رواية انت قدري الحلقة العشرون 20 بقلم رحاب القاضي
رواية انت قدري الجزء العشرون 20 بقلم رحاب القاضي
رواية انت قدري البارت العشرون 20 بقلم رحاب القاضي
 |
| رواية انت قدري الفصل العشرون 20 بقلم رحاب القاضي |
رواية انت قدري الفصل العشرون 20 بقلم رحاب القاضي
ـــــــــــــــــــ
في الحياه هتفضل علي طول عايش في اختبارات من الطبيعي تغلط في شويه منهم، بس هرجع واقول ان اللي هيسقط فيهم كلهم هو اللي ما اتعلمش من الفشل او الخساره وبقي بيكررها تاني..
_ صحيت ريم من نومها وكانت مدايقه جداً ولما افتكرت احمد عيونها اتملت دموع، وقامت طلعت هدوم من الدولاب ودخلت الحمام..
وبره الشقه وصل احمد وفتح الباب ودخل وراح لاوضة ريم وعرف انها بتاخد شاور، ابتسم بخبث وقلع جاكيت بدلته بسرعه والجزمه وراح عمل نفسه نايم علي السرير، وطلعت ريم بعد شويه وهي بتنشف شعرها ولما شافته قالت..
ريم
حراااامي..
_كتم احمد ضحكته وقام وهو عامل نفسه نايم وقال بأنزعاج....
احمد
في ايه يا حبيبتي هو فين الحرامي ده..
ريم بصتله بصدمه وقالت
معقول انا لسه نايمه..
احمد
روحي بس جهزي فطار غشان ما اتأخرش علي الشغل..
ريم بعدم فهم
لا استني معلش انت مش طلقتني وروحت خطبت الوتكه اللي كانت معاك في المكتب..
احمد
انا طلقتك امتي ده، روحي يلا يا ريم عشان تلحقي تجيبي ابنك اللي عند ماما واخر مره يا هانم هنسيب الولد لوحده مع ماما..
ريم هرشت في راسها رقالت
ايه ده انت عندك عيال؟...
احمد كتم صحكته بالعافيه وقالها
ايوه ابننا يا حبيبتي..
ريم بصدمه
احلف انا خلفت وعندي ولد وانا ما اعرفش..
ضحك احمد غصب عنه وقال
ههههههههههه يخربيتك اا هو ده وقت هزار يعني..
ريم بدموع
انا ما بهزرش انا خلفت امتي وابني فين، انت فين يا حبيب ماما وانت رجعتني امتي مش كنت مطلقني وانا كنت زعلانه دلوقتي ورحت اخد شاور وو...
قام احمد وقف قدامها وقالها
ايه رئيك لو كانت دي حياتنا بيتنا وابننا واحنا مع بعض..
ريم. بعدت عنه وقالت
دقيقه بس والنبي افهم انا دلوقتي في الواقع ولا بحلم عشان اعرف اتعامل..
احمد ابتسم وقال
اعتبرينا بنحلم...
ريم بدموع
وانت في الحلم ده اكيد مش هتتجوز عليا صح؟..
احمد بهدوء
ايوه مش هتجوز عليكي وما فيش واحده تملي عيني غيرك، وكمان رديتك ليا تاني..
ريم بحماس
يعني احضنك عادي..
احمد بخبث
وكل اللي عايزااااه كمان اعمليه..
ريم بضيق
لا افهم الاول برضو مين البنت اللي كانت عندك...
احمد بهدوء
حركه..
ريم
يعني ايه مش فاهمه؟..
احمد قرب منها وقال
حركه عشان اخلي الحجر اللي في دماغك ده يتكسر وتعترفي انك بتحبيني وبتغيري عليا، وعلي فكره انا رديتك بعلم ابوكي وممدوح..
ريم بحده
انا مش بتكلم في كده دلوقتي، انا بتكلم في حتة انك جرحتني وزعلتني عشان توصل للي انت عايزه..
احمد
ايه اللي انتي بتقوليه ده، وبعدين البنت دي والله انا كنت اول مره اشوفها في المكتب ومن طرف اخوكي ومش هشوفها تاني ولا عايز اشوفها المهم عندي انتي..
ريم بضيق
وانت عشان تتاكد من حبي ليك تجرحني وتعمل حاجه تدايقني ايه الانانيه دي..
احمد بحده
لا انتي ايه الغباء ده يا ريم انتي بطريقتك دي بتخسريني بجد، العلاقه دي ما حدش بيحاول يخليها تنجح غيري...
ريم
انت بتزعق ليه دلوقتي احنا بنتكلم عادي، بس ده طبعك اصلا وانت مش هتتغير..
_احمد قعد علي السرير وفضل يلبس في الجزمه بتاعته وقالها وهو متعصب..
احمد
ولا انتي عمرك هتتغيري برضو، بس انا قبلتك زي ما انتي وحبيتك وبحاول اخليكي تقبليني بس انتي للاسف مش بتحبيني وانا مش هفرض نفسي عليكي تاني كفااايه بجد..
