رواية الجميلة والشعر الأبيض (موضوع عائلي 2) الحلقة الثالثة 3 بقلم رحاب القاضي
رواية الجميلة والشعر الأبيض (موضوع عائلي 2) الجزء الثالث 3 بقلم رحاب القاضي
رواية الجميلة والشعر الأبيض (موضوع عائلي 2) البارت الثالث 3 بقلم رحاب القاضي
 |
| رواية الجميلة والشعر الأبيض (موضوع عائلي 2) الفصل الثالث 3 بقلم رحاب القاضي |
رواية الجميلة والشعر الأبيض (موضوع عائلي 2) الفصل الثالث 3 بقلم رحاب القاضي
ــــــــــــــــــــــــ
لا أطلب الكثير.. فقط رؤيتك.. لمدة لا تتجاوز عمراً كاملاً ..يعني يادوبك 🤏
_كان يونس قاعد في مكتبه ومعاه يوسف اللي بصله وهو مدايق وقاله..
يوسف
والله هتتحاسب علي اللي بتعمله في مراتك ده
يونس
هو انا عملت ايه يعني اصلا اتخانقنا ليه ما تعرفش السبب بس نكد. وخلاص نسوان تجيب الهم..
يوسف
لا اكيد في سبب اكيد انت عامل مصيبه خلاها تقلب عليك كده، وياريت ترجع بالذاكره كام سنه ورا كده وافتكر انت عملت فيها ايه..
يونس
قصدك ايه؟..
يوسف
قصدي مايا اللي خونت شهد معاها ولحد النهارده شهد نايمه علي ودانها وما تعرفش حاجه..
يونس بقلق
يا نهار اسود تفتكر شهد عرفت حاجه عن الموضوع ده؟..
يوسف
مش عارف هو موضوع وانهتي بس ولو اتفتح حياتك الزوجيه هتدمر..
يونس بضيق
اكبر غلطه في حياتي بجد، بس اكيد شهد ما عرفتش وهتعرف منين؟..
يوسف بحزن
ما تبقاش ناكر الجميل يا يونس شهد بتحبك وواقفه معاك في كل حاجه وبتسمع كلامك ومش بتطلب منك حاجه فوق طاقتك، بلاش تعمل زي اخوك وتخسرها زي ما هو خسر مراته زمان وندم عليها....
يونس بهدوء
طيب روح شوف شغلك وانا هتصرف..
يوسف
طيب وصلت لايه في موضوع عمار المنشاوي؟..
يونس
هانت اووي وهوصله وهقدم المشروع بتاعنا وهنعدي هنبقي في حته تانيه لو اتعاملنا معاه..
يوسف
طيب علي خيرة الله هروح انا اشوف اللي ورايا...
_ طلع يوسف ويونس فضل قااعد مدايق وهو بيفتكر اللي حصل من تلات سنين..
فلااااش باااك
ـــــــــــــ
_ في شقه راقيه جداً كان يونس قاعد هناك وجنبيه بنت حلوه جداً، كان هو قاعد مدايق جداً وهو بيقلب في موبيله وهي سألته وقالت..
مايا
مالك يا حبيبي في ايه؟..
يونس بجمود
انتي هترجعي شغلك امتي؟.
قربت منه وقالت
هو انت لحقت تزهق مني؟..
بعد عنها وقال
مش كده بس ااا... انا عايز ارجع لمراتي وبيتي مش هقدر اكمل معاكي..
اتملت عيونها دموع وقالت
اصلا كنت عارفه انت كنت بتتسلي مش اكتر، اتفضل روحلهم وانا من بكره... لا من النهارده همشي..
يونس بحزن
انا ما كنتش بتسلي انتي عجبتيني واوووي يا مايا وقربت منك وما فكرتش في اي حاجه، بس انا بحب مراتي مش هقدر اكمل وانا شايفها طلعان عينها مع ولادي وانا هنا بخونها..
نزلت دموع مايا ووقفت وقالتله
امشي يا يونس قوم امشي يلاا وانسي مايا خالص وانسي الكام شهر دول خالص حتي لو حصل وشوفتني صدفه اعمل نفسك مش عارفني...
قام يونس ومسك جاكيت بدلته وقالها
انا اسف بجد انا اسف...
_ قال كلامه وسابها ومشي...ورجع يونس من ذكرياته واتنهد بضيق وبعدين نفض كل الافكار دي من دماغه وكمل شغله هو كمان..
ــــــــ #بقلم_الكاتبه_رحاب_القاضي ـــــــ
_في بيت اهل عماد..
كان قاعد هو واخواته التلاته مجدي وشيماء واختهم اللي من باباهم بس جهاد ومعاهم المحامي اللي قال..
