رواية صاحب مفتاح الشقة الحلقة الرابعة 4 بقلم عمرو راشد
رواية صاحب مفتاح الشقة الجزء الرابع 4 بقلم عمرو راشد
رواية صاحب مفتاح الشقة البارت الرابع 4 بقلم عمرو راشد
 |
| رواية صاحب مفتاح الشقة الفصل الرابع 4 بقلم عمرو راشد |
رواية صاحب مفتاح الشقة الفصل الرابع 4 بقلم عمرو راشد
ما تشوفي حل في جوزك دا،، انا زهقت
= ولا يهمك انا هربيه المهم انت متزعلش
هو القميص وحش بجد؟
= دا انت كدا بتشكك في ذوقي بقا
أمجد الزفت دا هو بيشككني في نفسي
= سيب أمجد عليا وانا هاخدلك حقك منه بس يلا اخرج بسرعة قبل ما حد يشوفنا
" ساعتها مشيت بسرعة من جنب المطبخ و رجعت على الصالة وكملت اليوم بشكل طبيعي جدا لحد ما رجعنا وهنا بدأت المشكلة
انت مش شايف انك زودتها شوية؟
= زودتها ازاي يعني؟
انت احرجت صلاح جدا النهاردة
= هو اللي احرج نفسه لما يقارن نفسه بيا
وهو انت مين اصلا؟ انت كنت زيه في يوم من الايام لحد ما اتجوزتني وساعتها مسكت الشركة وبقيت مسؤول عنها وعن باقي املاكنا لكن غير كدا انت مكنتش تملك أي حاجة يعني احنا السبب في كل اللي انت فيه دا ف متنساش نفسك يا أمجد
= كل اللي أنا فيه دا من تعبي ومجهودي،، انا لو مش شاطر مكنتش مسكت الشركة،
برضو بمزاجنا يا أمجد
= انتي عايزة ايه دلوقتي ممكن اعرف؟
تكلم صلاح دلوقتي حالا وتعتذرله
= اكلم مين؟،، انتي مجنونة شكلك
انت من امتى وانت بترفضلي طلب؟
= انا عمري ما رفضتلك طلب بس الا دا،، انا مش هعمل كدا يا منال
بس انت هتعمل كدا يا أمجد
= خايفة على مشاعره ومش خايفة على كرامة جوزك
جوزي هو اللي مصمم يحرج نفسه و دي النتيجة
= وانا مش هعمل كدا
يبقا انت مش هتبات في البيت دا النهاردة
= نعم؟،، اومال هبات فين؟
دي مشكلتك مش مشكلتي،، اتصرف و بات في اي مكان يعجبك ولما تعقل وتعرف انت بتكلم ابقا ارجع غير كدا انت ملكش وجود هنا
= يعني دا اخر كلام عندك يا منال؟
ومعنديش غيره
" لإرضاء الشخص المغرور هو انك تنفذ اللي هو بيقوله بس انت في دماغك ممكن تعمل عكسه تماما بس مجرد التنفيذ وانك تمنحه احساس الانتصار دي لوحدها درع حماية ليك عشان بعدها تعرف تكسب انت وكله متوقف على ذكائك،، نزلت من الشقة حتى من غير ما اجيب هدومي و ركبت العربية و روحت على شقة ناهد،، فتحت الباب و دخلت و قعدت وبعد دقايق لقيتها خارجة من جوا
انا مش مصدقة نفسي،، انت جاي دلوقتي ازاي؟
= حظك حلو
دا أبواب السما مفتوحة بقا مش حظي بس اللي حلو
= اشمعنا؟
اصل انا دعيت انك تيجي تبات معايا النهاردة
= و اهي حصلت وجيت
نورت بيتك يا حياتي،، تحب احضرلك تاكل؟
= فاكرة لما قولتلك ايه الحاجة اللي متقدريش تشتريها؟
راحة البال صح؟
= صح وعشان كدا منال سلمت نفسها لينا بدون اي مجهود
ازاي؟
= منال على علاقة ب صلاح جوز اختها
دا الموضوع كدا رايح في سكة تانية،، بس ازاي انت مكنتش تعرف؟