ريم بحزن
انت مش من حقك تفسر مشاعري علي مزاجك، انت حط نفسك مكاني اروح دلوقتي اجيب راجل واخليه يقرب مني ويحضني قدامك عشان اخليك تغير عليا انت هتكون عادي..
وقف احمد قدامها وقال بحده
عشان كنت ادفنك وادفنه حي يا ريم..
ريم بسخريه
يعني حرام عليا وحلال ليك كرامتك غاليه عندك وانا اللي كرامتي رخيصه وساهل تتجرح..
احمد
اوكي الطريقه كانت غلط بس ما تنكريش ان لولا اللي حصل ده انتي ما كنتيش هتتأكدي من حبك ليا..
ريم بدموع
لا هو انا بحبك من زمان علي فكره، بس انت اللي كنت بتخليني اخاف اعترف بحاجه زي دي..
احمد اتنهد بضيق وقال
بصي يا ريم عشان الموضوع بقي سخيف اووي ، انا مديكي وقتك تفكري بس المره دي ورحمة ابويا اخر مره ومش بهددك ولا قصدي اخوفك، انا عايزك بس تفكري بعقلك يا ريم ومن غير غبااء...
ومسك ايدها بهدوء وقالها
وبرضو افتكري كويس اني رديتك عشان بحبك وهتحمل اي حاجه منك عشان بحبك ووارد نتخانق ونشد شعر بعض كمان بس هنعدي كل ده لو كنا بنحب بعض بجد..
_قال كلامه وسابها ومشي طلعت وراه ريم بسرعه وقالت..
ريم
استني يا احمد..
احمد ابتسم وقال
معقول بالسرعه دي فكرتي..
ريم
لا انا بس بسأل انت دخلت هنا ازاي ومين دخلك بابا ولا المنيل علي عينه صاحبك..
حدفها احمد بالمفتاح وقال بغيظ
ابوكي محترم مش وش ذلك ده المنيل علي عينه اخوكي...
_قال كلامه ومشي وريم راحت قعدت في الاوضه بتاعتها ولقيت احمد بعتلها رساله علي الفون..
فتحتها ريم وكان باعتلها
نسيت الجاكيت بتاعي عندك خلي بالك منه ومن قلبي اللي اخدتيه يا جزمه..
_ابتسمت ريم وقفلت الفون وراحت مسكت الجاكيت بتاعه وقالت لنفسها بهدوء..
ريم
هو انت تتحب بصراحه، بس لازم افكر بجد عشان لا اظلمك ولا تظلمني..
ــــــــــــــــــــــــــــــــــــــــ
_وفي شركة كامليا دخل ممدوح عندها المكتب..
وهي كانت قااعده مع عميل وقالت..
كامليا
ايه ده في ايه؟..
ممدوح
ده بيعمل ايه هنا؟..
كامليا
انت بتهزر اطلع بره يا ممدوح..
ممدوح قرب منها وقال
والله لو ما سكتي لاكون رميكي معاه من فوق..
وقف العميل وقال
والله علي. حسب معلوماتي ان انت مشيت من هنا وهتفتح شركه جديده، نعم عايز ايه؟..
ممدوح
لا دي حاجه ما تخصكش يا ابراهيم عشان انت لو قلبت قرد والله برضو ما هيبقي في شغل بينك وبين مدام كامليا..
ابراهيم بغيظ
انتي شايفه البني ادم ده بيتكلم ازاي يا كامليا..
مسكه ممدوح من هدومه وقال
اسمها كامليا هانم يااه وياريت هانم بس من غير ما تنطق اسمها علي لسانك..
بعد عنه ابراهيم وقال
بقي كده مااشي والله اللي حصل ده ما هيعدي بالساهل وهتشوفو..
ممدوح
لا ما احنا شايفين خيبتك وكفايه مش عايزين نشوف غيرها..
_طلع ابراهيم وهو متعصب، وممدوح قرب من كامليا ومسكها من ايدها حامد وهي قالت بقلق..
كامليا
انت اتجننت سيب ايدي وبعدين بتبصلي كده ليه؟..
ممدوح بحده
هو مش الحيوان ده حاول يدايقك قبل كده، بتدخليه مكتبك وتقعدو لوحدكم ليه...
كامليا بعدت عنه وقالت
لا ما هو المره دي جااي وغرضه شريف، ده جاي وعايز يتجوزني..
ممدوح بغضب
وحياة امك وانتي قولتي ايه؟..
كامليا
تفتكر انت انا قولتله ايه؟..
ممدوح بغضب
انا ماشي وبراحتك يا كامليا..
كامليا بسرعه قالت
رفضته طبعا عشان مستحيل اتجوز حد وقلبي مع حد تاني..
رجع ممدوح ووقف قدامها وقال
ومين بقي الحد اللي قلبك معاه..