عبد الدايم المحامي
الوصيه اللي سابها والدكم بعد ما افلس مقسمه حقكم بالعدل بينكم..
اتكلم عماد وقال بضيق
هو الراجل ده مش هنستفاد منه ولا وهو عايش ولا حتي بعد ما راح..
زعقت فيه جهاد وقالت
احترم نفسك واتكلم علي بابا الله يرحمه كويس..
مجدي بسخريه
ما تخلص يا استاذ عبد الدايم وتقول اللي عندك..
ردت عليه شيماء اخته وقالت
معلش يا مجدي خلينا نشوف اخرتها بقي...
المحامي
الوصيه بتقول ان شيماء ومجدي هياخدو البيت الكبير، وعماد وجهاد ليهم البيت الصغير والتركه بتاعته اللي فاضله بعد الافلاس اتقسمت بينكم بالتساوي كل واحد فيكم ليه 20 الف جنيه..
عماد بحده
ودول نعمل بيهم ايه نجيب بيهم لب..
مجدي بسخريه
يا حبيبي لو مش عايزهم احنا عايزينهم..
عماد بضيق
لا اهي نوايا تسند الزير...
جهاد بقلق
طيب كده انا وعماد هنقعد في بيتنا، وانت يا مجدي هتقعد انت وشيماء هنا..
ردت عليها شيماء وقالت
لا يا حبيبتي احنا هنبيع البيت وكل واحد ياخد. نصيبه ويروح لحاله..
جهاد بقلق _
طط طيب وانا هعمل ايه انا لو بعت البيت مش هلاقي اجيب بيت جديد..
رد عليها عماد وقال
متشليش هم يا اختي يا حبيبتي بيتي انا مفتوحلك ان مكانش اخوكي يشيلك مين هيشيلك بس..
جهاد بدموع
يعني هنبيع البيت برضو..
رد عليها عماد وقال
اومال طبعا وفلوسك هتفضل معايا لحد ما تتجوزي هجهزك بيهم وانا اللي هتكفل بيهم دي وصية ابويا...
_قامت شيماء هي ومجدي وبصو لجهاد بشماته وهي ما فهمتش نظراتهم وبعدين مشيو، وراحت جهاد مع عماد بيته واول ما دخلت معاهم البيت شافتهم ست كبيره فبصتلهم بقرف وقالت..
الست
استغفر الله العظيم يارب، ربنا يرحمنا برحمته..
جهاد بقلق وهي بتسأل عماد
مالها الست دي يا عماد. بتبصلنا كده. ليه؟..
رد عليها عماد بتوتر وقال
هه لا دي وليه خرفانه ربنا ما ادهاش خلفه لحد ما دماغها راحت منها متاخديش عليها انتي..
_دخلت معاه جهاد شقته ولقيتها مكركبه ومش نضيفه خالص، فقالتله وسالته..
جهاد
ايه ده يا عماد انت ليه سايب الشقه مكركبه كده؟..
ضحك عماد ورد عليها وقال
معلش بقي ما انا واحد قاعد اعزب لوحدي مين بقي هينضفلي وهيهتم بيا..
ردت عليه جهاد. وضحكت وقالت
ما تقلقش انا هرتبلك كل حاحه وان شاء الله ربنا يرزقك ببنت الحلال، هو بس انا هقعد فين؟..
عماد بسرعه قالها
الشقه كلها تحت امرك يا حبيبتي اقعدي في المكان اللي يريحك...
_دخلت جهاد. وقعدت في اضه بس كانت مكركبه كمان، نضفتها وبعدين طلعت عشان تنضف بره ما لقيتش عماد فروقتله البيت وغسلتله هدومه وبعدين نزلت جابت خضار وحاجات للبيت..
ــــــــ #بقلم_الكاتبه_رحاب_القاضي ـــــــ
_ وفي بيت جميله..
كانت فريده وايتن قاعدين بيفطرو وايتن قالتلها..
ايتن
يعني جميله وافقت علي الشغل عند اونكل عمار؟..
فريده
ايوه وبتجهز جوه اهو ورايحه الشغل..
ايتن بقلق
ربنا يستر بنتك مجنونه وطايشه وممكن ترجع بمصيبه..
فريده
عيب تقولي كده علي اختك، بالعكس انا نفسي تشتغل وتبقي شاطره عشان تروح المصنع عند عمك وتمسك نصيبكم وتشوف حقكم اللي هناك..
ايتن بحزن
ان شاء الله يا ماما..
_ طلعت في الوقت ده جميله وهي لابسه بنطلون جينز واسع وبلوزه بيضه طويله وعامله شعرها ضفيره وحطاها علي كتفها وقعدت جنبيهم وقالت..
