رواية الوقوع في الغرام الفصل السابع 7 بقلم هند الحجار

رواية الوقوع في الغرام الحلقة السابعة 7 بقلم هند الحجار

رواية الوقوع في الغرام الجزء السابع 7 بقلم هند الحجار

رواية الوقوع في الغرام البارت السابع 7 بقلم هند الحجار

رواية الوقوع في الغرام الفصل السابع 7 بقلم هند الحجار

رواية الوقوع في الغرام الفصل السابع 7 بقلم هند الحجار

جريت عاشان اسلم عليه و فجأة الرجالة بتاعته وقفوا قدامى ، اتكلمت بلهفة : 

_ لو سمحت عدينى 

اتكلم اللى واقف قدامى وقال : 

_ لا مينفعش هادى بيه مانع انو يشوف حد 

بصتله وانا مدايقة وقولت : 

_ بس انا مش حد عدينى لو سمحت انا عارفاه بقولك 

اتكلم الراجل وقال : 

_ ممنوع حضرتك 

خبطت برجلى على الأرض بعصبية مكنتش عارفة اعمل اى فبدأت انادى بصوت عالى وقولت : 

_ ي هاااادى ، هاااااااادى 

وشاورت بأيدى لحد ما خد باله 

هادى بصلى واخيرا شافنى شال النضارة وقال بفرحة : 

_ هند يخرب عقلك 

وقال للرجالة يوسعولى 

فالراجل اللى كان واقف قال : 

_ بس حضرتك دى مجرد عاملة بسيطة مينفعش تقف معاها 

بصيت بحزن ليه هادى اتكلم بعصبية : 

_ انت هتعرفنى اقف مع مين ولا اى بقولك ، دى صحبتى وسعلها 

اخيرا الرخم وسعلى روحت مطلعاله لسانى ، فهادى ضحك عليا ، روحت ،وسلمت عليه وقولت بفرحة : 

_وحشتنى اوى كان قلبى حاسس ان هشوفك تانى عامل اى ، ولؤى عامل اى ويوسف 

هادى بفرحة : 

_لؤى معايا ومستنى فى العربية ، ويوسف خطب 

وشى قلب من ساعة ما سمعت الجملة دى قولت بحزن : 

_ بجد خطب مين ؟! 

هادى قال بزعل عاشانى : 

_ اى ده مالك انتى زعلتى ولا اى ؟! 

قولت وانا بهز راسى بلأ : 

_ لا انا فرحانة عاشانه هو يستاهل كل خير اكيد 

كنت حاسة أن هعيط معرفش لى وقلبى بدأ يوجعنى قولت بحزن : 

_ طب انا كنت بس فرحانة إن شوفتك تانى حقيقى ، وبارك ليوسف وسلملى عليه وعلى لؤى وعلى أميرة وندى 

 هادى بحزن : 

_ مالك ي هند انتى زعلانة حاسس انك مدايقة ، طب تعالى سلمى على لؤى ده والله كل يوم نجيب فى سيرتك ، هيفرح اوى أما يشوفك !!! 

روحت معاه  بجد وحشنى اوى ، انا فعلاً معرفش لى اول ما سمعت انو خطب ادايقت ، لقيت نفس العربية اللى خطفونى فيها كان هو قاعد وماسك الفون روحت عنده وقولت بأبتسامة : 

_ ايوا يعنى انتوا خاطفنى هتعملوا بيا اى افهم بس؟! 

لؤى خد باله منى ضحك اول ما شافنى نزل من العربية وقال بفرحة :

_ هند  الرغاية ،يااه بعد كل ده شوفناكى تانى عاملة اى ؟! 

ضحكت وسلمت عليه وقولت : 

_ والله وحشنى عصبيتك عليااا وزعيقك فيا 

لؤى بأبتسامة : 

_ مش انتى اللى كنتى بتعصبينى ؟! 

ضحكت وقولت : 

_ ايوا فعلاً انا شقية حبتين 

هادى بصلى وقال : 

_ انتى هنا بتعملى اى 

قولت بلطف: 

_ انا شغالة جوا هنا فى المصنع ،وبروح المعهد وخلاص داخلة على الامتحانات اهو 

هادى :

_ بس ده مرمطة عليكى ي بنتى ، وتعب ليكى 

قولت بحزن : 

_ هعمل اى اهو اى حاجة تشغل وقتى وكدا وتخلينى اقدر اتعامل واعتمد على نفسى شوية !! 

