 |
| رواية صاحب مفتاح الشقة الفصل السادس 6 بقلم عمرو راشد |
رواية صاحب مفتاح الشقة الفصل السادس 6 بقلم عمرو راشد
تقبلي تتجوزيني،، تقبلي تكوني تحت أمري انا،، أمجد العطار صاحب مفتاح الشقة
= بس انت متجوز
ومالو تبقي الرابعة
= هو انت متجوز تلاتة؟
ايوا بس محدش يعرف
= ومنال؟
ملكيش دعوة ب منال،، انا عايز رد منك
= طب سيبني افكر،، انا محتاجة وقت
الجنة مبتستناش حد يا شهد،، انا عارف ان عندك طموح وحلم كبير عايزة توصليله
= ومنال مش هتزعل؟
متخافيش منها وميبقاش عندك قلق منها،، منال مكانها في النار واحنا لينا الجنة،، الجنة معايا انا وبس
= طب ارجوك سيبني افكر،، انا محتاجة وقت
وأنا مش هضغط عليكي،، براحتك خالص
" الإغراء للبني آدم شئ عظيم تقدر تخليه يعمل أي حاجة،، واي حاجة هنا مقصود بيها أي حاجة حرفيا،، يعني تخيل لو جيبت واحد من الشارع وقولتله اعمل حاجة معينة ومقابلها مبلغ كبير من المال تفتكر هيعمل ايه؟،، طبعا هيوافق من غير تفكير،، ما بالك بقا لو قولتله هخليك تملك كنوز الأرض،، تعيش في الجنة طول عمرك ومش انت بس،، انت وولادك و احفادك كمان يبقا طبعا لازم يوافق،، في اليوم دا أنا رجعت البيت لقيت منال نايمة بس لحسن حظي ان حماتي العزيزة كانت صاحية و تعبانة كالعادة،، كانت لسة خارجة من الحمام،، قربت عليها ومسكت ايدها عشان تتسند عليا بعد ما رسمت وش المسكين
الف سلامة عليكي يا حماتي
" ردت عليا و روحها غايبة عنها
الله يسلمك
= عارفة أنتي علاجك ايه؟
ايه؟
= لمون،، كوباية لمون من ايدي هتخليكي زي الفل
انا مليش نفس
= اسمعيني بس وصدقيني هتبقي كويسة
" مشيت بسرعة من قدامها من غير ما اسمع منها رد و روحت على المطبخ وبدأت اعمل كوباية اللمون وحطيت جرعة السم بتاعتها و رجعت بيها تاني وشوفتها وهي بتشربها قدامي وبتشكرني بعدها و دي حاجة جميلة انك تقدم خدمة جميلة ل بني آدم زي دا،، خدمة هتريحه من تعب الحياه وترحمه من تعبه،، بعد ما حماتي شربت اللمون دخلت تنام تاني،، وأنا كمان دخلت انام بعدها بس لما صحيت تاني يوم لقيت الحالة زادت أكتر واكتر على حماتي لدرجة انها بقت راقدة في السرير،، مش قادرة وواضح ان تعطيل الوظائف في جسمها بدأ يشتغل،، منال شافتني وانا بلبس عشان انزل،، جات وقفت وعنيها جواها شر
هو انت رايح فين؟
= نازل عندي شغل
انت عايز تنزل وماما تعبانة؟
= طب انا هعمل ايه يا حبيبتي؟،، احنا روحنا بيها للدكتور وكتب علاج،، ايه المطلوب تاني؟
ماهي لو دي امك كنت اتصرفت
= انتي عارفة اني بعتبر امك زي امي بالظبط
بس مش امك
= انتي عايزة ايه يا منال؟
مش عايزة حاجة،، انا هتصرف
= هتتصرفي تعملي ايه يعني؟
ملكش دعوة انزل شغلك وملكش دعوة بيا نهائي
= برضو
أمجد بقولك ايه،، ابعد عني و سيبني خالص دلوقتي
= اسيبك؟
" صرخت في وشي وقالتلي
امشي ابعد عني قولتلك،، سيبني بقا
