مش ع اساس ساهر برا اليوم ؟
نذير :سكر وراه الباب وقرب منها ...
يتبع....
لقراءة الفصل التاسع اضغط على : ( رواية ملائكة بألف وجه الفصل التاسع )
لقراءة باقي الفصول اضغط على : ( رواية ملائكة بألف وجه )