جميله
فين البيض العيون يا ماما؟..
فريده
ما فيش لو عايزه اعملي لنفسك..
جميله
اممم ما هي لو كانت ايطن كنتي قولتي حاضر ومن عينيا..
ايتن
نفسي يا جميله مره واحده في حياتك تنطقي اسمي كويس،وبعدين انتي رايحه الشركه عند عمار المنشاوي كده؟!..
جميله
ايوه في حاجه ولا ايه؟..
ايتن
ايوه طبعا ده انتي ونازله تجيبي عيش بتبقي اشيك من كده..
جميله
يا عما روحي، المهم انا هنزل بقي وابقي افطر اي حاجه يلا باااي..
فريده
طيب خدي بالك من نفسك وكلميني طمنيني عليكي..
جميله
حاضر يا ماما..
فريده
اخدي كل حاجه لازمه معاكي اوعي تكوني ناسيه حاجه..
جميله
ايوه يا ماما اخدت كل حاجه والله..
فريده
طيب والفلوس معاكي فلوس زياده ولا لا؟..
جميله
يالهوي يا ماما والله معايا كل حاجه..
فريده
بطمن عليكي يا جميله روحي يلا وما تنسيش تكلميني..
_ طلعت جميله واخدت تاكسي ونزلت منه قدام شركة عمار ووقفت متنحه وقالت..
جميله
بقي انا هشتغل هنا...
_ ودخلت الشركه والكل كان بيبصلها بفضول من لبسها البسيط، بس هي ما اخدتش بالها وراحت سألت الاستقبال علي مكتب عمار وهما قالولها انه مستنيها في مكتبه في الدور التالت...
_ طلعت جميله هناك وقابلت السكرتيره اللي كان لبسها شبه باقي موظفات الشركه بس كانت اجمل منهم بكتير وقالتلها جميله..
جميله
اما السكرتيره تبقي كده اومال الباقي هيبقي ازاي..
فيروز
نعم؟..
جميله
جميله عبد الرحيم العدوي..
فيروز
اااه طيب عمار بيه مستنيكي جوه...
جميله
هو انتي السكرتيره صح، هتمشي امتي بقي؟..
فيروز
لا مش همشي انا بقالي تلات سنين هنا..
جميله
اومال هو جايبني ليه، علي العموم هاتلي عصير نانجا وكيك..
_ دخلت جميله عند عمار وفيروز بصالها باستغراب، وجوه كانت جميله قاعده قدام عمار اللي بيتكلم في الموبيل وبيقول..
عمار
تمام بكره هستناكم برغم اني مش مقتنع بس عشانك يا دارين..
دارين
اطمن يا عمار بيه انت هتكون كسباان اووي بالمقابله دي..
عمار
ان شاء الله..
_ قفل معاها عمار وبص لجميله اللي كانت بتتفرج علي المكتب بنظره كلها اعجاب وقالها..
عمار
حلو ذوقي ولا لا؟..
جميله
حلو طبعا وواضح انك صارف ومكلف علي الشركه دي..
ابتسم عمار وقالها
فين الـ c v بتاعك يا جميله..
طلعت جميله الملف بتاعها من شنطتها وقالت
ايوه اهو اتفضل...
اخده منها عمار وبص فيه وقال
طالعه بمقبول اخر سنه امم، وما فيش اي خبره كمان، تمام يا جميله انتي هتبدأي تدريب لتلات شهور وو.. جميله انتي معايا؟..
جميله وهي باصه علي الشباك وقالت
ممكن اطلب من حضرتك طلب؟.
عمار بقلق
اكيد خير؟..
جميله
صورني وانا واقفه عند الشباك هنا والنبي....
اتنهد عمار بضيق وقال
جميله ده مكان شغل وانا بحب النظام في الشغل و..
قامت جميله بسرعه وقالتله
والنبي صوره واحده بس والنبي بقالي سنه ما غيرتش صورة الانستجرام..
عمار بصدمه من تصرفاتها
انتي مش طبيعيه اقسم بالله، اقعدي يا جميله مكانك لو سمحتي..
جميله بحزن
ليه التناكه دي كل ده عشان قولتلك تصورني، طيب ايه رئيك انك هتصورني وغصب عنك كمان..
وقف عمار وقالها بحده
مستحيل انتي عايزه عمار المنشاوي يقف يصور موظفه عنده..
_ بعد شويه كان كل موظفين الدور واقفين عند شبااك السكرتيره وبيتفرجو علي عمار وهو بيصور جميله...
عمار
تعالي يمين شويه عشان الشمس جايه علي وشك..
جميله
اهو كده مظبوطه..
حط عمار موبيلها علي الترابيزه وطلع موبيله وقالها
موبيلك الكاميرا بتاعته وحشه هصورك من عندي وابعتهملك..