كامليا بضيق
انت ايه اللي جابك مش خلاص كل حاجه خلصت ورديت الجميل..
ممدوح
تعالي معايا يا كامليا وبطلي تقولي كلام مالوش لازمه والزفت اللي كان هنا ده انا مش عايز اشوفه تاني هنا في الشركه والا هقعدك في البيت..
كامليا
انت بتتكلم كده بصفتك ايه، وايه تقعدني في البيت دي..
ممدوح مسك ايدها وقال
تعالي معايا وانا هفهمك كل حاجه..
ـ واخدها وطلعو بره الشركه وراحو؟؟..
ــــــــــــــــــــــــــــــــــــــــ
_ وفي محل موبليا..
كانت رباب وطارق هناك..
رباب
ما تسيب موبيلك ده وتختار معايا...
طارق
ما انا بصراحه كده قلقان علي امي من امك..
رباب
هي امي هتاكلها يعني ولا هتاكلها...
طارق
يعني انتي مش عارفه امك يا رباب، المهم قوليلي انتي اختارتي ايه؟..
رباب
ولا حاجه ايه الالوان دي هو احنا جايين ننقي عفش عريس وعروسه ولا عفش مدرسه ايه الالوان دي..
طارق
طيب اهدي وقوليلي انتي عايزه الوان ايه؟..
رباب
عايزه الوان عرايس يعني نيش مُدهب وانتريه مووف فاتح واوضة النوم تبقي كلها كده باللون الوردي او الفوشيا و..
طارق
ولا كلمه كمان هو حد. قالك. اني هفتح الشقه كباريه ده حتي الكباريه فيه شياكه عن اللي بتقوليه ده..
رباب
يعني انت عاجبك الالوان دي بيج وابيض ورمادي واسود..
طارق
ما هو ده اللي هيليق علي الوان شقتي، وبعدين في موف اهو بس هادي شويه..
رباب بضيق
براحتك شقتك وانت حر..
طارق
ايوه ازعلي في الموقف ده بالذات ازعلي عشان انا مش هخليكي تختاري الالوان البلدي اللي عايزه تجبيها دي..
رباب بحده
وجيبتني معاك ليه اصلا من الاول..
طارق
يا رباب بقي بلاش زعل دلوقتي والنبي، وتعالي بس نختار الوان هاديه علي زوقي وانا هقنعك بيها..
رباب
طيب بس انا اللي هختار حاجة المطبخ..
طارق بخبث
تمام بس الهدوم انا اللي اختارها..
رباب
ما انا معايا هدومي هنجيب هدوم تاني ليه انت محتاج يعني..
طارق
لا انتي اللي محتاجه ما هو مش معقول هنتجوز بعبايات امك اللي بتلبسيها دي..
رباب اتوترت وقالت
اا. ما انا في حاجات كنت بجيبها في جهازي معايا..
طارق
طيب اشوفها الاول افرض ما كانتش زي اللي في بالي..
رباب بحده
ابقي وقتها روح اتجوز غيري يا حيلتها..
_قالت كلامها ومشيت من قدامه وطارق قالها بغيظ..
طارق
استني هنا ما انا مش ضامن ذوقك، وبعدين تبطلي تقوليلي يا حيلتها دي انا جوزك علي فكره خدي يا بت هنا..
_ وفضلو يختارو في العفش بتاع شقتهم..
ــــــــــــــــــــــــــــــــــــــــ
_وفي بيت عزيز خال احمد...
نزل من اوضته وكانت علياء مراته قاعده بتعيط..
عزيز
مالك يا حبيبتي في ايه؟..
علياء ببكاء
مالك بعتلي ماسج انه سافر، ومش عايز يشوفني تاني عشان اتجوزت ومش هيقبل بالوضع ده وسافر حتي من غير ما يودعني او يسلم عليا..
عزيز بضيق
ابنك مش متربي وانتي دلعتيه بزياده، حقه يزعل بس مش حقه يزعل امه منه ويهرب كده..
علياء
هو انا يعني دلعته ليه هبقي انا والدنيا عليه مش كفايه انه اتربي من غير اب..
عزيز بضيق
كنتي تقدري تبقي ام واب ليه بس انتي اختارتي ان هو يبقي المتحكم وهو صغير..
علياء
انا مش عايزااه يرجع خليه يتحمل نتيجة اختياره، بس انا عايزه اطمن عليه واشوفه كل شويه..
عزيز بهدوء
حاضر والله هخليكي تطمني عليه ولما تحبي تشوفيه هاخدك ونسافر وغصب عنه هخليكي تشوفيه وانا في ضهره ومش هخليه يحتاج حاجه ابداً...
حضنته علياء وقالت
انا واثقه انك ديما هتكون في ضهره انت احسن راجل انا شوفته في حياتي يا حبيبي، المهم ساره قالت هتسافر الغردقه كام يوم..
عزيز
تمام وهناك ابن خالها هياخد باله منها..