= كنت شاكك من بدري ان في حاجة بينها وبينه بس معنديش دليل
بقا حد يسيب أمجد العطار ويروح ل صلاح؟
= الغرور يا ناهد،، اقذر صفة ممكن تكون في بني آدم،، منال مش عايزة حد يبقا احسن منها وعشان كدا هي مبقتش تحبني لإني بقارن نفسي بيها وناجح في دا فعلا لكن مش عايزة كدا،، هي عايزة اللي حواليها دايما اقل منها زي صلاح كدا،، رغم ان اختها معاها فلوس يعني المفروض صلاح دا يكون باشا بس شكله معف*ن،، عشان كدا هو عاجبها
وهتعمل ايه؟
= من اللحظة دي منال مش هتنام ولا هترتاح ثانية واحدة
ناوي على ايه يا أمجد؟
= اسحب منها راحة البال
ازاي بقا فهمني؟
= كل حاجة في معادها يا ناهد
طب انا ايه المطلوب مني؟
= كملي في اللي أنتي بتعمليه وخلاص ولما يكون في حاجة جديدة هقولك
حاضر المهم انت متضايقش ولا تزعل
= انا بزعل على اللي قدامي،، بزعل على جهله من اللي هيتعمل فيه
انت ناوي تقت*لها؟
= مرحلة القت*ل دي لسة قدامها شوية،، الاهم من القت*ل هو المو*ت بالبطئ وانك تبقا بتتمناه وميحصلش
بس خلي بالك من نفسك يا أمجد،، منال مش سهلة
= أمجد العطار مبيخافش من حد يا ناهد
" لقيتها بتطبطب على كتفي وقالتلي
طب تعالى ندخل جوا
= لا أنا هنام هنا النهاردة
ليه يا حبيبي ماهو السرير موجود
= ادخلي نامي يا ناهد و سبيني انا مرتاح هنا
اللي يريحك يا حبيبي
" أسوأ انتقام هو الانتقام اللي يجيلك من القريب لانه بيكون عارف عنك كل حاجة،، الحاجة اللي بتخاف منها،، الحاجة اللي ممكن توجعك،، نقطة ضعفك بتكون باينة قدامه و يقدر يدوس عليها بكل سهولة عشان كدا دايما يقولو ان الضر*بة اللي بتيجي من القريب بتو*جع اكتر،، بعد ما ناهد دخلت تنام كملت انا على الكنبة وفضلت صاحي مكنتش عارف انام،، طول الليل مخي صاحي وبيفكر لحد ما رسمت كل حاجة وبقيت متوقف على التنفيذ،، الصبح طلع عليا وانا لسة صاحي ولقيت ناهد خرجت من الأوضة وجات قعدت جنبي
انت لسة صاحي من امبارح يا حبيبي؟
= مش هعرف انام طول ما انا لسة معملتش اللي أنا عايزه
وهو ايه اللي انت عايزه؟
= السيطرة على كل شئ،، ابقا مالك كل حاجة على الأرض،، ابقا انا القوة والنفوذ و الحاكم،، انا الجنة للي معايا ونار جهنم على اللي يبقا ضدي،، ابقا العدل والظلم،، كل المعايير تكون في ايدي وابقا انا المتحكم فيها وساعتها بس هرتاح
طب وانا؟ مش هتفتكرني بأي حاجة؟
= انتي ليكي الامان والجنة معايا طول ما انتي بتنفذي اللي أنا عايزه
و انا تحت رجلك يا سيد الرجالة
= انا هقوم اغير هدومي وهنزل
رايح فين؟
= غايب عن امي بقالي أكتر من يومين و دا مينفعش
وهترجع امتى؟
= لما هرجع هتعرفي
#بقلم : #عمرو راشد
" دخلت غيرت هدومي بالفعل ونزلت روحت ل امي،، دخلت عندها و قعدت معاها
اومال فين مراتك؟
= في البيت يا ماما
هي اللي كانت مانعاك تزورني؟