جميله بحماس
اول مره اتصور بأيفون يلا يلا..
ابتسم عمار ودخلت عنده السكرتيره وقالت
عمار بيه الاجتماع فاضله ربع ساعه..
_ بصلها عمار بتوتر وكمان للموظفين اللي واقفين يتفرجو وقال بتوتر..
عمار
ااا ايوه ماشي.. وانتو واقفين هنا ليه ما كل واحد علي شغله..
قربت منه جميله وقالت
وريني الصور كده..
عمار بتوتر
مش وقته..
جميله
يلا يا عموري بقي وريني ما تبقاش رخم..
كل الموظفين اتصدمو وعمار اداها الموبيل وقال
خديه خالص مش عايزه بس اسكتي، فيروز جميله هتبقي معاكي في السكرتاريه عايزك تعلميها كل حاجه عايزها في تلات شهور تبقي توب..
فيروز
تحت امرك يا عمار بيه تعالي معايا يا جميله..
جميله
الصور حلوين اوي يا عمار هستناك تبعتهملي علي الوتس يلا مش هعطلك علي شغلك..
_ طلعت جميله مع السكرتيره، وعمار بصلها بعدم تصديق وابتسم علي طريقتها وشخصيتها اللي خلته يتصرف لاول مره في حياته كده معاها...
ـــــــــ #بقلم_الكاتبه_رحاب_القاضي ـــــــــ
_بالليل في بيت يونس..
كانت شهد قاعده في الجنينه بتذاكر لولادها، وقعدت جنب يوسف وقالتله..
شهد
ايه اللي انت عامله ده يا ابني هو انا مش قولت نمشي علي الخط..
يوسف
اعملك ايه الكلام هو اللي بيقع من علي الخط..
شهد
صبرني يارب بص انت ركز في اللي بتكتبه وما تسرحش وهتلاقي نفسك ما نزلتش من علي الخط..
يوسف
ماما روحي شوفي يزن وانا هظبط الوضع..
شهد ابتسمت وقالت
لا والله وبعدين اخوك شاطر ومش محتاجني زيك ياللي فهمك بطئ زي ابوك..
رد عليها يونس اللي كان واقف قريب منهم وقال
زي ابوه ده انا بتشتم وانا مش موجود اهو..
ما ردتش عليه شهد وقالت لابنها
يلا هنبدأ من الاول يا حبيبي بس نركز..
يونس
تعالي يا شهد عايزك..
شهد
مش فاضيه الشغالين رجعو هيعملولك اللي عايزه..
قرب منها وقال بهدوء
انا عايز مراتي مش عايز الشغالين..
يوسف
يا ماما روحي بقي وارحميني..
ضحك يونس وقاله
جدع يااه ذاكر لوحدك بقي..
_ واخد يونس شهد معاه وطلعو اوضتهم وهي راحت قعدت علي السرير وهي مدايقه وهو قالها بهدوء..
يونس
انا اسف عشان اتعصبت عليكي..
شهد بحزن
عادي..
يونس قعد جنبيها وقالها
طيب ايه اللي مزعلك مني بقي؟..
شهد
ما فيش حاجه..
يونس
لا في وبلاش تتعاملي معايا كده يا شهد ياريت..
شهد بدموع
انت ما بقتش فاضيلي يا يونس وانا حاسه اني بقيت لوحدي في كل حاجه ومش لاقياك جنبي غير بتعمل واجبك وخلاص وكأنه هم عليك كمان..
مسك يونس ايدها وقالها
لا أطلب الكثير فقط رؤيتك لمدة لا تتجاوز عمراً كاملاً ..يعني يادوبك...
شهد ابتسمت وقالت
يعني ايه؟..
يونس
يعني لو عليا افضل جنبك العمر كله وبرضو مش هشبع منك وما تركزيش اووي انا حافظها بالعافيه.. بس والله العظيم الشغل تقيل اوي الفتره دي ومش عارف اخد نفسي حتي..
شهد بحزن
الموضوع مش يوم ولا اتنين ده سنين يا يونس وانا كاتمه في قلبي وساكته وبقول مسيره يشوف اني مدايقه وتحس انك بعدت عني..
يونس
خلاص مش هتتكرر وما تكتميش لو سمحتي اتكلمي معايا علي طول بلاش نعمل مسافات بينا..
شهد بهدوء
حاضر وانا كمان اسفه اني زعلتك..
يونس قرب منها وقال
طيب ايه مش يلا بينا..
شهد بتوتر
الولاد عندهم مذاكره وخلينا قاعدين معاهم شويه..
يونس
اللي تشوفيه ما هما كده كده هينامو العيال..