" الانهيار بيكون صعب جدا على اي بني آدم،، بالذات لو شخص زي منال،، حالة منال دي مش غضب بالعكس دي بداية كسر ضلع منال،، بداية الانهيار ليها،، و دي حاجة انا مستمتع بيها جدا الصراحة،، حاجة مستنيها من زمان،، وصلت بيت ناهد وطلعت الشقة وفتحتها ودخلت لقيتها خارجة من المطبخ
حمدالله على سلامتك يا حبيبي
= الله يسلمك،، انتي بتعملي ايه
كنت بحضر الاكل
= طب سيبي الاكل وتعالي عشان عايزك
" مشيت ورايا وجات وقعدنا على الكنبة
انتي عملتي ايه مع منال؟
= من يوم عيد الميلاد متكلمناش
انا قولتلك اكتر من مرة اني عايزك تبقي اقرب واحدة ليها
= مانا مش عايزاها تشك في حاجة
ولو شكت هتعملي ايه؟
= مش عارفة
ازاي مش عارفة،، منال لو شكت فيكي لازم تثبتيلها انك معاها وبتحبيها،، لازم منال تعرف وتحس وتبقا متأكدة مكان انك اقرب واحدة ليها،، دورك انك تطمنيها فهمتي؟
= انا حاسة بخوف
مرات أمجد العطار مينفعش تخاف،، مينفعش لاي سبب،، انتي لازم تبقي قوية مفيش اي حاجة تقدر تأثر فيكي
= طب انت عملت ايه امبارح بعد ما مشيت من هنا؟
روحت ل شهد
= شهد مين؟
واحدة جديدة
= هتتجوزها؟
اه
= اشمعنا دي؟
اولا شهد جيران منال يعني ضر*بة هتكسرها و ثانيا البت دي غريبة،، عنيها فيها حاجة غريبة،، عندها طموح كبير أوي،، عايزة توصل بأي شكل وانا هعرف استغل دا كويس
= وكدا نقدر نقول مبروك ل صاحب مفتاح الشقة
لسة لما الموضوع يتم متستعجليش
= طب ونورا؟
خدت منها الموافقة امبارح
= انا نفسي اعرف انت متجوزها ليه؟
نورا دي كنز وكنز لا حصر له،، هي نور فعلا نازل من السما،، بني آدمة صافية جدا من جواها و هو دا سبب جوازي منها،، لما بشوفها بحس اني و*سخ اوي عشان كدا مش بروحلها عشان عايز اكمل في اللي انا بعمله،، مش عايز اقف نهائي
= بتفكر ترجع؟
لو رجعت يبقا مستاهلش الجنة،، مستاهلش اللي انا وصلتله
= انت عايز توصل لكل حاجة يا أمجد و دا مش صح
وانا هاخد كل اللي أنا عايزه من الدنيا،، اصل انا مش خسران حاجة،، معنديش حاجة اخسرها ولا اخاف عليها،، لازم دايما عشان تعرف تعيش تمشي على مبدأ يإما تعيش او تمو*ت،، لازم تتعامل مع كل لحظة في حياتك أنها اخر لحظة عشان تعرف تستمتع بيها وتعيشها صح
= ومش ممكن تخسر؟
الجبان هو اللي بيخسر وانا مش جبان
= والشاطر ممكن يقع يا أمجد
ومين قال اني شاطر؟،، انا بحا*رب ضد الدنيا وانا عارف اني هكسب
= انا اهم حاجة عندي انك تبقا معايا
يبقا تسمعي كلامي وتنفذي اوامري بالحرف الواحد وتشيلي الخوف من جواكي دا لو عايزة تبقي معايا فعلا
" كنت قاعدة مش عارفة اعمل ايه،، امي بتمو*ت قدامي ومش عارفه اعمل حاجة،، وسط ما انا قاعدة بفكر لقيت جرس الباب بيرن،، قومت فتحت ولقيت صلاح جوز اختي،، دخل وقفل الباب وراه
حماتي عاملة ايه دلوقتي؟
= مش كويسة خالص يا صلاح،، امي مبقتش قادرة تتحرك
طب اسمعي في موضوع مهم لازم تعرفيه
= موضوع ايه؟
فاكرة المحفظة اللي وقعت من الحرامي اللي اته*جم عليكي
" قومت وقفت بسرعة
لقيته؟
= ومش بس كدا دا أنا كمان عرفت مين اللي بعته
مين
= أمجد العطار جوزك!!