علياء ضحكت وقالت
ههههه اه منك ومن دماغك مش ساهل خالص انت وعارف بتعمل ايه كويس...
عزيز
طبعا والا ما كنتش خليتك توافقي تتجوزيني..
ــــــــــــــــــــــــــــــــــــــــ
_وبالليل قدام بيت كامليا..
وقف ممدوح بعربيته وهي كانت مدايقه جدا، وممدوح قالها بهدوء..
ممدوح
انا توقعت انك هتكوني مبسوطه لما اعرفك علي ابويا وابقي عايز اتجوزك....
كامليا
قصدك كنت فاكر اني ما هصدق صح؟..
ممدوح
بلاش كلامك ده يا كامليا، انا بجد عايز اتجوزك انتي بقي ادايقتي ليه؟..
كامليا
عشان ما قولتليش حطيتني في الامر الواقع وكانك عارف ردي..
ممدوح
ايوه انا عارف انك بتحبيني يا كامليا..
كامليا بحده
ماشي بتزفت بحبك بس مش هتجوزك ولا هتكون بينا حاجه عشان انا مش هقبل انك تتجوزني عشان انا بحبك وبس..
ممدوح فتحلها الباب وقال
انا غلطان انزلي يا كامليا، انا ما بحبش الغبااااء اصلا...
كامليا بغيظ
هنزل علي فكره ومش عايزه اشوف وشك تاني..
مسك ايدها قبل ما تنزل وقالها
يا غبيه هو انا لو ما كنتش بحبك كنت هقولك نتجوز..
كامليا سحبت ايدها منه وقالت بدموع
ما بتحبنيش انت كنت بتحب ساره سنين وفي يوم وليله بقيت بتحبني انا..
ممدوح
ايوه عادي حب سنين وعشرة سنين بتتنهي في لحظه ادارك ان الشخص اللي كنا فاكرينه ما فيش منه ولا حاجه، ده اللي حصلي مع ساره علي قد ما حبيتها علي قد ما في الاخر عرفت انها مش الزوجه اللي تفتح بيتي ولا اديها قلبي وانا مطمن..
كامليا بصتله وقالت
وانت هتتجوزني ليه يا ممدوح؟..
ممدوح
عشان هكون مبسوط وسعيد معاكي، لما فكرت كويس مجرد التفكير كنت مرتاح وانا بفكر فيكي اكتر، اللي حصلي واني كنت هموت خلاني اتأكد ان هي ممكن في يوم وليله تبدلني بغيري انما انتي هتفضلي معايا لاخر نفس لانك بتحبيني بجد وانتي اللي تستاهلي تتحبي مش هي..
ابتسمت كامليا وقالت
طيب انا عايزه وقت افكر..
ممدوح
ده من امتي ده؟..
كامليا بحده
اهو ده اللي عندي عاجبك ولا لا؟
ممدوح بغيظ
عاجبني يا ست كامليا، اتفضلي انزلي..
_كتمت كامليا ضحكتها ونزلت من العربيه ودخلت بيتها وهي مبسوطه جدا....
ــــــــــــــــــــــــــــــــــــــــ
_ وعدت الايام وجه معاد فرح طارق ورباب..
وكانت ريم وكامليا معاها..
رباب
بقولك يا دكتوره ريم هي مش الخواجيه دي اللي كانت مع اخوكي لما طخوه..
ريم
طخووه هو طارق سمع طخوه دي قبل كده..
رباب
مش موضوعنا هي ولا مش هي..
ريم
ايوه هي بس انتي ليه بتسألي وبطلي تبصيلها كده البت خايفه منك..
رباب
هموت واعرف شعرها طويل وبيلمع كده ازاي..
ريم.
معروفه فاتيكا زيت زتون للشعر اوعي تصدقي بتوع الرويات اللي يقولك شعرها ريحته ياسمين واخت ياسمين والكلام ده..
رباب
معاكي حق اصلا تلاقيها حاطه باروكه هو في شعر كده اصلا، بس خدودها بتلمع ازاي كده ولا يا اختي جسمها منحوت نحته..
ريم بسخريه
اتبطي يا رباب بلاش حقد وخلينا نعترف بالحقيقه احنا مش بنات جنبيها...
قربت منهم كامليا وقالت
هو في ايه بقي انتو بتنمو عليا ولا ايه؟..
رباب
لا ابدا والله تحنا بنتحسر علي حالنا مش اكتر..
ضحكت كامليا وقالت
ليه كده انتو زي القمر والله، ده انا اللي محتاجه اتعلم منكم..
ريم
استني يا رباب طلعت لينا فايده اهو..
كامليا
لا انا عايزه بس اعرف انتو ازاي وصلتو لنقطة الجواز بالسرعه دي..
رباب
انا اقولك في مثل بيقولك اكره ما تريد يأتيك..
ريم
ده مين اللي قال المثل ده؟..