_ ابتسمت شهد وفضلو قاعدين مع بعض كلهم، بس شهد كانت بتبصله ومن جواها حاسه ان في حاجه كبيره بينهم مش عارفه تفهمها ولا عارفه تتكلم ولا تقول ايه بس مخوفها ومحسساها انه بعيد حتي وهو جنبيها..
ـــــــــ #بقلم_الكاتبه_رحاب_القاضي ـــــــــ
_ في بيت بسيط..
كان عماد قااعد هناك مع زكريا اللي كان نايم علي الكنبه وبيتفرج علي التلفزيون وقاله..
عماد
وبس جيبت اختي الشقه واخدت فلوسها معايا يعني بلاش تيجي عندي الفتره دي ولو احتاجت حاجه هبعتلك اللي علي مزاجك..
زكريا بجمود
هي اختك دي عبيطه عشان تديك فلوسها كده بسهوله..
عماد
دي عيله صغيره ويدوب عندها بتاع 17 او 18 سنه واخواتي مش بيحبوها عشان ابويا سابنا وراح اتجوز امها زمان وخلفها هي وبقي يحبها اكتر مننا وكده..
زكريا
انت جاي عايز اي يا عماد..
عماد
ندخل مشروع سوا بالفلوس اللي معايا...
ضحك زكريا وقاله
روح لـ لولا هتنفعك واهو شغلكم سوا انما انا مش هفتح مشروع خسران يا عماد..
عماد
حقك ما انت ابن المنشاوي وشويه شويه وتتصالح علي اخوك عمار المنشاوي وتبقي مليادير زيه..
زكريا بغضب
اطلع بره يا عماد ولما احتاج منك حاجه هبقي ابعتلك يلا بره..
عماد
طيب بالراحه طيب ما تذقش..
_ مشي عماد وطلع راجل كبير من اوضته وهو ساند علي عكازه وقال..
المنشاوي
واخرتها معاك انا مش قولت مليون مره ما تدخلش الاشكال دي البيت..عايز تقابلهم يبقي بعيد عني
قام زكريا وقاله بحده
ما تعليش صوتك عليا وتحمد ربنا اني قااعد معاك وبراعي عجزك..
المتشاوي بدموع
انت قليل الادب وبجح وعمرك ما هتكسب حاجه طول ما انت ماشي في الطريق بتاعك ده..
زكريا بحده
قول لابنك الحرامي يديني حقي في ورث امي وانا هبقي كويس..
المنشاوي بغضب
عمار مش حرامي ياريتك كنت ربع اخوك يا زكريا..
زكريا بسخريه
عمار مش حرامي مع انه سرق حقي، بس انا حرامي وهاخد منه كل حاجه ومش بس كده انا كمان مجرم وقتال قتله وكل يوم بموت حد بكل برود...
المنشاوي بحزن
ربنا يهديك ما اقدرش اقولك غير كده يا ابن المنشاوي..
_ قال كلامه وسابه ودخل اوضته، وكلم عمار وهو بيعيط وقاله..
المنشاوي
تعالي لاخوك يا عمار اخوك بيضيع والله..
عمار رد عليه وهو بيركب عربيته
هبقي اشوفه يا بابا المهم انت كويس وصحتك كويسه..
المنشاوي
ايوه كويس ابقي ابعتلي مروان ابنك اشوفه..
عمار
من عينيا يا بابا وخلي بالك من نفسك مع السلامه..
_ خلص كلامه وشال الموبيل في جيبه وشاور للسواق يمشي وكان مدايق جدا، ودخل بيته لقي مروان ابنه مستنيه وقاله..
مروان
هو انا كل يوم افضل كده مستنيك علي العشا..
عمار
بالظبط ولو اكلت لقمه من غيري هطفحهالك..
مروان
لا وعلي ايه استني احسن، تعالي بقي نتعشي..
_وقعدو ياكلو علي السفره الكبيره والشغالين واقفين جنبيهم عشان لو احتاجو حاجه، وبص مروان لباباه بقلق وقال..
مروان
طردتها ولا لسه؟..
عمار
هي مين دي؟..
مروان
جميله مش معقول تكون ما عملتش مصيبه..
ابتسم عمار لما افتكرها وقال
بالعكس بنت لذيذه وروحها حلوه، بس دماغها تعبانه شويه..
مروان
يعني هي لسه مكمله شغل عندك..
ساب عمار الاكل وقال
لسه قااعده انا عايزها تفضل قااعده بصراحه حابب وجودها..
مروان
يا بابا بلاش دي ده انا كرهت اسم المنشاوي بسببها..
عمار بفضول
ليه يعني مش فاهم؟..
مروان بغيظ
لان جميله هانم مسمياني بدل مروان المنشاوي مروان مشاوي..