= انا محدش يقدر يمنعني عنك،، كل الموضوع اني كنت مشغول شوية في الشغل
" مردتش عليا ولكن فضلت تبصلي وهي ساكتة وبعد دقيقة اتكلمت وقالت
مالك يا أمجد؟
= انا كويس يا امي
شكلك مبيقولش كدا،، انت متخانق مع مراتك؟
= كل حاجة زي الفل يا امي متقلقيش
مشكلتك انك بتكتم اكتر ما بتحكي يا أمجد و دا ياابني غلط،، كدا غلط عليك، لو في حاجة مضايقاك قول واحكيلي
= صدقيني لو في حاجة انا مكنتش هتردد ثانية وكنت هحكيلك
طب اومال في ايه؟
= دا العادي يا امي،، معنديش جديد
عرفت اني كان عندي حق لما قولتلك انت مش مرتاح
= قصدك عشان منال يعني؟
منال دي من يوم ما ظهرت مشوفناش حاجة كويسة وأنا حذرتك كتير من الجوازة دي وانت مسمعتش كلامي
= كل واحد بيختار نصيبه يا امي
نصيبي يريحني ميتعبنيش
= و افرضي اني مكتوب عليا التعب والشقى في الدنيا هعترض يعني؟
ونعم بالله ياابني،، بس على الاقل الاقي مكان ارتاح فيه،، البيت دا اساس الراحة لاي بني آدم مينفعش اهرب منه
= وانتي مين قالك اني هربان بقا؟
عشان حالتك دي عدت عليا كتير لإني كنت بعملها زيك كدا بالظبط،، لما كنت اغضب من ابوك كنت اروح عند اهلي ومكنتش بحكي حاجة زي ما انت بتعمل كدا بالظبط،، وهما كانو يسألو كتير أوي عن اللي حصل وانا اجابتي كانت زي اجابتك برضو،، كل اللي انت بتقوله دا انا عديت بيه قبلك
= طب يا امي انا كنت جاي اطمن عليكي والحمدلله اطمنت،، انا همشي
و دا برضو كان نفس رد فعلي لما بحس اني زهقت من كلامهم كنت بقوم واسيبهم وامشي و ارجع ل ابوك تاني عشان يضغط عليا تاني ويزعلني اكتر
= لو كنتي اتطلقتي من بدري كان الموضوع خلص
عشان مكنش من السهل اد*مر حياتي بإيدي،، انت كنت موجود وخايفة عليك لما تكبر وتلاقي ابوك و امك متطلقين،، إنما في حالتك انت دي انت مش معاك طفل ف عشان كدا بقولك اهرب
= صدقيني يا امي حتى لو انا مكنتش معاكي برضو مكنتيش هتعرفي تطلبي الطلاق،، الحياه دي مكتوبة عليكي وهتعيشيها بالطول والعرض ف مفيش هروب منها
الله اعلم دي حاجة في علم الغيب
= دي الحقيقة
الله اعلم برضو
= عموما انا همشي ولو احتاجتي اي حاجة كلميني و انا كل يومين هجيلك
" مش من العدل انك تبقا عايش في حياه بتتأ*ذي فيها ومتعرفش تمشي منها،، بس دا لما تبقا زي امي،، ست غلبانة ومش قادرة تعمل حاجة انما انا قادر اعمل كتير أوي وفعلا انا بدأت دلوقتي في تنفيذ اول خطط للانتقا*م،، بعد ما نزلت من عند امي كانت الساعة لسة 5،، فضلت ماشي بالعربية في الشارع لحد ما الساعة بقت 8 وبكدا الوقت يكون مسموح اني اعرف انفذ خططي،، اتجهت بالعربية على شقة حماتي العزيزة،، وصلت هناك و رنيت الجرس وبعد دقيقة الباب اتفتح ودخلت بعد ترحيب منها،، قعدت معاها واتكلمت
ينفع كدا يا حماتي؟،، ينفع اللي منال بتعمله دا؟
= عملت معاك ايه البت دي؟
عايزاني اكلم صلاح واعتذرله