رباب
ما تدوقيش، المهم انا كنت بكره طارق اتجوزني، ريم عملت في حموكشه بلااااوي واهو واقع علي وشه فيها..
كامليا
يعني افتح دماغه يعني ولا اعمل ايه دلوقتي..
ريم
لااا الا اخويا بصي ممدوح غلبان مش زي الحيوانات البريه اللي في حياتنا..
رباب
وحياتك كلهم صنف واحد، وبعدين عنده واحده هشكه زيك كده وناشف معاكي ده بهيم..
ريم بغيظ
الله ما تتلمو بقي ده اخويا...
_ ضحكت كامليا وبعد شويه جه طارق واخد رباب وراحو القاعه اللي فيها الفرح والكل راح معاهم، وجه احمد وراح باركلهم وقال لطارق..
احمد
عارف لو زعلتها اا..
طارق
لا والله مش هزعلها ده انا هحطها في عينيا..
احمد
يا عم خد باقي كلامي ده انا كنت هقولك لو زعلتها هديك مكفأه..
ضحك طارق ورباب قالت
لااا بقولك ايه يا دكتور احمد اوعي يغرك اني عروسه وكيوت انا ممكن اتحول عليك دلوقتي..
احمد
الله يعينك يا طارق انا ماليش دعوه وما قولتلكش تتجوزها...
طارق مسك ايد رباب وقاله
بس انت اللي كنت سبب اني اتجوزها بعد ربنا وهفضل طول عمري ادعيلك عشان بقيت مراتي..
احمد ابتسم وقال
ربنا يسعدكم يارب....
_ قال كلامه وراح سلم علي رشاد وممدوح ومشي من غير ما يكلم ريم، وكامليا قالتلها..
كامليا
انتي لسه هتزعلي روحي ورااه المره دي الدور عليكي تتمسكي بيه...
ريم بتوتر
ما انا ما اقدرش وافرض كسفني..
كامليا
يكفي شرف المحاوله يلا روووحي..
_قامت ريم وطلعت ورا احمد، ورشاد مسك ايد كامليا وقالها..
رشاد
تعالي ترقص بقي مع العريس والعروسه ولا انا راجل عجوز وما اعجبش..
كامليا بصت لممدوح بطرف عينها وقالت
عجوز ايه بس يا اونكل ده انت احلي واحد في الفرح..
_ وقامت ترقص معاه وممدوح ما شالش عينه من عليها وقام قرب منهم وو..؟...
ــــــــــــــــــــــــــــــــــــــــ
_ وبره القاعه كان احمد لسه هيركب عربيته وريم جريت وراه بسرعه وقالت..
ريم.
استني يا احمد يا ابني استني قطعت نفسي..
احمد
نعم في ايه؟...
ريم
انت بتكلمني كده ليه يا احمد؟..
احمد
عشان طولتي يا ريم توقعت يوم ولا التاني وتكلميني وتقوليلي يلا نرجع، بس تاخيرك ده اكدلي انك ما بتح...
ريم بسرعه قالت
بحبك والله العظبم بحبك ومستعده ارجعلك دلوقتي واكمل حياتي معاك وزي ما هتتحمل شخصيتي انا كمان مش هطلب منك تتغير انا هحاول اغير نفسي عشان انت تبطل تعمل الحاجات اللي بتدايقني وبس..
قرب منها احمد وحضنها وقال وهو مبتسم
وحشتينييي اوووي علي فكره..
ريم بدموع
وانت كمان والله..
وبعدت عنه وقالت بتوتر
تعالي بقي ندخل ونحضر الفرح..
احمد
لا فرح ايه بس تعالي معايا، في مفجأه عملهالك وكنت مستني اليوم اللي ارجعك فيه عشان اوريهالك..
ريم بحماس
هتجيبلي كزبره مش كده..
احمد
انتي عايزه ليه كزبره هو انتي عايزه تطبخي حاجه..
ريم
يخربيت الجهل اللي انتو فيه، بقي مش عارف كزبره بتاع علطلاق كله بيكدب علطلاق شقلب واقلب..
احمد
ادخلي جوه يا ريم ما فيش مفاجأت..
ريم ضحكت وقالت
ههههه خلاص يلا بينا اغمص عينيا ولا لسه..
احمد بنفاذ صبر
لا واضح انك هتغيري من نفسك اووي، اطلعي يا ريم الله يسترك..
ــــــــــــــــــــــــــــــــــــــــ
_ وجوه القاعه قرب ممدوح من باباه اللي كان بيرقص مع كامليا وقاله..
ممدوح
بابا اتفضل اقعد عشان الخشونه ما تزيدش عليك يا حبيبي..
رشاد
والله واسيب القمر ده لوحده..
ممدوح
ما خلاص بقي يا حج عرفنا انك روش اتفضل بقي..
رشاد قال لكامليا اللي بتضحك
معلش يا بنتي بس انا ما كنتش معاهم وما عرفتش اربيهم..