_ضحك عمار بصوت عالي حتي الشغالين كمان ابتسمو علي الاسم اللي جميله ضيعت هيبته خالص، وعمار قال..
عمار
شوفت انا طلقت امك من 16 سنه بس ما فيش بنت عجبتني اوووي كده زي جميله..
مروان بصدمه
نعمممممم؟!..
عمار قام وقال
كمل اكلك وروح ذاكر بلاش مرقعه..
مشي عمار ومروان قال بصدمه
ابويا وجميله يا نهار اسود طارت ايتن خلاص..
ــــــ #بقلم_الكاتبه_رحاب_القاضي ــــــ
_ وفي بيت جميله..
من لما رجعت من الشغل وهي ماسكه موبيلها وبتتفرج علي صور عمار ومشغله اغاني رومانسيه، ودخلت عندها ايتن من غير ما تاخد بالها وقالت وهي باصه معاها علي الموبيل..
ايتن
يا نهار اسود عمو عمار؟..
جميله قفلت الموبيل بسرعه وقالت
لا لا لا انتي فاهمه غلط دد ده انا فتحت الصوره بالغلط؟..
ايتن بخبث
بالغلط واغاني حماقي وراسمك في خيالي دي بالغلط برضو..
قامت جميله وقفلت الباب وقالت بتوتر
بصراحه كده انا وقعت وغرقت في صاحب الشعر الابيض..
ايتن بسخريه
بقي انتي فاكره ان عمار المنشاوي هيبصلك..
جميله بغيظ
ليه ان شاء الله مالي رفيعه حبتين وقصيره شويه بس تتظبط حاجات مقدور عليها يعني..
ايتن
مش قصدي كده انتي حلوه وكل حاجه، بس ده عمو هااا عمو عمار..
جميله بضيق
خلاص انسي كانك ما سمعتيش حاجه..
ايتن
طيب ما تتقمصيش كده هو انتي عاجبك فيه ايه، غير الخصله البيضه؟...
جميله ابتسمت وقالت
شخصيته تعرفي ده متواضع جدا برغم انه اسم كبير وكده بس بيعامل الموظفين كأنهم شغالين معاه مش عنده، بيعاملهم عادي وبيهزر معاهم وهما بيحبوه جدا، نظراته كده وطريقته بصي هزني كده انا ما فيش حد اثر فيا كده زيه..
ايتن ضحكت وقالت
مش قادره اتخيل انتي وعمو عمار يا نهاري بجد لا لا مستحيل ده لو ماما عرفت..
جميله قاطعتها وقالت
اسكتي خالص ماما مش لازم تعرف حاجه عن كلامي ده، انا وعمار مجرد مدير وموظفه عنده وبس قدام ماما تمام..
ايتن
خلاص خلاص تمام....
_ في الوقت ده كانت فريده واقفه ورا الباب وقالت لنفسها بقلق..
فريده
معقوله الراجل غفلني وخد بنتي البريئه الغلباانه عشان يضحك عليها لااااا انا لازم اروح الشركه دي بكره واشوف ايه اللي بيحصل من ورا ضهري...
_ تفتكرو هيحصل ايه هناك اصلا؟..
ـــــــ #بقلم_الكاتبه_رحاب_القاضي ــــــ
_ وتاني يوم في مدرسة مروان وايتن..
دخلت المدرسه بعد ما وصلتها فريده ولقيت مروان واقف مع بنت وبيضحكو، فقربت منهم وقالت..
ايتن
ما تضحكوني معاكم..
مروان بقلق
لا ما فيش حاجه انتي جيتي امتي؟..
البنت بخبث
خلاص يا ميرو نكمل كلامنا وقت تاني..
مشيت البنت وقالت ايتن
والله ميرو بقي مخلي واحده غيري تقولك يا ميرو..
مروان
ما هو دلع اسم مروان ميرو اغير امه ازاي انا..
ايتن بحزن
لا ما تغيروش انا اسفه..
جات تمشي بس هو مسك ايدها وقالها
لا انا اللي اسف واوعدك ان ما فيش واحده ولا واحد هيقولي يا ميرو غيرك انتي مبسوطه كده؟..
ايتن ابتسمت وقالت
ايوه وهكون مبسوطه اكتر لما ما تكلمش بنات خالص..
مروان بتوتر
هااا طيب بعيد عن اللي بتقوليه ده، جميله قالتلك ايه علي بابا والشغل هناك؟..
ايتن بهدوء
عادي قالت انه كويس وبيعاملها كويس ومدير كويس يعني..
مروان
ايوه بالظبط ده نفس اللي قاله بابا انها موظفه كويسه..
ايتن
بجد هو قال كده؟..