لؤى بص لهادى وقال : 

_ بس اعتقد انك فى فترة امتحانات ومحتاجة وقت كافى وده تعب ، بقولك اى ي هادى 

هادى بصله وركز معاه فلؤى كمل : 

_ طب كدا كدا اعتقد انها متعلمة ، وهيبقا معاها مؤهل عالى ، وانت كنت محتاج سكرتيرة تنظملك مواعيد المكتب ، أعتقد إن هيبقا اريح ليها 

هادى قال بأبتسامة : 

_ هو ده بالظبط اللى كنت بفكر فيه ، اى رأيك ي هند ، احسنلك من هنا بكتير 

قولت بفرحة : 

_ ياااه ده انت نجدتنى ي راجل والله 

هادى : 

_ طب من بكرا تجيلى الشركة ، بصى هى مش بعيدة اوى عن هنا ، هبعتلك عربية قدام بيتك وتيجى تاخدك ، ماشى  

فرحت اوى ، يااه أخيراً هرتاح ، وحاجة نفسى فيها حصلت ، وافقت علطول وروحت قعدت ازاكر للأمتحانات ، وانا بفكر حياتى ودنيتى وخدانى على فين ، ياااه هو معقولة ممكن ربنا يعوضنى واتجوز هادى ، ياااه هو انا استحق كل ده اصلا قولت وانا بحط القلم على الكتاب : 

_اهو انا كدا علطول متجليش فكرة الجواز إلا على وقت الامتحانات ، ده اى بجد اللى انا فيه ده ما تركزى ي هند بقاا 

وفجأة وانا بكلم نفسى لقيت أميرة بترن عليا ،رديت بفرحة وقولت : 

_ قلبى ي ميرو عاملة اى 

أميرة صوتها وصلى : 

_ الحمد لله ي قلبى ، لؤى جه وقالى أنه شافك النهاردة معلش انشغلت عنك والله كنتى على بالنا وقالى كمان انك هتشتغلى مع هادى ،كويس كدا احسنلك كتير 

قولت بفرحة : 

_ اه الحمد لله ، وندى فين 

ندى صوتها وصلى : 

_ انا اهو ياللى مش بتسألى لازم نشوفك مينفعش كدا ي هند بجد ،الواحد حبك والله

قولت وانا بضحك : 

_ والله وانا كمان بحبكم ، هجيلكم قريب إن شاء الله ، إلا بالحق هو يوسف خطب مين 

أميرة : 

_ سوزى 

قولت بصدمة : 

_ بجددد 

ندى بزعل : 

_ والله منعرفش اى اللى حصله كلنا عارضناه وهو خطبها معرفش حصل اى فى دماغه 

قولت بزعل : 

_ ربنا يسعده ،يمكن دى اللى هتسعده 

اتكلمت معاهم كتير ،ونمت بدرى عاشان اصحا بدرى ، العربية وصلت قدام بيتنا ،كانت الساعة ٨ الصبح وانا لبست شميز ابيض وجاكت جينز على جيب اسود ،سنسلة على شكل فراشة وطرحة بيضة بصيت لنفسى برضا و قولت : 

_ قمر ي بت ي هند والله انا خسارة فى البلد دى 

سلمت على امى ودعتلى ومشيت ، وأخيراً وصلت ، بصيت لجمال الشركة من برة ،يخبر ابيض ي جدعان ده احنا مش عايشين والله 

دخلت وانا خايفة شوية معرفش لى ، لحد ما وصلت لمكتبه ، لقيت واحدة قاعدة برة وطلبت أن ادخله ، بصتلى وقال بقرف : 

_ معلش مستر هادى مدنيش ميعاد مسبق ، وبعدين مبيقابلش الأشكال دى 

بصيت لنفسى وبصتلها وقولت بزعيق : 

_ نعم ي عنيا ومالها الأشكال دى ،قوليلوا إن مستنياه برة ،هو عارفنى بقولك ده صحبى 

قامت وقالت بأسلوب مش كويس : 

_ تصدقى إنك واحدة بيئة ، وامشى من هنا بدل ما اطلبلك الأمن 

قولت بغضب ووشى كان احمر خالص :

_ طب وحيات ربنا لدخله وورينى هتعملى اى 

دخلت وفتحت المكتب وهى حاولت تمنعنى ، هادى وقف اول ما شافنى و ..

يتبع....

لقراءة الفصل الثامن اضغط على : ( رواية الوقوع في الغرام الفصل الثامن )

لقراءة باقي الفصول اضغط على : ( رواية الوقوع في الغرام )

تعديل المقال