كامليا بصوت واطي
سيبها عليا انا المهمه دي..
رشاد بصوت واطي
خلاص يبقي الاعتماد عليكي وانا هقعد بقي لاني تعبت بجد. من الوقفه..
مشي رشاد وممدوح قالها
شوفتي اعرفك من اد ايه ولا مره قربت منك زي ما ابويا عمل كده..
كامليا ابتسمت وقالت
عشان ما بتفهمش ياريتك زي اونكل رشاد كده..
ممدوح مسك ايدها وقرب منها بهدوء وقال
ما انا وارثه برضو انتي نسبتي انه ابويا..
اتوترت كامليا من قربه منها وهو قال بهدوء
هو فعلا قربي منك ده غلط بس اوقات كتير بيكون الغلط ده في لحظته حلو اوووي..
كامليا بصتله بحزن وقالت
بس مدام قولت عليه غلط يبقي هتندم عليه بعدين..
جات تبعد عنه بس هو قربها ليه اكتر وقال
مش هلحق اندم يا كامليا عشان هتجوزك سواء بقي رضيتي او لا انا هتجوزك..
كامليا بدموع
هو انت بتحبني بجد يا ممدوح ولا لا؟...
ممدوح
لا هتجوزك شفقه عشان صعباانه عليا..
كامليا
ليه ان شاء الله هو انا يعني..
ممدوح
يا غبيه هو في واحد هيتجوز واحده من غير ما يحبها، ممكن ما اكونش بحبك زي ما انتي بتحبيني بس مع الوقت انا واثق اني هعشقك..المهم انتي موافقه..
ابتسمت كامليا وقالت
ايوه موافقه يا ممدوح..
ــــــــــــــــــــــــــــــــــ
_ وفي اوتيل حلو جدا علي النيل..
كانت ريم ما احمد هناك وهي قاعده بتاكل وقالتله..
ريم
مش معقول يا حموكشه الاكل هنا جباااار ولا البط انا اول مره اكل بط بالحلاوه دي..
احمد
انتي جيبتي حموكشه دي منين؟..
ريم
من رباب هي بتقول عليك كده..
احمد بغيظ
منه لله اللي عرفكم علي بعض كنت ناقص انا، وبعدين انا حاجز احلي جناح هنا في الاوتيل ومتظبط من كل حاجه وانتي اللي لفت نظرك البط وبس..
ريم بطلت اكل وقالت
لا طبعا اوعي تفتكر اني بتاعت بطني انا بس كنت جعانه، وبعدين ما انا عارفه انت هتعمل ايه دلوقتي قريته في مليون روايه علي الفيس قبل كده..
احمد
ما هو ده السبب، منهم لله خلو دماغك عايشه في مكان غير اللي احنا عايشين فيه..
ريم قعدت جنبه وقالت
بالعكس ده انا مش هتعبك خالص اهو وفاهمه اللي انت عايزه..
احمد ابتسم وقال
بجد ده ياريت، قوليلي بقي انا ايه اللي ناوي اعمله..
ريم
مش العلبه اللي علي السرير دي فيها فستان فرح وانت هتخليمي البسه ونعمل فرح بينا وبين بعضينا كده عشان احنا اتجوزنا من غير فرح..
احمد بغيظ
اممم هو فعلا ده بيحصل في الرويات بس في الواقع انا اتجوزتك اجيبلك فستان فرح ليه..
ريم
عشان انا بنت ونفسي البس فستان فرح وعيني كانت هتطلع علي رباب النهارده وهي عروسه..
احمد بحده
اهو اللي حصل يا ريم وانا جاي هنا وجايبك معايا عشان اقضي شهر العسل اللي اتحرمت منه وبس...
ريم بغيظ
ما تعليش صوتك عليا وبعدين مدام العلبه دي ما فيهاش فستان فرح اومال فيها ايه؟..
احمد غمزلها وقال
فيها قميص نوووم ودلع بقي وحاجات..
ريم وقفت وقالت بحده
نعم نعم نعم نعم فيها ايه يا عينيا..
احمد بصدمه
ايه الطريقه دي يا بنت الناس يا محترمه منك لله يا رباب انا عارف دي طريقتها..
ريم بعصبيه
بقي انت مش راضي تعملي اللي انا عايزااه وتفرحني وتجيبلي فستان فرح وجايب حاجه لنفسك..
احمد وقف وقالها
ليه يا اختي هو انا اللي هلبسه ولا انا اللي هلبسه مثلا؟..
ريم
بس انا هلبسه ليك انت ومش هكون مبسوطه لاني مش بحب البس الحاجات دي..
ضربها احمد علي وشها كذا مره بهدوء وقال
تتعودي يا ماما ما انا مش متجوز خالتي نبويه..
ريم قعدت علي الكنبه واتربعت وقالت
انت ليه بتعمل فيا كده، ليه ديما مصمم تقفلني منك وتخليني اتخانق معاك..