مروان ابتسم وقال
ايوه بصراحه مش عارف ازاي اختك فلحت في الوظيفه دي..
ايتن
والله ولا انا كمان، يلا ربنا يستر..
مروان بقلق
معاكي حق ربنا يستر.. يلا بينا نشوف اللي ورانا..
ــــــــ #بقلم_الكاتبه_رحاب_القاضي ــــــــ
_ وفي شركة عمار الشناوي...
كانت يونس قاعد هناك مع يوسف ودارين، وقدامهم عمار اللي ماسك الملف بتاع المشروع بتاعهم، ويوسف قاله...
يوسف
وطبعا يا عمار بيه زي ما حضرتك شايف احنا المشروع بتاعنا لو تم واتنفذ صح هنضرب كل المنتجات التانيه..
يونس
الصفقه هندخل فيها وانت معانا يعني هنكسبها اكيد..
عمار ساب الملف وبصلهم وقال
بس انا ممكن اكسب الصفقه لوحدي من غير حد معايا ايه بقي اللي هيخليني اوافق بعرضكم؟..
جه يوسف يتكلم بس يونس قال بسرعه
النتيجه لو حضرتك لوحدك الصفقه دي تأثيرها هيكون مش كبير في السوق زي ما هنكون مع بعض فيها انا ناوي علي العالميه مش محلي وبس..
عمار بهدوء
تمام كلامك اقنعني بس مشروعك لا، انا ممكن اجيبلك اقل حد عندي يقدملي مشروع للصفقه احسن من بتاعك..
اتعصب يونس ويوسف قال بسرعه
ممكن نغيره وو..
قاطعه يونس لما وقف وقال
انت بتتكلم كده علي اساس ايه، انا جيت اقدم شغل هينفعك قبل ما ينفعني بس شغلي ما فيش زيه والصفقه دي هاخدها انا وهتم بمشروعي انا...
وقف عمار قدامه وقال
تمام لو قدرت تاخدها يبقي مبروك عليك...
وبص لدارين وقال
شرفتو يا دارين ابقي وصلي سلامي لفتحي بيه..
_ قال كلامه بكل هدوء وسابهم وطلع، ويونس مشي هو كمان وهو متعصب، وراح ورااه يوسف وقاله..
يوسف
في ايه يا يونس ما تهدي شويه وكنا هنوصل لحل..
يونس بعصبيه
انا ما حدش يتريق علي شغلي يا يوسف والواد ده والله لانزله للارض...
يوسف بضيق
طيب اهدي مش كده والله...
جات دارين ومسكت ايده وقالت
اوعدك اني هقف جنبك وهخليك تاخد الصفقه دي، بس المفروض تتعامل معاه بهدوء شويه..
سحب ايده منها وقال
لو سمحتي انا مش قادر اتكلم دلوقتي..
يوسف
ولا انا ومش طايق حد برضو..
تجاهلت دارين كلام يوسف وقالت ليونس
خلاص هسيبك تهدي ونتقابل وقت تاني...
_ وسابتهم ومشيت، ويوسف قلد طريقتها وقال..
يوسف
اوحدك اني حأف كنبك لحد ما تاخد السفكه، ايه البت المسهوكه دي ما احبش انا البنات دي..
يونس طلع موبيله اللي بيرن وقال
استني اشوف شهد عايزه ايه...
ورد علي شهد وقالها
اهدي طيب اهدي خلاص جاااي اهدي ياا شهد..
قفل معاها ويوسف سأله بقلق
مالها شهد في ايه؟..
يونس بضيق
الاستاذ يزن ابني عور واحد صاحبه في الحضانه..
ضحك يوسف وقال
ههههههه هو هيجيبه من بره....
يونس
انا مش فاضيلك شهد هناك لوحدها ولازم اروح بسرعه، هخلص واجيلك علي الشغل..
_ وفعلا مشي يونس وراح المدرسه بتاعت ولاده، واول ما دخل اوضة المدير شاف شهد قاعده وحاضنه ولادها وبتعيط وهي خايفه وواحد واقف قدامها وبيزعق فيها وبيقولها..
الراجل
مدام مش بتعرفو تربوهم بتدخلوهم مدارس زي دي ليه هو نافصين اشكال زيكم؟..
_ تفتكرو يونس هيعمل ايه؟...
ـــــــ #بقلم_الكاتبه_رحاب_القاضي ـــــــ
_وفي بيت عماد..
كانت جهاد بتجيب طلبات للبيت وهي وراجعه لقيت الست جارتهم بتبصلها بقرف، فسألتها جهاد بضيق وقالت..
جهاد
هو انا عملتلك حاجه يا طنط ليه بتبصيلي كده؟..