= دا ليه دا ان شاء الله؟
عشان هزرت معاه هزار تقيل شوية امبارح
= عادي انتو رجالة مع بعض وبعدين هو صلاح لسانه مقطوع يعني،، لو كان عايز يرد كان رد عليك إنما هو سكت عشان هو غلطان من الأول
هي بقا مش راضية تقتنع بالكلام دا
= سيبك منها و اوعى تعمل اللي هي بتقول عليه دا
طب انا اعمل معاها ايه؟
= زي ما اي راجل بيعمل مع مراته،، تاخد موقف منها
مبعرفش اقسى عليها،، انا بحبها أوي
= يا واد ماهو الحب اللي بيخليها تعمل معاك كدا
اعمل ايه بقا؟،، لو مش هحبها هحب مين يعني؟
= والله البت دي عبيطة،، حد يلاقي حد يحبه كدا في الزمن دا؟
ربنا يهديها يا حماتي،، المهم أنتي متقوليش ليها أي حاجة،، انا جاي افضفض معاكي بس شوية
= لا طبعا لازم اكلمها عشان تتربى شوية
عشان خاطري انا بلاش،، انا لما أكون محتاجك هقولك
= اعمل اللي انت عايزه يا أمجد
ربنا يخليكي لينا يا حماتي
= ويخليك يا حبيبي،، ثواني بقا اقوم اعملك حاجة تشربها
لا طبعا وهو دا ينفع؟، هقوم انا اعمل
= يا نهار اسود ميصحش طبعا،، هقوم انا اعمل استنى
وغلاوتي عندك ما تتعبي نفسك،، هقوم انا اعمل
= طب اعملنا شاي بلبن بقا وهتلاقي عندك كنافة في الفرن هاتها
من عنيا
" دخلت المطبخ وخفيت الابتسامة من على وشي و بدأت اعمل الشاي و بعدها حطيت السم في الكوباية بتاعتها،، بعدها بصيت على ساعتي كانت الساعة 10 وفي نفس التوقيت دا كان في 2 بيهج*مو على بيت منال عشان يسر*قوه وطبعا مش محتاج اقول مين اللي بعتهم،، طبعا انا،، لازم منال تترعب،، لازم تعرف انها محتاجاني،، بعد ما خلصت خرجت برا بالصنية وحطيتها قدامها مع ابتسامة خفيفة وقولتلها
اتفضلي يا حماتي بالهنا والشفا على قلبك
" عشان تعرف تلاعب الافعى لازم تمشي ناحيتها بهدوء وبكل ثقة وبعدها تقطع ديلها ف تكون الفرصة قدامك اكبر انك تقطع راسها،، ونقطة ضعف الافعى اقصد منال يعني هي أمها،، حماتي بدأت تشرب من الكوباية المسمومة بس في اللحظة دي الباب خبط،، خدت نفس عميق وقومت فتحت الباب لقيتها بنت في العشرينات من عمرها،، شكلها جميل،، خط*فتني من اول نظرة مش هقدر انكر بعدها سمعت صوت حماتي وهي بتقول
تعالي يا شهد
" خليتها تدخل بس كنت مراقبها كويس بعدها قعدت جنب حماتي اللي سابت الكوباية وبدأت ترحب بيها و بعدها قالتلي
دي شهد بنت جارتنا اللي فوق
" بصيتلها وأنا مبتسم وقولتلها
اهلا وسهلا
" حماتي بعدها عرفتها بيا،، لكن البنت كانت مكسوفة ومتوترة وقالت
طب انا كنت جاية اطمن عليكي،، هجيلك بقا في وقت تاني
" وفعلا قامت مشيت بس وانا بقفل الباب وراها سمعت صوت تليفون حماتي بيرن و بعدها هي ردت وقالت
حرامية ايه؟،، يا نهار اسود طب أنتي كويسة؟!!
يتبع....
لقراءة الفصل الخامس اضغط على : ( رواية صاحب مفتاح الشقة الفصل الخامس )
لقراءة باقي الفصول اضغط على : ( رواية صاحب مفتاح الشقة )