احمد اتنهد وقال
قومي يا ريم الله يسترك غيري هدومك وما تبوظيش اليوم..
ريم بحده
لا يا عينيا هو اليوم بايظ لوحده وما دام مش بتقدر طلباتي انا مش هنفذلك طلباتك والبتاع اللي انت جايبه ده بله واشرب مايته..
احمد بحده
لا ما هو غصب عن اهلك هتنفذي اللي انا عايزه وفي كل حاجه في حياتنا عشان انا زهقت منك بجد..
ريم بعصبيه
لا والله ومدام زهقت اووي مني كده ما تخليك راجل وتطلقني..
احمد مسكها من قفاها وقال
لمي لسانك بدل ما ادفنك هنا، انا راجل غصب عنك يا بت انتي ومس هطلقك..
ريم ذقته وقالت
ايوووووه باااان علي حقيقتك انت عايز تضربني طيب طلقني يا احمد انا مش عايزه اعيش معاك بس..
_ وفضلو هما الاتنين يتخانقو..
ــــــــــــــــــــــــــــــــــــــــ
_ وبعد سنتين..
في السجن دخل كمال وفتحي اوضة الزياره وكان احمد قااعد ومبتسم..
فتحي
خير جاي عايز ايه؟..
احمد
جاي اشمت فيكم واطمنكم علي الحبايب..
وقف احمد قدامهم وقال
انا وريم خلاص كلها ايام وهيبقي عندنا أواب ابننا، وممدوح سافر مع كامليا مراته عشان يحضرو فرح اخوها وبقي من احسن رجال الاعمال في مصر، وحمايا العزيز الراجل المحترم بقي قاعد وسط ولاده وفي اخر راحه وبيجي اخر اسبوع في كل شهر بيقضيه معايا انا وريم، وانتو بقي طمنوني عليكم يا عيال بتاخدو علي قفاكم كويس جوه ولا لا؟..
كمال
انتو مش عملتو اللي عايزينه سيبونا في حالنا بقي..
احمد
عيب عليك يا كيمو انا لازم كل فتره اجي وازوكم ده انتو ليكم فضل كبير اني اتجوز ريم وممدوح يختار صح ويتجوز البنت اللي هتريحه..
فتحي بعصبيه
انا عايز امشي من هنا مشوني من قداااامه..
احمد
حلو اوووي ان شاء الله زياره في التانيه وهتتشل مني او هتتجلط المهم تخصلك حاجه تفرحني فيك اكتر، يلا بقي همشي انا خلو بالكم من بعض وما تعملوش مشاكل هنا احنا ولادنا متربيين..
_ قال كلامه وطلع بره القسم خالص، وقرب ما يركب عربيته موبيله رن برقم ريم..
رد عليها وقال
ايوه يا حبيبتي معاكي...
ريم بصراخ
انت فين يخربيت امك انا بولاااااااااد..
احمد اتفزع وقال
بتولدي ازاي هو مش لسه فاضل كام يوم..
ريم ببكاء
اعمل طيب دلوقتي انا مش عايزه اولد خالص اصلا انا بموت يا احمد..
احمد بقلق
طيب اهدي يا حبيبتي وانا هكلم ماما وطارق هخليه يجيبلك الاسعاف وانا جاي حالا..
ريم ببكاء وصراخ
وانت فين بتخوني مش كده طلقني يا احمد..
احمد بحده
هو ده وقته يا ريم..
ريم بعصبيه وبكاء
بقولك طلقني يا خاين يا بتاع النسوان..
احمد اتنهد وقال
حاضر يا ريم هطلقك بس اهدي كده وبعد ما تولدي هطلقك..
ريم ببكاء
انت ما صدقت بقي، عايز تطلقني عشانها بقي انا طلعان عيني عشان اجيبلك ابنك وانت بتفكر تطلقني..
احمد بحده
اعمل لامك ايه طيب اعملك ايه..
ريم ببكاء
انت بتزعقلي ليه منك لله ربنا ينتقم منك علي اللي بيحصل فيا ده..
_قفل احمد في وشها وكامن طارق ومامته...
ــــــــــــــــــــــــــــــــــــــــ
_وبعد شويه. في بيت طارق..
دخل شقته وكانت رباب قاعده بتتفرج علي التلفزيون وهي ماسكه طبق فاكهه كبير وبطنها كبيره قدامها..
طارق
عامله ايه يا حبيبتي..
رباب
كويسه، ريم بقيت كويسه ولا لسه تعبانه..
طارق
لا كويسه اصلا ولدت طبيعي..
رباب
طيب كويس عايزين بقي نروح نباركلهم..
طارق
ان شاء الله، قوليلي بقي ايه موضوع اننا هنقعد عند ماما ده..
رباب
بص يا سيدي انت بقيت تدفع ايجار كبير في العياده بتاعتك، وكمان المصاريف كترت اووي عليك فانا وانت هنروح نقعد مع امي وامك هناك ونفتح العياده هنا ..