الست نورا بحده
هو انا كلمتك ادخلي يا اختي احسن الواد اللي جايبك يجي وما يلقكيش..
جهاد
انتي تقصدي مين، قصدك عماد اخويا؟...
الست نورا بسخريه
اخوكي قال اخوها قال هو انا عبيطه عشان اصدق كلامك ده، تلاقيكي وحده من اياهم..
جهاد بسرعه ردت عليها وقالت
لا والله انا اخته حتي بطاقتي اهي ونفس اسم الاب اهو..
_مسكت الست نورا البطاقه وقراتها وبعدين بصت لجهاد ولبسها الواسع وحجابها وكمان وشها باين عليه البراءه، فاتنهدت بضيق وقالتلها..
الست نورا
والله ازاي انتي بس اخت الواد ده..
ردت عليها جهاد بحزن وقالت
لو سمحتي يا حجه انا مسمحلكيش تقولي علي اخويا كده، هو يمكن تصرفاته مش مظبوطه شويه بس عشان يا حرام عايش لوحده انما انا مسمحش لحد يقول عليه حاجه غلط واسكت..
الست نورا بضيق قالتلها
خلاص يا بنتي انا مقصدش ويمكن ربنا هدااه ويلم نفسه بعد ما جاب اخته تقعد معاه، بعد اذنك...
_دخلت الست نورا بيتها وقفلت الباب، وادايقت جهاد من كلامها ودخلت شقتها وكان عماد برضو لسه مجااش، ودخلت المطبخ وعملتله اكل وفضلت قاعده قدام التلفزيون لحد ما جه عماد...
جهاد بضيق
كل ده يا عماد بقي تبات امبارح قاعد، وانا سايبني هنا لوحدي ..
رد عليها عماد بعد ما قعد جنبيها وقال
معلش يا جهاد بس كنت بخلص الورق بتاع البيت عشان نبيعه ونخلص...
جهاد
ماشي يا عماد ربنا يوفقك هروح اجهزلك الغداا..
عماد بفرحه
وكمان عملتي غدا فعلا الستات بتعمل جو حلو للبيت، ده انتي خلتيها شقه معتبره بعد ما كانت زريبه..
ضحكت جهاد وقالتله
عقبال ما تجيلك بنت الحلال اللي تريحك علي طول يا حبيبي..
دخلت جهاد المطبخ عشان تجهزله العشا وهو بصلها بخبث وقال لنفسه بسخريه..
عماد بخبث
طيبه اووي البت دي، بس معلش اهي هتنفعني كتير...
_تفتكرو عماد ناوي علي ايه مع اخته؟
ـــــــ #بقلم_الكاتبه_رحاب_القاضي ــــــ
_ وفي شركة عمار المنشاوي...
كانت جميله واقفه بتعمل قهوه ووقف عمار قريب منها وبصلها بهدوء وقال..
عمار
بقالي تلات سعات مستني القهوه..
جميله
ما انا مش بعرف اعملها بوش فبتبوظ مني وبعدين ليه طلبت اني اعملها بنفسي؟..
عمار بهدوء
عشان سبق وقولتلك اني بحبها من غير وش كفايه انك بتعمليها بنفسك..
جميله
ربنا يجبر بخاطرك..
_قبل ما ترد عليه قرب منهم العميل اللي كان في المطعم يوم مو قابلت العريس وقال..
العميل
لا لا ده انا حظي حلو اوووي عشان اشوف العروسه تاني هنا..
الموظفين كلهم بصولهم، وعمار قال
حضرتك بنفسك هنا هو مش الاجتماع بكره..
العميل
ايوه ايوه عارف بس انا جاي اعزمك انت والانسه خطيبتك علي عيد ميلاد شذي بنتي بكره دي هي موصيااني اجي اقولك بنفسي عشان تجيب العروسه معاك....
واحد من الموظفين
هو حضرتك خطبت يا عمار بيه الف مبروك..
موظف تاني
ربنا يتمم ليك بخير يا عمار بيه..
موظفه تانيه
الف مبروك يا عمار بيه العروسه زي القمر ربنا يسعدكم.
_والكل اتلم عليهم عشان يبارك ليهم، وفي الوقت ده دخلت فريده وجميله اتخبت ورا عمار وقالت...
جميله
يا نهار اسود ماما..
عمار بنفاذ صبر
ما هي كانت ناقصه اصلا..
_ تفتكرو ايه اللي هيحصل؟
يتبع....
لقراءة الفصل الرابع اضغط على : ( رواية الجميلة والشعر الأبيض (موضوع عائلي 2) الفصل الرابع )
لقراءة باقي الفصول اضغط على : ( رواية الجميلة والشعر الأبيض (موضوع عائلي 2) )