طارق
انتي جدعه اوي يا رباب ومن حسن حظي اني اتجوزتك وبقيتي مراتي..
رباب
طبعا هو انت كنت هتلاقي في حلاوتي اصلا..
حضنها طارق وقال
طبعا لا يا قلبي، رباب كنت عايز اقولك علي حاجه حصلت النهارده في المستشفي بس خايف تزعلي..
رباب
عارفه ساره رجعت واحده صحبتي كلمتني وقالتلي عشان تغيظني وكده..
طارق
انا هسيب المستشفي وو..
رباب
لا طبعا يا طارق انا واثقه فيك انك عمرك ما هتزعلني وبعدين هي بقيت ست متجوزه وانت متجوز واللي حصل ده كان زمان وكل يوم بيعدي علينا بيغير فينا كتير. انت اكيد ما بقاش اللي جواك ليها زي زمان..
طارق
بسم الله مشاء الله كبرتي وعقلتي يا حبيبتي..
رباب
يا رخمم انا من يومي عاقله..
طارق
ثقتك دي فوق راسي يا رباب وانتي مستحيل تكوني مع حد ويشوف غيرك...
_ما اجمل تلك الصدفه التي جمعتني بكَ، لتكون انت العوض عن كل حزن اصاب قلبي...
ــــــــــــــــــــــــــــــــــــــــ
_ وفي المستشفي..
كانت ريم في نايمه علي السرير الطبي وجنبيها بيبي صغير وقاعده جنبيها الهام وقصادهم رشاد ومعاه عزيز وعليااء ..
الهام
حمد لله علي سلامتك يا حبيبتي..
علياء
البيبي شكله قمر اوووي..
عزيز
هتسموه عزيز مش كده..
ريم بصت لالهام وقالت
بقولك ايه سكتي اخوكي انا مش طايقه نفسي..
رشاد
مش مهم الاسم المهم انك قومتي بالسلامه يا حبيبتي..
ريم بحزن
الله يسلمك يا بابا..
ودخل احمد وقال
حمد لله علي سلامتك يا حبيبتي..
ريم بحده
انت كنت فين ياااااه بقي اولد من غيرك..
احمد باحراج
هو انا يعني اللي كنت هولدك....
عزيز
انا بقول نمشي احنا يا جماعه بلاش نشوف احمد وهو بيتهزأ اكتر من كده..
رشاد
وانا كمان همشي هبقي اجيلك البيت الصبح يا ريم..
ريم
ما تجيش با بابا انا هبقي اجيلك انت قادر تمشي..
رشاد
ما انا لو كنت ربيتك ما كنتيش هتقولي كده، انا غلطان اني جيت او ظهرت في وشك..
وطلعو كلهم واحمد قالها
ينفع كده زعقتي الراجل في عيشته يا شيخه..
ريم لوت بوزها وقالت
ما تتكلمش معايا لو سمحت..
احمد قرب منها وقعد جنبيها وقال
انا اسف والله كان مشوار مهم كده كنت لازم اروحه..
ريم بدموع
انا كنت تعباانه اوووي وكنت محتجالك جنبي..
احمد
حقك عليا وبعدين التعب كله راااح اهو اكيد لما ابننا جه..
ريم ببكاء
لا ده كلام وخلاص انا تعبانه لسه والله وبعدين بطني لسه كبيره هو انا هفضل طول عمري بكرش كده..
ضحك احمد وقالها
لا يا حبيبتي مع الوقت هتخس، المهم هاتي أواب انا عايز اشوفه..
ريم بغيظ
مش عايزه اشوفه وزعلانه منه شوفت من اولها تعبني ازاي..
احمد
والله انا مش عارف انتي ازاي بقيتي ام يا ريم...
_وقام احمد قعد جنبيها من ناحية ابنهم وشاله علي ايده وقالها..
احمد بدموع
بسم الله ما شاء الله يا ريم شكله وي القمر بصيله كده..
بصت ريم لابنهم وقالت بصدمه
منك لله يا احمد ايه ده؟..
احمد بقلق
في ايه يا ريم..
ريم
شايف مناخيرك اللي طلعت في الواد يعني اوحش حاجه فيك هي اللي هتطلع في ابني...
احمد بغيظ
مالها مناخيري يا ريم ما تتلمي ما انتي بقيتي بكرش اهو ومش متكلم..
ريم بحده
ما هو بسببك انت وابنك بس شكله فعلا امور اووي، بقي ده بتاعي انا لوحدي..
احمد
بتتكلمي علي الواد وكأنه سندوتش كفته..
_ ضحكو هما الاتنين وكملو حياتهم في مشاكل وضحك وهزار، وبرغم اختلاف شخصياتهم الا ان الاختلاف ده هو اللي جمعهم وخلاهم يكملو بعض...
لقراءة باقي الفصول اضغط على : ( رواية انت قدري )